GÉNESIS 25
25
Abrahamwan Ceturawan wawasniyoj kanku
1Abrahamqa ujtawan casarallarqataj, chay warmimpa sutintaj karqa Cetura. 2Abrahampa wawasnin Ceturapi karqanku: Zimran, Jocsán, Medán, Madián, Isbac, Suawan. 3Jocsampa wawasnin karqanku Sebawan, Dedanwan. Dedampa miraykunasnintaj karqanku: Asureos, letuseos, leumeos ima. 4Madiampa wawasnintaj karqanku: Efa, Efer, Hanoc, Abida, Eldawan. Kay tukuy karqanku Ceturaj miraynin. 5Abrahamtaj wawan Isaacman tukuy kapuyninta qoporqa. 6Jinamanta Abrahamqa wakin warmisnimpi wawasninman pisi imasllata jaywararqa. Chaymantaqa kausashaspallaraj Isaacmanta chay wakin wawasninta t'aqaspa inti llojsimuynejman kacharqa.
Abraham wañupun
7Abrahamqa tukuynimpi kausarqa pachaj qanchis chunka phishqayoj watasta. 8Abrahamqa wañuporqa allin wañuypi, allin machuña, ashkha watasniyojtaj. Ajinamanta ñaupa tatasninman riporqa. 9Wawasnin, Isaac, Ismaelwan p'amparqanku Macpela chhanka jusk'upi; chayqa kashan Mamremanta inti llojsimuynejpi, hitita Zoharpa wawan Efrompa jallp'ampi. 10Chay jallp'ata Abraham rantikorqa hititasmanta. Abrahamta p'amparqanku warmin Sara p'ampasqa kasharqa chaypi. 11Abraham wañupusqanmanta qhepata Dios bendicerqa Abrahampa wawan Isaacta; pay tiyakorqa, “Pichus kausaj rikuwan”, nisqa pujyoj qayllampi.
Isaacpa miraynin
12Kaykuna kanku Abrahampa wawan Ismaelpa wawasnin, pichus karqa egipcia Agarpa wawan, Saraj kamachimpata. 13-15Chaykunaqa nacesqankuman jina kanku: Ismaelpa kuraj kaj wawanqa: Nebaiot, chanta kallarqankutaj Cedar, Adbeel, Mibsam, Misma, Duma, Massa, Hadar, Tema, Jetur, Nafis, Cedemawan. 16Chaykuna kanku chunka iskayniyoj sutis Ismaelpa wawasnimpata. Jallp'asninkupis kikin sutisninkuwan sutichasqas karqanku, jinallataj toldosninkupis. Sapa ujninku kurajkunas karqanku t'aqankupikama.
17Ismaelqa pachaj qanchis chunka qanchisniyoj watasniyoj wañuporqa, jinamanta ñaupa tatasninman riporqa. 18Miraykunasnin jamorqanku tiyakoj Havilawan Shurwan tinkuykunasman; chay kashan Egiptoj chimpampi, Asiriamanta jamunapi. Chaypi tiyakorqanku wauqesninku mana munashajtinku.
Jacobwan Esauwan nacenku
19Kaykuna kanku Abrahampa allchhisnin, Isaacpa wawasnin. 20Isaacqa tawa chunka watasniyoj karqa Rebecawan casarashaspa; Rebecaqa Betuelpa wawan karqa, Labampa panantaj; paykuna arameos nisqa, paykuna tiyakorqanku Padan-arampi. 21Rebecaqa mana wawasniyoj kayta aterqachu; chayrayku Isaacqa Diosmanta wawata mañakorqa. Señortaj chay mañakusqanta uyarerqa; jinamanta Rebecaqa wijsayoj rikhurerqa. 22Rebecaj wijsampi iskay wawas karqanku; takanakorqankutaj. Chayrayku nerqa: Sichus ajinallapuni kanqa chayqa, imapajtaj kausaniri?, nispa. Chaymantaqa Señorta taporqa. 23Señortaj nerqa: Wijsaykipi iskay naciones kashan, iskay ayllus maqanakushanku manaraj naceshaspa. Ujnin kaj aswan atiyniyoj kanqa ujninmanta. Kuraj kajqa sullk'a kajpa nisqampi kanqa.
24Rebecaj wachakunan p'unchay chayamorqa; pay iskayta ujllapi wachakorqa. 25Ñaupajta nacej kajqa p'aqopacha, tukuy ukhun thapulla karqa, suticharqankutaj Esauta. 26Ujnin kajtaj nacekorqa Esaupa chaki talonninta ujnin makinwan jap'irisqa, chayrayku suticharqanku Jacobta. Isaacqa sojta chunka watasniyojña karqa, Rebeca warmin wachakushajtin.
Esaú trocarqa kuraj wawa kaspa jap'inanta
27Wawasqa wiñarqanku. Esauqa campo runa karqa, monte animalesta sumajta jap'iyta yacharqa. Jacobtaj may lat'u runa karqa, payqa jarallapipuni tiyakuyta munaj. 28Isaacqa anchata munaj mikhuyta Esaupa monte animalesta jap'isqanmanta aycha kankata, chayrayku payta astawan munakoj. Rebecataj Jacobta munakoj.
29-30Uj kuti Jacob wayk'usharqa; Esautaj monteta risqanmanta sayk'usqa chayamuspa nerqa Jacobman: Chay puka mikhuyniykimanta uj chhikata qoriway ari, yarqhaywan wañushaniña, nispa. Chayrayku payta Edonta suticharqanku.
31Jacobtaj nerqa: Kuraj wawa kaspa jap'inaykita vendeway. 32Esautaj nerqa: Qhawariy, yarqhaywan wañushaniña, ima allintaj kawanqa kuraj wawa kaspa jap'inay tiyapunawanri?
33Jacobqa nillarqapuni, kunampacha nillayña qonawaykita, nispa. Esautaj yarqhaywan mana kayta atispa, kuraj wawa kaspa jap'inanta, nerqa qopunanta Jacobman. 34Chaymantaraj Jacobqa t'antata jaywarqa, chuwismanta ruwasqa mikhunatawan. Esautaj mikhuykuspa ujyaykuspataj sayariytawan riporqa. Ajinata Esauqa kuraj kaspa jap'inanmanta mana dakorqachu.
Currently Selected:
GÉNESIS 25: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
