GÉNESIS 29
29
Jacob Harampi
1Chaymanta Jacob rillarqapuni inti llojsimuynejpi tiyakojkunaj jallp'ankuman. 2Chaynejpi rikorqa uj pujyuta, chay qayllaspitaj kinsa t'aqa ovejas puñurashajta, imaraykuchus chaymanta tukuy uywas yakuta ujyaj kanku. Chay pujyoj simintaj uj rumiwan kirpasqa karqa. 3Tukuy uywas tantakamojtinkutaj tukuy michejkuna chay rumita kirparaj kanku, yakuta uywasman ujyachinankupaj; chaymantataj kirpaykapullaj kanku chay rumiwan. 4Jacobtaj chayman qayllaykuspa michejkunata taporqa: Wauqesníy, maymanta kankichejri? Paykunataj kuticherqanku: Haranmanta kayku, nispa. 5Jacob tapullarqataj: Rejsinkichejchu Nacorpa wawan Labanta? Paykunataj: Arí, rejsiyku, nerqanku.
6Jacob tapullarqataj: Walejllachu kakushan?, nispa. Paykunataj: Arí, walejlla kakushan, nerqanku. Qhawariy jaqayqa ususin Raquel ovejasninta qhatimushan, nispa.
7Chanta Jacob nerqa: P'unchayllaraj, manaraj ovejasta wisq'ana horasrajchu. Manachu yakuta ujyaykuchiytawan michimuwajchejraj?
8Paykunataj nerqanku: Mana chayta ruwaykumanchu. Noqaykoqa suyanayku tiyan tukuynejmanta uywas tantakamunanta. Chaymantaraj tukuy michejkuna ujllapi kay pujyuta kirparasqayku, ovejasman yakuta ujyachinaykupaj.
9Paykunawan parlashanankukamataj, Raquelqa tatampa ovejasnin qhatirisqa chayamorqa, imaraykuchus payllapuni chay ovejastaqa michej. 10Jacobtaj tion Labampa ovejasninwan jamusqanta yachaytawan, pujyuman qayllaykuytawan chay rumita tanqarpayarqa, ovejasmantaj yakuta ujyaracherqa. 11Chaymantataj Jacobqa Raquelta napaykuspa, waqarikuspataj much'aykorqa. 12Raquelmantaj payqa willakorqa, Rebecaj wawan kasqanta, Labampa sobrinon. Raqueltaj kachaykukorqa imachus kasqanta tatanman willaj.
13Labantaj Jacobmanta parlajta uyariytawan, panampa wawan kasqanta yachaytawan, usqhay usqhayta kachaykukorqa taripaj. Taripaytawantaj ujllaykuspa much'aykorqa, jinaspataj wasinman pusarqa. Chaypi Jacobqa willarqa tukuy ima kausayninkupi kasqanmanta. 14Labantaj nerqa: Cheqamanta qanqa kikin yawarniymanta, kikin tulluymantataj kanki.
Jacob llank'an Raquelrayku Learaykutaj
Jacobqa uj killata Labanwan tiyakorqa. 15Chay qhepamantaj Labanqa nerqa: Qanqa mana qhasillamanta llank'awajchu aylluy kasqaykirayku. Niway mashkhatachus pagasunayta.
16Labanqa iskay warmi wawasniyoj karqa: Kuraj kajqa Lea, sullk'a kajtaj Raquel karqa. 17Leaj ñawisnenqa mana as allinchu karqa; Raqueltaj may k'achita karqa. 18Jacobqa Raquelta munapayarqa, chayrayku nerqa: Sullk'a wawayki Raquelrayku qanchis watata llank'apusqayki, nispa.
19Labantaj kuticherqa: Arí, allin kanman qanman qopunay, waj runaman qonaytaqa. Jina kajtenqa noqawan tiyakunallaña.
20Jinamanta Jacobqa Labampaj llank'aporqa qanchis watata Raquel ususinrayku; jinapis paymanqa rijch'arqa pisi tiempo, imaraykuchus anchata munakorqa. 21Qanchis wata junt'akojtintaj, Jacobqa Labanman nerqa: Kunanqa qopullawayña ususiykita casarakunaypaj, ñapis junt'aykiña qanchis watata llank'apusqayki nisusqayta payrayku.
22Labantaj tukuy chay llajtayoj runasta wajyacherqa casamientota ruwachinampaj. 23Ch'isintaj Labanqa Jacobman entregarqa Leata, Jacobtaj paywan puñorqa. 24Jinaspataj Labanqa uj kamachintawan qorqa, Leaj kamachin kanampaj, sutintaj Zilpa karqa.
25Jacobtaj q'ayantinraj reparakorqa Leallawan puñusqanta; chayraykutaj Labanman nerqa: Imatataj kayta ruwawankiri? Manachu Raquelrayku llank'aporqayki? Imaraykutaj kay jinata ch'aukiyawankiri?
26Labantaj kuticherqa: Kaypeqa mana usuchu sullk'a kajraj casaranan, ñaupajtaqa kuraj kajraj casaranan tiyan, chaymantaraj sullk'aqa. 27Leawan casarasqayki semanataraj junt'ay, chaymanta Raqueltapis entregallasqaykutaj, sichus qan uj qanchis watatawan noqawan llank'anki chayqa.
28Jacobqa nerqa uj jinatawan llank'ananta. Leawan casarasqanku semanata junt'ajtintaj Labanqa Raqueltañataj warmimpaj entregarqa. 29Labanqa Raquelman qollarqataj uj kamachinta Raquelta yanapanampaj, sutintaj karqa Bilha. 30Ajinamanta Jacobqa casarallarqataj Raquelwan, payta munakorqa astawan Leamanta nisqaqa. Jinamanta Labampaj qanchis watatawan llank'aporqa.
Jacobpa wawasnin
31Señor rikorqa Jacobqa Leata mana munakusqanta, chayrayku nerqa Lea wawasniyoj kananta, Raqueltaj mana wawasniyoj.
32Leaqa wijsayoj rikhurerqa Jacobpaj, nacejtintaj suticharqa Rubenta, Señor rikuwan llakisqa kasqayta. Chayrayku qosayqa kunan munakuwanqapuni, nispa.
33Chaymanta qhepata Leaqa wawayojllataj karqa, Chaytaqa suticharqa Simeonta, Señorniy yachan chejnisqa kasqayta, chayrayku uj wawatawan qowan, nispa.
34Chay qhepata Leaqa wawayojllataj karqa, chaytataj suticharqa Levita. Kunan qosayqa noqamampuni k'askakamuwanqa astawan, ñapis kinsa wawastaña paypaj rejsini, nispa.
35Aswan qhepaman Leaqa wawayojllataj karqa, suticharqataj Judata. Chaymantataj nerqa: Kunanqa Señorta yupaychasaj, nispa. Chaymantaqa alqarqa wawayoj kayta.
Currently Selected:
GÉNESIS 29: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
