GÉNESIS 8
8
Jatun muspha paraj tukukuynin
1Dios yuyarikorqa Noemanta, paywan khuska tukuy animales arcapi kajkunamantawan. Chaymanta wayrachimorqa, chaytaj yakuta ch'akiykucherqa. 2Yuyay chinkay ukhu qochataj manaña phullchimorqachu, jinallataj janaj pachamanta t'ojyaspa phullchimoj yakupis. Parapis thañiporqa. 3Yakoqa pisimanta pisi ch'akikaporqa. Pachaj phishqa chunkayoj diamanta astawan yakoqa ch'akiykorqa. 4Chunka qanchisniyoj p'unchaypi, qanchis kaj killapi arcaqa tiyaykorqa Ararat nisqa orqo pataman. 5Yakoqa astawanñapuni ch'akiykusharqa. Chunka kaj killaj ñaupaj kaj diampi ñapis rikukorqankuña aswan alto kaj orqospa puntasnin.
6Tawa chunka p'unchaymanta, Noeqa arca ruwasqan ventananta kicharikamorqa. 7Kacharerqataj jatun yana q'arqañata. Chaytaj kayman jaqayman phawaykacharqa ch'aki jallp'ata mask'aspa, nitaj ni mayman tiyaykuyta atispa kutimpullarqataj. 8Chayta Noeqa uj palomantañataj kacharerqa jallp'a rikhurinñachus manarajchus chayta yachanampaj. 9Palomaqa kutirimpullarqataj arcaman; imaraykuchus manarajpuni jallp'ata tarerqachu chayman tiyaykunampaj, jallp'aqa yakuwan p'ampasqallaraj karqa. Noetaj makinta jaywarqorqa ventanamanta, palomataj makinman tiyaykorqa, paytaj arca ukhuman apaykorqa.
10Noeqa suyakorqa qanchis diatawan, chaymanta ujtawan phawachillarqataj palomata. 11Palomataj ña chharpuykushajtinña Noeman kutimporqa, uj q'omer olivo laqhe achurisqa. Ajinamanta Noeqa yacharqa yakoqa ch'akiykushasqantaña. 12Chaymanta qanchis diatawanraj suyallarqataj. Chaymantaraj palomata ujtawan phawachillarqataj, palomari manaña chay kutipi Noeman kutimporqachu.
13Chaypacha Noeqa sojta pachaj ujniyoj watasniyojña karqa, yakutaj tukuynin ch'akiykaporqa. Chaypacha karqa ñaupaj kaj día ñaupaj kaj killapi. Noeqa arcaj patanta qhatararqa; qhawarejtintaj jallp'aqa ch'akiña karqa. 14Iskay chunka qanchisniyoj diapi iskay kaj killapi jallp'aqa sumaj ch'akiñapuni karqa.
15-16Chaymanta Dios nerqa Noeman: Arcamanta llojsillayña, warmiykiwan, wawasniykiwan, qhachunisniykiwan ima. 17Jinallataj qanwan khuska kaj animalestapis jawaman kicharillayña: P'isqosta, uywasta, pampata qhatatakojkunata ima; jallp'aman tukuynejman rispa miranankupaj, kay mundoman junt'anankukama, nispa.
18Chaymanta Noeqa llojserqa arcamanta warminwan, wawasninwan, qhachunisninwan ima. 19Jinallataj llojserqanku tukuy uywas, monte animales, pampata qhatatakojkuna, tukuy lijrayoj animales ima. 20Noetaj uj altarta Señorpaj ruwarqa, chaypitaj Diospaj uj rikuchikuta ruphacherqa, mikhuna uywasta, phawajkunata ima sapa ujmanta ujtakama ajllaspa. 21Chay q'apaytaj Diospaj may sumajpuni karqa munasqanman jina, nerqataj sonqompi: Kunanqa manaña jallp'ata jasut'isajchu runaj juchanrayku. Imaraykuchus runaqa waynamantapacha mana allin kajllatachu yuyan. Nillataj kausajkunatapis tukuchisajchu kunampi jina. 22Jallp'a kanankama kallanqapuni chajras, cosechas; kallanqataj q'oñi, chiri, q'omer tiempo, chirawi tiempo; chantaqa p'unchay, tutapis.
Currently Selected:
GÉNESIS 8: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
