SAN JUAN 16
16
1Kay imasta nerqaykichej ama misk'anaykichejpaj. 2Sinagogasmanta wijch'usonqanku; hora qayllamushanña maypachachus pillapis qankunata wañuchispa yuyanqa Diospaj allinta ruwashasqanta. 3Chayta ruwanqanku, imaraykuchus Dios Tatata, noqatapis mana rejsiwaykuchu. 4Chay imasta nerqaykichej, chay hora chayamojtin yuyarikunaykichejpaj imastachus nisqaymanta.
Santo Espíritoj ruwaynin
Qallariypeqa kay imasta mana nerqaykichejchu, imaraykuchus qankunawan kasharqani. 5Kunantaj rishani kachamuwajniyman; manataj mayqenniykichejpis tapuwankichejchu: Maymantaj rishanki?, nispa. 6Astawanqa kay imasta nisqayrayku, sonqoykichejman llakiy junt'aykun. 7Noqataj cheqata niykichej: Qankunapaj allin kanqa noqa rinayqa, imaraykuchus mana riyman chayqa, sonqochaj Espíritu mana jamunmanchu qankunaman. Ripusaj chayqa, payta kachamusqaykichej. 8Pay jamuspaqa mundopi kaj runasta juzganqa juchamanta, cheqa kajmanta, juiciomantawan. 9Juchamanta, imaraykuchus juchayoj kanku noqapi mana creesqankurayku. 10Cheqa kajmanta, imaraykuchus Tatayman ripushani, manañataj qankuna ujtawan rikuwankichejchu. 11Juiciomanta, imaraykuchus kay pachapi kamachejqa juchachasqaña.
12Ashkha imastawanraj qankunaman ninay tiyan, manataj chaykunata unanchayta atiwajchejchu kunanqa. 13Chay cheqa Espíritu chayamojtin, pay cheqa kajman pusasonqachej; imaraykuchus mana payllamantachu parlanqa, astawanqa Dios Tatamanta tukuy uyarisqanta nenqa. Qankunamantaj willasonqachej imaschus qhepata jamunankuta. 14Paytaj jatunchawanqa, imaraykuchus noqajmanta jap'enqa, yachachisonqachejtaj. 15Tukuy ima Tataypata kajqa noqajllatataj; chayrayku noqajmanta jap'enqa nerqani, qankunamantaj yachachisonqachej.
16Uj chhikamanta manaña rikuwankichejchu; uj chhikamantataj, watejmanta rikullawankichejtaj; imaraykuchus Dios Tataman rishani.
Phutikoyqa kusiyman tukun
17Chaypacha wakin yachachisqasnin tapunakorqanku: Imatataj niyta munawanchej: Uj chhikamanta mana rikuwankichejchu; uj chhikamantataj ujtawan rikuwankichej, imaraykuchus Tataypaman rishani, nispari? 18Ima niytataj munan uj chhikamantawan nispari? Mana unanchayta atinchejchu imatachus nisqanta.
19Jesustaj yachaspa tapukuyta munasqankuta, paykunaman nerqa: Uj chhikamantawan manaña rikuwankichejchu; uj chhikamantataj ujtawan rikullawankichejtaj, nisqayraykuchu, tapunakushankichej? 20Cheqamanta, cheqamanta niykichej: Waqankichej, llakikunkichejtaj; kay mundopi runastaj kusikonqanku. Chaywampis llakiyniykichejqa kusikuyman tukonqa. 21Onqoj warmeqa, wachakunan p'unchay chayamojtin llakikun; imaraykuchus horan chayamun; wawata wachakuytawantaj chay nanaymanta qonqapun, kusikuywan kay mundopi wawata nacichikusqanrayku. 22Ajinata qankunapis kunan llakikushankichej. Uj kutitawan rikusqaykichej, sonqoykichejtaj kusikonqa; manataj pipis chay kusiyta qankunamanta qhechuyta atenqachu.
23Chay p'unchaypitaj mana imata tapuwankichejchu. Cheqamanta, cheqamanta niykichej: Dios Tataqa, tukuy imata sutiypi mañakojtiykichejqa qosonqachej. 24Kunankama mana imatapis sutiypi mañakorqankichejchu; kunanqa mañakuychej, jap'inkichejtaj, kusikuyniykichej junt'asqa kanampaj.
Jesucristo mundota atipan
25Kay tukuy imasta rijch'anachina palabraswan parlarqaykichej. Hora qayllamushanña, chaypachataj mana rijch'anachinaswan chu parlasqaykichej, astawanqa, sut'ita Dios Tatamanta willasqaykichej. 26Jaqay p'unchaypeqa sutiypi mañakunkichej; manataj niykichejchu Dios Tatamanta mañapusqaykichej, nispa. 27Kikin Dios Tata munakusunkichej, qankuna noqata munakuwasqaykichejrayku, creenkichejtaj Dios Tatamanta jamusqayta. 28Dios Tatajmanta llojsimorqani, mundomantaj jamorqani; kunantaj mundota saqespa Dios Tatajman kutishani.
29Yachachisqasnin nerqanku: Kunan sut'ita parlanki, manataj rijch'anachina palabraswanchu. 30Kunanqa yachayku tukuy imata yachasqaykita, manataj pipis imata tapusunan kanchu; chayrayku creeyku Dios Tatamanta jamusqaykita.
31Jesustaj paykunaman kuticherqa: Kunanqa creenkichejchu?, nispa. 32Kayqa hora chayamushanña, chayamunñapis, chaypachataj ch'eqerasqas kankichej; sapa ujpis munasqaykichejman jina ripunkichej, noqata sapayta saqerparispa; manataj sapaychu kashani, imaraykuchus Tatay noqawan kashan. 33Kay tukuy imasta niykichej, noqapi sonqo tiyasqas kanaykichejpaj. Mundopeqa ñak'arinaykichej tiyan; chaywampis sonqochakuychej, imaraykuchus mundota noqa atipaniña.
Currently Selected:
SAN JUAN 16: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
