SAN JUAN 2

Caná llajtapi casaraku

1Kinsa p'unchayninmantaj, casamiento karqa Galilea Caná llajtapi; Jesuspa mamantaj chaypi kasharqa. 2Jesús yachachisqasninwan chay casamientoman wajyasqas karqanku. 3Vino pisiyajtintaj, Jesuspa maman payman nerqa: Vinonku mana kanñachu.

4Jesustaj nerqa: Warmi, ima ruwananchej tiyan noqanchej chaymanta? Manaraj horay chayamunchu.

5Mamantaj kamachisman nerqa: Tukuy ima nisqanta ruwaychej.

6Sojta jatuchaj rumi p'uyñus, chaypi wakichisqas kasharqa, judiospa llimphuchakunankuman jina, sapa p'uyñutaj iskay, chayrí kinsa yuru jich'ay jina karqa. 7Jesustaj kamachisman nerqa: Kay p'uyñusman yakuta junt'arachiychej, nispa.

Paykunataj junt'aracherqanku. 8Chantá, Jesús nerqa: Kunanqa wiserqospa kuraj kamachiman rikuchimuychej; paykunataj aparqanku.

9-10Kuraj kamachitaj, yakumanta ruwasqa vinota llamirispa, mana yacharqachu maymantachus apamusqankuta. Kamachisqa yacharqanku yakullata wisisqankuta. Kuraj kamachitaj casarakojta wajyarqa. Nerqataj: Mayqen runallapis sumaj vinotaqa ñaupajtapuni jaywan; casarakuman wajyasqas, allin ujyarasqaña kashajtinkutaj, mana walej vinota jaywan. Qanrí, kay qhepakama sumaj vinota waqaychasqanki.

11Jesús kay milagrosta ruwayta qallarerqa Galilea Caná llajtapi. Ajinamanta atiynimpa lliphipiyninta rikucherqa; yachachisqasnintaj paypi creerqanku.

12Chaymantá Jesús uraykorqa Capernaumman, maman, wauqesnin, yachachisqasnintin ima. Chaypitaj mana unaytachu karqanku.

Jesús llimphuchan templota

[Mt 21.12-13; Mr 11.15-18; Lc 19.45-46]

13Judiospa Pascuanman qayllaña kasharqa. Jesustaj Jerusalenman wicharerqa. 14Templopitaj tariparqa wakasta, ovejasta, palomasta ima qhatushajkunata; qolqeta trocajkunatataj tiyashajta. 15Jesustaj lazomanta chicoteta ruwaspa, tukuyninkuta templomanta qharqorqa; jinallatataj ovejasta, wakastapis. Trocajkunaj qolqesninkuta pampaman qhallarpayarqa; mesasninkutataj tijrararqa. 16Palomasta qhatojkunamantaj nerqa: Kaykunata orqhoychej kaymanta. Tataypa wasintaqa ama qhatuna wasiman tukuchiychejchu.

17Chaypacha yachachisqasnin yuyarikorqanku escribisqa kasqanta: Tatáy, wasiykej sinch'i munakuynin tukuchiwan.

18Judiostaj kuticherqanku: Ima señalestataj qhawachiwasqayku, kay imasta ruwaspari?

19Jesustaj paykunaman kuticherqa: Kay templota urmachiychej, kinsa p'unchaymantataj sayarichisaj.

20Chantá, judiostaj nerqanku: Kay temploqa, tawa chunka sojtayoj watapi ruwasqa karqa; qanrí kinsa diallapichu sayarichinki?

21Jesustaj, kikin cuerponta templo kasqanta nerqa. 22Chay nisqanta yachachisqasnin yuyarikorqanku, Jesús wañusqasmanta kausarimorqaña chaypacha. Escrituratataj creerqanku, jinallataj Jesuspa parlasqantapis.

Jesusqa tukuyta rejsin

23Pascua p'unchaykunapi Jerusalempi Jesús kashajtin, ashkhas sutimpi creerqanku, milagrosta ruwasqanta rikuspa. 24Astawanqa Jesús paykunapi mana confiarqachu, imaraykuchus tukuyninkuta rejserqa. 25Manataj karqachu runamanta imatapis payman willana; payqa yachallarqa imachus runapi kasqanta.

Currently Selected:

SAN JUAN 2: QCHSB

Highlight

Copy