SAN JUAN 21

Jesús rikhurin qanchis yachachisqasninman

1Chay qhepata, Jesús ujtawan yachachisqasninman rikhurerqa, Tiberias qocha qayllapi; ajinamanta pay rejsichikorqa. 2Chay yachachisqastaj tantasqas kasharqanku: Simón Pedro, Tomás, mellizo nisqa, Galileapi kaj Canamanta Natanael, Zebedeoj churisnin, waj iskay yachachisqaswan ima. 3Simón Pedro paykunaman nerqa: Challwasta jap'imusaj.

Paykunataj nerqanku: Noqaykupis qanwan risqayku, nispa. Rispataj uj boteman wicharerqanku; chay tutantintaj mana uj challwatapis jap'erqankuchu. 4Sut'iyashajtinña Jesús qocha qayllapi rikhurerqa; yachachisqasnintaj mana yacharqankuchu pay Jesús kasqanta. 5Jesustaj paykunaman nerqa: Waynas, imallapis kapusunkichejchu mikhunapaj?

Paykunataj nerqanku: Mana kapuwaykuchu.

6Jesús nillarqataj paykunaman: Ch'ipata botej pañannejman choqaykuychej, chaypi jap'inkichej.

Jinatataj choqarqanku. Chantá ch'ipata orqhoyta mana aterqankuchu, ashkha challwaswan junt'a kasqanrayku. 7Chaypacha, Jesuspa munakusqan yachachisqaqa, Pedroman nerqa: Señorqa, nispa.

Simón Pedrotaj, Señor kasqanta uyarispa, pata p'achanta churaykukorqa, imaraykuchus q'alalla kasharqa; qochamantaj phinkiykorqa. 8Wakin yachachisqastaj botepi jamorqanku, ch'ipa junt'a challwasta apamuspa, imaraykuchus ch'aki jallp'amanqa pachaj metros jinallaña kasharqa. 9Jallp'aman uraykuspataj, rikorqanku nina brasasta; chay patapitaj uj challwata, t'antatawan churasqata. 10Jesustaj paykunaman nerqa: Wakin challwasta apamuychej, kunan jap'isqaykichejmanta.

11Simón Pedro boteman wicharispa, jallp'aman ch'ipata orqhorqa, jatuchaj challwaswan junt'ata. Chaypitaj pachaj phishqa chunka kinsayoj challwas karqanku. Chay jina challwaswampis, ch'ipaqa mana llik'ikorqachu. 12Jesustaj yachachisqasman nerqa: Jamuychej mikhurikuychej.

Manataj mayqenninkupis taporqankuchu: Pitaj kanki?, nispa. Yachasqanku Señorpuni kasqanta. 13Jesustaj paykunaman qayllaytawan, t'antata oqharispa jaywarqa, jinallatataj challwatapis.

14Kaywantaj kinsa kutiña karqa, Jesús wañusqasmanta kausarimuspa, yachachisqasninman rikhurisqan.

Jesús parlan Simón Pedroman

15Mikhuyta tukusqankutawan, Jesús nerqa Simón Pedroman: Simón, Jonaspa churin, munakuwankichu paykunamanta astawan?

Pedrotaj kuticherqa: Arí Señor, yachanki munakususqayta.

Jesustaj nerqa: Corderosniyta michipuway.

16Jesús ujtawan Pedroman nerqa: Simón, Jonaspa churin, munakuwankichu?

Pedrotaj kuticherqa: Arí Señor, qan yachanki munakususqayta.

Jesús nillarqataj: Ovejasniyta michipuway.

17Kinsa kaj kutipi nillarqataj: Simón, Jonaspa churin, munakuwankichu?

Pedrotaj llakikorqa, kinsa kutikama munakuwankichu?, nisqanmanta. Kuticherqataj: Señor, qan tukuy imata yachanki, munakususqaytapis yachanki.

Jesustaj payman nerqa: Ovejasniyta michipuway. 18Cheqamanta, cheqamanta niyki: Waynallaraj kashaspaqa, chumpillikoj kanki, munayniykiman jinataj purej kanki; machuña kaspataj makisniykita aysarinki, wajtaj chumpichisunki, maymanchus mana munasqaykimantaj pusasonqa.

19Chayta nerqa yachachiyta munaspa ima wañuywanchus Pedroqa Diosta yupaychanan kasqanta. Chayta niytawantaj, qhepayta jamuy, nerqa.

Jesuspa munakusqan yachachisqa

20Pedro qhepaman kutirikuspa rikorqa Jesuspa munakusqan yachachisqa jamushajta. Payllataj cenapi Jesusman atiykukuspa nerqa: Pitaj jap'ichisonqa? 21Pedrotaj chay yachachisqata rikuytawan Jesusman nerqa: Señor, imataj kanqa paymantari?

22Jesús kuticherqa: Sichus munani kutimunaykama pay qhepakunanta chayqa, ima dakusunki qanmanri? Qanqa qhepayta jamuy, nispa.

23Chay nisqata hermanos ukhupi willakorqa jaqay yachachisqa mana wañunan kasqanta. Jesustaj mana imatapis nerqachu, mana wañonqachu nispa. Astawanqa nerqa: Sichus kutimunaykama pay qhepakunanta munani chayqa, imá dakusunki qanmanri?

24Kay yachachisqa chay imasta willarqa, escriberqataj. Yachanchejtaj willasqasnenqa cheqapuni kasqanta.

25Jesuspa ruwasqasnintaj aswan ashkharaj tiyan. Chaykunachus ujmanta uj escribikunman chayqa, yuyani mundontimpipis mana campo kanmanchu, chay escribisqa librosta churanapaj. Amén.

Currently Selected:

SAN JUAN 21: QCHSB

Highlight

Copy