SAN LUCAS 1

Qallarikuynin

1-2Ashkhasña munarqanku escribiyta, imaschus noqanchej ukhupi allin rejsisqas karqa chaykunamanta; ñaupajmantapacha rikojkuna willawasqanchejman jina, pikunachus Diospa palabranta predicarqanku. 3-4Noqamampis rijch'awarqa, kay tukuy imasta allinta entiendespa escribisunayqa, imaschus qallariymantapacha kasqanta, may respetasqa Teófilo; aswan allinta yachanaykipaj, imastachus yachachisorqanku chay cheqa kajta.

Juan Bautistaj nacikusqanmanta

5Herodes Judeapi kamachishajtin, uj sacerdote karqa Zacarías sutiyoj, Abiaspa mit'anmanta; warmintaj Isabel sutiyoj, Aarompa ayllunmanta. 6Qhari warmi karqanku llimphu kausayniyoj runas Diospa ñaupaqempi; Señorpa nisqanman jina kausakuspa, ni pejpa ima ninan. 7Mana wawayoj karqanku, Isabel mana wachakoj kasqanrayku; iskayninkutaj machusña karqanku.

8-9Jinallapi, Zacarías mit'ampi Diosta sirvishajtin, usunkuman jina, sorteopi Zacariasman chayarqa, Señorman inciensota q'osñichina. 10Pay inciensota q'osñichinankamataj, runasqa jawapi Diosmanta mañakusharqanku. 11Jinallapi, Zacariasman rikhurerqa Señorpa angelnin sayashaj, incienso altarpa pañannejpi. 12Angelta rikuspataj Zacariasqa, pawichikuspa mancharerqa. 13Chantá angeltaj payman nerqa: Ama mancharikuychu Zacarías. Mañakusqaykita Dios uyarinña, warmiyki Isabel wawayoj kanqa, paytataj Juanta sutichanki. 14Ancha kusiypuni qampaj kanqa, jinallataj wajkunapajpis wawayki nacikusqanmanta. 15Payqa jatun kanqa Señorpa ñaupaqempi. Manataj vinota, nitaj ima machachej ujyanasta ujyanqachu. Mamampa wijsanmantapacha Santo Espirituwan junt'a kanqa. 16Ashkha israelitasta kutirichenqa Señor Diosninkuman. 17Señorpa ñaupaqempi purenqa, profeta Eliaspa espiritunwan, atiywan ima; tatasta wawasninkuwan allinyachispa, mana kasukojkuna kasukuyta yachanankupaj. Ajinata, runasta allinta wakichenqa Señorta recibinankupaj.

18Zacariasqa angelta taporqa: Imaynatataj chantá kayta yachasaj? Noqaqa machuña kani, warmiypis payaña.

19Angeltaj kuticherqa: Noqa Gabriel kani, Diospa kamachimpi; pay kachamuwan willasunaypaj kay sumaj noticiasta. 20Nisusqayta mana creesqaykiraykutaj opayanki, mana parlarinkichu wawayki nacikunankama. Ajinata kay tukuynin junt'akonqa maychus kasqanman jina.

21Chaykamataj runasqa jawapi Zacariasta maytapuni suyasharqanku, anchata templo ukhupi qhepakusqanrayku. 22Llojsimuspataj Zacariasqa mana parlayta aterqachu; paykunataj, imachá payman rikhurin santuariopi, nisharqanku. Zacariastaj, señasllawanña parlasharqa opayasqanrayku.

23Mit'an templopi junt'akojtintaj kutiporqa wasinman. 24-25Qhepamantaj Isabel warmenqa wijsallikorqa. Phishqa killa junt'atataj mana wasinmanta llojserqachu, nispa: Señor ruwan kaytaqa, ama runa sajrata qhawanawampaj.

Jesús nacikusqanmanta

26-27Sojta killanmantaj, Dios kachamorqa ángel Gabrielta, Galileapi Nazaret llajtaman, manaraj qharita rejsej María sutiyojman; pichus casaranampaj parlapayasqa karqa, José sutiyoj, Rey Davidpa ayllunmanta kaj qhariwan. 28Maypichus María kasharqa chayman yaykuspataj, angelqa payta napaykorqa: Qampi Diospa khuyakuynin! Señor qanwan kashan. [Tukuy warmismanta aswan bendicisqa kanki.]

29Angelpa nisqanta uyarispataj t'ukorqa, imatachus niyta munasqanta chay napaykusqan. 30Chaymantataj angelqa nerqa: Ama mancharikuychu María. Qanqa Diospa khuyakuyninta tarinki. 31Kunanqa wijsayoj rikhurinki. Nacichikunki uj qhari wawata, Jesustataj sutichanki. 32Payqa jatun kanqa, sutichasqataj kanqa patapi kajpa Churin; Señor Diostaj, tatan Davidpa reinonta payman qonqa. 33Payqa wiñaypaj israelitasta kamachenqa, mana jayk'aj tukukuyniyoj reinompi.

34Chaymantataj Mariaqa angelta taporqa: Chantá imaynataj kay kanqa? Noqaqa qharita mana rejsinichu.

35Angeltaj kuticherqa: Santa Espíritu qanman jamonqa, Diospa atiynintaj llanthusonqa; nacej wawaqa ajllasqa sutichasqa kanqa Diospa Churin. 36Jinallataj aylluykimanta Isabelpis, paya kashaspaña, qhari wawayoj kanqa, mana wawayoj nisqapis, sojta killa wijsayojña. 37Diospajqa mana imapis mana atikojqa kanchu.

38Chaypacha María nerqa: Noqaqa Señorpa kamachin kani. Diospa munaynin ruwasqa kachun noqapi nisqaykiman jina.

Angeltaj ñaupaqenmanta riporqa.

María watukun Isabelta

39Chaypachataj Mariaqa rerqa usqhayllata Judea jallp'api uj llajtaman. 40Zacariaspa wasinman yaykuspataj, Isabelta napaykorqa. 41Maríaj napaykusqanta Isabel uyarejtintaj, wawaqa wijsan ukhupi kuyurerqa. Isabeltaj Santo Espirituwan junt'a karqa. 42Qhaparispataj nerqa: Bendicisqa kanki warmis ukhupi, wijsaykipi kaj wawapis bendicisqallataj. 43Ima niytataj kay munan, Señorniypa maman watukunawampajri? 44Napaykuwasqaykita uyarisqaytawan, wawaqa wijsay ukhupi kusiywan kuyurin. 45May kusiyniyoj kanki creesqaykirayku. Señorpa nisusqanqa junt'akonqapuni.

46Mariataj nerqa: Almayqa jatunchan Señorta. 47Espirituytaj mayta kusikorqa Salvawaj Diosniypi. 48Diosqa, warmi kamachimpa wajcha kayninta qhawarqa. Chayrayku kunanmantapacha tukuy runaj miraynin noqata kusikuyniyoj kanki niwanqanku. 49Tukuy Atiyniyoj Diosqa, jatun imasta noqapaj ruwarqa; sutenqa Santo. 50Diospa khuyakuynenqa miraymanta mirayman, payta manchachikojkunapaj. 51Makinwantaj atiyninta rikucherqa; ch'eqeracherqataj tukuy jatunchakojkunata sonqonkupi yuyayninkupi ima. 52Atiyniyojkunata uraykucherqa tronosninkumanta; llamp'u sonqoyoj runastataj oqharerqa. 53Yarqhasqa runasta allin imaswan atipacherqa. Qhapaj runastataj mana imayojta kachaporqa. 54-55Diosqa, khuyakuyninmanta yuyarikuspa, kamachin Israelta yanaparqa; ñaupa tatasninchejman wiñaypaj parlasqanman jina, Abrahamman, tukuy paypa mirayninman ima.

56Mariataj, kinsa killata jina, Isabelwan kakorqa. Chaymantataj wasinman kutiporqa.

Juan Bautistaj nacikusqan

57Isabelqa nacichikunan junt'akojtin, qhari wawata nacichikorqa. 58Kausaqesnin, ayllusnin ima, Señor sumajta Isabelta khuyasqanta uyarispa, paywan kusikorqanku. 59Pusaj p'unchayninmantaj, jamorqanku wawata circuncidaj, suticharqankutaj tatan Zacariaspa sutinwan. 60Mamantaj nerqa: Mana. Wawaj sutenqa Juan kanqa.

61Paymantaj nerqanku: Mana pipis aylluykipi chay sutiyojqa kanchu.

62Tatantataj señaswan taporqanku ima sutiwanchus sutichayta munasqanta. 63Zacariastaj, tablillata mañakuspa, chaypi escriberqa: Juan sutenqa, nispa. Tukuyninkutaj t'ukorqanku. 64Chay kikimpachataj Zacariaspa simin kicharikorqa, qallumpis phaskakaporqa; parlaspataj Diosta yupaycharqa. 65Tukuy chay qayllapi tiyakojkuna mancharikorqanku. Runastaj tukuy Judea lomaspi, kay tukuy imasta willararqanku. 66Tukuy uyarisqankutataj, sonqonkupi waqaychaspa, ninakorqanku: Chantá imapunitaj kanqa kay wawari? Señorpa atiynin paywan karqa.

Zacariaspa takiynin

67-68Tatan Zacariastaj Santo Espirituwan junt'asqa karqa. Sut'incharqataj kay jinata: Yupaychasqa kachun Israelpa Señor Diosnenqa, imaraykuchus ayllunta watukorqa, juchasninmantataj salvarqa. 69-71Noqanchejpaj atiyniyoj Salvadorta oqharerqa, kamachin Davidpa ayllunmanta; imaynatachus ñaupajmanta Dios parlasqanman jina, ajllasqa profetasnimpa siminnejta; enemigosninchejmanta salvanawanchejpaj, tukuy chejniwajninchejpa makisninmantawan. 72Dios khuyarqa, tatasninchejta yuyarikuspa, sumaj tratonta paykunawan ruwasqanmanta. 73-75Abraham tatanchejmantaj juraspa nerqa qonawanchejta; enemigosninchejmanta salvasqas kaspa, mana manchachikuspa, Diospa munayninta ruwananchejpaj; mana juchayoj, cheqan kausaypi, paypa ñaupaqempi kausananchejkama. 76Qanri wawáy, jatun Diospa profetan sutichasqa kanki. Señorpa ñaupaqenta rinki, purinasninta wakichispa. 77Ayllunmantaj salvacionta rejsichinki, juchasninku pampachasqas kanankupaj. 78Diosninchejqa, khuyakoj sonqonrayku, patamantapacha k'anchamuspa watukuwarqanchej. 79Jamorqa laqhapi tiyakojkunata k'anchanampaj, wañuy llanthupi kajkunatapis; purinasninchejta cheqanchaspa, sonqo tiyakuyta qonawanchejpaj. 80Wawaqa wiñasharqa, kallpachakusharqataj espiritupi. Payqa ch'innejpi tiyakorqa Israel aylluman rikuchikunankama.

Currently Selected:

SAN LUCAS 1: QCHSB

Highlight

Copy