SAN LUCAS 5

Ashkha challwasta jap'inku

(Mt 4.18-22; Mr 1.16-20)

1Jesús uj kuti Genesaret qocha cantopi kashajtin, maytapuni runas payman k'iskikamorqanku. Diospa palabranta uyarinankupaj. 2Chaypi rikorqa iskay botesta. Challwiristaj botesninkumanta llojsispa challwa jap'ina ch'ipasta t'ajsasharqanku. 3Jesusqa Simompa botenman yaykuspa, mañarqa ithirichinanta aswan qocha ukhunejman; chay botepi tiyaykukuspataj, chaymanta yachacherqa ashkha runasman. 4Parlayta tukuspataj Simonman nerqa: Apay boteykita aswan chaupiman, chantá wijch'uykuychej ch'ipasniykichejta challwata jap'inaykichejpaj.

5Simontaj kutichispa nerqa: Maestro, tukuy tutantin llank'ayku, nitaj uj challwallatapis jap'ikuychu; chaywampis, palabraykiman jina ujtawan wijch'uykusaj ch'ipata.

6Ajinata ruwaspataj, may chhika challwata jap'erqanku, ch'ipasninkupis llik'ikunayasharqaña. 7Waj botepi challwiri masisninkutataj wajyarqanku, jamuspa yanapanankupaj. Jamuspataj iskaynin botesman junt'acherqanku; chay jawataj botesqa chinkaykoj jinaña kasharqanku. 8Chayta rikuspa Simón Pedroqa, Jesusman qonqoriykukuspa nerqa: Señor ithirikuy noqamanta, imaraykuchus juchasapa runa kani, nispa.

9Ashkha challwata jap'isqankurayku, Pedroqa mayta t'ukorqa, jinallatataj paywan kajkunapis. 10Kikillantataj Zebedeoj churisnin Santiagowan, Juanwan t'ukorqanku; paykunaqa Pedroj challwiri masisnin karqanku. Jesustaj Simonman nerqa: Ama mancharikuychu, kunanmantaqa runastañataj challwata jina jap'inki.

11Paykunataj botesta qocha cantoman aysaspa, tukuy imatataj saqerparispa Jesuswan rerqanku.

Jesús thañichin lepra onqoyniyojta

(Mt 8.1-4; Mr 1.40-45)

12Uj llajtapi Jesús kashajtin, chaypi uj runa leprawan onqosqa kasharqa; paytaj Jesusta rikuytawan qonqoriykukuspa k'umuykorqa pampakama, mañakorqataj: Señor, munanki chayqa, atinki llimphuchawayta, nispa.

13Jesustaj makisninwan llankharispa nerqa: Arí munani, llimphuchasqa kay. Onqosqa runataj chay kikimpacha lepranmanta thañikaporqa. 14Jesustaj nerqa: Ama ni piman willankichu; sacerdotellaman qhawachikoj riy; llimphuchasqa kasqaykimantataj ofrendata qoy, Moisespa kamachisqanman jina; chaywantaj thañisqaña kasqayki yachakunampaj.

15Jesusmanta willaykunastaj astawan astawan uyarikorqa; may ashkha runastaj jamorqanku uyarej, onqoykunasninkumanta thañikapuyta munaspa. 16Chaywampis Jesusqa ch'inkunaman rej Diosmanta mañakoj.

Jesús thañichin tunuyasqa runata

(Mt 9.18; Mr 2.1-12)

17Uj kuti, Jesús yachachinankama, wakin fariseos leymanta yachachejkunawan chaypi tiyasharqanku. Paykunaqa jamusqanku tukuynin Galilea ranchosmanta, Judeamanta, Jerusalenmanta ima. Señorpa atiynintaj Jesuswan karqa onqosqasta thañichinampaj. 18Wakin runastaj phullupi wantumorqanku uj tunuyasqa runata. Chay runatataj wasi ukhuman pusaykuyta munarqanku Jesuspa ñaupaqenman. 19Manataj ni maynejta yaykuyta aterqankuchu, ashkha runa k'iskikamusqanrayku; chayrayku wicharerqanku wasi pataman, tejasta orqhospataj, chaynejta chaupiman phullupi uraykucherqanku Jesuspa ñaupaqenman. 20Creesqankuta rikuspa Jesusqa onqosqaman nerqa: Runa, juchasniykeqa pampachasqasña kanku.

21Chantá leymanta yachachejkuna, fariseoswan, paykuna ukhupi unanchaspa nisharqanku: Pitaj kay runa Diospa contranta parlajri? Manachu Dioslla juchastaqa pampachayta atin?, nispa.

22-23Yuyasqankuta yachaspataj Jesús kuticherqa: Imaraykutaj chay jinata yuyashankichejri? Kikillampuni, juchasniykimanta perdonasqaña kanki niypis, sayarikuy puririytaj niypis. 24Kunan rikunkichej Runaj Churin atiyniyoj kasqanta, kay pachapi juchasta pampachanampaj.

Tunuyasqa runamantaj nerqa: Qanta niyki; jatarikuy, phulluykita oqharispa ripuy wasiykiman.

25Kikimpachataj chay runaqa, paykunaj rikunankuta sayarispa, phullunta oqharispa wasinman riporqa Diosta yupaychaspa. 26Tukuyninkutaj t'ukuspa Diosta yupaycharqanku, mancharisqastaj nerqanku: Mana jayk'aj rikusqanchejta rikunchej kunanqa, nispa.

Jesús wajyan Leví sutiyoj runata

(Mt 9.9-13; Mr 2.13-17)

27Chaymanta llojsiytawan Jesús rikorqa uj impuesto cobraj runata, Leví sutiyojta. Cobranan chaypi tiyakushajtintaj Jesús nerqa: Qhatiway, nispa.

28Chantá Levitaj sayariytawan, tukuy imanta saqerpayaspa Jesusta qhaterqa.

29Levitaj wasimpi wakicherqa jatun mikhuyta Jesuspaj; ashkha cobrajkunataj, wajkunawan khuska mikhoj tiyaykorqanku. 30Fariseostaj leymanta yachachejkunawan thutorqanku Jesuspa yachachisqasnimpaj, nerqankutaj paykunaman: Imaraykutaj mikhunkichej ujyankichejtaj cobrajkunawan juchasapaswan imari, nispa.

31Jesustaj kuticherqa: Walej kajkunaqa jampejta mana wajyanankuchu tiyan, manachayqa onqosqaslla. 32Mana cheqan sonqoyoj runasta wajyajchu jamorqani Diosman kutirinankupaj, manachayqa juchasapasllata.

Ayunomanta

(Mt 9.14-17; Mr 2.18-22)

33Chaypacha, Jesusta taporqanku: Imaraykutaj Juampa yachachisqasnin, fariseospatapis ashkha kutita ayunanku, Diosmantataj mañakunku, qampa yachachisqasniykirí mikhunku ujyankutaj?

34Jesustaj kuticherqa: Qankunarí atiwajchejchu casamientopi kajkunata mana mikhuchiyta, casarakoj paykunawan kashajtin? 35Chayamonqa tiempo maypachachus casarakoj qhechusqa kanqa. Chaypachamá ayunanqanku.

36Nillarqataj kay rijch'anachinata: Mana pipis mosoj p'achata llik'ispa mauk'a p'achaman siranmanchu: imaraykuchus mosoj kajqa mauk'ata llik'enqa; manataj walejchu mauk'api mosojqa. 37Manataj pipis mosoj vinota mauk'a qara botasman jich'anmanchu; imaraykuchus mosoj vinoqa botasta phatachenqa; vinotaj suronqa, iskayninkutaj usonqanku. 38Chayrayku mosoj vinotaqa jich'anqanku, mosoj qara botasman; chay jinapeqa mana usonqankuchu iskaynimpis. 39Mana pipis unayniyoj vinota ujyajqa munanmanchu mosoj vinotaqa, unayniyojpuni aswan sumaj, nispa.

Currently Selected:

SAN LUCAS 5: QCHSB

Highlight

Copy