SAN LUCAS 7
7
Jesús thañichin capitampa uywasqanta
(Mt 8.5-13)
1Chay imasta runasman parlayta tukuspa Jesusqa Capernaumman yaykorqa. 2Chaypitaj tiyarqa uj capitán; paypa munasqa uywasqantaj onqosqa kasharqa wañoj jinaña. 3Capitanqa Jesusmanta parlajta uyarispa, kacharqa judiosmanta kurajkunata, mañakuspa Jesusta pusamunankuta uywasqanta thañichinampaj. 4-5Jesusman qayllaykuspataj maytapuni mañarqanku rinanta: Allimpuni kanman kay capitanta yanapanaykeqa; imaraykuchus payqa munakun ayllunchejta, sinagogatapis ruwachipuwanchej, nispa.
6Jesustaj paykunawan rerqa. Wasi qayllapiña kashajtinkutaj, capitanqa kausaqesninta kachamorqa Jesusman ninankupaj: Señor, ama qhasi mana kajta jamuychu, noqaqa mana allin runachu kani wasiyman yaykunaykipaj. 7Chaynejta mana munarqanichu qanman jamuyllatapis. qanqa uj simillata niy, uywasqaytaj thañikaponqa. 8Noqapis kamachejniyoj kani, jinallatataj soldadostapis kamachini. Ujninta nini rinanta, paytaj rin. Wajta, jamuy nini, jamuntaj. Uywasqaytapis uj imata ruway nini chayqa, ruwan.
9Chayta uyarispa Jesusqa t'ukorqa; chantá paywan rejkunaman kutirispataj, nerqa: Cheqamanta, kay runaj feninta jinaqa, mana Israel ayllupipis tarerqanichu.
10Kachasqa runastaj wasiman kutipuspa, onqosqa kamachitaqa thañisqataña tariparqanku.
Jesús kausarichin Nainmanta viudaj wawanta
11Chaymanta Jesús risharqa Naín llajtaman; yachachisqasnintaj ashkha runas ima paywan risharqanku. 12Llajta qayllapitaj tinkorqa uj wañusqata p'ampaj apashajkunawan. Ayaqa, viudaj uj k'ata wawan karqa. Ashkha runastaj llajtamanta paywan risharqanku. 13Señortaj viudata waqashajta rikuspa, khuyaspataj, nerqa: Ama waqaychu.
14Qayllaykuspataj aya apanata llankharerqa; wantojkunataj sayaykorqanku. Jesustaj wañusqaman nerqa: Wayna, qanta niyki, sayariy.
15Wañusqataj tiyaykamuspa parlarerqa. Jesustaj waynataqa kausashajta mamanman qoporqa. 16Chayta rikuspataj tukuyninku mancharikorqanku. Diosta yupaychayta qallarerqanku nispa: Jatun profeta noqanchej ukhupi rikhurin. Dios ajinata ayllunta watukoj jamun.
17Chay ruwasqantaj uyarikorqa tukuynin Judeapi, muyuriynintimpi ima.
Juan Bautistaj kachasnin
(Mt 11.2-19)
18-19Kay tukuy imasmanta Juanman yachachisqasnin willamorqanku. Paykunamanta iskay yachachisqasninta wajyaspataj, Juanqa kacharqa Señorta tapojta: Qanchu kanki pichus jamunan karqa chayqa, chayrí wajtachu suyasqayku? 20Chantá Jesusman rispataj paykunaqa nerqanku: Juan Bautista kachamuwayku qanta tapojta: Qanchu kanki pichus jamunan karqa chayqa, chayrí wajtachu suyasqayku?
21Chay kikimpacha ashkha runasta thañicherqa nanaykunasninkumanta, onqoykunasninkumantapis. supayniyojkunatapis thañichillarqataj. Chanta ashkha ciegostapis qhawaricherqa. 22Juampa kachasninman kutichispataj nerqa: Kutipuychej, Juanman willamuychej imastachus rikusqaykichejta, uyarisqaykichejta ima: Ciegos rikunku, suchus puririnku, leprayojkuna llimphuchasqas kanku, joq'aras uyarinku, wañusqas kausarimunku, wajchasmampis evangelio willakun. 23Kusikuyniyojtaj kanqa pichus noqarayku mana misk'ajqa.
24Kachas ripusqankutawantaj, Jesusqa Juanmanta runasman willayta qallarerqa, nispa: Imatataj ch'in pampapi rikumorqankichej? Wayraj kuyuchisqan soqosotachu? 25Astawanqa, imata rikorqankichej? Uj sumaj p'achayoj runatachu? Qankuna yachankichej, sumajta p'achallisqas kajkunaqa, kusisqa kausajkunapis reyespa palaciosnimpi kashanku. 26Chantaqa, imatapunitaj rikumorqankichej? Uj profetatachu? Arí niykichej, profetamantapis astawanraj. 27Paymantaqa escribisqaña karqa: Kayqa, kachamuni willajniyta ñaupaqeykita, paytaj ñaupaqeykipi ñanta wakichipusonqa. 28Niykichej, tukuy warmismanta nacejkunamanta mana ujllapis Juanmanta aswan kuraj kanchu; chaywampis, Diospa reinompi aswan juch'uy kajqa, paymanta aswan kurajraj.
29Kayta uyarispataj tukuy runa, cobrajkuna ima, Diosqa cheqampuni nerqanku, Juampa bautismonwan bautizachikuspa. 30Fariseostaj leymanta yachachejkuna ima qhesacharqanku, imatachus Dios paykunanejta ruwayta munasqanta, mana Juanwan bautizachikuspa.
31Señortaj nerqa: Imamantaj rijch'achisaj kay runaspa miraynintari? Pimantaj rijch'akunkuri? 32Paykunaqa rijch'akunku wawas plazapi tiyaraspa qhaparinakojkunaman, nispa: Qenata tocapuyku, manataj tusunkichejchu; llakiy takiykunata takipuyku, manataj waqankichejchu. 33Juan Bautistaqa jamorqa t'antata mana mikhoj, nitaj vinota ujyaj, qankunataj supayniyoj ninkichej. 34Runaj Churin jamojtintaj, mikhusqanrayku, ujyasqanraykutaj ninkichej: Kay runaqa anchata mikhun, anchata vinota ujyan, juchasapaswan rejsinakoj, impuestota cobrajkunawan ima, nispa. 35Diospa yachaynenqa ruwasqasnimpi rejsichikun.
Jesusqa fariseo Simompa wasimpi
36Uj fariseo wajyarqa Jesusta paywan mikhunampaj. Wasinman yaykuspataj mikhoj tiyaykukorqa. 37Chantá llajtapi kaj, uj juchasapa warmitaj, fariseoj wasimpi Jesús kasqanta yachaspa, apamorqa q'apaj jawina perfumeta, yuraj rumi yuritupi. 38Paypa qhepampi, chakisnin qayllapi tiyaykukuspa waqayta qallarerqa; waqayninwantaj chakisninta joq'ochaspa chujchasninwan ch'akicherqa. Chakisninta much'araspataj perfumewan jich'aykorqa. 39Kayta rikuspataj, Jesusta wajyaj fariseoqa umachakorqa: Sichus kay runa cheqamanta profeta kanman chayqa, rejsinmanchá pichus, imayna laya juchasapa warmichus llankhaykusqanta. 40Jesustaj chayman kutichispa nerqa: Simón, ujta nisqayki. Paytaj nerqa: Niway ari, Maestro, nispa.
41Uj qolqe manoj runaman, iskay runas manu karqanku. Ujnin kajqa phishqa pachaj denario qolqe manu karqa; ujnintaj phishqa chunka. 42Mana imaynamanta kutichipuyta atejtinkutaj, iskayninkuta khuyaspa, manaña mañakaporqachu. Kunan niway ari, mayqentaj chay iskayninkumanta astawan munakonqari?
43Simontaj kuticherqa: Pichus aswan manu karqa, chay kasqanta yuyani.
Paytaj nerqa: Arí, cheqamanta ninki, nispa.
44Warmiman kutirispataj Simonman nerqa: Rikushankichu kay warmita? Wasiykiman yaykumorqani, manataj yakullatapis jaywariwarqankichu chakisniypaj; payrí, waqayninwan chakisniyta joq'ochan chujchanwantaj ch'akichin. 45Mana much'awarqankichu; payrí yaykumuytawan chakisniyta much'aspa mana sayk'unchu.
46Umayta aceitewan mana jawiwarqankichu; payrí, chakisniyta q'apaj, perfumewan jawiwan. 47Chaynejta niyki, ashkha juchasnin pampachasqa kasqanta, imaraykuchus anchata munakorqa; pisi perdonasqarí, pisita munakun.
48Warmimantaj nerqa: Juchasniyki pampachasqasña kanku.
49Tukuy paywan khuska mikhojkunataj, paykuna ukhu niyta qallarerqanku: Pi runataj kay, juchastapis pampachajri?
50Jesustaj warmiman nerqa: Creesqayki salvasunki, sonqo junt'asqa ripuy, nispa.
Currently Selected:
SAN LUCAS 7: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
