HECHOS 13

2. Pablon mayïr kuti Diosan arunakap yatiyir saratapa

(13.1—14.28)

Bernabeampi Saulompix, Diosan arunakap yatiyiriw markanakar sarañ qalltapxi

1Antioquía iglesianxa, profetanakampi, yatichirinakampiw utjarakïna. Jupanakasti akanakänwa: Bernabé, Simeón (khitirutix “Negro” sasa sutichapkarakïna), Cirenenkir Lucio, Manahem (khititix, Galilea apnaqir Herodes Antipasamp chika jilasitayna uka), ukhamarak Saulo. 2Mä urusti, jupanakax Tatituruw yupaychasipkäna, ayuno lurasipkän ukchañkamaw Qullan Ajayux jupanakar säna: “Bernabeampiru, Saulompir yaqhacharapipxita. Nayaw jupanakar mä suma irnaqäwitak ajllista” sasa.

3Ukatsti, Tatitur mayisina, ayuno lurasinxa; amparanakap Bernabeampiru, Saulompir luqxatasin jupanakar khitxapxäna.

Apostolunakax Chipre sat wat'an Diosan arunakap yatiyapxi

4Qullan Ajayuw Bernabeampiru, Saulompir khithäna, Diosan arunakap yatiyiri. Nayraqatax Seleucia chiqaruw sarapxäna, uka chiqatsti Chipre#13.4 Chipre: Mediterráneo jach'a qutankir wat'a, Bernabean markapa (Hch 4.36). wat'aruw botet sarapxäna. 5Salaminar purisinsti, Tatitun arunakapat judionakan sinagogapan yatiyañ qalltapxäna. Juan Marcosax#13.5 Juan: Juan Marcos (Hch 12.12,25; 13.13; 15.37-38), Bernabean wila masipa (Col 4.10). jupanakamp chikaw sararakïna, jupanakar yanapiri.

6Ukatsti taqpach wat'a muytasinxa, Pafos sat puertoruw puripxäna. Ukansti Barjesús sutini mä layqa judío jaqiruw jikxatapxäna, jupasti k'ari profetänwa. 7Uka layqasti marka apnaqir Sergio Paulo sat wali amuyt'an jilïrimpïskänwa. Uka jilïristi Bernabeampiru, Saulompiruw jawsayanïna, Diosan arunakap ist'añ munatap layku. 8Ukampis uka layqa jaqix, jark'asïnwa, janiw marka apnaqir jilïrin iyawsañap munkänti. Uka jaqin yaqha sutipasti griego arunxa, Elimas satarakïnwa. 9Ukat Saulox, khititix Pablo satäkarakïn ukax, Qullan Ajayun phuqt'atäsin uka jaqir wal uñkatäna, 10juparusti sarakïnwa:

—¡K'ari ñanqha jaqi, sallqjañampi, jan walimpi, phuqhantat supayan wawapa, chiqa kankañ uñisir jaqi! ¿Kunatarak Tatitun suma chiqa thakhip q'iwiptayañ munaskaktasti?#13.10 Os 14.9 (10). 11Ukatpï jichhax Tatitux jumar mutuyätamxa: juykhuptätawa, janirakiw intin qhanapsa mä qawqha urunak uñjkätati —sasa.

Ukspachaw Elimasax jan kuns uñjkxänti, jupatakix ina laxa ch'amakakïxänwa, ukat jupax amparat irpayasiñatak maynir thaqhäna. 12Uk uñjasinsti, marka apnaqir jilïrix Tatit Jesusan yatichäwinakapxat muspharataw uñjasïna, ukatsti iyawsarakïnwa.

Pablompi Bernabeampix, Pisidia uraqinkapxiwa

13Pablompi, Bernabeampi, Juanampix, Pafos markat mä barcor mantasin Perge markaruw sarxapxi, Panfilia uraqina. Ukampis Juan Marcosax jupanakar jaytjawayasin Jerusalenaruw kutt'anxäna. 14Perge markatsti Pablompi jupamp chik saririnakampix, Pisidia uraqinkir Antioquía markakamaw kayut sarasipkakïna. Uka markansti, sábado urun sinagogar mantasin qunt'asipxäna.#13.14 Lc 4.16-28. 15Kamachi qillqatampi, profetanakan qillqatapamp ullart'at qhipatsti,#13.15 Sinagoga chiqanxa, Moisesan qillqatanakapat ullarapxäna (kamachinaka, jan ukax, Pentateuco satäki uka qillqata) profetanakan yaqhip qillqatanakampit ullarapxarakïna. sinagogan jilïrinakapax Pablompiru, mayninakampiruw jawsayapxäna akham sasa:

—Israelit jilatanaka, jumanakantix kuna iwxt'añanakas utjapxstam ukax, arsusipkakim —sasa.

16Ukapachaw Pablox sayt'asïna, ukatsti amukt'apxañapatakiw amparap ayti, ukat jupanakar sarakïna:

—Israelankir chachanaka, ist'apxam, jumanaka, Tatitur axsartas sarnaqir jaqinaka, ist'apxarakim. 17Israel markan Diosapax jiwasan nayra awkinakasaruw ajllïna. Jupanakarusti mä jach'a markarurakiw tukuyäna, jupanakax khuri Egipto markan jayankir jaqjam jakasipkän ukapacha. Ukatsti, jach'a ch'amapampiw uka uraqit jupanakar irpsunïna.#13.17 Ex 1.7; 12.51. 18Diosax pusi tunka maraw wasaran jupanakan jan wali luräwinakap uñjäna.#13.18 Nm 14.34; Dt 1.31. 19Ukatsti jupax Canaán uraqin paqallqu jach'a markanak t'unjäna, uka uraqinak jiwasan awkinakasar churañataki. 20Taqi ukanakasti pusi pataka phisqa tunka maran lurasïna.

“Uka qhipatsti Diosax jupanakatakix jilïr irpirinak ucharapïna, Samuel profetan urunakapkama.#13.20 Jue 2.16; 1 S 3.20. 21Ukapachasti jupanakax mä rey mayipxäna#13.21 1 S 8.4-5,19. jupanakar apnaqañapataki. Diosasti iyawsasaw jupanakarux mä rey churäna. Uka reyisti Benjamín ayllunkir Quis sat chachan Saúl yuqapänwa. Saúl reyisti pusi tunka maraw marka apnaqäna. 22Uka qhipatsti Diosax Saúl reyir reyi qunuñapat jaqunukünwa, ukatsti Davidaruw reyit utt'ayäna. Diosax Davidat akham säna: ‘Nayax Jesé chachan David yuqaparux chuymaxar purkirïtap jikxatta, jupax taqi kuntix nayax munkta uk lurani’#13.22 1 S 13.13-14; 16.12; Sal 89.20 (21). sasa. 23Uka kipka Davidat saraqiriw Jesusaxa, juparuw Diosax Israel markar qhispiyir khithani, arskatayna ukhamarjama.#13.23 2 S 7.12-16; 22.51; Sal 132.11-13,17; Hch 2.30. 24Jesusax janïr jutkän ukapachaxa, Juan sat chachaw Israelankir taqi jaqinakar yatiyäna akham sasa: “Jan wali luräwinakamat kutikipstapxam, bautismo katuqapxarakim”#13.24 Mc 1.4; Lc 3.3; Hch 19.4. sasa. 25Jiwañap jak'asti, Juanax israelitanakar sänwa: “¿Khitiw sapxistas nayaruxa? Janiw nayax khititix jutañapäki ukäkti, ukampis mayniw nayat qhipa jutani, juparusti janiw nayax wiskhupan chinuñap jararañatakis askïkti”#13.25 Mt 3.11; Mc 1.7; Lc 3.16; Jn 1.26-27. sasa.

26“Israelit jilat masinaka, Abrahaman wawanakapa, jumanaka, Diosar axsartas sarnaqir yaqha markankir jaqinaka, aka qhispiyäwi arunakax taqi jiwasanakatakiwa. 27Jerusalén markan jakirinakampi jilïr irpirinakapampixa, janiw Jesusan khitïtapsa yatipkänti, janirakiw amuyt'apkänti kuntix sinagogan sapa sábado urun profetanakan qillqatanakapat ullarapkän uksa; ukampis Jesusar jiwayasax jupanak kipkaw profetanakan arunakap phuqhapxäna. 28Jupar jiwayañatakix janiw kuna juchsa jikxatapkänti, ukhamäkipansa Pilatorux jiwañap mayisipkakïnwa.#13.28 Mt 27.22-23; Mc 15.13-14; Lc 23.20-23; Jn 19.15. 29Ukatsti taqi kunatix Qillqatanakan Jesusxat siskän ukanak phuqhasxipanxa, cruzat jupar apaqasin amay p'amp'añ chiqaruw imt'xapxäna.#13.29 Mt 27.57-61; Mc 15.42-47; Lc 23.50-56; Jn 19.38-42. 30Ukampis Diosaw jiwatanak taypit juparux jaktayäna. 31Jesusasti walja urunakawa, walja kutirakiw uñstäna, jupamp chik Galilea uraqit Jerusalenar makhatapkataynas jupanakaru.#13.31 Hch 1.3. Jichhasti jupanakaw Jesusat jaqinakar yatiyapxi.

32“Nanakasti jumanakarux kuntix Diosax nayra awkinakasar arsuwaykän uka suma arunak yatiyasipksma. 33Uksti jiwasa, jupan wawanakaparux Diosax arsutap phuqhistuwa, Jesusar jaktayasa, kamisatix payïr Salmo q'uchun qillqatäki ukhamarjama: ‘Jumaw nayan wawaxätaxa; nayaw jichhax jumar jakañ chursma’ sasa. 34Diosax jiwatanak taypit Jesusan jaktañap yatiyxataynawa, janchipan jan ñusjañapataki. Qillqatansti jupax sarakiwa: ‘Davidar arsut qullana chiqpach arunak phuqhäwa’#13.34 Is 55.3 sasa. 35Ukatpï yaqhawjan sarakixa: ‘Janiw munätati juman munat luqtiriman janchip ñusjañapxa’ sasa. 36Chiqpachansa Davidax Diosan arsutaparjamaw jaysäna. Ukampis qhipat jiwxänwa, nayra awkinakapan amay imäwipar imt'atäxarakïnwa, janchipasti ñusjxarakïnwa. 37Ukatsipana, Diosax jiwatanak taypit Jesusarux jaktayi, janchipasti janiw ñusjkänti. 38Ukhamasti, jilatanaka, yatipxam, Jesús tuqiw jumanakarux juchat pampachäwi utjatap yatiyasi. 39Ukat jupar iyawsirinakax jupa tuqi pampachäwi jikxatapxi, Moisesan kamachipax janiw juchanakamat pampachäwi jikxatayapkiristamti.#13.38-39 Hch 10.43; Ro 4.24-25; 10.4; Heb 9.9. 40Amuyasipxam, ukatarak profetanakan yatiyat arsutanakapasti jumanakampi phuqhasiskaspan:

41‘Uñtapxam, jisk'achirinaka,

muspharapxam, chhaqtapxarakim;

jan amuyt'añ luräwinak urunakaman lurä,

jumanakasti janiw ukanakax: “Chiqaw” sapkätati,

jumanakar ukanak yatiykipansa.’ ”

42Pablompi mayni jilatanakampi sinagogat mistxipansti, jaqinakax jupanakar achikt'apxänwa, jutir sábado urun wasitat ukanakxat jupanakar parlapxañapataki. 43Sinagogan tantachasïwi tukuyxatatsti, judionakat waljaniw Pablompiru Bernabeampirux arkapxäna, judionakan iyawsäwipar kutikipstirinakas arkapxarakïnwa. Pablompi Bernabeampisti jupanakarux Diosan munasiñapan ch'aman sayt'apxañapatakiw iwxt'apxäna.

44Jutir sábado urusti, markpachaw Tatitun arunakap ist'irix tantachasipxäna. 45Ukataq jaqinak uñjasinsti, judionakax Pablon arunakapar kutipayañ qalltapxäna, kunayman tuqipxarakïna. 46Ukapachasti Pablompi Bernabeampix jan axsarasaw sapxäna:

—Nayraqatax wakisipunïnwa jumanak judionakar Diosan arunakapat yatiyañaxa. Ukampis jumanakax janiw katuqañ munapktati, janirakiw wiñay jakañ katuqañatakjam amuyasipktasa. Ukatpï jichhax, nanakax jan judiöpkis ukanak taypin suma arunak yatiyapxäxa.#13.45-46 Hch 18.6; 28.28. 47Tatituw nanakarux ukham sapxitu:

“Markanakan qhanäñapatakiw jumarux uchsma,

uraqi tukuskam qhispiyasiñ arunakaxat yatiyañamataki” sasa.

48Uk ist'asinsti, jan judiöpkis uka jaqinakax kusisipxänwa. Sapxarakïnwa: “Tatitun arunakapax wali sumapuniwa” sasa. Ukatsti wiñay jakañ katuqañatak wakichatanakax iyawsapxarakïnwa.#13.48 Wiñay jakañatak wakichatanaka: Ro 8.29-30 ukhamaraki Dn 12.1; Lc 10.20; Flp 4.3; Ap 13.8; 21.27. 49Ukhamaw Tatitun arunakapax taqi uka chiqanakan yatiyasïna. 50Ukampis judionakax askit uñt'at warminakampiru, markan wali aytat chachanakampir parlxayasin amtayapxäna, Pablompiru, Bernabeampir uñisiyañataki, uka markat jaqsuñataki. 51Ukat Pablompi Bernabeampix uka jaqinakatak kayunakapat laq'a thalarasisinxa, Iconio markaruw sarxapxäna. 52Tatitur iyawsirinakasti wali kusisitaw jikxatasipxäna, Qullan Ajayumpi phuqt'atäpxarakïnwa.

Currently Selected:

HECHOS 13: AYOPD

Highlight

Copy