GÉNESIS 33
33
Jacobumpi, Esaú jilapampix sumankthapipxiwa
1Kunapachatix Jacobux Esaú jilaparu pusi pataka jaqinakampi jutaskir uñjkäna ukkhaxa, wawanakxa Liampiru, Raquelampiru, pani uywatanakapampiruw lakiräna. 2Nayraqatarusti uywatanakampi jupanakan wawanakapamp uchäna, ukxarusti Liampiru wawanakapampiruw ucharakïna, qhiparusti Raquelampiru Joseampirurakiw uchäna. 3Ukxarusti jupanakat nayrt'awayänwa, jilapan jak'achasiñapkamasti p'iqipa uraqir puriyañkamaw paqallq kuti alt'asïna. 4Ukampis Esaú jilapax jikxatiriw jalanïna, qhumantasinsti jamp'att'arakïnwa. Panpachaniw jachapxäna. 5Ukatsti Esaú jilapax warminakaru, wawanakaru uñkatasin jiskt'arakïna:
—¿Khitirak jupanakasti? —sasa.
Jacobux sarakïnwa:
—Tatit Diosax nayat khuyapt'ayasitu, jupasti taqi aka wawanak nayar churitu —sasa.
6Ukat uywatanakax wawanakapamp jak'achasipxäna, p'iqip uraqir puriyañkamaw alt'asipxarakïna. 7Ukxarusti Liampi, wawanakapampirakiw jak'achasipxäna, jupanakas uka kipkarak uraqir puriñkam alt'asipxäna, qhiparusti Joseampi, Raquelampiw jak'achasipxäna, jupanakas alt'asipxarakïnwa. 8Esausti akatjamat jiskt'äna:
—¿Kun munasarak thakhin jutkasin jikxatkta uka uywa tamanak apayanistasti? —sasa.
Jacobusti sarakïnwa:
—Ukax juman nayat khuyapt'ayasiñamatakiwa —sasa.
9Esaú chachasti sänwa:
—Janiw munat jilata, uywanakax nayan utjaskituwa. Kunatix jumankki ukax jumankaskakpan —sasa.
10Ukampis Jacobux saskakïnwa:
—Janiw ukhamäkaspati. Nayax achikt'asïma, juman khuyapayasiñamtix jikxatsta ukaxa, aka churäwi katuqt'ita, jumar uñjataxasti Diosarus uñjkirista ukhamawa, juman nayar wali sum katuqatam layku. 11Jumataki apankta uka churäwi katuqt'akitaya, Diosaw nayarux qamir tukuyitu, janiw kunas pist'kituti —sasa.
Jacobux sintpun achikt'äna, ukat Esaú jilapax iyawsas uka churäwinak katuqäna; 12ukampis sarakïnwa:
—Walikiwa, jichhax saraskakiñäni. Nayaw juman nayraqatam sarä —sasa.
13Jacobusti ukxaruw säna:
—Munat jila, wawanakan pisi ch'amanïpxatap yattawa, ukhamarus qalluni ovejanakata, vacanakata llakisiñaxarakiwa; qarirxapxaspa ukaxa, mä urunak ovejanakax jiwarxaspa. 14Jumax nayrst'askakim, nayasti uywanakan qhipap k'achat jutaskä, wawanakamp chika, jumampi Edom chiqan jikisiñkama —sasa.
15Esaú jilapasti sänwa:
—Walikiwa, jaqinakaxat mä qawqhani jaytawayäma —sasa.
Ukampis Jacobux ukxaruw sarakïna:
—Janikuchaki. Jumax jan ukat llakiskamti, walikïskaniwa —sasa.
16Esaú jilapasti ukürpachaw Edom chiqar kuttawayxäna. 17Ukampis Jacobux Sucot sat chiqaruw sarxäna, ukan jupax mä uta lurasïna, uywanakapatakisti layminakat chhujllanak lurarakïna. Ukat Jacobux uka chiqaru Sucot sutimpi uchäna.
18Kunapachatix Jacobux Padán-aram chiqat kuttankän ukkhaxa, k'umaraw Canaán uraqir purïna, ukatsti Siquem sat marka uñkatasin utjnuqtäna. 19Jacobusti pataka qullqimpiw mä uraqi alasïna, Jamor jaqin wawanakapata, Siquem sat jaqin awkipata, uka chiqaruw utjnuqtäna. 20Ukatsti Jacobux mä altar luräna, ukarusti “Israelan Diosapa” sasaw sutichäna.
Currently Selected:
GÉNESIS 33: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
