GÉNESIS 42
42
Josean jilanakapax Egipto markaruw trigo alasir sarapxi
1Jacobux Egipton trigo utjaskatap yatisinxa, yuqanakaparuw säna:
—¿Kuns akan jumanakax jumanakkam uñch'ukisis lurasipkta? 2Egipton trigox utjaski sapxituwa. Ukar trigo alir sarapxam, manq'atjam jan jiwaraskañasataki —sasa.
3Ukatsti Josean jilanakapax tunkaniw Egipto markar trigo alir sarapxäna; 4ukampisa Jacobux janiw Benjamín wawap antutaskänti, jupasti Josean jilapänwa,#42.4 Benjamín jupasti, Josean sullka jilapänwa, panpachanisti Jacobumpina Raquelampin wawapäpxänwa (Gn 30.22-24; 35.16-18). chuymapansti sänwa: “Inampis kuna jan walt'añarus purxaspa” sasa. 5Israelan yuqanakapasti mayni saririnakamp chikaw trigo alasir sarapxarakïna, taqi Canaán uraqin mach'an utjatap layku.
6Joseasti Egipto markan apnaqiripänwa, jupaw trigo aljäna taqi chiqat purinir jaqinakaru. Kunapachatix jilanakapax jupa nayraqatar uñstapkän ukkhasti, Josean nayräxaparuw alt'asipxäna, ajanunakapsa uraqir puriyañkama. 7Joseasti uñjas ukspachaw jilanakaparux uñt'xäna; ukampis jan uñt'iriw tuküna, qhuru arumpiw jiskt'arakïna:
—Jumanakax ¿kawkits jutapxta? —sasa.
Jupanakasti ukxaruw sapxarakïna:
—Nanakax Canaán uraqit trigo alasiriw jutapxta —sasa.
8Joseax jilanakapar uñt'kchïn ukasa, jupanakax janiw Joseätap amuyapkänti. 9Ukat Joseax kuna samkanaktix jupanakxat samkasirïkäna ukanak amtasïna, ukat jupanakar sarakïna:
—Jumanakax uñaqanakäpxtawa, kawkhatcha markarux aynacht'ayañjamäski uk uñaqiriw jutapxtaxa —sasa.
10Jupanakasti sapxarakïnwa:
—¡Janiw, tata! Nanaka luqtirinakamax trigo alasirikiw jutapxta. 11Nanakax chiqap jaqinakäpxtwa, mä sapa awkinikïpxaraktwa. Janipuniw kunapachas uñaqir jaqit sarnaqapxirïkti —sasa.
12Joseasti saskakïnwa:
—K'arisipxtawa. Jumanakax uñaqanakäpxtawa, kawkhatsa aka markarux aynacht'aysna uk uñaqiriw jutapxtaxa —sasa.
13Ukampis jupanakax sasipkakïnwa:
—Tata, nanak luqtirinakamax tunka payan jiläpxtwa, mä sapa awkinikïpxaraktwa, Canaán uraqin jakapxta. Sullka jilasti awkixampiw utankaski, maynïristi jiwxiwa —sasa.
14Ukampis Joseax saskakïnwa:
—Sapxsmat janicha, jumanakax uñaqanakäpxtawa, 15jichhasti yant'añäniwa, faraonan sutipxaruw sapxsma, jichhax janiw akat mistupkätati sullka jilam puriniñapkama. 16Jumanakax sapkta ukax chiqati janicha uk yatiñäni: jumanakat mayni khithapxam sullka jilamar irptiri, mayninakasti katuntataw akankapxäta. Jilamarutix jan puriyanipkani ukaxa, jumanakax uñaqanakäsipkapuntawa. ¡Faraonan sutipxaruw juramentompi sapxsma! —sasa.
17Joseasti jupanakarux kimsa uruw katuntat ukankayäna, 18kimsa uru qhipatsti sarakïnwa:
—Nayax Diosar axsarir jaqïtwa. Jichhax kuntix sapkäma uk lurapxam, ukhamat jumanakax pampachat uñjasipxäta, 19chiqpacha suma jaqinakäpxsta ukaxa, jumanakax mayni jilamar carcelar jaytawayapxam, ukat mayninakasti sarapxam, utamankirinakatak trigo apapxarakim jupanakan manq'asiñapataki. 20Ukatsti sullka jilam irpt'ataw kuttanipxäta, ukhamat nayax yatï kuntix sapkta ukax chiqätaynati janicha uka. Janitix chiqäkchi ukasti, jumanakax jiwayatäpxätawa —sasa.
Jupanakasti “Walikiw” sapxänwa, 21ukampisa jupanakkamaw aruskipasipxäna:
—Chiqpachansa jan walpun jiwasax jilasar lurtanxa. Kunapachatix jupat khuyapt'ayasiñasatak achikt'askäna ukkhaxa, janiw jiwasax llakit uñjkchïyätan ukasa jupar ist'käyätanti. Ukat jichhax jiwasar t'aqhisiñax wakt'arakistu —sasa.
22Ukxarusti Rubenax sarakïnwa:
—Nayax sasipkapunsmaxaya: “Jan kuns jupar lurapxamti” sasa; ukampis jumanakax janiw nayar ist'apkistati, jichhasti jiwatapat phuqhañasaw wakt'istu —sasa.
23Jupanakax janiw Josean uk amuyatap yatipkänti, Joseasti jupanakarux aru jaqukipir jaqi tuqiw parlatayna. 24Ukampisa, Joseax jupanak jak'at sartawayasin wal jachäna. Ukatsti jupanakan ukar kuttanisinxa, Simeonaruw katuntayäna, ukatsti jupanakan uñjkañaw ñach'antayarakïna. 25Ukxarusti yanapirinakaparuw sarakïna: “Aka jaqinakatakix costalanakapar trigo phuqhantarapipxam, qullqinakapxa costalaparkam uskxapxarakim, thakhitakisti manq'añ wakicht'arapipxam” sasa. Ukatsti ukhamapuniw lurasïna. 26Josean jilanakapasti asnonakapar trigo khumxatawayasin sarxapxäna.
27Arum samart'añatak mä chiqar purisinsti, jupanakat maynïrix asnopar manqt'ayañatakiw costalap jararäna, ukatsti qullqipan ukankaskatap uñjarakïna. 28Ukat jilanakapar säna:
—¡Uñjapxam, akax qullqixarakisä! ¡Costalaxankaskiwa! —sasa.
Jupanakasti taqiniw wal mulljasipxäna, axsarañat khathatisaw jupanakkam sasipxarakïna:
—¿Kunatsa Diosax ukham luristu? —sasa.
29Canaán uraqir purxapxän ukkhasti, Jacob awkiparuw taqi ukanak yatiyapxäna, jupar sapxarakïnwa:
30—Egipto marka apnaqir jaqix jan walpun uñjapxitu, “Jumanakax uñaqanakäpxtawa” sapxituwa. 31Nanakasti juparux sapxaraktwa: “Nanakax chiqap jaqinakäpxtwa, janipuniw kunapachas uñaqa jaqit sarnaqapxirïkti; 32tunka payan jila sullkäpxtwa, mä sapa awkinikïpxaraktwa; maynïristi janiw nanakampïkxiti, sullkasti Canaán uraqin awkixampiw utankaski” sasaw sapxta. 33Ukatsti jupax sapxarakituwa: “Akhamat yatiñäni chiqpachan suma jaqinakäpxsta ukxa, jumanakax mayni jilamaru jaytawayapxam, ukat mayninakasti sarapxam utamankirinakatak trigo apapxarakim jupanakan manq'asiñapataki, 34ukampis sullka jilam irpt'ataw kuttanipxäta, ukhamat nayax jumanakan chiqa jaqinakäpxatam yatï, janiraki uñaqäpxatama; ukapachasti jilamarux antutxarakïwa, jumanakas jan kuna llakinikiw aka markan sarnaqasisipkäta” sasa.
35Kunapachatix Josean jilanakapax costalanakap warsusipkän ukkhasti, sapa costalan qullqi jikxatapxäna, uka qullqi uñjasinsti, jupanakasa, awkipasa wal mulljasipxäna. 36Ukat Jacobux säna:
—Jumanakax jan wawani uñjasiyapxistaxa. Joseax janiw jiwasampïkxiti, Simeonas ukhamaraki, ¡jichhasti Benjamín wawaxaruw irpañ munapxaraktaxa! ¡Taqi ukanakax llakisiñat jiwayitani! —sasa.
37Ukat Rubenax awkipar sarakïna:
—Nayaw Benjaminar uñjaskä, kuttayanirapxämawa. Janitix kuttayanirapkäm ukasti, pani wawaxaruw jiwarayäta —sasa.
38Ukampisa Jacobux ukxaruw sarakïna:
—Benjamín wawaxax janiw jumanakamp sarkaniti. José jilapax jiwxiwa, Benjamín sapakiw qhiparxaraki. Kuna jan walt'añarutix thakhin puriyapxasma ukax, jumanakaw juchanïpxäta nayan llakiskäwi jiwañaxatakixa —sasa.
Currently Selected:
GÉNESIS 42: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
