GÉNESIS 50
50
1Joseax awkipan jiwat amayapat qhumantasïna, jacht'asisaw jamp'att'äna. 2Ukatsti kawkïr qullirinakatix Josear uñjapxirïkän ukanakaruw awkipan amayapar suma q'apkir qullanakampi jawsupxañapatak mayïna.#50.2 Egipcionakasti mä jilïr jaqin amayaparux kunayman qullanakampiw jawsupxirïna, ukhamat uka amayax jan thujsantañapataki. Ukampis hebreonakax janiw ukham lurapxirïkänti. Qullirinakasti ukham lurapxäna. 3Pusi tunk urunakaw qullirinakax q'apkir qullanakamp uka amayar jawsupxäna, ukkha urunakarakiw wakisïna mä jiwat amayar q'apkir qullanakamp jawsuñaxa.
Egiptonkir jaqinakasti paqallq tunka uruw Jacobun jiwatapat jachapxäna, 4uka urunak qhipatsti, Joseax faraonan jach'a utapankirinakampiw parläna, sarakïnwa:
—Jumanakatix chiqpachan munapxchista ukaxa, faraonar akham sarapipxita, 5kunapachatix awkixax jiwañampïxäna ukapachax, mä juramento jupax lurayitu, kawkïr imañ chiqtix Canaán uraqin jupa pachpa wakichaski ukar imxañaxataki.#50.5 Gn 47.29-31. Ukhamasti awkixar imt'asxir sarañatakiw achikt'asta; imt'anxasinsti kuttanxakïwa —sasa.
6Faraonasti sarakïnwa:
—Awkima mayitaparjam jupar imt'ayir saraskakim —sasa.
7Joseasti awkipar imayiriw saräna, jupamp chikasti faraonan utapankirinakampi, Egipto uraqinkir jach'a jilïr jaqinakampiw sarapxäna, 8Jacobun jak'a wila masinakapampi, Josean wila masipampi, jilanakapampis sarapxarakïnwa. Gosen uraqinsti wawanakampi, uywanakampik jaytawayapxäna. 9Joseamp chikasti, jaqinakax carretanakata, caballonakat sarapxäna, jaqix waljapunïnwa. 10Jordán jawir jak'ankir Atad sata chiqar purisinsti, taqpachaniw Jacobun jiwatapat jachapxäna, Joseasti ukan paqallqu urunakaw awkipat jachäna.#50.10 Paqallqu urunaka: hebreonakax ukkha urunakapuniw mä wila masin jiwatapat jachapxirïtayna.
11Uksa tuqin jakir cananeo jaqinakasti ukham jachir uñjasax sapxänwa: “Egiptonkirinakax wali sum mä amay imt'asiñ yatipxatayna” sasa. Ukat uka chiqarux “egipcionakan jachañ pampa” sas sutichapxäna.
12Jacobun yuqanakapasti, kuntix awkipax maykatayna ukhamarupuniw taqi kunsa phuqhapxäna, 13ukatsti Canaán uraqiruw apxapxäna, Macpelá uraqinkki uka putur imt'xañataki, uksti Abrahamaw wila masinakapan imatäñapatak Efrón hitita jaqit alatayna. Uka uraqisa, uka putusa, Mamré chiqat inti jalsu tuqinkiwa. 14Joseasti, awkipar imt'xasaxa, Egiptoruw jilanakapampi, jupamp chik sarapkän uka jaqinakamp kuttxäna.
Josean qhipa urunakapa
15Jacob awkipan jiwxatapatsti, Josean jilanakapax chuymanakapan akham sapxäna: “Inas jichhax Joseax uñisxchistani, jupar jan walinak luratasat phuqsuschistani” sasa. 16Ukat yatiyirinak khithapxäna jupar akham sañataki: “Awkimax janïra jiwkän ukkhaw sapxitäna, 17jumar akham sañataki: ‘Jilanakamarux taqi jan walinak lurapkäyätam ukanakata, jucha luratanakapatsa pampachakimaya’ sasa. Ukat jichhax achikt'asipxsma nanakan jan wali luratanakax pampacht'añamataki, nanakax awkiman Diosapan luqtiripäpxarakstxaya” sasa.
Yatiyirinakax uka iwxa arunak Josear yatiyapkän ukkhasti, Joseax wal jachäna. 18Ukatsti jilanakapaw purinïna, jupanakasti Josean nayräxapar killt'asisax uraqir puriñkamaw alt'asipxäna, sapxarakïnwa:
—Juman luqtirimäpxtwa —sasa.
19Ukampis Joseax ukxaruw sarakïna:
—Jan axsarapxamti. Janiw nayax Diosäkti. 20Jumanakax nayar jan walinak lurañ amtapxäyätaxa, ukampis Diosaw uka jan walinak askir tukuyxi, jichhasti uk uñjaraktan: Diosax walja jaqinakan jakaskañapatakiw ukham luri. 21Ukhamax jan axsarapxamti. Nayaw jumanakarusa, wawanakamarus manq'añ churasipkäma —sasa.
Joseax ukham jilanakapar chuymachäna, munasiñ arunakampiw jupanakar arst'arakïna.
Josean jiwxatapa
22Joseampi, awkipan wila masipankirinakampisti Egipto markan jakasipkakïnwa. Joseasti patak tunkan maraw jakäna, 23Efraín wawapan allchhinakaparus uñjasiwaykänwa. Ukhamarakiw Maquir allchhipan wawanakaparus wawapatjam katuqawayäna, Maquirasti Manasesan wawapänwa.
24Mä urusti Joseax jilanakaparuw säna: “Jiwañaxax jak'ankxiwa, ukampis Diosaw jumanakar yanapt'ir jutani, ukatsti aka markat irpsuwayxapxätamwa, kawkïr uraqtix Abrahamampiru, Isaacampiru, Jacobumpir churañatak arskäna uka uraqiru” sasa. 25Ukatsti Israelan wawanakaparux mä juramento lurayäna, sarakïnwa: “Chiqpachansa Diosaw jumanakar yanapt'ir jutani. Uka urusti jumanakax nayan ch'akhanakax akat apasxapxätawa” sasa.
26Joseasti patak tunkan maranïkän ukkhaw Egipto markan jiwxäna. Janchipsti suma qullanakamp jawsusaw mä cajonar uchxapxäna.
Currently Selected:
GÉNESIS 50: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
