Pigólí 3

Píɛ ayóómɛ kɛgɔd kɛ́ kɛ́yɛ́ɛ a Tɛ́mpɛl

1Wɔɔ́s wúmmú, pa Píɛ pɔ́lɛ́ na Sɛ́aŋ pɛ́ɛ́bág a Tɛ́mpɛl agɛɛn agɛɛlɛ pɛɔ́sɔ́gɔ́lɔ́n pɛ́ njə́ŋí ɛ́dáád ɛ wɔɔ́s. 2Kɛgɔd kímmú kɛ́yɛ́ɛ kɔ kiləndínə́ə́n a ɛbá yɛ́ udíyoog wó a nɛsɔd nɛ́ a Tɛ́mpɛl. Páyɛ́ɛ agodɔ́ŋɔn udíyoog ogo wóow pɔ́nɔ́: «Udíyoog ó kɔdɛ́ɛ.» Mɔɔd ogo yɛɛ́lɔ́b kɛgɔd əgín kɔ a niə́bíən niə́ŋ. Ɛ́nɛ́ wɔɔ́s, páyɛ́ɛ piim pámonyáŋɛn, pə́yiim əmuúligigi kɔ áay agolɛ́ba moom na pɔɔd pá páyɛ́ɛ agosɔ́dɔn a Tɛ́mpɛl. 3Ná yɛɛ́dála pa Píɛ pɔ́lɛ́ ná Sɛ́aŋ pɔ́ɔsɔd a Tɛ́mpɛl, aáság kobodɛ́gɛn ombɔg lɛ́ pámɔyɛ́ʼkɛn yoom. 4Pɔ́lɛ́ piim pə́yímubísin əngis, náa Píɛ ɔnɔ́ na nyɔ́lɛ́: «Ɛ́bɛdɛ́ʼtɛg!» 5Mɔɔd aáság kolɛŋ kobodɛ́ʼtɛg lɛ́ ayɛ́ɛ agofɛg lɛ́ pándamoyɛ́ʼkɛn yoom. 6Náa, Píɛ yiísə́ə́ ɔnɔ́ na nyɔ́lɛ́: «Mɛ ntɛɔ́gɔ na kóol, ntiɛn na mɔɔnɛ́. Kɛbán kímuʼ, nkə kɛ́ nkódíí, ndagoyɛ́ʼkɛn kɛ́lɛ́. Taa: A niiŋ nɛ́ Yə́sus Kilíʼtus mɔɔ́n ó Násalɛd, tɛ́ɛ́mɛn, ódáŋana!» 7Píɛ aáság kumuúgumin a ombɔg ó nɛnom, əmə́mudə́ə́míni. Ambaan á kɛgɔd yándɛ tə́ŋ, annasáŋ, na tulə́ŋ tuə́ŋ kɛ́. 8Aáság kucilib, aádɛ́lɛm kidə́níʼtən, əə́bə́ə́ kodáŋana. Yɛɛ́sɔ́d a Tɛ́mpɛl ondáŋ na pa Píɛ, aádáŋana, oósiodo, aányáadɛ Táán. 9Kiʼtúú kɛ́ pɔɔd kiim kɛ́ kɛ́yɛ́ɛ kɔ, kɛ́yɛ́moodála aádáŋana, aányáadɛ Táán. 10Pááság kolɛŋ lɛ́ mɔɔd nyɔ́ ayɛ́ɛ əguləndən a udíyoog ó Tɛ́mpɛl agolɛ́ba moom aa alɛɛ́nɔ. Udíyoog wóow páyɛ́ɛ agodɔ́ŋɔn lɛ́ «Udíyoog ó Kɔdɛ́ɛ». Nkó ɛ pɔɔd yɛɛ́bág, páyɛ́ɛ əgəə́wúunəni a nkə kɛ́ kɛ́másánɛ́ɛ́.

Tɔgɛ́ɛ́ tó Píɛ yɛɛ́sɔ́yɔ a Tɛ́mpɛl

11Wɔnɔ́ ná mɔɔd nyóon ayɛ́ɛ ədiiʼkíni kuliog a ɛbá ɛ́ pa Píɛ pɔ́lɛ́ na Sɛ́aŋ, ungim yɛɛ́nyá, páagɛɛnan na ɔʼtɛ́d kɔ́gɔ́ɔg kɛnɔ kɛ́ páyɛ́ɛ, a mogon mó noádɛʼ mó páyɛ́ɛ pɔdɔ́ŋɔn lɛ́ «Mogon mó a nɛsɔd nɛ́ Salomɔ́ɔŋ» 12Ná Píɛ yɛɛ́dála náan, yɛɛ́dɛ́lɛm agosɔyɔ na pɔɔd ɔnɔ́: «Pəŋi pɔɔd pá a Ɛ́sɛlayɛl, tuə́ áa polɛ əgəə́wúunəni náan lɛ́ wɔnɔ́ ná mɔɔd nyóonɛ amóóm ə́? Tuə́ aa poábɛdɛ́ʼtɛg náan wɔnɔ́ a toɛn tuə́s tó pəsibáamɔɛ́d agá aa tɛmámoyɛ́ɛ́lɛ lɛ́ ádáŋana, ɔmbɔ́ lɛ́ wɔnɔ́ ná tɛlɛɛ́ pɔɔd pá pə́ə́yísíníí a kəə́liʼtiniʼ ə? Ndóo.

13«Táán yɛ Ábɛlaam, Táán yɛ Ɛ́sag, Táán ɛ Yáʼkɔb, Táán ɛ pasɛʼkóón pə́ə́s#3.13 Kɛ́lɛ náan a kálaʼtaʼ yɛ Ɔsa 3.15 yoóloodi nugəm nó yɛɛ́ʼkɛ́nɛ́nɛ́ɛ́ na uʼkudin wəəŋ Yə́sus. Pəŋibáamɔɛ́d poyɛ́moólɛ́g na palaamɛʼ pá nigúu lɛ́ pámoyóon, pumə́əmuúʼtəm a udi ó Pɛláad ná ayɛ́ɛ əə́ʼkusəə lɛ́ nyɔ́lɛ́ əə́ndəmuúlis. 14Puíʼtə́m nyɔ́ ayɛ́ɛ ufúlúʼtú, nyɔ́lɛ́nyɔ́amɔɛ́d tɛn sáád, pumə́əŋíən agá na Pɛláad lɛ́ ə́buúlisin mɔɔd nyɔ́ alɛɛ́ ongoónanan. 15Náan aa poyóón nyɔ́ alɛɛ́ lɛ́ nyɔ́lɛ́ aa aágɛɛ́ʼkɛnanan ɔlaa. Náa, Táán ayɛ́moyóndɛ́gɛ, tɛlɛ pawɛ́sɛnɛg. 16Mɔɔd nyóonɛ nyɔ́ polɛɛ́ agodɛ́ʼtɛg, nyóonɛ nyɔ́ poálɛ́ŋ kɔŋɛʼ kɔŋɛʼ, a toɛn tó a niiŋ nɛ́ Yə́sus, niiŋ nɛ́ tɛágɛ́nɛ́ɛ́ oʼto a nɛ́lɛ́ aa amóóm náan wɔnɔ́ ná aáʼkoómɛ́ɛ́ a əngis yááŋan á pəŋi piim.

17«Pomóŋŋí, mbálɛŋ! Kɛ́lɛ lɛ́ a fiɛ́d kolɛŋ aa pəŋi na puʼkúm poáŋan póyɛ́ɛ́lɛ Yə́sus náan. 18Náa, nkə kɛ́ Táán yɛɛ́fɛ́g kɔ́gɔ́ɔg kalaʼ, kɛ́lɛ́ kɛ́go aa kɛ́yáás. Kɛ́lɛ nkə kɛ́ yiísə́ə́ a unuʼ ó palɔɛgɛʼ pɛbán pə́ə́ŋ lɛ́ Məsíi yəəŋ ɛlɛ́ɛ́ konɛ ntɔ́b. 19Ə́súʼkíən anɛ́ɛ́n, púliogi ongoo a mabɛ́, púimbuúlini ná Táán alɛɛ́ agɛɛlɛ lɛ́ ə́buúlisin mabɛ́ mááŋan. 20Áay, Sə́dúk alɛ́ɛ́ koboyɛ́ʼkɛn kɛnɛŋ kɛ́ kooyig, áabodómɛn Yə́sus, Məsíi yɛ́ əyíbuyííyídin kɔ́gɔ́ɔg kalaʼ. 21A kó nɛ́gɔŋ, Yə́sus yiígóodi lɛ́ áyag kɛɛn ələndin a mɔɛn, súʼtə́ə́ agɛɛn əgiig a wɔɔ́s wó Táán alɛ́ɛ́ kɛɛlɛɛ́ lɛ́ pɛbán piim pɛán pɛwa. Nkə kɛ́ yiísə́ə́ əgín kɔ́gɔ́ɔg kalaʼ a unuʼ ó palɔɛgɛʼ pɛbán pə́ə́ŋ áa kɛ́ɛg. 22Moyíis yiísə́ə́ kɔmɔɛ́d ɔnɔ́: “Sə́dúk Táán waaŋan alɛ́ɛ́ kɛɛlɛ lɛ́ ɔndɔɛgɛʼ pɛbán wəəŋ wɔnɔ́ mɛ álon a kibúúm kɛáŋan. Polɛ́ɛ́ koob nkə kɛ́ alɛ́ɛ́ kobodɛ́anɛɛ́. 23Ungim nyɔ́ alɛ́ɛ́ kosáŋɛnɛɛ́ koob tɔgɛ́ɛ́ tó ɔndɔɛgɛʼ pɛbán o Táán, pálɛ́ɛ́ kumuúliogi a ondáŋ wó ndɛg ɛ Táán, ə́əgu#3.23 Kusiəd a angɛŋ 22 əgiig a 23, kɛ́lɛ náan a kálaʼtaʼ ɛ Tɛʼt 18.15, 18, 19 ” 24Palɔɛgɛʼ pɛbán pá Táán piim, Əgəə́bə́ə na Samowɛ́ɛl, na pɔsɔ́g pá pə́yíím a ngim, pɛ́ɛ́sɔ́yɔ tɛn nkə kɛ́ɛnɛ kɛ́ kɛ́lɛɛ́ agaásan a mədúg móonɛ má tigódíí. 25Pəŋi aa polɛɛ́ pɔɔ́n pá palɔɛgɛʼ pɛbán pá Táán, pɔɔ́n pá a nɛálad nɛ́ Táán ayáágánan na pasɛ pááŋan a kɛnɛŋ kɛ́ yɛɛ́dɛánɛ na Ábɛlaam ɔnɔ́: “Ndɛ́ɛ́ kɛɛlɛnɛ puog pó pɔɔd puim pó a nsí kɔŋɛʼ a ngim yɛ ndɛg yaaŋ#3.25 Kɛ́lɛ náan a kálaʼtaʼ ɛ Siɛ 22.18 ” 26A kidíídí kɛáŋan aa Táán yɛɛ́yáŋ agɛɛlɛ lɛ́ uʼkudin wəəŋ yíim álon. Ayɛ́moodóm lɛ́ ná áboyɛ́ɛlɛ kɔŋɛʼ, ɛ́nɛ́ mɔɔd a ondáŋ wááŋan ədúm ngim na pɛbán piə́ŋ pɛ́ pɛbɛ́.»

Currently Selected:

Pigólí 3: yatDBL

Highlight

Copy