LÓʼKAS 13

Kasɛ ɔlaa, náan fiɛ́d olɛ kɛlóŋ

1Əgín a kɛnɛŋ kɛ́go kɛ́ɛg, pɔɔd pə́mmú pááság kiim adɛ́anɛ na Yə́sus wɔnɔ́ ná a kɛnɛŋ kɛ́ pibíəniʼ pɛ́ Kalilə́ə pɛ́yɛ́ɛ agɛɛ́ʼkɛn pɛfɔny pɛɔ́bɔn na Táán, Pɛláad aáság kɛɛlɛ lɛ́ páboyóóna. 2Yə́sus aáság kubuyúlisini ɔnɔ́ na pɔ́lɛ́: «Polɛ agofɛg lɛ́ páyóóna pibíəniʼ pɛ́ Kalilə́ə pɛ́ɛb lɛ́ pɔ́lɛ́ páyɛ́ɛ pɛɛlɛ mabɛ́ agaáyɛn pɔɔ́npásɛ pɔ́ɔ́bɔn pɛ́ndɛ́ŋ á? 3Ndabodɛ́anɛ lɛ́ ndóo. Náa, pəŋi poʼkasɛnɛ ɔlaa wááŋan, puəwu tɛn náan yoom ímuʼ wɔnɔ́ pɔ́lɛ́. 4Nto tɛn puuniʼ na ɛ́dáád yɛ́ noádɛʼ nó nogóón nó a Silowə́ə nuídə́ə́ŋə́nən, noáság koboyóóna, poafɛg lɛ́ páyɛ́ɛ na nsɔ́ɔ́ agaáyɛn pɔsɔ́g piim pá a Yolósalɛm a? 5Ndabodɛ́anɛ lɛ́ ndóo. Náa, pəŋi poʼkasɛnɛ ɔlaa wááŋan, puəwu tɛn náan yoom ímuʼ wɔnɔ́ pɔ́lɛ́.»

Yə́sus yiísíəd nkaʼtɛ́n na wɛɛn wó údiʼkə́əguúmíí

6Yə́sus aáság kubuúsiədin nkaʼtɛ́n yɛ́ɛnɛ, ɔnɔ́: «Mɔɔd anyóon ayɛ́ɛ na wɛɛn wə́ə́ŋ a pɔlɛ́m. Aáság kiim lɛ́ ágɛ́sa, amboan yoom. 7Náa ɔnɔ́ na mɔɔd nyɔ́ ayɛ́ɛ osóboni pɔlɛ́m puə́ŋ: “Táá, pɛag a pɛ́ɛnɛ pɛ́dáád wɔnɔ́ ná ndɛɛ́ əgiimən lɛ́ nkɛ́sa ambɛn, ntɛboan yoom. Sóm wólɛ́, ódɛyɛ́bɛníɛn kɛnɔ iyó.” 8Náa, uʼkudin nyóon aáság kumuyúlisini ɔnɔ́ na nyɔ́lɛ́: “Sə́dúk, ímuudí kə́mmú waag wóonɛ, ndəədímə nyə́gingilidi nidíŋ, ná nyáágan nsí ɛ kiliʼkii kɔ. 9Amaʼkɛɛlɛ wə́əguum a waag wó wə́əgiim. Údiúmin áay, úusəə lɛ́ pə́də́əŋi”.»

A wɔɔ́s ó kisúgiʼ wúmmú, Yə́sus ayóómɛ ɔʼkɛ́ɛd nyɔ́ ayɛ́ɛ na kɛnɛ́m

10A wɔɔ́s wúmmú ó kisúgiʼ kɛ́ Yúdɛn, Yə́sus ayɛ́ɛ agaaʼkananɛ pɔɔd a yoog ɛ pɛɔ́sɔ́gɔ́lɔ́n. 11Ɔʼkɛ́ɛd nyummú ayɛ́ɛ kɔ nyɔ́ uŋun wó ɔmbɛ́ óyɛ́ɛ na nyɔ́lɛ́. Uŋun wóow óyɛ́moyɛ́ʼkɛn kɛnɛ́m kɛ́ kíyímuyúúd, adɛáʼkɛ kaábɛ́nɛn. Ayɛ́ɛ aáʼkɛɛlɛ na kobany kóog, pɛag puuniʼ na pɛ́dáád. 12Ná Yə́sus yɛɛ́dála ɔʼkɛ́ɛd nyóon, aáság komodɔ́ŋɔn, náa ɔnɔ́ na nyɔ́lɛ́: «Ɛ́ya, mbágodáálɛ aá, kɛnɛ́m kɛáŋ kɛáman.» 13Aáság komoyábɛgɛn ɔmbɔg, ɔʼkɛ́ɛd tə́ŋ, əə́bə́ə́ kɛɛ́ʼkɛn nugəm na Táán.

14Nkúm ɛ yoog ɛ pɛɔ́sɔ́gɔ́lɔ́n yɛ́ɛy ɛyóób ilúún na nkə kɛ́ɛg kɛ́ Yə́sus ayɛ́ɛ́lɛ wɔɔ́s ó kisúgiʼ, əə́bə́ə́ kosɔyɔ na kiʼtúú kɛ́ pɔɔd kɛ́ kɛ́yɛ́ɛ kɔ áay, ɔnɔ́: «Tɛlɛ na mədúg máʼtáan na úmmuʼ má tigódíí lɛ́ tígud a mɔ́lɛ́#13.14 Kɛ́lɛ náan a kálaʼtaʼ yɛ Ɔsa 20.9-10; Tɛʼt 5.13-14 A mɔɔ́s móom aa púimənií ná páboyóómanɛ a mabámbany mááŋan, adɛ́njaŋ a wɔɔ́s ó kisúgiʼ.» 15Sə́dúk əyímuyúlísíni ɔnɔ́: «Pəŋi, polɛ moɔ́ŋɛ́ná pusú! Wɔɔ́s ó kisúgiʼ, adɛ́ ándɛ puógondin káwoʼ yaaŋan, ɔmbɔ́ lɛ́ jáʼkáas yaaŋan agɛɛn na yɛ́lɛ́ a məní lɛ́ áŋo aa? 16Náa, ɔʼkɛ́ɛd nyóonɛ oʼ? Ntóón yɛ́ a yoog ɛ pɔɔd yɛ Ábɛlaam yɛ́ɛnɛ yɛ́ Sáʼtan yɛɛ́góda aándɛɛ́ pɛag puuniʼ na pɛ́dáád, kɛ́dɛɔ́gɔ kɔŋɛʼ lɛ́ pə́muyóndin a kɛáŋ kɛ́ɛg wɔɔ́s ó kisúgiʼ ə?» 17Niúlisi niə́ŋ nɛ́ɛn nɛ́yɛ́ʼkɛn pabɛnɛn pə́ə́ŋ piim oʼto kono. Náa, kiʼtúú kɛ́ pɔɔd kiim kɛ́ kɛ́yɛ́ɛ kɔ áay, kɛ́yɛ́ɛ agɔnyɔ́gɛla na ndam ɛ pɛbán yɛ́ɛy ngim yɛ́ ayɛ́ɛ agɛɛlanɛ.

Nkaʼtɛ́n yɛ nsám ɛ moʼtáadɛ na ɛ toan tó kunudi umbúb

(Maʼt 13.31-33; Mə́l 4.30-32)

18Náa Yə́sus ɔnɔ́: «Nɛlaamɛʼ nɛ́ Táán nɛáŋwáŋánan nkə áŋ? Na igə aa ndɛɛ́ ogofɛg nɛ́lɛ́ áŋ? 19Taa, nɛ́lɛ náanɛ wɔnɔ́ nsám ɛ moʼtáadɛ yɛ́ mɔɔd nyummú ayɛ́ɛ́n agon a pɔlɛ́m puə́ŋ. Yɛɛ́lóg, yaáyáma, ɛmáán kiɛd, pɛsag pímíim awáaga aŋŋany kɔ a ntab yəəŋ.» 20Yə́sus ayɛ́ɛ́n na tɔgɛ́ɛ́ yuudi ɔnɔ́: «Na nkə tɛn kímmú kɛ́yaán aa nfɛgɛɛ́ Nɛlaamɛʼ nɛ́ Táán áŋ? 21Nɛ́lɛ náanɛ wɔnɔ́ mayaa má toan tó kunudi umbúb má ɔʼkɛ́ɛd alɛɛ́ agodɔb na ɛ́fɔlɛ́ yɛ́ umbúb óság kobágan.»

Udíyoog ólɛ ommɔ́ɔ́mɔ́sɛ

22A niɛn nɛ́ Yə́sus ayɛ́ɛ agɛɛn a Yolósalɛm, yɛɛ́sánan a pabálɛ́ɛg na əʼkúu yá əndiʼti. Ayɛ́ɛ agɛɛn əə́giim yáaʼkananɛ pɔɔd.

(Maʼt 7.13-14)

23Náa mɔɔd nyummú əə́muŋíən ɔnɔ́: «Sə́dúk ngɔ́ɔ́, əgín ngab ɛ pɔɔd sɔɔŋ súg áa ɛlɛ́ɛ́ kɔɔyɛɛ́ á?» Yə́sus əyúlísi ɔnɔ́: 24«Ágɔ́nɛ́gɛ́an agɛɛlɛ lɛ́ pósɔd yɛ́ a udíyoog wó ólɛɛ́ ommɔ́ɔ́mɔ́sɛ lɛ́ fɔ́lɔ́b áa ndɛɛ́ əgusəə. Piíŋ pálɛ́ɛ́ kuunə kosɔd, pádɛáʼkɛ.

(Maʼt 25.10-12)

25«Əlígi mɔɔd o noádɛʼ aáʼkodɛ́ɛmɛn, əə́ʼkubuəg yoog, aáʼkofany, ná pəŋi pá polɛ́ɛ́ kolɔbɛɛ́ a táán púbə́ə́ kogɔʼtɔn umbuús, poámodɔ́ŋɔnɔ, poɔʼkɔ́: “Sə́dúg, Sə́dúg wɛ! Íbibuə́n!” Alɛ́ɛ́ kubuyúlisini ɔnɔ́ na pəŋi: “Ntɛboólɛŋɛn ó! Pəŋi póob ntɛlɛŋɛn ə́lə́ə́ áa puə́giim.”

(Maʼt 7.22-23)

26«Ná pəŋi pómodɛ́anɛ poɔʼkɔ́ na nyɔ́lɛ́: “Adɛ́ tɛɛ́nɛ́ɛ́nɛ, tɛáŋó poloʼ na wɛ a! Adɛ́ Oyáʼkánánɛ pɔɔd a pɛdom piə́s ə́!” 27Ná nyɔ́lɛ́ yíiʼkini kobodɛ́anɛ ɔnɔ́ na pəŋi: “Ntɛlɛŋɛn páyaán áa polɛɛ́ ó! Ə́suídíən káag laálá na mɛ, pəŋi pá poágɛɛlanɛ kɔbɛ́.”

(Maʼt 8.11, 12)

28«Ná poádála Ábɛlaam, na Ɛ́sag, na Yáʼkɔb, na palɔɛgɛʼ pɛbán pá Táán piim a Nɛlaamɛʼ nɛ́ Táán, pəŋi padoán a táán, polɛ́ɛ́ kɛɛn kɔ́gɔ́ɔg əgín mandɛɛ na mandɛɛ, əgín pɛgɛg kaágáma. 29Pɔɔd pálɛ́ɛ́ kiim pádɛ́ɛman lɛ́ na pɔsɔ́g pá a noá nó ándɛ wɔɔ́s wə́əgiim ódɛ́ɛmɛn, na pá a noá nó ándɛ wáagɛɛn agɛɛ́mɛŋan, na pɔsɔ́g tɛn pá kobag na pá kusuu, əgiimən a kɛsɛɛn kɛ́ a Nɛlaamɛʼ nɛ́ Táán.

(Maʼt 19.30, 20.16; Mə́l 10.31)

30«Náan, pə́mmú pá pálɛɛ́ nɛ́gɔŋ ngim, pálɛ́ɛ́ kosan yuudi, pə́mmú tɛn pá pálɛɛ́ nɛ́gɔŋ yuudi pálɛ́ɛ́ kuúlini ngim.»

Yə́sus alɛ sásaad na kugu

31A kɛnɛŋ kɛ́go kɛ́ɛg, Pafalɛsɛyɛ́ɛŋ pə́mmú pááság kiim pááyɛʼtɛnɛ, náa pɔ́nɔ́ na Yə́sus: «Tɛ́ɛ́mɛn, wɛ́ɛn kɛnɔ kɛ́ndɛ́ŋ, Ɛlóod alɛ anyɔ́ŋɛn kogoyóon.» 32Aáság kubuyúlisini ɔnɔ́ na pɔ́lɛ́: «Todáan adɛ́anɛ na kɛyɛɛ́njɛ́m kɛ́ɛg poɔʼkɔ́: Taa, na naánɛ́, na na koany, ndɛ agoŋɛ́ŋŋaŋ məŋun má mabɛ́, ndáagoómanɛ mabámbany, ná a mədúg mádáád, nyóon anɛ́ɛ́n oʼto a pigólí pɛ́am. 33Kɛbán kímuʼ, nkóódi lɛ́ nyɛ́ɛn yuudi na mɛ ngə́ naánɛ́, na na koany na a wɔɔ́s wó wə́əyə́ən lɛ́ kídíəguunə lɛ́ póon ɔndɔɛgɛʼ pɛbán o Táán kɛnɔ kɛ́ndɛ́ŋ ná kɛ́sánɛn əgín lɛ́ a Yolósalɛm.

Yə́sus ayálɛ́lɛ́ɛ́ a kidíídí kɛ́ Yolósalɛm

(Maʼt 23.37-39)

34«Əə́əy Yolósalɛm! Yolósalɛm, əə́əy na wɛ nyɔ́ olɛɛ́ agoóna palɔɛgɛʼ pɛbán pá Táán, pɔɔd pá Táán alɛɛ́ agodóman, waábodóan na aʼtáán lɛ́ pə́guə́ʼkən. Njúúnə lɛ́ nyágɔnyɛdɛn pɔɔ́n pááŋ a ɛbá yáam pɛnɛŋ wɔnɔ́ pɛnɛŋ, wɔnɔ́ ná ándɛ nsɛɛ yə́əgəə́gúlig pɔɔ́n a nfaáan yəəŋ. Náa pəŋi podɛʼkáagɛnyaáʼkɛnɛ! 35Táán alɛ́ɛ́ kobodóɛn uʼkóó wááŋan. Náa ndábodɛ́anɛ lɛ́ Əgəə́bə́ə nɛ́gɔŋ, podɛágɛʼtála kə́mmú, súʼtə́ə́ ná polɛ́ɛ́ kusəlií poɔʼkɔ́: Táán ágoyɛ́ɛlɛ kɔŋɛʼ, wɛ nyɔ́ alɛɛ́ əgiim a niiŋ nɛ́ Sə́dúk#13.35 Táán alɛ́ɛ́ kobodóɛn uʼkóó wááŋan: (Pódála tɛn náan a kálaʼtaʼ ɛ Siə 22.5) …súʼtə́ə́ ná polɛ́ɛ́ kusəlií poɔʼkɔ́: (Kɛ́lɛ náan a kálaʼtaʼ ɛ Maʼt 23.39.) «Táán ágoyɛ́ɛlɛ kɔŋɛʼ, wɛ nyɔ́ olɛɛ́ əgiim a niiŋ nɛ́ Sə́dúk.» (Kɛ́lɛ náan a Pɛʼk 118.26.)!»

Currently Selected:

LÓʼKAS 13: yatDBL

Highlight

Copy