LÓʼKAS 14

Yə́sus ayóómɛ ombámbany wɔɔ́s ó kisúgiʼ kɛ́ Yúdɛn

1A wɔɔ́s wúmmú ó kisúgiʼ kɛ́ Yúdɛn, Yə́sus ayɛ́ɛ́n anɛ́ɛnɛ a nó nkúm ɛ Pafalɛsɛyɛ́ɛŋ yimmú. Pɔɔd pá páyɛ́ɛ kɔ, páyɛ́ɛ amoócɛʼtɛ kɔŋɛʼ kɔŋɛʼ. 2Náan aa mɔɔd nyummú yɛɛ́dɛ́lɛmɛn kɔ áay a udi wə́ə́ŋ. Mɔɔd ogo nyóon yiíləŋin. 3Yə́sus aáság kusiəd tɔgɛ́ɛ́, náa ɔnɔ́ na palɛŋ pɛcɛm, na Pafalɛsɛyɛ́ɛŋ: «A pɛcɛm piə́s, tɛlɛ filí lɛ́ tɛómɛ ombámbany wɔɔ́s ó kisúgiʼ ə?» 4Pááság komoyáámɛn, ɔmbɔ́ əgín pɛbɛɛ. Yə́sus aáság kodɔ́bɛd ombámbany nyóon, amámoyóómɛ, ɔnɔ́ na nyɔ́lɛ́, yɛ́ɛn. 5Náa aáboyágasɛnɛ, ɔnɔ́: «Oyaán úmmuʼ aa a ondáŋ wááŋan alɛɛ́ ogɛɛn lɛ́ alɛ na mɔɔ́n wəəŋ, ɔmbɔ́ lɛ́ na káwoʼ yəəŋ náa yəə́də́əŋ a niɛ́ ɔ́ɔlɔb lɛ́ adɛálónɛ ɔmbɔ́ kíɛn a wɔɔ́s ó kisúgiʼ ə́?» 6Pádɛʼkáagaáʼkɛ kumuyúlisini kɛbán na kɛbán.

Oʼkɔɔ óyaán áa aádɛ́ɛ́ kiiyid

7Yə́sus yɛɛ́dála wɔnɔ́ ná pəən pá a kɛsɛɛn páyɛ́ɛ agobɔgɔnɔn mɔʼkɔɔ má yuudi əguləndin. Əyíbusiə́din nkaʼtɛ́n yɛ́ɛnɛ, ɔnɔ́: 8«Pámaʼkogodɔ́ŋɔn a kɛsɛɛn, odɛnjɛ́ɛ́n ələndin a oʼkɔɔ ó yuudi lɛ́ amaʼkɛɛlɛ pɔ́ɔ́dɔ́ŋɔn kɔ a wɔɔ́n wóow, mɔɔd nyɔ́ amágoyááyɛn wɛ 9ná mɔɔd nyɔ́ amáboodɔ́ŋɔn pəŋi piim lɛ́ na wɛ na nyɔ́lɛ́, ədínjíim agodɛ́anɛ lɛ́ ódɛ́ɛmɛn, wɛ́ʼkɛn sɔ́g nyóon oʼkɔɔ. Kɛnɛŋ kɛ́ɛg wadɛ́ɛmɛn na kaaŋ kuim agɛɛn ələndin a oʼkɔɔ wó a ngim. 10Ndóo, pámaʼkogodɔ́ŋɔn a kɛsɛɛn, tod ələndin a oʼkɔɔ wó a ngim, agɛɛlɛ lɛ́, ná mɔɔd nyɔ́ amágoodɔ́ŋɔn əə́giim əgiig, ágoodɔ́ŋɔn, ɔnɔ́: “Sɔ́g waam, mɛ́ɛn ələndin káanɛ a oʼkɔɔ ólaŋ#14.10 Kusiəd a angɛŋ 8 əgiig a 10, pódála tɛn náan a kálaʼtaʼ ɛ Pos 25.6-7 ” Náan, wagɛɛn na nugəm a udi ó pɔsɔ́g piim pá páanɛ́ɛnɛ na wɛ. 11Kɛ́lɛ lɛ́, nyɔ́ alɛ́ɛ́ kaábágɛdɛɛ́, pálɛ́ɛ́ kumuúsuuli. Náa nyɔ́ alɛ́ɛ́ kəə́sulií nkó a nsí, pálɛ́ɛ́ komobágɛdɛ.»

Tɔ́ŋɔ́nɔ mɔsɔ́gasɔ́gá a kɛsɛɛn kɛáŋ

12Aáság kodɛ́anɛ tɛn na mɔɔd nyɔ́ ayɛ́moodɔ́ŋɔn, ɔnɔ́: «Wɔɔ́ndɔdɔ́ŋɔnɔ pɔɔd agonɛ́ɛnɛ, ɔmbɔ́ na wɔɔ́s, ɔmbɔ́ na niób, odɛʼtɔ́ŋɔ́nɔ pɔsɔ́sɔ́g pááŋ, ɔmbɔ́ lɛ́ pomóŋŋí pááŋ, ɔmbɔ́ yoog yaaŋ ɛ pɔɔd, ɔmbɔ́ pɔsɔ́g pá tugúm lɛ́, pɔ́lɛ́ tɛn páagodɔ́ŋɔn agonɛ́ɛnɛ na koany. Áay, wɔɔ́ʼkɔɔŋ pɛsáábɔ́n a nkə kɛ́ omáboyɛ́ʼkɛn. 13Ndóo, waándagɛɛlɛ wɔɔ́n, tɔ́ŋɔ́nɔ mɔsɔ́gasɔ́gá, pɛgɔd, pɔɔd pá pɛnɛ́m, powongwóg. 14Náan wagɛɛn kɔŋɛʼ lɛ́ pɔ́lɛ́ póʼkóodi yoom íguguyúlisini. Táán alɛ́ɛ́ kuguyúlisini ná pá páyɛ́ɛ sáád pálɛ́ɛ́ koóndɛgan.»

Nkaʼtɛ́n ɛ mɔsɔ́gasɔ́gá mó pɛ́ɛ́dɔ́ŋɔn a oʼkɔɔ ó pɔsɔ́g pá páyɛ́ɛ pɔdɔ́ŋɔ́nɔ́ɔ́n

(Maʼt 22.1-10)

15Ná mɔɔd nyummú nyɔ́ ayɛ́ɛ a ondáŋ ó pɔɔd pá pɛ́ɛ́dɔ́ŋɔn kɔ a wɔɔ́n wóow ayóób tɔgɛ́ɛ́ tóod, yiísə́ə́ ɔnɔ́ na Yə́sus: «Kɔŋɛʼ na nyɔ́ alɛ́ɛ́ kusiədií ngab a kɛsɛɛn kɛ́ a Nɛlaamɛʼ nɛ́ Táán!» 16Yə́sus əyímusiə́din nkaʼtɛ́n yɛ́ɛnɛ, ɔnɔ́: «Mɔɔd aa nyóon ayɛ́ɛ́lánɛ kɛa kɛ́ kɛsɛɛn, ɔɔ́dɔ́ŋɔ́nɔ pɔɔd piíŋ a kɛ́lɛ́. 17Ná kɛnɛŋ kɛ́ konɛ́ɛnɛ kíyííg, aáság kodom uʼkudin wəəŋ lɛ́ yɛ́ɛn adɛ́anɛ na pɔɔd pá yɛɛ́dɔ́ŋɔ́nɔ a wɔɔ́n, píimən, moom muim moándɛ musóbíniə́n.

18«Pə́ə́bə́ə́ kaásáŋɛnanɛ pɔ́lɛ́ piim lɛ́ nyóonɛ ɔnɔ́: “Nyooŋɛ́nɛ́nɛ pɔlɛ́m əgín a mədúg móonɛ, kíəguunə lɛ́ nyɛ́ɛn adála pólɛ́, sɛ́gɔɔ yɛ́cɛ́nɛn.” 19Nyummú ɔnɔ́: “Mɛ njɛɛ́wɛ́ɛ́n paʼkáwoʼ pá kobása pábaan pábaan náan annam áʼtáan. Kíəginjuunə lɛ́ nyɛ́ɛn afɛg kugud na pólɛ́, sɛ́gɔɔ yɛ́cɛ́nɛn.” 20Nyummú tɛn yiísə́ə́ ɔnɔ́: “Mɛ, nsiədín ɔʼkɛ́ɛd əgín a mədúg móonɛ, ntɛɔ́gɔ ugiim.”

21«Uʼkudin nyóon aáság kuúlini agɛɛn adɛ́anɛ na sə́dúg wəəŋ nkə kiim kɛ́ pə́yímuyúlísíni. Mɔɔd o noádɛʼ aáság koob ilúún, náa ɔnɔ́ na uʼkudin wəəŋ: “Ə́bísígíí kɛɛn a pɛdom pɛ́ a pálɛ́ɛg, na a angag á pungə́, wíim úsiəd lɛ́ na mɔsɔ́gasɔ́gá, na pɛgɔd, na pɔɔd pá woog, na pá pɛnɛ́m.” 22Uʼkudin aáság kɛɛn, əmímbuúlíni, náa ɔnɔ́ na sə́dúg wəəŋ: “Sə́dúg, mbáʼkɛɛn əsug, mbɛ́ɛ́lɛ nkə kɛ́ wəə́səə, náa mɔʼkɔɔ mə́ligi.” 23Náa sə́dúg ɔnɔ́ na nyɔ́lɛ́: “Tod a pungə́ pó kidun, úyə́njən malɛ́m, ógóda pɔɔd lɛ́ píimən, noádɛʼ nóam núyə́əg.” 24Ndabodɛ́anɛ lɛ́, ɔmbɔ́ úmmuʼ a pá páyɛ́ɛ pɔdɔ́ŋɔ́nɔ́ɔ́n, adɛágoóʼtɛn moom mó konɛ móam!»

Agɛɛlɛ lɛ́ wɛ́ɛn a ondáŋ ó paaʼkan pá Yə́sus

25Yə́sus ayɛ́ɛ agɛɛn, kiʼtúú kɛ́ pɔɔd kíəmuyə́ən a ngim súuu. Náa aágaágasɛ, ɔnɔ́ na pɔ́lɛ́: 26«Nyɔ́ ɔnɔ́ nyɔ́lɛ́ aagɛɛn ongaaʼkan waam ogóódi lɛ́ yɛ́nnyɔ́ŋɛn agosan wɔnɔ́ ná aányɔ́ŋɛn sɛ, na ŋŋí, na oʼkán, na pɔɔ́n, na pomóŋŋí pá pagɛ́ɛd na pá panɔ́mɛɛd. Ogóódi lɛ́ yɛ́nnyɔ́ŋɛn agosan wɔnɔ́ ná aágaányɔ́ŋɛn nyɔ́lɛ́nyɔ́amɔɛ́d. Náan fiɛ́d ɔdɛɔ́gɔ ogɛɛn ongaaʼkan waam. 27Nyɔ́ ədiə́lúlinií ɔmbásá wə́ə́ŋ əgiim yínjə́ən, nyóon ɔdɛɔ́gɔ ogɛɛn ongaaʼkan waam.

28«Tísəə lɛ́ wɛ nyummú waanyɔ́ŋɛn kowáag noádɛʼ nó lóóŋ a mɔɛn, nkə aa waáyaŋ agɛɛlɛ? Adɛ́ waayaŋ ələndin a nsí, ósóngɛ yiim yɛ́ yə́əguyúunən, ódála nga mɔɔnɛ́ mááŋ mə́əguyíigin agɛɛlɛ lɛ́ óman ongwáag wóow a? 29Náan fiɛ́d óoʼ, uməʼkəə́bə́ə́, unjibə́nən, ungim nyɔ́ aágoodála, adɛ́ aagoóŋɔnɔ 30ɔnɔ́: “Táá mɔɔd nyóonɛ ə́, əyə́ʼtúmíí ongwáag wáʼkomoyag!”

31«Tísəə tɛn lɛ́ nkúm ɛyaán áa ɛlɛɛ́ ɛgɛɛlɛ lɛ́ yaándagɛɛn anɔɛyɛ pɛdá na nkúm yimmú, yɛnjaŋ áa ləndin agaásóngɛ nga na tɔ́ɔ́sɛn yəəŋ ɛ pɔɔd yówád alɛ ogoʼpɛm pɛdá na sɔ́g nyóʼkáag nyɔ́ ogódíí tɔ́ɔ́sɛn ɛ pɔɔd niʼtin. 32Amaʼkodála lɛ́ nyɔ́lɛ́ ɔdɛɔ́gɔ ogoʼpɛm, aadómɛn nkúm yɛ́ʼkáag pɔɔd ná iligi laálá lɛ́ pɛ́ɛn amodɛ́anɛ, pɔ́lɛ́ pááyóóbanan, pɛ́ɛlɛ uŋóón.

33«Taa, náan aa kɛ́lɛɛ́ kɛɛnɛɛ́ tɛn a pəŋi. Mɔɔd əfə́gidini oʼto na nkə kiim kɛ́ ogódíí, ɔdɛɔ́gɔ ogɛɛn ongaaʼkan waam.

Yə́sus yiísíəd nkaʼtɛ́n na məbə́lí má máʼkosolɛɛ́

(Maʼt 5.13; Mə́l 9.50)

34«Ɛɛ́ɛ, məbə́lí málɛ yoom ɛ́laŋ. Náa, kɛnɛŋ kɛ́ máʼkosolɛɛ́, ngə́ igiiʼkini kɛɛlɛ lɛ́ mósob kə́mmú yindigi. 35Mə́ndigi tɛn maŋɛʼ, fiɛ́d na pigólí ɔmbɔ́ əgín a nsí, ɔmbɔ́ sɛ́ɛb a kiliʼkii; mándɛ agá lɛ́ pádo kodoán a táán. Taa, wɛ nyɔ́ olɛɛ́ na ntóɛŋ ɛgoob, óyoob!»

Currently Selected:

LÓʼKAS 14: yatDBL

Highlight

Copy