LÓʼKAS 15

Yə́sus yiísíəd nkaʼtɛ́n na nodóm nó nuíním

1Pagɔ́mmanɛʼ mag na pɛɛlanɛʼ mabɛ́ páyɛ́ɛ pɛɛnan pɔ́lɛ́ piim ná Yə́sus alɛɛ́, agɛɛn agoob tɔgɛ́ɛ́ tuə́ŋ. 2Náa Pafalɛsɛyɛ́ɛŋ na palɛŋ pɛcɛm pə́əgəə́bə́ə́ kumuə́lúluu, pɔ́nɔ́: «Táá mɔɔd nyóonɛ taa! Alɛ əgusiəd pɛɛlanɛʼ mabɛ́ kɔŋɛʼ, aánɛ́ɛnɛ ondáŋ na pɔ́lɛ́#15.2 A nɛaʼkananɛʼ nɛɔ́bɔn, kɛ́yɛ́ɛ lɛ́ mɔɔd amaʼkonɛ́ɛnɛ na mɔɔd nyɔ́ páálɛŋ lɛ́ ɔdɛɔ́gɔ ommoáŋáán, wɛ tɛn umə́ə́fílə́níí.!»

3Yə́sus əyíbusiə́din nkaʼtɛ́n yɛ́ɛnɛ, ɔnɔ́: 4«Tísəə lɛ́ nyummú a ondáŋ wááŋan ogóódi todóm əʼtin áʼtáan, náa númuʼ nuə́ním. Aagɛɛlɛ tuə́? Adɛáyaŋ kudi ə́mə́dí tóonɛ tó əʼtin ə́niʼ na puuniʼ na túniʼ a ɔdɛ, agoyag kɛɛn əguunə nó nuə́ním, súʼtə́ə́ əgín ɔɔ́ʼkɔɔŋ ɔ? 5Ná wɔɔ́gɔɔŋ oʼ, adɛ́ wəgiim wə́lúu a kɛɔsɛd na tɔnyɔ́g tuim, 6wíim əgiig na nólɛ́ a noádɛʼ, ónyama piim pá pálɛɛ́ ndúmiʼ na wɛ, wɔʼkɔ́ na pɔ́lɛ́ píimən, pányɔ́ga na wɛ lɛ́ nodóm noáŋ nó nuíním, waáʼkɛɛn ɔgɔɔŋ ɔ! 7A fɔ́lɔ́b ndabodɛ́anɛ lɛ́ náan tɛn yoom ímuʼ aa kɛ́lɛ́ɛ́ kɛɛnɛɛ́ a mɔɛn, kɛnɛŋ kɛ́ ɔngɛɛlɛʼ kɔbɛ́ úmmuʼ aágasɛ ɔlaa. Tɔnyɔ́g tólɛ́ɛ́ kɛɛn kɔ kɛlaŋanan agaáyɛn tó tólɛɛ́ a pɔɔd əʼtin ə́niʼ na puuniʼ na pə́niʼ pá pálɛɛ́ sáád, kídíəgunəə́ lɛ́ págasɛ ɔlaa.»

Yə́sus yiísíəd nkaʼtɛ́n na mɔɔnɛ́ má mííním

8«Tísəə ɔmbɔ́ lɛ́ ɔʼkɛ́ɛd anyóon alɛɛ́ na mɔɔnɛ́ mə́ə́ŋ, pisúg pɛówád, náa kímuʼ kiə́ním. Tuə́ áa aágɛɛlɛ? Adɛ́ əəguug piʼtíləʼ piə́ŋ, ná ə́siəd kiɛsɛʼ, yóóla yoog yəəŋ na a əʼkid kɛ́, əguunə kisúg kɛ́ɛg kímuʼ kɛ́ kiə́ním súʼtə́ə́ ɔɔ́ʼkɔɔŋ ɔ? 9Ná ɔɔ́gɔɔŋ, aanyama pɔsɔ́sɔ́g pə́ə́ŋ na ungim nyɔ́ alɛɛ́ ndúmiʼ na nyɔ́lɛ́, ɔnɔ́: “Mɛ́naan, pɔ́nyɔ́ga na mɛ lɛ́ mbɔ́ɔ́ŋ mɔɔnɛ́ máam má mííním.” 10Ndabodɛ́anɛ na pəŋi lɛ́, náan tɛn aa ándɛ məŋun má maʼtom má Táán máanyɔ́ga, kɛnɛŋ kiim kɛ́ ɔngɛɛlɛʼ kɔbɛ́ úmmuʼ aágasɛ ɔlaa wə́ə́ŋ.»

Nkaʼtɛ́n ɛ sɛ a pɔɔ́n, na pɔɔ́n pə́ə́ŋ pábaan

11Yə́sus ayɛ́ɛ́n na tɔgɛ́ɛ́ yuudi, ɔnɔ́: «Mɔɔd nyummú aa anyóon ayɛ́ɛ na pɔɔ́n pə́ə́ŋ pá panɔ́mɛɛd pábaan. 12Wɔɔ́s wúmmú anɛ́ɛ́n, kiyi kɛáság kɛɛn aboan sɛ wɔɔbɔn, náa kɛɔ́nɔ́ na nyɔ́lɛ́: “Paabá, ɛ́nyɛɛ́ʼkɛn yaam ngab ɛ tugúm toáŋ.” Sɛ aáság koboyáaban nkə kɛ́ ayɛ́ɛ na kɛ́lɛ́, ɛ́nɛ́ mɔɔ́n na yəəŋ áa ngab. 13Mayaa má mədúg a ngim yɛ́ɛy, kiyi kɛ́ɛg kɛáság kolɛga muə́ŋ áa moom, aányáŋɛn mɔɔnɛ́, amɛ́ɛn ɔsaa a nigúu nɛ́ a laálá. Kɔ́gɔ́ɔg, aáság kaádɛ́gɛd ɔlaa konɛ na mɔɔnɛ́ mə́ə́ŋ, aáman koyósag. 14Ná ayɛ́ɛ aáʼkoman koyósag mɔɔnɛ́, məyíi mááság kudə́əŋ a nigúu nɛ́ɛn, aándɛ a osog, yoom na yoom ɔdɛɔ́ŋ kə́mmú. 15Aáság kɛɛn əsiəd pigólí a nó mɔɔd nyummú kɔ a nigúu nɛ́ɛn. Mɔɔd əyímusiə́d a kinuŋ kɛ́ pɔŋɔnɛá puə́ŋ. 16Ayɛ́ɛ anyɔ́ŋɛn əgín lɛ́, ɔmbɔ́ moom mó pɔŋɔnɛá póyɛ́ɛ agonɛ, nyɔ́lɛ́ yə́ə́guminin kaadɛ na mólɛ́, pádɛmoyáʼkɛ́nɛ. 17Əə́bə́ə́ anɛ́ɛ́n kəə́lə́ʼkəni ɔlaa wə́ə́ŋ, ɔnɔ́: “Pəgudin pá sɛ waam pálɛ kága na moom mó konɛ ilubənən, mɛ ndə́giim əgu njaan káanɛ! 18Ndóo, ndəguúlini a nó paabá, ndamodɛ́anɛ nyɔʼkɔ́: Paabá, njɛ́ɛ́lɛ kɔbɛ́ a əngis á Táán, na a əngis yááŋ. 19Ntiligi kə́mmú nyóonɛ lɛ́ pɛ́ʼtɔ́ŋɔn pɔ́nɔ́ mɔɔ́n waaŋ. Ísiə́d agá nɛ́gɔŋ wɔnɔ́ uʼkudin waaŋ.” 20Ná ayɛ́ɛ aáʼkaásɔ́ngɛ náan, aáság kodɛ́ɛmɛn əguúlini a nó sɛ. Əgín ná sɛ ayɛ́moodála əə́giim kága laálá, maan mááság kumuúsiəd na mɔɔ́n. Aáság kodɛ́ɛmɛn agɛɛn amooboŋ a ngə́ na ɔʼtɛ́d, aádam ə́muə́súʼkənən, wɔnɔ́ ánɛ agá mɔɔ́n konɛán na unuʼ. 21Náa mɔɔ́n ɔnɔ́ na nyɔ́lɛ́: “Paabá, njɛ́ɛ́lɛ kɔbɛ́ a əngis á Táán na a əngis yááŋ. Ntiligi kə́mmú nyóonɛ lɛ́ píiʼkini kɛʼtɔ́ŋɔn lɛ́ mɔɔ́n waaŋ, ndóo.” 22Náa, alɛ anɛ́ɛ́n agosɔyɔ kɔ náan a, sɛ aáság kodɔ́ŋɔn pəgudin pə́ə́ŋ, ɔnɔ́ na pɔ́lɛ́, pə́ə́bisig kumuyíimin na kilə́ə́, pə́siəd əgín kɛ́ kɛádɛ́ɛ́ agaáyɛn piim, píim na kɛ́lɛ́, pə́níigi mɔɔ́n. Pə́muyíimin tɛn na langa, pámoyáág a ombɔg, páyɛmoyɛ́ʼkɛn tɛn palábá, ə́níig. 23Pə́muúguminin tɛn kɛyɔ́ŋ kiə́ŋ kɛ́ káwoʼ kɛ́ kɛsɛsáán kɛ́ɛg, póon, pánam, pɔɔd pánɛ, páanyɔ́ga 24lɛ́, mɔɔ́n wəəŋ nyóon yiígú, náa əə́ʼkiiʼkini kiim yóndɛgɛɛ́. Yiíním, náa mbə́ʼkiiʼkini komoyɔ́ŋɛ́ɛ́.

«Pááság kəə́bə́ə́ wɔɔ́n. 25Pɛbán pɛ́ɛb piim pɛ́lɛ agaásan, mɔɔ́n nyɔ́ osaá ó mɔɔd nyóon əligi a pɔlɛ́m. A nimbuúli niə́ŋ, ná ayɛ́ɛ aándɛ ndúmiʼ na noádɛʼ, aáság koob kɛndɔg kɛ́lɛ agaágo a noádɛʼ noɔ́bɔn, pálɛ əgubin. 26Aáság kodɔ́ŋɔn uʼkudin nyummú əgumuŋíən nkə aa kɛ́lɛɛ́ agaásan a noádɛʼ náan əə́. 27Náa uʼkudin nyóon ɔnɔ́ na nyɔ́lɛ́: “Woómóŋŋí nyɔ́ moóngaa áa əmímbuúli, kólɛ́ aa sɛ waaŋan alɛɛ́ agɛɛlɛ wɔɔ́n agɔnyɔ́ga lɛ́ mɔɔ́n əmímbuúli ɔnnasáŋ. Amámoyóónɛn idúg yə́ə́ŋ yɛ́ɛy yɛ́ ayɛ́ɛ əgusigə”. 28Mɔɔ́n nyɔ́ osaá nyóon aáság koob ilúún, ɔnɔ́ nyɔ́lɛ́ ɔdɛɔ́sɔd tɛn a noádɛʼ nóon. Sɛ aáság kiim álon əgiim amoyɔ́sɔ́gɔlɔn lɛ́ ɔ́sɔd. 29Náa mɔɔ́n ɔnɔ́ na sɛ: “Óób paabá! Pɛag wɔnɔ́ pɛag aa pɛ́ɛnɛ ndɛɛ́ na wɛ, ndə́əguúgudin. Ntɛ́njag kogoyɛ́ɛlɛnɛ oʼto wó ɔnnasáŋ ɔmbɔ́ wɔɔ́s. Náan tɛn aa ɔmbɔ́ wɔɔ́s, odɛ́njag kɛnyɛɛ́ʼkɛn ɔmbɔ́ əgín ɛyaa yɛ́ idúg lɛ́ nyóon, nnɛ na pɔsɔ́sɔ́g páam, tɛányɔ́ga. 30Kɔmɔɛ́d lɛ́, əgín a wɔɔ́mɔ́ɔ́n nyóonɛ kudíin yimbuúlini, wəə́ʼkumuúguminin idúg əgín yááŋ ɛ́laŋ yɛ́ɛy agomoyóónɛn, nyɔ́lɛ́ nyɔ́ yɛɛ́nyáŋɛn tugúm toáŋ, aáʼkoman kɛɛn ayósagɛɛ́ na pɛdáŋanaʼ!” 31Náa sɛ ɔnɔ́ na mɔɔ́n: “Kɛ́lɛ náan, mɛ mɔɔ́n. Wɛ olɛ na mɛ pɛnɛŋ piim. Nkə kiim kɛ́ nkódíí, kɛ́lɛ kɛáŋ. 32Náa, tiígóodi lɛ́ tíɛlɛ wɔɔ́n, tɛányɔ́ga lɛ́ woómóŋŋí nyóonɛ yiígú, náa əə́ʼkimbuúlinií a ɔlaa. Yiíním, náa mbə́ʼkiiʼkini komoyɔ́ŋɛ́ɛ́!” »

Currently Selected:

LÓʼKAS 15: yatDBL

Highlight

Copy