LÓʼKAS 16

Yə́sus yiísíəd nkaʼtɛ́n na oʼtáŋananɛ moom wo nsiŋ

1Yə́sus yiísə́ə́ na paaʼkan pə́ə́ŋ ɔnɔ́: «Mɔɔd o tugúm nyummú aa nyóon ayɛ́ɛ na oʼtáŋananɛʼ moom muə́ŋ nyɔ́ páyɛ́ɛ agosɔyɔ lɛ́ alɛ agoyósag moom muə́ŋ. 2Aáság komoodɔ́ŋɔn wɔɔ́s wúmmú, ɔnɔ́ na nyɔ́lɛ́: “Kɛ́ɛnɛ kɛ́ ndɛɛ́ agoob oʼ? Pɔ́nɔ́ olɛ agoyósag moom móam, ngɔ́ɔ́? Mɛ́ɛn, wɛ́nyɛɛlɛnɛ siʼtɔ́ɔg wɔnɔ́ ná olɛɛ́ agodáŋananɛ mólɛ́ lɛ́, waáman a pigólí na mɛ.” 3Oʼtáŋananɛʼ moom nyóon əə́bə́ə́ kosɔyɔ kɔ a ɔʼtɛ́m wə́ə́ŋ, ɔnɔ́ əə: “Wɔnɔ́ ná sə́dúg waam əə́ʼkindiogií a pigólí əə, tuə́ áa mbándagɛɛlɛɛ́ áay nɛ́gɔŋ əə́? Ntɛɔ́gɔ kóam na toɛn, ntɛágaáʼkɛ pigólí pɛ́ ɛsóó. Pɛlɛ́baʼ tɛn, ntɛɔ́gɔ a pɛ́lɛ́, oʼto kono. 4Áaa! Mbɔ́ʼkɔɔŋ nkə kɛ́ ndáagɛɛlɛ a kóonɛ lɛ́, na ndáaman a pigólí, nyɔ́ɔŋ pɔɔd pá pálɛɛ́ pə́gisiəd kɔŋɛʼ a noádɛʼ noɔ́bɔn.” 5Aáság kodɔ́ŋɔnɔ ungim nyɔ́ yiígóodini sə́dúg wəəŋ uŋín. Ayɛ́boodɔ́ŋɔ́nɔ úmmuʼ úmmuʼ. Náa ɔnɔ́ na sɔ́g o na oʼto na oʼto: “Wɛ óoʼ, sə́dúg waam alɛɛ́ əguguŋíən nkə?” 6Náa mɔɔd ɔnɔ́: “Alɛ əgiŋíən ngóngóŋ ɛ məgúd, əʼtin áʼtáan.” Uʼkudin nyóon aáság kumuyúlisini ɔnɔ́: “Táá nufuuʼ noáŋ nó uŋín a nóonɛ. Ə́bísígíí kowaga, údilə noɛ́ndɛ́ŋ lɛ́ əʼtin ábaan na yówád.” 7Aáság kosan a wɛndɛ́ŋ, ɔnɔ́ na nyɔ́lɛ́: “Wɛ tɛn oʼ, alɛ əguguŋíən nkə?” Náa sɔ́g nyóon ɔnɔ́: “Alɛ əgiŋíən mugudəʼ mó ngafón, əʼtin áʼtáan.” Uʼkudin nyóon aáság kusəə ɔnɔ́ na nyɔ́lɛ́: “Táá nufuuʼ noáŋ nó uŋín a nóonɛ, tilid wɔʼkɔ́ əʼtin ə́niʼ.” 8Sə́dúk yɛɛ́gány oʼtáŋananɛʼ moom muə́ŋ o kɛcoo nyóon lɛ́ yɛɛ́fɛ́ga pɛbán a nɛ́ mɔɔd wo nsiŋ. Kɛ́lɛ lɛ́ pɔɔd pá a nsí yɛ́ɛnɛ pálɛ agolɛŋ kofɛga pɛbán pɛɔ́bɔn pɔ́lɛ́ na pɔ́lɛ́, agaáyɛn pɔsɔ́g pá a kɛmoámoáŋ.

9«Mɛ, ndabodɛ́anɛ anɛ́ɛ́n nyɔʼkɔ́: Ɛlɛ́an ɔsɔ́g na tugúm tó kɛcoo tóonɛ tó a nsí, agɛɛlɛ lɛ́ ná tólɛ́ɛ́ komanɛɛ́, pɔsɔ́sɔ́g póob pə́buúsiəd kɔŋɛʼ a mɔʼkɔɔ má a pəliə́g.

10«Nyɔ́ pálɛɛ́ kaágɛ́ɛ́ oʼto na nyɔ́lɛ́ a pɛbán pɛ́ piliʼti, pálɛ́ɛ́ tɛn kaag oʼto na nyɔ́lɛ́ a pɛ́ pɛgóón. Nyɔ́ alɛ́ɛ́ kɛɛnɛɛ́ tɛn na kɛcoo a pɛbán pɛ́ piliʼti, alɛ́ɛ́ kɛɛn tɛn na kɛ́lɛ́ a pɛ́ pɛgóón. 11Nga kɛ́lɛ lɛ́ pádɛʼkáagaag oʼto na pəŋi a tugúm tó kɛcoo, pádɛndɛ́ɛ́ tɛn kaag oʼto na pəŋi a tó fɔ́lɔ́b. 12Nga pádɛʼkáagaag oʼto na pəŋi a tugúm tó tódɛɔ́gɔ toáŋan, ánɛ aa aáboyɛ́ʼkɛn tó tólɛɛ́ toáŋan ə́?

(Maʼt 6.24)

13«Mɔɔd o pigólí ɔmbɔ́ úmmuʼ ɔdɛɔ́gɔ ugugudin pəsə́dúg pábaan. Əgín lɛ́ aabɛnɛn úmmuʼ, áanyɔ́ŋɛn nyummú, ɔmbɔ́ lɛ́ aagoóbɛn úmmuʼ áasɛ́ɛdɛ nyummú. Podɛɔ́gɔ págɛɛlɛ lɛ́, wɛ ogo úmmuʼ wəə́gudin Táán, wəə́gudin tɛn mɔɔnɛ́, ndóo.»

Pɛcɛm pɛ́ Moyíis na Nɛlaamɛʼ nɛ́ Táán

14Pafalɛsɛyɛ́ɛŋ páyɛ́ɛ agoob tɔgɛ́ɛ́ tóod tuim, páamoóŋɔnɔ lɛ́ pɛ́nyɔ́ŋɛnɛn mɔɔnɛ́ na toɛn. 15Yə́sus ayɛ́bodɛánɛ ɔnɔ́ na pɔ́lɛ́: «Pəŋi, polɛ ogoóloodi a əngis á pɔɔd lɛ́ polɛ sáád. Náa, Táán nyɔ́lɛ́ aálɛŋ ntɛ́m yaaŋan a kaadɛ. Nkə kɛ́ pɔɔd pálɛɛ́ agodɛ́ʼtɛg wɔnɔ́ kɛlaŋanan kɛ́ kɛa kɛ́ yoom, kɛ́lɛ a əngis á Táán, kɛlaŋanan kɛ́ kɛbɛ́ kɛ́ yoom.

(Maʼt 11.12, 13)

16«A Sɛ́aŋ Ɔsɔgɛn pɔɔd aa toɛn tó pɛcɛm pɛ́ Moyíis na tó a nkə kɛ́ palɔɛgɛʼ pɛbán pá Táán píídílə, tuísúgə́ni. Əgəə́bə́ə áay a kɛnɛŋ kɛ́ Sɛ́aŋ, Tɔsɔm Tólaŋ tó a Nɛlaamɛʼ nɛ́ Táán tólɛ agaálɔɛgɛ. Ungim alɛ agonɔɛyɛ lɛ́ ɔ́sɔd a nɛ́lɛ́.

(Maʼt 5.18)

17«Kɛ́lɛ́ɛ́ kɛɛn kɛfɛ́fɛ́n agɛɛlɛ lɛ́ nsí na mɔɛn íwu, agaáyɛn kɛɛlɛ lɛ́ ɛyaa ɛ́ kɛlɛŋ ɔmbɔ́ sɔɔŋ yɛ́ a kálaʼtaʼ ɛ pɛcɛm, íliog.

(Maʼt 5.32, 19.9; Mə́l 10.11-12)

18«Mɔɔd ungim nyɔ́ aáŋɛŋ oʼkán lɛ́ kodɔn koáman, əməʼkusiəd wɛndɛ́ŋ, alɛ uʼtə́ŋə́ə́n a kɛdaŋ. Nyɔ́ əə́siəd tɛn ɔʼkɛ́ɛd nyɔ́ onom əmíim ámooŋɛŋ, nyóon alɛ uʼtə́ŋə́ə́n tɛn a kɛdaŋ.»

Yə́sus yiísíəd nkaʼtɛ́n na uʼkúgúmiʼ na ɛsɔ́gasɔ́gá ɛ́ mɔɔd

19«Mɔɔd nyummú o tugúm ayɛ́ɛ kɔ nyɔ́ ayɛ́ɛ əgəə́níigən pisig pɛ́ pilə́ə́ pɛ́ mɔɔnɛ́, aálaa mɔɔ́s miim a podogoloʼ, aánáma pisig pɛ́ moom a wɔɔ́n. 20A udíyoog wó a nɛsɔd nɛ́ a oʼkág wə́ə́ŋ, ɛsɔ́gasɔ́gá ɛ́ mɔɔd yímmú ɛ́yɛ́ɛ agɛɛ́mɛŋan kɔ, niiŋ lɛ́ Lasáal. Ayɛ́ɛ na mudíʼtís a nkó náan kíligidigidi. 21Ayɛ́ɛ əguunə lɛ́ nyɔ́lɛ́ ábáda ɔmbɔ́ əgín pubum pó póyɛ́ɛ əgudə́əŋən a tɛ́bɛlɛʼ yɛ uʼkúgúmiʼ, ánɛ, pobo agá aa póyɛ́ɛ əgiim anága mudíʼtís muə́ŋ.

22«Ɛsɔ́gasɔ́gá yɛ́ɛy yááság kugu, məŋun má maʼtom mə́míim amonyáŋɛn agɛɛn na nyɔ́lɛ́ a ɛbá yɛ́ Ábɛlaam. Uʼkúgúmiʼ tɛn əə́gú, pə́mə́muúní. 23Wɔnɔ́ ná ayɛ́ɛ aándagaánɛ kɔ a piíd, aáság kobágɛ əngis a mɔɛn. Ádála kága laálá, Ábɛlaam alɛ kɔ na Lasáal a ɛbá. 24Aáság kaag nɛŋo, ɔnɔ́: “Sɛ waam Ábɛlaam! Siəd maan na mɛ. Ɛ́ʼtómɛn Lasáal ə́nyum ɛnoónó a məní, yíim əgingwiiyi nɔmɛm lɛ́ ndɛ agaánɛ kɛ́fɔlɛ́ a yug yɛ́ɛnɛ.” 25Náa Ábɛlaam ɔnɔ́ na nyɔ́lɛ́: “Mɛ mɔɔ́n, Áyóŋɛ́ɛ́ lɛ́ wɛ oyɔ́mɔ́dɔ́ɔ́ wááŋ ɔlaa, Lasáal aágaánɛ. Nɛ́gɔŋ yɛ́ɛnɛ, nyɔ́lɛ́ aándɛ a wiiy, wɛ waágaánɛ. 26Na náan kɛ́, kɛa kɛ́ kilímə́ə́n kɛ́ kɛwáaŋ kɛ́mábɛsáá lɛ́ na pəŋi na pəsi, agɛɛlɛ lɛ́ pá pə́əguunə kodɛ́ɛmɛn áanɛ agoyaag káag ná polɛɛ́, pádɛnjɔ́ɔ́ŋ ngə́. Ɔmbɔ́ tɛn pəŋi póʼkáag podɛɔ́ŋ ngə́ igiim káanɛ ná pəsi tɛlɛɛ́.”

27«Náa uʼkúgúmiʼ nyóon ɔnɔ́ na Ábɛlaam: “Paabá, mbágoyɔ́sɔ́gɔ́lɔ́nɛ́ɛ́, tóm Lasáal a noádɛʼ nó sɛ yaam, 28pomóŋŋí páam pálɛ kɔ nto ɛ́ʼtáan. Yɛ́ɛn aboyááganan mbaŋ ná pə́dinjíím agɛmboan tɛn áanɛ a kɛnɔ kɛ́ ntɔ́b kɛ́ɛnɛ.” 29Náa Ábɛlaam ɔnɔ́: “Pomóŋŋí pááŋ pálɛ kɔ na pɛcɛm pɛ́ Moyíis, na nkə kɛ́ palɔɛgɛʼ pɛbán pá Táán píídílə. Póóbɛn pɔ́lɛ́.” 30Uʼkúgúmiʼ nyóon aáság kuúlisini na Ábɛlaam ɔnɔ́: “Ndóo, paabá yaam Ábɛlaam, pɛ́ɛb náan pɛ́sɛʼtanɛn. Náa, mɔɔd amaʼkodɛ́ɛmɛn áanɛ a pəsi pá tiə́ʼkugúú, agɛɛn aboósɔyɔn, páagasɛ ɔlaa.” 31Náa Ábɛlaam ɔnɔ́: “Pádɛóbɛn pɛcɛm pɛ́ Moyíis na nkə kɛ́ palɔɛgɛʼ pɛbán pá Táán píídílə, ɔmbɔ́ mɔɔd yoóndɛg a pɛlóŋ, pə́diə́gəə́liʼtini”.»

Currently Selected:

LÓʼKAS 16: yatDBL

Highlight

Copy