YouVersion Logo
Search Icon

LÓʼKAS 3

3
Nkə kɛ́ Sɛ́aŋ Ɔsɔgɛn pɔɔd ayɛ́ɛ əgiim álɔɛgɛ
(Maʼt 3.1-6; Mə́l 1.1-6)
1A kɛnɛŋ kɛ́go kɛ́ɛg, Tibɛ́ɛl aa ayɛ́ɛ nkúm yɛ́ nkóʼkóón. Ayɛ́ɛ aáʼkɛɛlɛ pɛag puuniʼ a nɛlaamɛʼ. Pɔ́nsɛ́ Pɛláad ayɛ́ɛ ngɔ́mɛnaʼ yɛ́ nkóʼkóón a Siudə́ə, Ɛlóod Antɛʼpáas aálaamɛ a Kalilə́ə, móŋŋí wəəŋ Filíib a Iʼtulə́ə na a Tɛlaʼkoníid, Lɛsánɛas a Abɛlɛ́ɛn. 2Pa Ánaʼ pɔ́lɛ́ na Kayíif páyɛ́ɛ payaaganɛʼ pɛfɔny pá pagóón. Náan aa Táán yɛɛ́sɔ́yɔ a kɛnɛŋ kɛ́go kɛ́ɛg na Sɛ́aŋ, mɔɔ́n ó Saʼkalɛ́as. Yɛɛ́sɔ́yɔ na nyɔ́lɛ́ a kɛnɔ kɛ́ kifələ́ə́n. 3Sɛ́aŋ ogo aáság kiim ádáŋana a əʼkúu yá a ɛbá ɛ́ noom nó Siuludɛ́ɛŋ əngim. Ayɛ́ɛ əgiim álɔɛgɛ ɔnɔ́: «Ə́súʼkíən óo! Liogíən ongoo a mabɛ́, púim, mpoósɔgɛn, ná Táán ə́buúlisin mabɛ́ mááŋan.» 4Kɛ́yásánɛ́ɛ́ əgín wɔnɔ́ ná Ɛsayíi, ɔndɔɛgɛʼ pɛbán o Táán yiídílə a kálaʼtaʼ yəəŋ. Yiídílə lɛ́:
«Nɛŋo nɛ́ mɔɔd nɛ́lɛ asáŋa a kɛnɔ kɛ́ kifələ́ə́n, nɛɔ́nɔ́: “Sóbíníən pungə́ pó Sə́dúk óo!
Tə́nígə́níən pɛáŋ piə́ŋ pɛ́dɛ́lɛm sáád.
5Púyə́əgəni pibod piim.
Pósɛndanɛ nkon ngim, na moŋɛnɛ́ŋɛn muim.
Pungə́ pó pólɛɛ́ pogɔ́dɛ́ʼkɔd, púdə́nigəni pólɛ́, pódɛ́lɛm tə́lə́lə́lə́.
Pó pólɛɛ́ pobɛ́, póolɛŋ kuyə́əgəni.
6Ungim alɛ́ɛ́ kodála wɔnɔ́ ná Táán amáboyɔ́ɔ́yɛ#3.6 Kɛ́lɛ náan a kálaʼtaʼ yɛ Ɛsa 40.3-5. Píísə́ə́ əgín wɔnɔ́ ná kɛ́yɛ́ɛ a nkə kɛ́ píídílə a tɔgɛ́ɛ́ tó kɛlɛ́ɛg.”.»
Pɛyɔm pɛ́lɛ́ɛ́ kɛɛn kɔ
(Maʼt 3.7-10)
7Sɛ́aŋ ayɛ́ɛ agodɛ́ananɛ na pɔɔd pá páyɛ́ɛ əgiimən əsiədə ɔsɔgɛn ɔnɔ́: «Pəŋi musə́sə́d mó pɛlɔ́ngɛʼ móonɛ, ánɛ aa amábodɛánɛ lɛ́ ngə́ ɛgaágɛɛŋɛ ilúún ɛ́ Táán yɛ́ɛnɛ yɛ́ yə́ndəgimií ɛlɛ kɔ. 8Ooo yi, kɛbán kɛ́dɛɔ́gɔ! Ɛlɛ́an anɛ́ɛ́n pɛbán pɛ́ píoloodi lɛ́ puə́ʼkəə́suʼki, puóʼkuliogi ongoo a pɛbán pɛ́ pɛbɛ́. Podɛfɛ́g lɛ́ kɛ́lɛ əgín a niə́səə nɛ́ na unuʼ na unuʼ lɛ́ Ábɛlaam alɛ sɛʼkóón waaŋan, ndóo. Ndabodɛ́anɛ lɛ́ ɔmbɔ́ əgín aʼtáán yɛ́ɛnɛ yɛ́ poádɛ́ʼtɛg, Táán alɛ ogɛɛlɛ lɛ́ yáán ndɛg yɛ Ábɛlaam! 9Taa, yaá áa yɛ́ɛnɛ yándɛɛ́ a ombɔg lɛ́ pásóma piɛd a ngaŋ. Kiɛd kiim kɛ́ kídiə́guúmíí modámádám mólaŋ, pálɛ́ɛ́ kosom, páadagɛdɛ a yug.»
10Náa pɔɔd pə́əŋíən na Sɛ́aŋ pɔ́nɔ́ əə: «Ooo, tíɛlɛ anɛ́ɛ́n tuə́ ə́?» 11Náa ɔnɔ́ na pɔ́lɛ́: «Wɛ nyɔ́ olɛɛ́ na pilə́ə́ pɛ́baan, ɛ́ʼkɛn kímuʼ na sɔ́g nyɔ́ oʼkódií. Wɛ nyɔ́ olɛɛ́ na yoom ɛ́ konɛ, áyóŋɛ́ɛ́ sɔ́g nyɔ́ ɔdɛɔ́gɔ na yɛ́lɛ́.» 12Pagɔ́mmanɛʼ mag pááság kiimən tɛn kɔ áay lɛ́ Sɛ́aŋ áboósɔgɛn. Pə́yímuŋíən pɔ́nɔ́ na nyɔ́lɛ́ əə: «Kɛlág, nkə aa pəsi tigódíí lɛ́ tíɛlɛ ə́?» 13Náa Sɛ́aŋ ɔnɔ́ na pɔ́lɛ́: «Pəŋi, pudiŋíən na pɔɔd lɛ́ pálónɛ mag agaáyɛn nkə kɛ́ nɛlaamɛʼ nɛ́lɛɛ́ əguŋíən.» 14Pasɔ́njaa tɛn pááság kiim. Náa pɔ́nɔ́ na Sɛ́aŋ əə: «Pəsi oʼ?» Əyíbuyúlísíni ɔnɔ́: «Pəŋi, pudisiə́dín mɔɔd mɔɔnɛ́ a náan iyó, oó lɛ́ a toɛn. Ndóo. Pɔ́nyɔ́ga na nkə kɛ́ pálɛɛ́ agoboyɛ́ʼkɛn a pɛsáábɔ́n pɛáŋan.»
Mɔɔd alɛ kɔ nyɔ́ əə́ndəgimií
15Ungim ayɛ́ɛ agobóŋan fɔ́lɔ́b fɔ́lɔ́b lɛ́ Məsíi yəgiim. Náa, páyɛ́ɛ əgəə́ŋíənə kɔ a ntɛ́m yɔɔbɔn a kaadɛ pɔ́nɔ́ əə: «Sɛ́aŋ nyóon əə, adɛ́njaŋ nyɔ́lɛ́ aa alɛɛ́ Məsíi ə́?» 16Náa ɔnɔ́ na pɔ́lɛ́ piim: «Ndóo óo! Mɛ, əgín na məní má məní aa ndɛɛ́ agoboósɔgɛn. Mɔɔd alɛ kɔ nyɔ́ əə́ndəgimií a ngim yaam. Nyɔ́lɛ́ alɛ na toɛn amɛ́njaáyɛn. Mɛ ntiigin ɔmbɔ́ nyóonɛ lɛ́ mbodɛm a udi wə́ə́ŋ əgumuyóndin palábá a ambaan. Nyɔ́lɛ́ alɛ́ɛ́ koboósɔgɛn na a Uŋun wó Ufúlúʼtú na a yug. 17Ogóódi maʼtɛ́ngɛ́lɛ́ a ombɔg má kofɛm ngəŋ na mɔ́lɛ́. Alɛ́ɛ́ kɛɛlɛ lɛ́, ngəŋ yɛ́ ɛlɛɛ́ ɛlaŋ, ə́əsiəd agɛɛ́ngɛg a kɛságɛʼ kiə́ŋ. Ə́əsiəd pifum a kogɔ́lɔnɛ a yug yɛ́ ɛ́dɛndɛ́ɛ́ kuwúú.» 18Sɛ́aŋ ayɛ́ʼkɛ́nan pɔɔd ndə́b yimmú náan kɛ́fɔlɛ́, agoboólɔɛgɛnɛ Tɔsɔm Tólaŋ.
19Yɛɛ́dɛánɛ na Ɛlóod nyɔ́ ayɛ́ɛ alaamɛ a Kalilə́ə ɔnɔ́: «Ɛlóod, omɛ́ɛ́lɛ kɔbɛ́ əgusiəd Ɛlodɛ́ad, oʼkán ó móŋŋí waaŋ lɛ́ ógóan!» 20Náa aa Ɛlóod ayɛ́ʼkɛn toɛn lɛ́ pə́gumin Sɛ́aŋ, pámoyáág a yoog yɛ njaan. Əyíʼkíni kosáʼtɛnɛn kɛ́ɛg a pɛbán pɛ́ pɛbɛ́ piim pɛ́ ayɛ́ɛ aáʼkɛɛlɛ.
Yə́sus ayɛ́ɛ́n lɛ́ Sɛ́aŋ ámoósɔgɛn
(Maʼt 3.13-17; Mə́l 1.9-11)
21Ná ungim ayɛ́ɛ əə́ʼkusiəd ɔsɔgɛn, Yə́sus aáság kiim, Sɛ́aŋ amámosɔ́gɛn tɛn. Ná ayɛ́ɛ ɔgɔɔ́sɔ́gɔlɔn, mbálámɔɛn yaáság kəə́buən. 22Uŋun wó Ufúlúʼtú wááság kiim úsuu fɛɛ́ɛɛ wɔnɔ́ kiɛm, ómámoláʼtɛ́mɛn a nkó. Nɛŋo nɛáság kiim nísuu tɛn kɔ́gɔ́ɔg a mɔɛn, nɛɔ́nɔ́ na nyɔ́lɛ́: «Wɛ, olɛ mɛ mɔɔ́n wo ɔʼtɛ́m, tɔnyɔ́g tóam tuim tólɛ na wɛ#3.22 Pódála tɛn náan a kálaʼtaʼ ɛ Pɛʼk 2.7, Ɛsa 42.1 »
Pasɛʼkóón pá Yə́sus
(Maʼt 1.1-16)
23Yə́sus ayɛ́ɛ aándɛ na pɛag wɔnɔ́ niʼtin na pɛówád ná əyə́ʼtúmíí pigólí. A mafɛgaʼ má pɔɔd kɛ́yɛ́ɛ lɛ́, alɛ mɔɔ́n ó Yósɛb. Yósɛb yɛ Əlíi, 24Əlíi ɛ Maʼtáad, Maʼtáad ɛ Lə́fi, Lə́fi ɛ Mə́líʼki, Mə́líʼki ɛ Yanáay, Yanáay ɛ Yósɛb, 25Yósɛb ɛ Maʼtaʼtɛ́as, Maʼtaʼtɛ́as yɛ Ámos, Ámos ɛ Nayúum, Nayúum yɛ́ Ɛ́sɛli, Ɛ́sɛli ɛ Nagáay, 26Nagáay ɛ Máad, Máad ɛ Maʼtaʼtɛ́as, Maʼtaʼtɛ́as ɛ Səməyíin, Səməyíin ɛ Yosɛ́ɛg, Yosɛ́ɛg ɛ Yóda, 27Yóda yɛ Iyowánan, Iyowánan ɛ Lɛ́sa, Lɛ́sa ɛ Solobabɛ́ɛl, Solobabɛ́ɛl ɛ Salaʼtíɛl, Salaʼtíɛl ɛ Nə́li, 28Nə́li ɛ Mə́líʼki, Mə́líʼki yɛ Ə́di, Ə́di ɛ Kósam, Kósam yɛ Ɛlɛmádam, Ɛlɛmádam ɛ Ɛ́ɛl, 29Ɛ́ɛl ɛ Yə́sus, Yə́sus yɛ Ɛliɛsɛ́ɛ, Ɛliɛsɛ́ɛ ɛ Yolíim, Yolíim ɛ Maʼtáad, Maʼtáad ɛ Lə́fi, 30Lə́fi ɛ Sɛmɛyɔ́ɔŋ, Sɛmɛyɔ́ɔŋ ɛ Siudáa, Siudáa ɛ Yósɛb, Yósɛb ɛ Yónam, Yónam yɛ Ɛlɛáʼkim, 31Ɛlɛáʼkim ɛ Mɛ́lɛa, Mɛ́lɛa ɛ Mɛ́na, Mɛ́na ɛ Maʼtáʼta, Maʼtáʼta ɛ Náʼtam,
Náʼtam ɛ Tə́fid, 32Tə́fid ɛ Yəsə́ə, Yəsə́ə yɛ Obɛ́ɛd, Obɛ́ɛd ɛ Póos, Póos ɛ Sala, Sala ɛ Naásɔn, 33Naásɔn yɛ Amɛnadáab, Amɛnadáab yɛ Ədimíin, Ədimíin yɛ Əliníi, Əliníi yɛ Ɛ́sɛlɔm, Ɛ́sɛlɔm ɛ Fálɛs, Fálɛs ɛ Siudáa, 34Siudáa ɛ Yáʼkɔb, Yáʼkɔb yɛ Ɛ́sag, Ɛ́sag yɛ Ábɛlaam, Ábɛlaam ɛ Tɛ́la, Tɛ́la ɛ Naʼkɔ́ɔl, 35Naʼkɔ́ɔl ɛ Səlúug, Səlúug yɛ Ɛlagóo, Ɛlagóo ɛ Falɛ́ɛg, Falɛ́ɛg yɛ Ɛbɛ́ɛ, Ɛbɛ́ɛ ɛ Sɛ́la, 36Sɛ́la ɛ Káyɛnam, Káyɛnam yɛ Alɛfasáad, Alɛfasáad ɛ Sɛm, Sɛm ɛ Nówə, Nówə ɛ Lámɛg, 37Lámɛg ɛ Məʼtusalɛ́ɛm, Məʼtusalɛ́ɛm yɛ Ɛ́nɔ́g, Ɛ́nɔ́g ɛ Yɛlɛ́ɛd, Yɛlɛ́ɛd ɛ Malɛlɛyɛ́ɛl, Malɛlɛyɛ́ɛl ɛ Káyɛnam, 38Káyɛnam yɛ Ɛnóos, Ɛnóos ɛ Sɛ́ɛd, Sɛ́ɛd yɛ Ádam, Ádam mɔɔ́n ó Táán.

Currently Selected:

LÓʼKAS 3: yatDBL

Highlight

Share

Copy

None

Want to have your highlights saved across all your devices? Sign up or sign in