Maʼtɛ́as 16

Pafalɛsɛyɛ́ɛŋ na Pasadosɛyɛ́ɛŋ pɔ́nɔ́ Yə́sus yɛ́ɛlɛ ongán pɔ́lɛ́ pádála

(Mə́l 8.11-13; Maʼt 12.38-39; Lóʼk 11.16, 11.29; Lóʼk 12.54-56)

1Pafalɛsɛyɛ́ɛŋ na Pasadosɛyɛ́ɛŋ páyɛ́ɛ əguunə kudə́əŋi Yə́sus a kisindiʼ. Náan aa páyɛ́ɛ́n amoóboan, pɔ́nɔ́ na nyɔ́lɛ́: «Ɛɛlɛ kɛálɛ́ʼkán kɛ́ kíəbiíloodi lɛ́ Táán áa əyíím ágoodom.» 2Náa Yə́sus ɔnɔ́ na pɔ́lɛ́: «Pəŋi polɛanɛ lɛ́ ná niób níəsuu, poɔʼkɔ́ kɛnɛŋ kɛ́ naánɛ́ kɛádɛ́ɛ́, mbálámɔɛn ɛlɛ póóʼkóʼkóʼkó. 3Ná koany kóagaáyɛnɛ, poɔʼkɔ́ wɔɔ́s ó naánɛ́ wóayɛb, mbálámɔɛn ɛlɛ túgúgúgú. Əgín a nɛdɛ́ʼtɛg nɛ́ɛn nɛ́ poádɛ́ʼtɛg mbálámɔɛn, polɛ agolɛŋ kaanɛn nkə aa kɛ́agaásan wɔɔ́s wóow. Náa, pɛálɛ́ʼkán pɛ́ pɛ́lɛɛ́ agaásan a kɛnɛŋ kɛ́ɛnɛ kɛ́ tigódíí, podɛɔ́gɔ agolɛŋ kaanɛn pɛ́lɛ́! 4Pəŋi ɔsɛg wóonɛ ó nɛ́gɔŋ wó poyɛ́bɛ́nɛ́ɛ́, podɛágoóbɛnɛɛ́ Táán. Polɛ əgiŋíən lɛ́ nyɛ́ɛlɛ kɛálɛ́ʼkán. Ndóo, pudiə́giim agɛɛn na kɛálɛ́ʼkán kɛ́ndɛ́ŋ ná kɛ́sánɛn əgín kɛ́ɛg kɛ́ kɛ́yáyɛ́lɛ́ɛ́ na Sɛonáas.» Yə́sus aáság kudi ə́mə́buudí, aásán.

Nkə kɛ́ Pafalɛsɛyɛ́ɛŋ na Pasadosɛyɛ́ɛŋ pálɛɛ́

(Mə́l 8.14-21; Lóʼk 12.1-6)

5Agoyaag koɔ́bɔn nsɛ́ɛ́ ɛ noom, paaʼkan pə́yə́bə́líí kusiəd pɛlɛ́ɛd agɛɛn na pɛ́lɛ́. 6Yə́sus yiísiə́d tɔgɛ́ɛ́, ɔnɔ́ na pɔ́lɛ́: «Pólóʼkɔd na kinudiʼ umbúb kɛ́ Pafalɛsɛyɛ́ɛŋ na kɛ́ Pasadosɛyɛ́ɛŋ pógódíí!» 7Ná yiísə́ə́ náan, paaʼkan pə́ə́bə́ə́ kəə́lúluu kɔ pɔ́lɛ́ na pɔ́lɛ́, pɔ́nɔ́: «Alɛ əgusəə náan lɛ́ wɔnɔ́ ná tidiiminií tísiəd pɛlɛ́ɛd pɛ́ tɛánɛ!» 8Yə́sus yɛɛ́lɛ́ŋ nkə kɛ́ɛg kɛ́ páyɛ́ɛ afɛga. Náa ɔnɔ́ na pɔ́lɛ́: «Nkə áa polɛɛ́ na mafɛgaʼ móom poɔʼkɔ́ mbə́səə náan a oʼto wóonɛ lɛ́ pudiimin púsiəd pɛlɛ́ɛd pɛ́ poánɛ ə́? Kəə́liʼtiniʼ koáŋan kúligi kudom ə́! 9Puligi podɛób əgín ə́? Pundigi agaáyɔ́ɔ́ŋɛ pɛlɛ́ɛd pɛ́ʼtáan pɛ́ poyáában tɔ́ɔ́sɛn ɛ pɔɔd ɛ́ʼtáan, páánɛ́ á! Mɔsaŋɛʼ mósɛ́g áa puíyə́ə́gi na pɛbɛŋ pɛ́ pɛ́ɛ́lɔ́bɔn, poányáŋɛn agɛɛn na mólɛ́? 10Podɛɔ́gɔ agaáyɔ́ɔ́ŋɛ tɛn pɛlɛ́ɛd pɛ́ʼtáan na pɛ́baan pɛ́ poyáában tɔ́ɔ́sɛn ɛ pɔɔd íniʼ, páánɛ́ á! Mɔsaŋɛʼ mósɛ́g áa puíyə́ə́gi na pɛbɛŋ pɛ́ pɛ́ɛ́lɔ́b, poányáŋɛn agɛɛn na mólɛ́? 11Tuə́ áa podɛágoóbɛ́ɛ́ lɛ́ kinudiʼ umbúb kɛ́ Pafalɛsɛyɛ́ɛŋ na Pasadosɛyɛ́ɛŋ kɛ́ mbə́səə lɛ́ pólóʼkɔd na kɛ́lɛ́, adɛ́njaŋ kɛbán kɛ́ pɛlɛ́ɛd aa ndɛɛ́ əgusəə?» 12Áay anɛ́ɛ́n aa páyálɛ́ŋɛ́ɛ́ lɛ́ adɛ́njaŋ toan tó kunudi umbúb ó pɛlɛ́ɛd aa Yə́sus ayɛ́ɛ əgusəə. Ayɛ́ɛ əgusəə lɛ́ pə́ə́nuŋ na nkə kɛ́ Pafalɛsɛyɛ́ɛŋ na Pasadosɛyɛ́ɛŋ pálɛ́ɛ́ agaaʼkananɛ.

Píɛ ɔnɔ́ Yə́sus alɛ Mɔɔ́n o Táán

(Mə́l 8.27-30; Lóʼk 9.18-21)

13Ná Yə́sus ayɛ́ɛ́n əgiig a pálɛ́ɛg yɛ́ pɔ́ɔdɔ́ŋɔn lɛ́ Səsalə́ə ɛ Filíib, yiíŋíən na paaʼkan pə́ə́ŋ ɔnɔ́: «Kɛnɛŋ kɛ́ pɔɔd pálɛ agosɔyɔ əə, pálɛ əgusəə lɛ́ mɛ Mɔɔ́n o mɔɔd ndɛ ánɛ ə́?» 14Náa pɔ́nɔ́ na nyɔ́lɛ́: «Pɔsɔ́g pə́mmú pálɛ əgusəə lɛ́ olɛ Sɛ́aŋ Ɔsɔgɛn pɔɔd. Pə́mmú pɔ́nɔ́ olɛ Ɛlɛ́as. Pɔsɔ́g pə́mmú tɛn pɔ́nɔ́ olɛ Siələmíi, oó lɛ́ ɔndɔɛgɛʼ pɛbán o Táán nyummú.» 15Náa Yə́sus ɔnɔ́ na pɔ́lɛ́: «Ooʼó. A nɛáŋan nɛ́ pəŋibáamɔɛ́d anɛ́ɛ́n ə́ə, poɔʼkɔ́ ndɛ ánɛ ə́?» 16Simɔ́ɔŋ Píɛ əyímuyúlísíni ɔnɔ́: «Olɛ Məsíi, olɛ Mɔɔ́n o Táán nyɔ́ alɛɛ́ a ɔlaa.» 17Yə́sus yiísə́ə́ ɔnɔ́ na nyɔ́lɛ́: «Olɛ kɔŋɛʼ, wɛ Simɔ́ɔŋ! Wɛ mɔɔ́n ó Sɛ́aŋ. Olɛ kɔŋɛʼ lɛ́ nkə kɛ́ɛg kɛ́ wəə́ʼkusəlií, adɛ́njaŋ mɔɔd aa amɛ́ɛ́lɛ lɛ́ ólɛŋ, ndóo. Sɛ waam nyɔ́ alɛɛ́ a mɔɛn áa amágoyɛ́ɛ́lɛ lɛ́ úsəə náan. 18A mɛ, ndagodɛ́anɛ lɛ́, olɛ niiŋ lɛ́ Nɛdáán, a nɛdáán nɛ́ɛn, ndawáag Yoog ɛ pɔɔd yaam ɛ Táán kɔ. Kugu kódɛndɛ́ɛ́ kɔɔŋ ngə́ na yɛ́lɛ́. 19Ndagoyɛ́ʼkɛn mulibəʼ mó a Nɛlaamɛʼ nɛ́ a mɔɛn. Nkə kɛ́ olɛ́ɛ́ kusúŋíí a nsí, kɛ́lɛ́ɛ́ kəə́súŋ tɛn a mɔɛn. Kɛ́ olɛ́ɛ́ kondinií a nsí, kɛ́lɛ́ɛ́ koóyóndin tɛn a mɔɛn.» 20Ná ayɛ́ɛ aáʼkosɔyɔ náan na Píɛ, ayágásɛ́ɛ́ ná paaʼkan pə́ə́ŋ pálɛɛ́, aáság koboyááganan mbaŋ na toɛn, ɔnɔ́ pádɛʼtɛánɛ na mɔɔd wɛndɛ́ŋ náan lɛ́ nyɔ́lɛ́ alɛ Məsíi.

Yə́sus ɔnɔ́ nyɔ́lɛ́ alɛ́ɛ́ kugu, ə́yiʼkini kiim álon a kəəniʼ ongóm

(Mə́l 8.31-33; Lóʼk 9.22)

21A kəə́siəd a kɛnɛŋ kɛ́ɛg, Yə́sus əə́bə́ə́ kodɛ́ananɛ na paaʼkan pə́ə́ŋ ɔnɔ́: «Nkóódi lɛ́ mbág a Yolósalɛm ná ponnom pó nigúu, na puʼkúm pó payaaganɛʼ pɛfɔny, na palɛŋ pɛcɛm píʼkumin kɔ, pɛ́nnɛ́ɛyɛ ntɔ́b, pɛ́njoon. Náa, mɔɔ́s mádáád a ngim yɛ́ɛy yɛ́ páagɛnjoon, ndəgiiʼkini kiim ndon a kəəniʼ ongóm.» 22Píɛ aáság kəə́súidin Yə́sus a ɛbá agosɔyɔ na nyɔ́lɛ́. Ayɛ́moóbɛ́n a nkə kɛ́ɛg kɛ́ yɛɛ́sɔ́yɔ, ɔnɔ́ na nyɔ́lɛ́: «Ndóo Sə́dúk! Yoom ɛ́dɛ́agoyɛ́ɛlɛ, Táán əəguúnuŋ.» 23Ná Píɛ yiísə́ə́ náan, Yə́sus əyímuyə́dúgídíí, ɔnɔ́ na nyɔ́lɛ́: «Sáʼtan wɔnɔ́ wɛ! Liog a mɛ udi, ə́suídíí laálá. Tuə́ áa waányɔ́ŋɛn lɛ́ wáádádɛg a ngə́ yaam əə́? Mafɛgaʼ mááŋ móom má olɛɛ́ na mɔ́lɛ́, mɔ́dɛɔ́gɔ mafɛgaʼ má Táán, málɛ má pɔɔd.»

Nkə kɛ́ kíəgəə́yúunə agɛɛlɛ lɛ́ mɔɔd ə́yə́ən Yə́sus

(Mə́l 8.34—9.1; Lóʼk 9.23-27)

24Náa ɔnɔ́ na paaʼkan pə́ə́ŋ: «Mɔɔd əməʼkusəə lɛ́ əəginjə́ən, óliogi ɔʼtɛ́m na nyɔ́lɛ́nyɔ́amɔɛ́d, yə́lúú ɔmbásá wə́ə́ŋ ná yíim anɛ́ɛ́n yínjə́ən. 25Kɛ́lɛ lɛ́, wɛ nyɔ́ wɔʼkɔ́ wamaʼkanɛ ɔlaa wááŋ, wɛ nyóon olɛ́ɛ́ koʼtaŋ wólɛ́. Kɔmɔɛ́d lɛ́ wɛ nyɔ́ olɛ́ɛ́ koʼtaŋɛɛ́ ɔlaa a kidíídí kɛ́am, wɛ nyóon aa olɛ́ɛ́ kɛɛnɛɛ́ na wólɛ́. 26Mɔɔd amaʼkɛɛn na tugúm tuim tó a nsí, náa ɔlaa wə́ə́ŋ olɛɛ́ undióŋóón, amɛ́ɛ́lɛ nkə aa nyóon? Ímuʼ na ímuʼ yɛ́ mɔɔd alɛɛ́ ogɛɛ́ʼkɛn agɛɛlɛ lɛ́ áwɛɛna ɔlaa wə́ə́ŋ, ɛ́dɛɔ́gɔ. 27Kɛ́lɛ lɛ́, mɛ Mɔɔ́n o mɔɔd, ndɛ́ɛ́ kimbuúlini a nugəm nó Táán Sɛ waam. Ndɛ́ɛ́ kiim ondáŋ na məŋun máam má maʼtom. Áay anɛ́ɛ́n aa ndɛ́ɛ́ kaabaá pɛsáábɔ́n lɛ́ na wɛ ogo na pɛáŋ. Əgín tɛn wɔnɔ́ a niə́siəd nɛáŋ#16.27 Tála tɛn a kálaʼtaʼ ɛ Pɛʼk 62.13; na a nufuuʼ nó Ɔlɔ́ 2.6 28A fɔ́lɔ́b ndabodɛ́anɛ lɛ́, a pəŋi póonɛ pá polɛɛ́ póob, pə́mmú pálɛ kɔ pá pádɛndɛ́ɛ́ kugúú ná pádɛ́yɛ́ʼtála mɛ Mɔɔ́n o mɔɔd ndə́əgiim nsuu a nɛ́ ɔndaamɛʼ a mɔɛn.»

Currently Selected:

Maʼtɛ́as 16: yatDBL

Highlight

Copy