Maʼtɛ́as 17

Yə́sus ayáyáánɛ́ɛ́

(Mə́l 9.2-9; Lóʼk 9.28-36)

1Mədúg máʼtáan na úmmuʼ a ngim yɛ́ɛy, Yə́sus yiísiə́d lɛ́ na Píɛ, na pa Sɛ́ag pɔ́lɛ́ na móŋŋí Sɛ́aŋ, amɛ́ɛn na pɔ́lɛ́ a oʼkon a mɔɛn lóóŋ. Páyɛ́ɛ kɔ́gɔ́ɔg əgín pɔ́lɛ́bə́əsíŋ. 2Ná páyɛ́ɛ́n əgiig kɔ a oʼkon a mɔɛn, Yə́sus ayáyáánɛ́ɛ́ a əngis yɔ́ɔ́bɔn páamodɛ́ʼtɛg. Udi wə́ə́ŋ óyɛ́ɛ wándaanom wɔnɔ́ wɔɔ́s, pilə́ə́ piə́ŋ fúlúʼtúʼtúʼtú, píəmənyə kumənyə́ə́n. 3Paaʼkan pə́ə́ŋ póob pádáád píídíin pádála agá, nto ɛ pɔɔd ɛ́baan foáy lɛ́ na Moyíis na Ɛlɛ́as, páʼkodɛ́lɛm a ɛbá ɛ́ Yə́sus, pálɛ agosɔyɔ na nyɔ́lɛ́. 4Náa Píɛ ɔnɔ́ na Yə́sus: «Sə́dúk, kɛ́lɛ kɔŋɛʼ lɛ́ tɛ́lɔb áanɛ. Omaʼkɔnyɔ́ŋɛn, ndabowáagɛn piób pɛ́dáád lɛ́, wɛ kímuʼ, Moyíis kímuʼ, Ɛlɛ́as kímuʼ». 5Píɛ alɛ kɔ na tɔgɛ́ɛ́ a unuʼ ə, kɛnɔ kɛáság kəə́súʼkin na kɛbɛd. Nɛŋo níyíím nɛ́lon kɔ a kɛbɛd kɛ́ɛg a kaadɛ, nɛɔ́nɔ́: «Taa, nyóonɛ alɛ mɛ Mɔɔ́n wo ɔʼtɛ́m nyɔ́ kímíʼkə́mmi lɛ́ nyíiyid. Pómoyóóbɛn aá!» 6Ná Paaʼkan pə́ə́ŋ póob pádáád páyóób nɛŋo nɛ́ɛn, nkó yɔɔbɔn yaáság kobag. Pááság kudə́əŋ na əndu, nti yɔɔbɔn a nsí. 7Yə́sus aáság kaáyɛʼtɛnɛ a ɛbá yɔ́ɔ́bɔn, aádam ə́buúnyigən, náa ɔnɔ́ na pɔ́lɛ́: «Tɛ́mɛ́naan, podɛʼtámmána.» 8Ná pídə́ə́míni oʼto, pɛ́ɛ́bóan Yə́sus aándɛ nyɔ́lɛ́nyɔ́əsíŋ, fiɛ́d mɔɔd kə́mmú a ɛbá yə́ə́ŋ. 9Ná páyɛ́ɛ pə́ndəgiim pə́suu oʼkon, Yə́sus ayɛ́boyáágánan mbaŋ, ɔnɔ́: «Ná tiə́ndəsuulií, podɛʼtɛánɛ na mɔɔd nkə kɛ́ɛnɛ kɛ́ kɛ́másánɛ́ɛ́ a oʼkon. Polɛ́ɛ́ kudíin púsəə kɛ́lɛ́ ná páʼkɛnjoon mɛ Mɔɔ́n o mɔɔd, mbə́ʼkiiʼkini kiim nyóndɛg a pɛlóŋ.»

10Náa paaʼkan pə́əmuŋíən pɔ́nɔ́ əə: «A igə aa palɛŋ pɛcɛm pálɛɛ́ əgusəə lɛ́ Ɛlɛ́as ogóódi lɛ́ áyag kiim əə́#17.10 Tála a kálaʼtaʼ ɛ Məl 3.23 ?» 11Yə́sus əyíbuyúlísíni ɔnɔ́ na pɔ́lɛ́: «Ɛɛ́ɛ, kɛ́lɛ náan fɔ́lɔ́b lɛ́ Ɛlɛ́as ogóódi kiim lɛ́ yíim ədə́nigəni pɛbán wɔnɔ́ ná kíəguunə lɛ́ píɛn. 12Náa a mɛ, ndabodɛ́anɛ lɛ́ Ɛlɛ́as əyíím, pɔɔd pádɛmoólɛ́ŋ, páyɛ́ɛ́lɛ na nyɔ́lɛ́ wɔnɔ́ ná pɛ́ɛ́nyɔ́ŋɛn. Náan tɛn aa pálɛ́ɛ́ kinjəʼkənií, mɛ Mɔɔ́n o mɔɔd.» 13Paaʼkan pááság koob anɛ́ɛ́n lɛ́ kɛbán kɛ́ Sɛ́aŋ Ɔsɔgɛn pɔɔd aa ayɛ́ɛ əgusəə náan.

Yə́sus ayóómɛ moóngaa nyɔ́ ayɛ́ɛ abany kidiʼ

(Mə́l 9.14-29; Lóʼk 9.37-43)

14Ná pə́yíím əgiig kɛnɔ kɛ́ pɔɔd pə́yə́yiilin, mɔɔd nyummú kɔ áay aáság kaáyɛʼtɛnɛ a ɛbá ɛ́ Yə́sus, əmə́mudə́ə́ŋə́nən a udi na əndu, ɔnɔ́: 15«Sə́dúk sɛ́gɔɔ, siəd maan na mɔɔ́n waam. Alɛ abany kidiʼ. Kɛ́lɛ əgumuyə́bi na toɛn lɛ́ na kɛnɛŋ, əə́ʼkudə́əŋ a yug, ɔmbɔ́ lɛ́ a məní. 16Njɛ́ɛ́n na nyɔ́lɛ́ a udi ó paaʼkan pááŋ, pámáfɛ́gɛ́ɛ́, pádɛáʼkɛ komoyóómɛ». 17Yə́sus ayáfɛ́mɛ́ɛ́, ɔnɔ́ na pɔ́lɛ́: «Pəŋi ɔsɛg wóonɛ wó podɛágaágɛ́ɛ́ oʼto na Táán, polɛ pabɛ́ a las! Kíəguunə lɛ́ nyɛ́ɛn na pəŋi agɛɛn əgiig súʼtə́ə́ naanɛ́g? Nkóódi lɛ́ mpoonóʼtan kə́mmú súʼtə́ə́ naanɛ́g? Púinjiimin na moóngaa nyóon áanɛ.» 18Pááság kumuyíimin na nyɔ́lɛ́. Yɛɛ́sásɛ́dɛn uŋun wó ɔmbɛ́ wóow wááság kolon a moóngaa nyóon. Əgín tɛn kɔ áay, moóngaa aáság koom. 19Paaʼkan pə́ə́ŋ páyáyɛ́ʼtɛ́nɛ́ɛ́ a ɛbá yə́ə́ŋ. Páyɛ́ɛ əgín pɔ́lɛ́ na pɔ́lɛ́. Pə́yímuŋíən pɔ́nɔ́ əə: «Sə́dúk, a igə aa pəsi tɛdɛáʼkɛnɛɛ́ koŋɛŋ uŋun wó ɔmbɛ́ wóow əə́?» 20Yə́sus əyíbuyúlísíni ɔnɔ́: «Podɛáʼkɛnɛ koŋɛŋ wólɛ́ lɛ́ kəə́liʼtiniʼ koáŋan kólɛ kudom. A fɔ́lɔ́b ndabodɛ́anɛ lɛ́ poyáágɛn oʼto na Táán ɔmbɔ́ əgín náanɛ sɔɔŋ wɔnɔ́ niis nɛ́ ɛnás ná polɛ págodɛ́anɛ na oʼkon wóow lɛ́ wə́ə́lúgin, wɛ́ɛn agaágon kɛnɔ kɛ́ndɛ́ŋ, kɛ́yaáyɛ́ɛlɛ tɛn náan. Yoom na yoom ɛ́goboólaŋ ɛ́dɛʼkɛ́ɛ agɛɛn kɔ. [ 21Náa, agɛɛlɛ lɛ́ mɔɔd áŋɛŋ uŋun wó ɔmbɛ́ wɔnɔ́ wóow, kɛ́lɛ əgín a pɛɔ́sɔ́gɔ́lɔ́n, ə́əgumin tɛn ə́simə́.]»

Yə́sus əə́səə kə́mmú lɛ́ pálɛ́ɛ́ komoyóon, ə́yiʼkini kiim yóndɛg

(Mə́l 9.30-32; Lóʼk 9.43-45)

22Wɔɔ́s wúmmú wó pɔɔ́n pá maʼtom piim páyágɔnyɛdɛn a Kalilə́ə, Yə́sus ayɛ́bodɛánɛ ɔnɔ́: «Pálɛ́ɛ́ kiʼkumin, mɛ Mɔɔ́n o mɔɔd, páyɛndɛg. 23Pálɛ́ɛ́ kɛnjoon náa, mɔɔ́s mádáád a ngim yɛ́ɛy, ndagoóndɛg.» Ntɛ́m ɛ paaʼkan pə́ə́ŋ yaáság kɔyɛb anɛ́ɛ́n a kúfuʼ.

Na Yə́sus, na Píɛ, pɛ́ɛ́ʼpɛ́ɛ́ mag ɛ Tɛ́mpɛl

24Ná Yə́sus ayɛ́ɛ́n əgiig a Kaʼpɛlɛnáyum na paaʼkan pə́ə́ŋ, Pagɔ́mmanɛʼ mag ɛ Tɛ́mpɛl pííŋíən na Píɛ pɔ́nɔ́ əə: «Píɛ, kɛlág kɛáŋan kɛ́lɛ́ kɛ́dɛɔ́gɔ agoʼpɛ́ɛ́ mag ɛ Tɛ́mpɛl a#17.24 Kɛ́lɛ náan a kálaʼtaʼ yɛ Ɔsa 30.11-16 ?» 25Náa Píɛ ɔnɔ́ na pɔ́lɛ́: «Ɛɛ́ɛ, alɛ agoʼpɛ́ɛ́la.» Ná Píɛ ayɛ́ɛ́n əgiig a noádɛʼ, Yə́sus aa yɛɛ́yáŋ əsiəd tɔgɛ́ɛ́, ɔnɔ́ na nyɔ́lɛ́: «Simɔ́ɔŋ! Wɛ waádála kɛbán kɛ́ɛnɛ tuə́? Pa ánɛ aa pógódíí lɛ́ páʼpɛ́ɛ́ táas, ɔmbɔ́ lɛ́ pálónɛ moom mó nɛwáagɛʼ agɛɛ́ʼkɛn na puʼkúm pó a nsí yɛ́ɛnɛ? Pəən óm, pɔɔ́n pɔ́ɔ́bɔn pá nigúu ə́?» 26Náa Píɛ ɔnɔ́ na nyɔ́lɛ́: «Pəən áa ándɛ páawáagɛ.» Náa Yə́sus ɔnɔ́: «Kióloodi anyóon lɛ́ pɔɔ́n pá nigúu pɔ́dɛɔ́gɔ lɛ́ páʼpɛ́ɛ́ mag. 27Ɔmbɔ́ náan, a kóonɛ lɛ́ kɛ́dɛnjɛ́ɛ́n lɛ́: “Ígod aa yɔ́ɔ́sɔbɛd, kólɛ́ aa mómááŋ”, tod áay a məní, ódagɛdɛ ɛnɔ́b. Nsú ɛ na oʼto na oʼto yɛ́ yəə́siəd ɛnɔ́b, wáásɛn unuʼ wə́ə́ŋ, waboan kɔ, kisúg kɛ́ mɔɔnɛ́ kɛ́ kímíig agoʼpɛ́ɛ́ mag yəəs. Úsiəd mɔɔnɛ́ móom, óʼpɛ́ɛ́ pəsi mag».

Currently Selected:

Maʼtɛ́as 17: yatDBL

Highlight

Copy