Maʼtɛ́as 20

Pɔsɔ́g pá píídíin pə́siəd a pigólí a ngim

1«Kɛ́lɛ lɛ́, Nɛlaamɛʼ nɛ́ a mɔɛn nɛ́lɛ náanɛ wɔnɔ́ ná mɔɔd nyummú nyɔ́ yiígóodi malɛ́m mə́ə́ŋ, ayɛ́ɛ́lɛ. Yɛɛ́lón na koany púúb agɛɛn əguunə pɔɔd lɛ́ pɛ́ɛn əgud a pɔlɛ́m puə́ŋ. 2Pɔsɔ́g pá yɛɛ́bóan, ayáyóóbánánɛ́ɛ́ na pɔ́lɛ́ lɛ́, pɛsáábɔ́n pɛɔ́bɔn pɛ́agɛɛn nkə kɛ́ kɛásɛʼtan a wɔɔ́s ó pigólí kilúd. Ná páyɛ́ɛ páʼkaáyóbanan náan, aáság kusəə lɛ́ pɛ́ɛn əgud. 3Əgiim əgiig áanɛ na kɛás, aáság kiiʼkini kolon, aáboan pɔsɔ́g pə́mmú pálɛ oʼkɔɔ, pɔ́dɛɔ́gɔ na pigólí. 4Náa, ɔnɔ́ na pɔ́lɛ́, pɛ́ɛn tɛn əgud a pɔlɛ́m puə́ŋ, nyɔ́lɛ́ aaboyɛ́ʼkɛn nkə kɛ́ kɛásɛʼtan a pɛsáábɔ́n pɛɔ́bɔn. 5Pɔsɔ́g tɛn póob pááság kɛɛn əgəə́bulid na póʼkáag a pigólí a pɔlɛ́m.

«Aáság kiiʼkini kolon a tóɛf, əə́siəd pɔsɔ́g pə́mmú. A mangɛn mádáád, əmíʼkíni kolon, əə́siəd tɛn pə́mmú. 6Aáság kiiʼkini kolon áanɛ a wɔɔ́s kɛɛn. Əmíʼkíni koboan pɔsɔ́g tɛn pə́mmú pálɛ kɔ oʼkɔɔ. Náa ɔnɔ́ na pɔ́lɛ́, a igə aa póob pə́ələndən áay wɔɔ́s kilúd, pádiɛlɛ yoom ə́? 7Náa, pɔsɔ́g póob pɔ́nɔ́ na nyɔ́lɛ́: “Tɛlɛ oʼkɔɔ lɛ́ tɛdɛɔ́ŋɛn mɔɔd ugibiísiəd a pigólí.” Náa mɔɔd ɔnɔ́ na pɔ́lɛ́: “Mɛ́naan, póɛn aboan pɔsɔ́g a mɛ pɔlɛ́m, púgud”. 8Na niób, ná kɛnɛŋ kɛ́ kodɛ́ɛmɛn pigólí kɛ́yɛ́ɛ kiə́ʼkiim əgiig, mɔɔd o pɔlɛ́m aáság kodɛ́anɛ na uʼkudin wəəŋ nyummú lɛ́ ɔ́dɔ́ŋɔn ungim nyɔ́ yiígúd a pɔlɛ́m puə́ŋ wɔɔ́s wóow, áboyɛ́ʼkɛnan pɛsáábɔ́n pɛɔ́bɔn, kəə́bə́ə́ na pá pííyíbə́nən kiim, əgusúgəni na pɔsɔ́g pá na oʼto na oʼto. 9Pɔsɔ́g pá pə́yíím a wɔɔ́s kɛɛn pááság kiim adɛ́lɛm, pə́ə́siə́d pɛsáábɔ́n pɛɔ́bɔn, nkə kɛ́ kɛ́ɛ́sɛ́ʼtan a wɔɔ́s ó pigólí kilúd. Pɔsɔ́g póʼkáag tɛn piim pɔ́yɔ́ɔ́ŋ əgín tɛn yoom ímuʼ. 10Ná kɛnɛŋ kɛ́ pɔsɔ́g pá na koany púúb kíyíím əgiig, pááság kɛɛn adɛ́lɛm. Páyɛ́ɛ agofɛg lɛ́ pɔ́lɛ́ pɔ́ɔgɔɔŋ agaáyɛn pɔsɔ́g. Aáság koboyɛ́ʼkɛnan tɛn pɔ́lɛ́ əgín nkə kɛ́ kɛásɛʼtan a wɔɔ́s ó pigólí kilúd wɔnɔ́ pɔsɔ́g. 11Páyɛ́ɛ əgusiəd mɔɔnɛ́ móom pɔ́ɔgɔɔ́gɔ́dɔ mɔɔd o pɔlɛ́m, 12pɔ́nɔ́, a igə aa pɔ́lɛ́ pá pááʼpɛ́ma yoóy, na ɛdɔm wɔɔ́s kilúd a pigólí, nyóon aáboyɛ́ʼkɛn pɛsáábɔ́n əgín yoom ímuʼ na pɔsɔ́g pá pə́ʼkimií áanɛ a ngim, pə́ə́gud áwaʼ mmuʼ súg ə́! 13Náa mɔɔd o pɔlɛ́m əə́guúlisini na sɔ́g nyummú ɔnɔ́: “Sɔ́g waam, nkə kɛ́ kɛbɛ́ aa mbɛ́ɛ́lɛ, náa waágɛmbɛn əə́? Tɛdɛáyóbanan pəsi na wɛ lɛ́, a pigólí pɛáŋan pɛ́ wɔɔ́s kilúd, ndaboyɛ́ʼkɛn nkə kɛ́ kɛásɛʼtan a? 14Siəd pɛsáábɔ́n pɛáŋ, wɛ́ɛn. Kímíʼkə́mmi náan lɛ́ nyɛ́ʼkɛn na pɔsɔ́g pá pə́míim a ngim, yoom ímuʼ wɔnɔ́ wɛ. 15Mɔɔnɛ́ málɛ máam, ndɛ ogɛɛlɛ na mɔ́lɛ́ wɔnɔ́ ná kímíʼkə́mmi. Olɛ agoob kɔbɛ́ lɛ́ wɔnɔ́ ná mbádɛ́ɛ́ ɔʼtɛ́m á?” » 16Yə́sus aáság kiiʼkini kaábɛg tɔgɛ́ɛ́, ɔnɔ́: «Taa, náan aa kɛ́lɛ́ɛ́ kɛɛnɛɛ́. Pá pálɛɛ́ yuudi pálɛ́ɛ́ kuúlini ngim. Pá pálɛɛ́ ngim, pálɛ́ɛ́ kosan yuudi.»

Pɛnɛŋ pɛ́dáád áa pɛ́ɛnɛ Yə́sus ɔnɔ́ nyɔ́lɛ́ alɛ́ɛ́ kugu ə́yiʼkini kiim álon a kəəniʼ ongóm

(Mə́l 10.32-34; Lóʼk 18.31-34)

17Ná páyɛ́ɛ pándaabag a Yolósalɛm, Yə́sus yiísiə́d paaʼkan pə́ə́ŋ pá pówád na pábaan lɛ́ pɔ́lɛ́ pə́ə́súid. Páyɛ́ɛ agɛɛn əə́giim ɔ́sɔyɔ na pɔ́lɛ́, ɔnɔ́: 18«Taa, pəsi a póonɛ tɛándabágɛ́ɛ́ a Yolósalɛm, kɛnɔ kɛ́ páagɛndɛg mɛ Mɔɔ́n o mɔɔd a ɔmbɔg á puʼkúm pó payaaganɛʼ pɛfɔny, na palɛŋ pɛcɛm. Pálɛ́ɛ́ kosom kɛbán kɛ́am lɛ́ pɛ́njoon, 19Pə́yíʼkumin agɛnyɛɛ́ʼkɛn a ɔmbɔg á pandɛŋ Táán lɛ́ pɛ́sɛ́ga, pɛ́mbáam, pɛ́mbaŋan a ɔmbásá. Náa, mɔɔ́s mádáád a ngim yɛ́ɛy, ndəgiiʼkini kiim ndon a kəəniʼ ongóm.»

Nkə kɛ́ ŋŋí ɛ pa Sɛ́ag pɔ́lɛ́ na Sɛ́aŋ yiíŋíən na Yə́sus

(Mə́l 10.35-45; Lóʼk 22.25-27)

20Náa ŋŋí ɛ pa Sɛ́ag pɔ́lɛ́ na Sɛ́aŋ, pɔɔ́n pá Səbədə́ə aágaáyɛʼtɛnɛ na pɔɔ́n pə́ə́ŋ a ɛbá ɛ́ Yə́sus, əmə́mudúmin əndu a udi əgumuŋíən yoom. 21Náa Yə́sus ɔnɔ́ na nyɔ́lɛ́: «Nkə aa waányɔ́ŋɛn əə́, íyowó?» Náa ɔʼkɛ́ɛd ɔnɔ́ na nyɔ́lɛ́: «Táá, mɛ pɔɔ́n a póonɛ pábaan. Ndaanyɔ́ŋɛn lɛ́ wɛ́ʼkagɛn lɛ́ ná waágɛɛn a oʼkɔɔ wááŋ ó Nɛlaamɛʼ, waaboyáág lɛ́ nyóonɛ a ombɔg wááŋ ó nɛnom, nyummú a oó kɛmɛs.» 22Náa, Yə́sus əyíbuyúlísíni ɔnɔ́ na pɔ́lɛ́: «Podɛɔ́gɔ agolɛŋ nkə kɛ́ɛg kɛ́ polɛɛ́ əgiŋíən. Polɛ págaáʼkɛ konɛ ntɔ́b yɛ́ mɛ ndáanɛ a?» Náa pɔ́nɔ́ na nyɔ́lɛ́: «Ɛɛ́ɛ tɛlɛ págaáʼkɛ.» 23Náa ɔnɔ́ na pɔ́lɛ́: «Ɛɛ́ɛ, a ntɔ́b, kɛ́lɛ náan fɔ́lɔ́b lɛ́ pəŋi tɛn polɛ́ɛ́ konɛ yɛ́lɛ́. Náa, a kɛ́ kuləndin a ombɔg wáam ó nɛnom na a oó kɛmɛs, adɛ́njaŋ mɛ áa ndágɛɛ́ʼkɛn mɔ́lɛ́. Máagoob na pá Mbáa yiísóbíni lɛ́ mɔ́ɔ́bɔn.» 24Ná pɔsɔ́g paaʼkan pə́mmú póob pá pówád páyóób nkə kɛ́ niŋŋí nɛ́ɛn nííŋíən, píílíŋ na pɔ́lɛ́. 25Yə́sus ayɛ́boodɔ́ŋɔn pɔ́lɛ́ piim, náa ɔnɔ́ na pɔ́lɛ́: «Pəŋi, adɛ́ pəŋibáamɔɛ́d poálɛŋ lɛ́ a nsí yɛ́ɛnɛ, puʼkúm pólɛ alaamɛ a toɛn á? Pagóʼkóón póoloodi lɛ́ pɔ́lɛ́ aa pálɛɛ́ na Nɛlaamɛʼ a? 26Náa, a pəŋi, kíʼkóodi lɛ́ kíɛn náan, ndóo. Kíɛn agá lɛ́ nyɔ́ alɛɛ́ anyɔ́ŋɛn kɛɛn kɛgóʼkóón, yáyáánɛ inə́mbí ɛ́ pɔsɔ́g. 27Nyɔ́ aányɔ́ŋɛn kɛɛn oʼtɛ́lɛm yuudi a ondáŋ wááŋan, yɛ́ɛn wɔnɔ́ kɛɔ́lɛ́ kɛáŋan. 28Taa, náan tɛn aa kɛ́lɛɛ́ lɛ́ mɛ Mɔɔ́n o mɔɔd ntiʼkə́əgiim a nsí yɛ́ɛnɛ lɛ́ ná pɔɔd aa pɛ́ɛnɛɛ́ munə́mbí móam, ndóo. Njíím lɛ́ ná mɛ áa nyɛ́ɛnɛɛ́ inə́mbí yɔ́ɔ́bɔn, ndɛ nyɛɛ́ʼkɛn ɔlaa wáam agɛɛlɛ lɛ́ nyááŋɛn ɛ́fɔlɛ́ ɛ́ pɔɔd.»

Yə́sus ayóómɛ powongwóg pábaan

(Mə́l 10.46-52; Lóʼk 18.35-43)

29A nɛlon nɛ́ɛn wɔnɔ́ ná páyɛ́ɛ pándaalon pálɛ́ɛg ɛ Yəlíʼko, kiʼtúú kɛ́ pɔɔd kɛ́yɛ́ɛ əgiim kíbuyə́ən a ngim. 30Powongwóg pábaan pá páyɛ́ɛ pələndínə́ə́n kɔ áay a ɛbá yɛ́ ngə́ pááság koob lɛ́ Yə́sus aa nyóon alɛɛ́ agosan. Pə́ə́bə́ə́ kumuʼkíŋə pɔ́nɔ́ na nyɔ́lɛ́: «Sɛ́gɔɔ Sə́dúk! Wɛ Mɔɔ́n o Tə́fid, siəd maan na pəsi o!» 31Kiʼtúú kɛ́ pɔɔd kɛ́ɛg kiim kiə́bə́ə́ kobosásan, pɔ́nɔ́ na póob, pɔ́lɔg nnuʼ. Náa, pɔ́lɛ́ páyɛ́ɛ agá əgiiʼkini kosása na toɛn, pɔ́nɔ́: «Sɛ́gɔɔ Sə́dúk! Wɛ Mɔɔ́n o Tə́fid, siəd maan na pəsi o!» 32Yə́sus aáság kodɛ́lɛm, náa ɔnɔ́ na pɔ́lɛ́, píim. Əyíbuŋíən ɔnɔ́ əə: «Nkə aa poányɔ́ŋɛn lɛ́ nyɛ́ɛlɛ na pəŋi ə́?» 33Náa pɔ́nɔ́ na nyɔ́lɛ́: «Sə́dúk! Tɛanyɔ́ŋɛn lɛ́ óbɛyɛ́ɛlɛ tíiʼkini kodɛ́ʼtɛganan kə́mmú o!» 34Maan mísiə́d Yə́sus na pɔɔd póob, aáság kobodɔ́bɔ a əngis. Əgín tɛn ná ayɛ́ɛ́lɛ náan, pə́ə́bə́ə́ kodɛ́ʼtɛganan, páádɛ́ɛ́mɛn, pə́ə́bə́ə́ kiim pə́muyə́njən.

Currently Selected:

Maʼtɛ́as 20: yatDBL

Highlight

Copy