Maʼtɛ́as 21

Yə́sus yɛɛ́sɔ́d a Yolósalɛm páamoyááganan pɛʼkɛ́ʼkɛ́

(Mə́l 11.1-11; Lóʼk 19.28-40; Sɛ́a 12.12-16)

1Ná Yə́sus na paaʼkan pə́ə́ŋ páyɛ́ɛ pándɛ ndúmiʼ na Yolósalɛm, pándɛ a Pɛdfasə́ə, a oʼkon ó malɛ́m má pa Olifiyə́ə, Yə́sus yɛɛ́dɛ́lɛm aáság kudə́əmini paaʼkan pə́ə́ŋ pábaan, amáboodóm yuudi, 2ɔnɔ́ na pɔ́lɛ́: «Todáan a ɛyaa ɛ́ nigúu yɛ́ɛy yuudi. Ná puə́giig kɔ, poaboan jáʼkáas ntilígə́ə́n na mɔɔ́n a ɛbá. Púdíŋin, púinjiimin na pólɛ́. 3Mɔɔd əməʼkubuŋíən yoom, púmuyúúlisini poɔʼkɔ́: “Sə́dúk alɛ njaan na pólɛ́.” Ná poádɛ́anɛ náan, pə́əbuudi lɛ́ púim na pólɛ́.» 4Pɛbán pɛ́ɛb piim pɛ́yɛ́ɛ agodáŋana náan agɛɛlɛ lɛ́ nkə kɛ́ ɔndɔɛgɛʼ pɛbán o Táán yiísə́ə́, kɛ́as. Yiísə́ə́ ɔnɔ́: 5«Tɛánɛ́an na pɔɔd pá a Siyɔ́ɔŋ poɔʼkɔ́: Táá nkúm yaaŋan aa yɛ́ɛy yəə́ndəgimií. Abágɛ́dɛn a jáʼkáas a mɔɛn wɔnɔ́ iyənjə́g ɛ́ mɔɔd. Jáʼkáas ɛgo ɛlɛ na mɔɔ́n a ngim#21.5 Kɛ́lɛ náan a kálaʼtaʼ ɛ Saʼk 9.9 » 6Paaʼkan póob pááság kɛɛn, pámɛ́ɛ́lɛ əgín wɔnɔ́ ná Yə́sus ayɛ́bodɛánɛ. 7Pááság kudíŋin jáʼkáas na mɔɔ́n, pámɛ́ɛn na yɛ́lɛ́, . Póyóliógóníí pilə́ə́ pɛɔ́bɔn pɛ́ niŋiʼ, pámáágan a jáʼkáas a mɔɛn, Yə́sus aábágɛd, əə́ləndin. 8Ɛ́fɔlɛ́ ɛ́ pɔɔd ɛ́yɛ́ɛ ogoóliogoni pilə́ə́ pɛɔ́bɔn pɛ́ niŋiʼ, páadɛ́ga a ngə́, pɔsɔ́g pə́mmú páasóma pɛlaa, pə́əgiim agaágan a ngə́ agomonyáadɛ#21.8 Pódála tɛn náan a kálaʼtaʼ ɛ 2Puʼk 9.13 9Pɔɔd páyɛ́ɛ kiʼtúú kilúd lɛ́ póonɛ yuudi, pə́mmú ngim, pə́əgiim páágan pɛʼkɛ́ʼkɛ́, pɔ́nɔ́: «Nugəm na wɛ ó, Mɔɔ́n o Tə́fid! Táán ágoyɛ́ɛlɛ kɔŋɛʼ, wɛ nyɔ́ olɛɛ́ əgiim a niiŋ nɛ́ Sə́dúk. Nugəm nóɛn na Táán nyɔ́ alɛɛ́ a mɔɛn.» 10Ná Yə́sus ayɛ́ɛ́n əgiig a Yolósalɛm, kɛnɔ kíyə́nyígídíí. Pɔɔd páyɛ́ɛ əgəə́ŋíənə pɔ́nɔ́ əə: «Ánɛ aa alɛɛ́ náan əə́?» 11Náa kiʼtúú kɛ́ pɔɔd pá páyɛ́ɛ əgiim pə́muyə́ən pɔ́nɔ́: «Yə́sus, ɔndɔɛgɛʼ pɛbán o Táán áa alɛɛ́nɔ o! Mɔɔ́n ó Násalɛd, a Kalilə́ə.»

Yə́sus yɛɛ́ŋɛ́ŋ pɔɔd pá páyɛ́ɛ agɛɛlɛ undunə́ a Tɛ́mpɛl

(Mə́l 11.15-17; Lóʼk 19.45-48; Sɛ́a 2.13-16)

12Yə́sus ayɛ́ɛ́n ɔsɔd a Tɛ́mpɛl, aáŋɛ́ŋ ungim nyɔ́ yɛɛ́bóan kɔ a undunə́ lɛ́ na palɛgaʼ kɛ́ na pɔɔŋɛnɛʼ kɛ́, əə́díʼkə́ni paʼtɛ́bɛlɛʼ pá pɔsɔ́g pá páyɛ́ɛ agóʼpanɛ mɔɔnɛ́, na toʼkóm tó pɔsɔ́g pá páyɛ́ɛ alɛga piɛm. 13Náa ɔnɔ́ na pɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́, Táán ɔnɔ́: “Pálɛ́ɛ́ kodɔ́ŋɔn noádɛʼ nóam lɛ́ noádɛʼ nó mɔnɔŋ miim málɛ́ɛ́ kɛnyɔɔ́sɔ́gɔlɔnɛɛ́ a nólɛ́”. Náa, pəŋi o! Poáʼkaánɛ agá nólɛ́, nɛɔsɛm nɛ́ piíbən#21.13 Pódála tɛn náan a kálaʼtaʼ yɛ Ɛsa 56.7; na a ɛ Siə 7.11 !» 14Powongwóg, na pɔɔd pá pɛnɛ́m páyɛ́ɛ kɔ a Tɛ́mpɛl. Páyáyɛ́ʼtɛ́nɛ́ɛ́ ɛbá ɛ́ Yə́sus, aáság koboyóómanɛ mabámbany mɔ́ɔ́bɔn. 15Puʼkúm pó payaaganɛʼ pɛfɔny na palɛŋ pɛcɛm páyóób kɔbɛ́ na pɛ́ɛ́dála piə́wúunəniʼ pɛ́ pɛbán pɛ́ɛb pɛ́ Yə́sus ayɛ́ɛ́lɛ, na wɔnɔ́ ná poómbaa páyɛ́ɛ agaágan piʼkíŋ kɔ a Tɛ́mpɛl pɔ́nɔ́: «Nugəm na Mɔɔ́n o Tə́fid o!» 16Náa pɔ́nɔ́ na Yə́sus: «Olɛ agoob nkə kɛ́ɛg kɛ́ poómbaa pálɛɛ́ əgusəə ə́?» Náa Yə́sus ɔnɔ́ na pɔ́lɛ́: «Ɛɛ́ɛ, ndɛ agoob óo. Pəŋi oʼ, podɛ́mbana nkə kɛ́ɛnɛ kɛ́ kɛ́lɛɛ́ kidiídílə́ a Kálaʼtaʼ ɛ Táán lɛ́: “Oyɛ́ɛ́lɛ lɛ́, ɔmbɔ́ poómbaa, ɔmbɔ́ tɛn pɔɔ́n pá podom, pə́dúmə nugəm noáŋ#21.16 Kɛ́lɛ náan a kálaʼtaʼ ɛ Pɛʼk 8.3, əgín wɔnɔ́ ná kɛ́lɛɛ́ a yɛ́ píídílə kalaʼ a tɔgɛ́ɛ́ tó kɛlɛ́ɛg.!” » 17Yə́sus aáság kudi ə́mə́buudí, aásán. Yɛɛ́lón pálɛ́ɛg, amɛ́ɛn a Pɛʼtaníi. Yiíbúlim kɔ́gɔ́ɔg.

Kɛbán kɛ́ figiyə́ə yɛ́ ɛdɛʼkɛ́lɛɛ́ na modámádám

(Mə́l 11.12-14,20-25)

18A koany kaáyɛnɛ, wɔnɔ́ ná ayɛ́ɛ əguúlini a pálɛ́ɛg, njaan ɛyɛ́ɛ amoobany. 19A ngə́, aáság kodála kiɛd kímmú kɛ́ pɔ́ɔdɔ́ŋɔn lɛ́ figiyə́ə. Ayáyɛ́ʼtɛ́nɛ́ɛ́ ndúmiʼ a nidíŋ, aáboan lɛ́ ɔmbɔ́ ɛdámádám ímuʼ ɛ́dɛɔ́gɔ kɔ a mɔɛn, əgín pɛáŋánán pɛ́lɛ́ na pɛ́lɛ́ aa yɛɛ́bóan kɔ. Náa ɔnɔ́ na figiyə́ə yɛ́ɛy: «Wɛ, odɛndɛ́ɛ́ kuum kə́mmú.» Əgín tɛn ná yiísə́ə́ náan, kiɛd kɛ́ɛg kɛáság kogálɛgɛd. 20Ná paaʼkan pə́ə́ŋ pɛ́ɛ́dála nkə kɛ́ɛg kɛ́ kɛ́yáyɛ́lɛ́ɛ́, pə́yə́wúnə́níí kɛ́fɔlɛ́. Náa pɔ́nɔ́ na nyɔ́lɛ́: «Sə́dúk, tuə́ áa figiyə́ə yɛ́ɛy yaáság kogálɛgɛd kɔ áay náan kum a nsí ə́?» 21Náa Yə́sus ɔnɔ́ na pɔ́lɛ́: «A fɔ́lɔ́b ndabodɛ́anɛ lɛ́, pomaʼkaag oʼto na Táán, podiɛn kɔ na isuŋ, polɛ págɛɛlɛ tɛn nkə kɛ́ɛnɛ kɛ́ mɛ mbɛ́ɛ́lɛ na figiyə́ə. Polɛ póonɛ lɛ́ pomaʼkodɛ́anɛ na oʼkon wóow lɛ́ wə́ə́lúgin, wɛ́ɛn agaádagɛdɛ a noom nó ɛbá fiɛ́d, kɛ́yaáyɛ́ɛlɛ náan. 22Nkə kiim kɛ́ polɛ́ɛ́ kuŋíənií na Táán a pɛɔ́sɔ́gɔ́lɔ́n ná pomáág oʼto na nyɔ́lɛ́, aaboyɛ́ʼkɛn.»

Yúdɛn ɛlɛ anyɔ́ŋɛn kolɛŋ ánɛ aa amɛ́ʼkɛn Yə́sus toɛn lɛ́ yáaʼkananɛ pɔɔd

(Mə́l 11.27-33; Lóʼk 20.1-8)

23Yə́sus aáság kɛɛn ɔsɔd a Tɛ́mpɛl, əə́bə́ə́ kaaʼkananɛ pɔɔd. Alɛ anɛ́ɛ́n kɔ agaaʼkananɛ a, puʼkúm pó payaaganɛʼ pɛfɔny na ponnom pó nigúu pááság kaáyɛʼtɛnɛ a ɛbá yə́ə́ŋ, náa pɔ́nɔ́ na nyɔ́lɛ́: «A toɛn tó ánɛ aa olɛɛ́ agɛɛlɛ nkə kɛ́ɛg kɛ́ olɛɛ́ agɛɛlɛ ə́? Ánɛ aa agoyɛ́ʼkɛ́nɛ́nɛ́ɛ́ toɛn lɛ́ wɛ́ɛlɛ ə́?» 24Yə́sus əyíbuyúlísíni ɔnɔ́ na pɔ́lɛ́: «Mɛ tɛn ndəbuŋíən kɛ́sɔn kímuʼ súg. Puməʼkinyuúlisini nkə kɛ́ mɛ ndə́buŋíən, mɛ ndabodɛ́anɛ tɛn a toɛn tó ánɛ ndɛɛ́ agɛɛlɛ nkə kɛ́ɛnɛ kɛ́ ndɛɛ́ agɛɛlɛ. 25Ánɛ aa əyíím ádom Sɛ́aŋ lɛ́ yíim agɛɛlɛ ɔsɔgɛn? Táán óm, pɔɔd əə́? Ɛ́ʼtɛánɛ́an!» Pə́ə́bə́ə́ kɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Timəʼkumuyúlisini lɛ́ Táán áa ayɛ́moodóm, əəbiŋíən ɔnɔ́ əə: “A igə anɛ́ɛ́n áa tidiʼkə́yəmuyə́liʼtinií ə́?” 26Náa, timəʼkusəə tɛn tɛɔʼkɔ́: Pɔɔd aa páyɛ́moodóm, kiə́s kɛ́agɛɛn kɛbɛ́ lɛ́ ungim aálɛŋ lɛ́ Sɛ́aŋ ayɛ́ɛ Ɔndɔɛgɛʼ pɛbán o Táán.» 27Pə́yímuyúlísíni pɔ́nɔ́ na nyɔ́lɛ́: «Pəsi tɛdɛálɛŋ ánɛ aa ayɛ́moodóm.» Náa nyɔ́lɛ́ tɛn ɔnɔ́ na pɔ́lɛ́: «Oʼó! Mɛ tɛn ntɛábodɛ́anɛ a toɛn tó ánɛ aa ndɛɛ́ agɛɛlɛ pɛbán pɛ́ɛb.»

Nkaʼtɛ́n ɛ pɔɔ́n pábaan

28Yə́sus əyíbuŋíən kə́mmú ɔnɔ́ əə: «A nɛáŋan əə, poádála tuə́ a kɛbán kɛ́ɛnɛ kɛ́ kɛ́lɛɛ́ lɛ́: Mɔɔd anyóon ayɛ́ɛ na pɔɔ́n pə́ə́ŋ pábaan. Náa ɔnɔ́ na sɔ́g o na oʼto na oʼto: “Mɛ mɔɔ́n, tod agɛɛlɛ oʼtom wóonɛ náanɛ a mɛ pɔlɛ́m naánɛ́.” 29Mɔɔ́n aáság kosáŋɛnɛ ɔnɔ́ na sɛ: “Ndóo, ntɛágɛɛn.” Náa, a ngim yɛ́ɛy ɔʼtɛ́m wə́ə́ŋ wááság kaágasɛ, amɛ́ɛn agɛɛlɛ oʼtom wo sɛ ayɛ́moyɛ́ʼkɛn. 30Ná sɛ nyɔ́lɛ́ yɛɛ́dála lɛ́ mɔɔ́n nyóon aásáŋɛ́nɛ kɛɛn agɛɛlɛ oʼtom wə́ə́ŋ, ayɛ́ɛ́n aboan sɔ́g wo annam ábaan, amámoodóm lɛ́ yɛ́ɛn amoyɛ́ɛlɛnɛ oʼtom əgín ogo úmmuʼ. Náa sɔ́g nyóon ɔnɔ́ na sɛ: “Ooʼó paabá, ndagɛɛn!” Kɛándɛ kɔ a ngim yɛ́ɛy a, aáság kolɔb adiɛn agɛɛlɛ wólɛ́.

31«Náa ndə́buŋíən anɛ́ɛ́n na pəŋi nyɔʼkɔ́ əə, a poómbaa póob pábaan, oyaán áa ayɛ́ɛ́lɛ nkə kɛ́ sɛ wɔɔbɔn ayɛ́ɛ anyɔ́ŋɛn lɛ́ pámoyɛ́ɛlɛnɛ ə́?» Náa pɔ́nɔ́ na nyɔ́lɛ́: «Sɔ́g ó na oʼto na oʼto aa ayɛ́ɛ́lɛ nkə kɛ́ sɛ wɔɔbɔn ayɛ́ɛ anyɔ́ŋɛn.» Náa Yə́sus ɔnɔ́: «A fɔ́lɔ́b ndabodɛ́anɛ lɛ́ Pagɔ́mmanɛʼ mag na pɛdáŋanaʼ pálɛ́ɛ́ koyaŋ ɔɔgɔɔŋ oʼkɔɔ na pəŋi a Nɛlaamɛʼ nɛ́ Táán 32lɛ́, Sɛ́aŋ Ɔsɔgɛn pɔɔd əyíím, əmə́bulóódi ngə́ ɛ sáád. Náa, pudiʼkə́əgəə́liʼtini tɔgɛ́ɛ́ tuə́ŋ. Pagɔ́mmanɛʼ mag na pɛdáŋanaʼ agá aa pə́yə́líʼtíníí. Ɔmbɔ́ a ngim yɛ́ɛy ná poyɛ́ɛ poáʼkodála pɛbán pɛ́ɛb piim na əngis yááŋan, podɛʼkáagasɛ ntɛ́m yaaŋan əgəə́liʼtini tɔgɛ́ɛ́ tuə́ŋ.»

Nkaʼtɛ́n ɛ pɛbɛ́ pɛ́ pəgudin

(Mə́l 12.1-12; Lóʼk 20.9-19)

33Yə́sus ayɛ́bodɛánɛ ɔnɔ́: «Óʼtánaan nkaʼtɛ́n yɛ́ɛnɛ: Mɔɔd nyummú aa nyóon yɛɛ́dɛ́g pɔlɛ́m puə́ŋ, amágóʼkɛ́nɛ́ɛ́ na oʼkág, əə́dím nɔsá kɔ agonɔg nyiín, aáwáág ɛyaa ɛ́ yoog kɔ lóóŋ a oʼkág a mɔɛn a mɔɔd nyɔ́ əə́nuŋ pólɛ́ agɛɛlɛ lɛ́ ádɛ́ʼtɛg pɔlɛ́m puim#21.33 Pódála tɛn náan a kálaʼtaʼ yɛ Ɛsa 5.1-2 Ná ayɛ́ɛ aáʼkoman kɛɛlɛ nkə kɛ́ɛg kiim, aáság kusiəd anɛ́ɛ́n pɔɔd pá pigólí, amáág kɔ a túʼpaaʼtɛ́, amɛ́ɛn ongɛn. 34Ná masómbóó mə́yíím əgiig, yiídə́ə́míni pəgudin pə́ə́ŋ pə́mmú, amáboodóm ná pɔsɔ́g pá páyɛ́ɛ əgud a pɔlɛ́m puə́ŋ pálɛɛ́, pábodɛ́anɛ lɛ́ píim pámodómɛn yəəŋ ngab. 35Ná pɔsɔ́g póob káag pɛ́ɛ́dála pɔsɔ́g pá pə́yíím pádom, píígúmin úmmuʼ, pámámobáám əgín náanɛ ɔʼtɛ́m úmmuʼ. Nyummú pámóón. Nyummú tɛn páádóan na aʼtáán, əə́gú. 36Mɔɔd o pɔlɛ́m aáság kiiʼkiniʼ kiim ádom pɛ́ndɛ́ŋ. Páyɛ́ɛ piíŋ agaáyɛn pɔsɔ́g pá na oʼto na oʼto. Pɔsɔ́g pá a pɔlɛ́m páyɛ́ɛ́lɛ əgín náan yoom ímuʼ wɔnɔ́ ná páyɛ́ɛ́lɛ na pɔsɔ́g pá na oʼto na oʼto.

37«Mɔɔd o pɔlɛ́m aáság kudə́əmini anɛ́ɛ́n mɔɔ́n wəəŋ o nyɔ́lɛ́nyɔ́amɔɛ́d, amámoodóm. Ayɛ́ɛ agofɛg ɔnɔ́: “Wɔnɔ́ ná kɛ́lɛɛ́ lɛ́ alɛ mɔɔ́n waam, pádɛáwɛ́ɛsɛ komodɔ́bɔ”. 38Náa, ná pɔ́lɛ́ pɛ́ɛ́dála lɛ́ mɔɔ́n áa nyóon əə́ʼkiim ádómɛ́ɛ́, pə́ə́bə́ə́ kosɔyɔ agá pɔ́lɛ́ na pɔ́lɛ́ pɔ́nɔ́: “Táá, mɔɔd nyɔ́ alɛ́ɛ́ kolɔbɛɛ́ a tugúm tó sɛ aa nyóonɛ! Tímuúguminəən, tɛ́moyóon. Náan, tugúm tóonɛ tóagoob na pəsi”. 39Pááság kumuúgumin, páálón pɔlɛ́m na nyɔ́lɛ́, pámɛ́ɛn amoyóon.»

40Ná ayɛ́ɛ aáʼkoman kosɔyɔ náan, aáság kubuŋíən ɔnɔ́ na pɔ́lɛ́ əə: «Áay oóoʼ! Ná mɔɔd o pɔlɛ́m nyɔ́lɛ́nyɔ́amɔɛ́d əə́giim əə, tuə́ áa aágɛɛlɛ na pəgudin póob əə́?» 41Náa pɔ́nɔ́ na nyɔ́lɛ́: «Adɛndɛ́ɛ́ kusiəd maan na pɛbɛ́ pɛ́ pəgudin pɛ́ɛb ɔmbɔ́ sɔɔŋ. Əəbuúgumən, áboyóóna ná ə́siəd pɔlɛ́m puə́ŋ agɛɛ́ʼkɛn na pɔɔd pá pigólí pɛ́ndɛ́ŋ pá pálɛ́ɛ́ komoyɛ́ʼkɛnɛɛ́ nkə kɛ́ kɛ́alon kɔ a kɛnɛŋ kiim kɛ́ alɛ́ɛ́ kɔnyɔ́ŋɛnɛɛ́.» 42Yə́sus yiísə́ə́ ɔnɔ́ na pɔ́lɛ́: «Adɛ́ poáʼkobana nkə kɛ́ɛnɛ kɛ́ kɛ́lɛɛ́ kidiídílə́ a Kálaʼtaʼ ɛ Táán lɛ́:

“Nɛdáán nɛ́ pawáagaʼ toádɛʼ pɛ́ɛ́dó,

nɛ́lɛ́ nɛ́go aa nɛ́yáán nɛdáán nɛ́ nígumíníníí noádɛʼ.”

Táá niɛlɛʼ nɛ́ Sə́dúk áa nɛ́ɛn aá!

Kɛ́lɛ na pəsi kiə́wúunəniʼ kɛ́ kɛbán#21.42 Kɛ́lɛ náan a kálaʼtaʼ ɛ Pɛʼk 118.22-23 !»

43A komananɛ, Yə́sus yiísə́ə́ ɔnɔ́: «Taa, kólɛ́ aa ndɛɛ́ əgusəə na pəŋi lɛ́, Táán alɛ́ɛ́ koboóbɔg Nɛlaamɛʼ niə́ŋ agɛɛ́ʼkɛn na pá pálɛ́ɛ́ kɛɛlɛɛ́ pigólí pɛ́ pɛ́alon na yoom. 44Ungim nyɔ́ alɛ́ɛ́ kəə́búbigií a nɛdáán nɛ́ɛn, alɛ́ɛ́ kubúmbun. Nyɔ́ nɛ́lɛ́ɛ́ kumudə́əŋənənií, nɛ́lɛ́ɛ́ komoyɔ́ɔb.» 45Ná puʼkúm pó payaaganɛʼ pɛfɔny na Pafalɛsɛyɛ́ɛŋ páyálɛ́ŋɛ́ɛ́ lɛ́ kɛbán kɛɔ́bɔn aa Yə́sus ayɛ́ɛ əgusəə náan, 46pə́ə́bə́ə́ kuunə pungə́ pó kumuúgumin. Náa, wɔnɔ́ ná pɔɔd páyɛ́ɛ kɔ piíŋ, pádɛʼkáawɛ́ɛsɛ komodɔ́bɛd lɛ́ ungim yɛɛ́lɛŋɛn lɛ́ Yə́sus alɛ Ɔndɔɛgɛʼ pɛbán o Táán.

Currently Selected:

Maʼtɛ́as 21: yatDBL

Highlight

Copy