Maʼtɛ́as 22

Nkaʼtɛ́n ɛ wɔɔ́n ó kodɔn

(Lóʼk 14.15-24)

1Yə́sus ayɛ́ɛ agosɔyɛla a poʼkaʼtɛ́n a mɔɛn, ɔnɔ́: 2«Nɛlaamɛʼ nɛ́ a mɔɛn nɛ́lɛ náanɛ wɔnɔ́ nkə kɛ́ kɛ́yáyɛ́lɛ́ɛ́ na nkúm yimmú yɛ́ ɛyɛ́ɛ́lánɛ kɛa kɛ́ kɛsɛɛn a kodɔn kó mɔɔ́n. 3Yɛɛ́dóman pəgudin pə́ə́ŋ lɛ́ pɛ́ɛn anyama pɔɔd pá yɛɛ́dɔ́ŋɔ́nɔ a wɔɔ́n, píimən. Náa, pɛ́ɛ́sáŋɛ́nɛ lɛ́ pə́díəgiim. 4Nkúm yaáság kiiʼkini kodom pəgudin pɛ́ndɛ́ŋ lɛ́ pɛ́ɛn adɛ́anɛ na pɔɔd póob lɛ́ paʼkáwoʼ pə́ə́ŋ na mudúg muə́ŋ mólaŋ, páʼkoóna, páʼkonáma. Páʼkoman kusóboni moom muim, píim a wɔɔ́n. 5Ɔmbɔ́ náan pɔɔd póob pə́diʼkə́əsiəd kɛnɛŋ. Páyɛ́ɛ́nan agá a maʼtom mɔ́ɔ́bɔn mɛ́ndɛ́ŋ kɛɛlɛ. Páyɛ́ɛ lɛ́ póonɛ páagɛɛn a malɛ́m mɔ́ɔ́bɔn, pə́mmú a məndunə́ mɔ́ɔ́bɔn kɛɛlɛ. 6Pɔsɔ́g pə́mmú píígúmən pəgudin pá nkúm, pámábobáám, pámáboyóóna. 7Ná nkúm ɛyóób náan, ilúún ɛ́yɛ́moobány, aáság kodom pasɔ́njaa lɛ́ pɛ́ɛn agoóna pacocóo póob piim, páman kubilə pálɛ́ɛg yɔɔbɔn.

8«Náa nkúm yɔ́nɔ́ na pəgudin pə́ə́ŋ: “Poádála ə́! Moom mó wɔɔ́n áa móonɛ moáʼkomanɛɛ́ koósóboni. Náa, pɔɔd pá páyɛ́ɛ pɔdɔ́ŋɔ́nɔ́ɔ́n a kɛsɛɛn pádɛʼkóosɛʼtanɛn lɛ́ pánɛ mólɛ́. 9Póɛn nɛ́gɔŋ a angag á pungə́ əngim. Ungim nyɔ́ poáboan kɔ, pómodɛ́anɛ lɛ́ yíim a kɛsɛɛn”. 10Pəgudin pááság kɛɛn, pə́míim pə́bug ungim nyɔ́ pɛ́ɛ́bóan. Páyɛ́ɛ lɛ́ na pɔɔd pá pabɛ́ kɛ́, na pɔsɔ́g pá paŋɛʼ kɛ́. Yoog síɛ́ɛ́d!

11«Nkúm yaáság kosɔd əgiim adála pɔɔd pá pə́yíímən. Ná yɛɛ́sóm əngis, aáság kodála mɔɔd nyummú kɔ nyɔ́ adɛʼkɛ́lɛɛ́ na kilə́ə́ kɛ́ wɔɔ́n. 12Náa ɔnɔ́ na mɔɔd ogo nyóon: “Wɛ, tuə́ áa omɛ́ɛ́lɛ agosɔd a yoog ɛ wɔɔ́n fiɛ́d na kilə́ə́ kɛ́ wɔɔ́n a nkó?” Mɔɔd yiílə́ndin sáb, kɛbán kɛ́ kuúlisini na nkúm fiɛ́d. 13Náa nkúm yɔ́nɔ́ na pəgudin pə́ə́ŋ: Kumínəən mɔɔd nyóonɛ, pómoogóda ɔmbɔg na ambaan, pómoódagɛdɛ káag a táán, a mbin. Kɔ́gɔ́ɔg, əgín mandɛɛ na mandɛɛ, əgín pɛgɛg na pɛgɛg kaágáma aa pɛ́lɛɛ́ kɔ.»

14Əguyibənən, Yə́sus aáság kusəə ɔnɔ́: «A fɔ́lɔ́b ndabodɛ́anɛ lɛ́ piíŋ pálɛ pɔdɔ́ŋɔ́nɔ́ɔ́n náa, əgín ngab sɔɔŋ aa Táán əyííyid.»

Kɛbán kɛ́ mag koʼpɛ́ɛ́ na Sɛsáal

(Mə́l 12.13-17; Lóʼk 20.20-26)

15Pɔɔd pá a ɛgɔny ɛ́ Pafalɛsɛyɛ́ɛŋ páyágɔ́nyɛ́dɛ́ɛ́ əguunə wɔnɔ́ ná pálɛɛ́ págɛɛlɛ a kóonɛ lɛ́ ɔmbɔ́ əgín a tɔgɛ́ɛ́ tó əə́buyúúlisini, Yə́sus ə́də́əŋ a kisindiʼ kɛɔ́bɔn. 16Náan aa pə́yííyid ngab ɛ pɔɔd a ondáŋ wɔ́ɔ́bɔn na pɔsɔ́g tɛn pá a ɛgɔny yɛ́ Ɛlóod, pámáboodóm lɛ́ pɛ́ɛn əmuŋíən kɛbán. Ná páyɛ́ɛ́n əgiig kɔ, pə́yímuŋíən pɔ́nɔ́ əə: «Kɛlág, tɛálɛŋ lɛ́ wɛ olɛ əgusəə fɔ́lɔ́b, olɛ agaaʼkananɛ tɛn sáád wɔnɔ́ ná mɔɔd ogódíí lɛ́ ádáŋana a ngə́ yɛ́ yəə́gə́mmi Táán. Udiə́gu niis na mɔɔd, ungim alɛ yoom ímuʼ a əngis yááŋ. 17Kólɛ́ aa timíim əguŋíən lɛ́ óbɛdɛ́anɛ, a nɛáŋ ə́ə, pɛcɛm piə́s pɛ́lɛ əgusəə lɛ́ tɛ́ʼpɛ́ɛ́ mag na Sɛsáal əə́?» 18Yə́sus yɛɛ́lɛ́ŋ lɛ́ ambaan yə́ə́ŋ áa pálɛɛ́ əguunə náan. Náa ɔnɔ́ na pɔ́lɛ́: «Poagɛnjaásɔsɛn lɛ́ nkə ə́? Moɔ́ŋɛ́ná pusú wɔnɔ́ pəŋi! 19Oo, kɛbán kɛ́dɛɔ́gɔ! Mayɛ́nyɛɛ́ʼkɛ́naan kisúg kɛ́ mɔɔnɛ́ má polɛɛ́ agoʼpɛ́ɛ́la mag na mólɛ́ áŋ!» Pááság kolónɛ kisúg kɛ́ mɔɔnɛ́ kímuʼ, pámámonáámɛ́nɛ. 20Náa ɔnɔ́ na pɔ́lɛ́: «Udi wóonɛ wó ólɛɛ́ kɔ əə, wó ánɛ aa ólɛɛ́nɔ ə́? Niiŋ tɛn nɛ́ɛnɛ nɛ́ nɛ́lɛɛ́ kɔ nidilídə́ə́n ə́ə, nɛ́ ánɛ aa nɛ́lɛɛ́nɔ ə́?» 21Náa pɔ́nɔ́ na nyɔ́lɛ́: «Udi wóow ólɛ ó Sɛsáal. Ɔmbɔ́ tɛn niiŋ nɛ́ɛn, niə́ŋ áa nɛ́lɛɛ́nɔ.» Náa Yə́sus ɔnɔ́ na pɔ́lɛ́: «Yɛ́ ɛ́lɛɛ́ ɛ́ Sɛsáal, poɛ́ʼkɛn na Sɛsáal. Yɛ́ ɛ́lɛɛ́ ɛ́ Táán, póyɛɛ́ʼkɛn na Táán.»

22Pə́yə́wúnə́níí kɛ́fɔlɛ́ ná əyíbuyúlísíni náan, pááság kumuudi, páádɛ́ɛ́mɛn agɛɛn.

Pɛlóŋ pɛ́lɛ́ɛ́ kiiʼkini koóndɛgan əə́

(Mə́l 12.18-27; Lóʼk 20.27-38)

23Wɔɔ́s əgín wóow, Pasadosɛyɛ́ɛŋ, (pɔ́lɛ́ aa pádɛʼkɛ́lɛɛ́ əgəə́liʼtini lɛ́ pɛlóŋ pɛ́lɛ́ɛ́ koóndɛg) páyɛ́ɛ́n aboan Yə́sus, pááság kumuŋíən pɔ́nɔ́ əə: 24«Kɛlág! Táá nkə kɛ́ Moyíis yiísə́ə́ áa kɛ́ɛnɛ ɔnɔ́: “Mɔɔd amaʼkogóan ɔʼkɛ́ɛd náa əə́gú, əʼtí pɔɔ́n na oʼkán, móŋŋí ə́díin əsiəd kidí, pə́bíənə pɔɔ́n na kɛ́lɛ́ a niiŋ nɛ́ kɛlóŋ móŋŋí wəəŋ#22.24 Pódála tɛn náan a kálaʼtaʼ ɛ Tɛʼt 25.5-6 ” 25Kɛbán áa anɛ́ɛ́n a kɛ́ɛnɛ kɛ́lɛɛ́ lɛ́: Pɔɔd aa póob páyɛ́ɛ a niŋŋí nɛɔ́bɔn nto ɛ́ʼtáan na ɛ́baan. Sɔ́g nyɔ́ osaá aágóan ɔʼkɛ́ɛd, náa, əə́gú ná pə́dímbíən mɔɔ́n. Móŋŋí nyɔ́ ayɛ́ɛ əgumuyə́ən aáság kudíin əsiəd kidí. 26Nyɔ́lɛ́ tɛn əə́gú, əʼtí mɔɔ́n. Sɔ́g wo annam ádáád tɛn, yoom ímuʼ. Kɛ́yɛ́nánán náan súʼtə́ə́ a sɔ́g wo annam áʼtáan na ábaan, las yɔɔbɔn. 27A komananɛ, ɔʼkɛ́ɛd nyóon tɛn aáság kudíin əgu a ngim. 28Áay oóoʼ! A pɔ́lɛ́ póob nto ɛ́ʼtáan na ɛ́baan, ná pɛlóŋ pɛ́lɛ́ɛ́ koóndɛgan anɛ́ɛ́n óoʼ, oyaán áa alɛ́ɛ́ kɛɛnɛɛ́ onom wəəŋ ə́?» 29Yə́sus əyíbuyúlísíni ɔnɔ́ na pɔ́lɛ́: «Nkə kɛ́ɛg kɛ́ polɛɛ́ əgusəə kɛ́lɛ a ɔsɛd a mɔɛn lɛ́ podɛɔ́gɔ agolɛŋ nkə kɛ́ kɛ́lɛɛ́ kidiídílə́ a kálaʼtaʼ, pondɛŋ tɛn toɛn tó Táán wɔnɔ́ ná tólɛɛ́. 30Kɛ́lɛ lɛ́, ná pɛlóŋ pɛ́lɛ́ɛ́ koóndɛgan, ungim alɛ́ɛ́ kolaa wɔnɔ́ məŋun má maʼtom a mɔɛn, panɔ́mɛɛd páʼkoána pagɛ́ɛd, pagɛ́ɛd pádiɛnán pɛdɔ́ʼtɔn tɛn. 31A kɛ́ɛnɛ kɛ́ pɛlóŋ koóndɛg, podɛ́mbana nkə kɛ́ Táán yiísə́ə́ na unuʼ wə́ə́ŋ ɔnɔ́: 32“Ndɛ Táán yɛ Ábɛlaam, Táán yɛ Ɛ́sag, na Táán ɛ Yáʼkɔb#22.32 Kɛ́lɛ náan a kálaʼtaʼ yɛ Ɔsa 3.6 ” Táán ɔdɛɔ́gɔ Táán ɛ pɔɔd pá pálɛɛ́ pɛlóŋ, alɛ Táán ɛ pá pálɛɛ́ a ɔlaa.» 33Ungim nyɔ́ ayɛ́ɛ agoob tɔgɛ́ɛ́ tóod, ayɛ́ɛ əgəə́wúnəni na nɛaʼkananɛʼ nɛ́ Yə́sus.

Táá, kɛcɛm kɛ́ kɛ́mááyɛn pɛcɛm piim a kɛ́ɛnɛ

(Mə́l 12.28-34; Lóʼk 10.25-28)

34Ná Pafalɛsɛyɛ́ɛŋ páyóób lɛ́ Yə́sus yɛɛ́lɔ́g unuʼ ó Pasadosɛyɛ́ɛŋ, páyágɔ́nyɛ́dɛ́ɛ́. 35Náan aa sɔ́g nyummú a ondáŋ wɔ́ɔ́bɔn, ɔndɛŋ pɛcɛm əyímuŋíən agomoásɔsɛn, ɔnɔ́: 36«Kɛlág! A pɛcɛm piim əə, kɛ́yaán áa kɛ́mááyɛn pɔsɔ́g ə́?» 37Náa, Yə́sus ɔnɔ́ na nyɔ́lɛ́: «Táá kɛcɛm kɛ́ kɛ́mááyɛn aa kɛ́ɛnɛ kɛ́lɛɛ́ lɛ́: “Nyɔ́ŋɛn Táán Sə́dúk waaŋ na ɔʼtɛ́m wááŋ ungim, na ɛdáányɛ́ yááŋ yiim, na mafɛgaʼ mááŋ miim#22.37 Kɛ́lɛ náan a kálaʼtaʼ ɛ Tɛʼt 6.5 ” 38Kɛ́lɛ aa kɛ́lɛɛ́ kɛcɛm kɛ́ kɛgóón, kɛcɛm kɛ́ kɛ́mááyɛn piim. 39Kɛ́ kiə́yə́ə́n kɛ́ɛg, kɛ́máamoŋwáŋanan tɛn aa kɛ́ɛnɛ kɛ́lɛɛ́ lɛ́: “Nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d#22.39 Kɛ́lɛ náan a kálaʼtaʼ ɛ Ləf 19.18 ”. 40Əgəə́bə́ə a pɛcɛm pɛ́ Moyíis, əgiim agɛɛnanan a nkə kɛ́ palɔɛgɛʼ pɛbán pá Táán píísə́ə́, nidíŋ a nɛ́ɛn nɛ́lɛɛ́ a pɛcɛm pɛ́ɛb pɛ́baan.»

Yə́sus alɛ lɛ́ nyɔ́lɛ́ mɔɔ́n ó Tə́fid, nyɔ́lɛ́ Sə́dúk ɛ Tə́fid ə

(Mə́l 12.35-37; Lóʼk 20.41-44)

41Wɔnɔ́ ná Pafalɛsɛyɛ́ɛŋ páyɛ́ɛ kɔ áay paágɔ́nyɛ́dáán, Yə́sus aáság kubuŋíən ɔnɔ́: 42«Pəŋi poádála tuə́ a kɛbán kɛ́ Məsíi əə́? Alɛ mɔɔ́n wo ánɛ ə́?» Náa pɔ́nɔ́ na nyɔ́lɛ́: «Alɛ mɔɔ́n o Tə́fid oo.» 43Yə́sus ayɛ́bodɛánɛ ɔnɔ́ na pɔ́lɛ́: «Tuə́ áa Tə́fid nyɔ́lɛ́nyɔ́amɔɛ́d, ná Uŋun wó Ufúlúʼtú úyímuyə́ə́g a ɔʼtɛ́m ayɛ́modɔ́ŋɔn anɛ́ɛ́n lɛ́ Sə́dúk ə́? 44Adɛ́ kɛ́lɛ lɛ́, Tə́fid nyóon aa yiísə́ə́ ɔnɔ́:

“Sə́dúk Táán aádɛánɛ na Sə́dúk waam ɔnɔ́:

Wɛ, ləndin áanɛ a ombɔg wáam ó nɛnom

agɛɛn əgiig əgín wɔnɔ́ ná ndɛ́ɛ́ kɛɛlɛɛ́ lɛ́

úgíʼtən pabɛnɛn pááŋ na ambaan#22.44 Kɛ́lɛ náan a kálaʼtaʼ ɛ Pɛʼk 110.1 ”

45Tuə́ áa Məsíi alɛɛ́ ugiiʼkini kɛɛn lɛ́ alɛ mɔɔ́n o Tə́fid, Tə́fid nyɔ́lɛ́nyɔ́amɔɛ́d aámodɔ́ŋɔn lɛ́ Sə́dúk wəəŋ ə́?» 46Mɔɔd na mɔɔd adɛʼkɔ́ɔgɔɔŋ kɛbán kɛ́ kumuyúlisini. Əgəə́bə́ə a wɔɔ́s wóow, mɔɔd adɛʼkɛ́ɛ agowɛ́ɛsɛ kumuŋíən kə́mmú kɛbán.

Currently Selected:

Maʼtɛ́as 22: yatDBL

Highlight

Copy