Piligu 16
16
Haga mini Ishimail
1Ibram paɣa Zarai daa bi dɔɣi bihi. Zarai daa mali Ijipti dab’ bipuɣiŋga ka o yuli booni Haga. 2Ka Zarai daa ti yɛli Ibram, “Nyama, Yawɛ bi chɛ ka n dɔɣi bihi, dinzuɣu zaŋmi n dab’ bipuɣiŋga ŋɔ dɔni, di pa shɛli o ni dɔɣi bihi ti ma.” Ka Ibram daa saɣi Zarai ni yɛli shɛm maa. 3Ibram ni daa chaŋ ti ʒini Keenan tiŋgbɔŋ ni la yuun’ pia nyaaŋa, ka Ibram paɣ’ Zarai daa zaŋ o dabili Haga ŋun daa nyɛ Ijipti bipuɣiŋga la n-ti o yidana Ibram ka o niŋ o paɣa. 4Ka Ibram mini Haga daa dɔni, ka o niŋ pua. Haga ni daa nya ka o mali puu maa, ka o lihi ʒiɛm Zarai ŋun daa su o maa.
5Di saha ka Zarai daa yɛli Ibram, “N ʒiɛmbu ŋɔ taali ʒi a zuɣu. Mani n-zaŋ n dab’ bipuɣiŋga ŋɔ ti a, ka o ti nya ka o mali pua, ka lihi ʒiɛm ma. Yawɛ ni woligi ti m min’ a.”
6Amaa ka Ibram daa yɛli Zarai “Nyama, o nyɛla a dabili, ka a su o fukumsi; niŋm’ o a ni yu shɛm.” Ka Zarai daa yihi Haga halibiɛɣu ka o zo.
7Ka Yawɛ malaika daa yi o zuɣu mɔɣu ni kulibɔn shɛli din daa be Shur soli polo 8m-bɔh’ o, “Zarai dabili Haga, ya ka a lee yina bee ya ka a lee chana?”
Ka o yɛli, “N yila n lan’ Zarai sani zɔra.”
9Ka Yawɛ malaika maa yɛl’ o, “Labim’ a lan’ maa sani nti zaŋ amaŋ’ ti o.” 10Ka Yawɛ malaika maa daa lan yɛli Haga, “N ni chɛ ka a zuliya nab’ pam hal ka so ti ku tooi kali ba.” 11Yawɛ malaika maa daa lan yɛli Haga yaha, “Nyama, a mali pua, a mi ti yɛn dɔɣila bidibiga, ka bol’ o yuli Ishimail,#16.11 ISHIMAIL: Hiburuli ni di gbinni nyɛla “Naawuni wumya” bee “Naawuni wumda” dama Yawɛ wum a nandahima kuhigu maa. 12A bia maa ni ti bemi kaman mɔɣu ni buŋ’ la. O ti ku bɔri so yɛla, ka so gba ti ku bɔr’ o yɛla; ka o min’ o dɔɣiriba zaa ti ku tooi laɣim be.”
13Ka Haga daa boli Yawɛ ŋun tɔɣis’ o yɛtɔɣa maa yuli, “Naawuni ŋun nyara;” dama o daa yɛlimi, “Ka daɣila n shiri nyala Naawuni ka na be n nyɛvil’ ni n ni nya o maa nyaaŋa?” 14Dinzuɣu ka bɛ daa boli kɔbiliga maa yuli Bɛrilahairoi; ka di do Kadɛshi mini Bɛrɛd sunsuuni.
15 #
Gal 4.22
Ka Haga daa ti dɔɣi Ibram bidibiga, ka Ibram daa boli bi’ so Haga ni dɔɣi maa yuli Ishimail. 16Ibram yuma daa nyɛla yuun’ pihiniinaayɔbu saha shɛli Haga ni daa dɔɣi Ishimail ti o maa.
Currently Selected:
Piligu 16: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
