Luk 10
10
Yisa tim ninvuɣ’ pisopɔin
1Dimbɔŋɔ nyaaŋa ka ti Duuma daa pii ninvuɣ’ pisopɔin n-tim ba niriba ayiyi ni bɛ daŋ o tooni chaŋ tin’ shɛŋa zaa omaŋmaŋ’ gba ni daa yɛn chaŋ. 2#Mat 9.37-38 Ka yɛli ba, “Puu atam zooya pam, amaa ka tumtumdiba lee pɔra; dinzuɣu suhimiya ŋun su puu atam maa kpuɣibu ka o bo tumtumdiba pahi ka bɛ kpuɣi puu atam maa na. 3#Mat 10.16 Chamiya, amaa nyamiya, n tim ya mi kaman piɛbihi ni be kunduna sunsuuni shɛm la. 4#Mat 10.7-14; Maak 6.8-11; Luk 9.3-5 Di ʒin ya liɣiri kolibihi bee adiikunima bee namdanima; yi mi di puhiya daadam kam sol’ ni. 5Ka yi yi ti kpe yil’ shɛli, yin’ daŋmi yili maa nim’ puhibu ŋ-ŋɔ: ‘Naawuni niŋmi alibarika niŋ yili ŋɔ nim’ ni.’ 6Ka ŋun yuri Naawuni daalibarika yi be yili maa ni, yi daalibarika puhigu maa ni kpalim o ni; amaa lala nir’ yi ka yili maa ni, di ni lab’ yi sanna yaha. 7#1 Kɔr 9.14; 1 Tim 5.18 Ka kul kpalimmiya be yil’ yin’ ni n-diri ka nyuri bɛ ni kul tin ya shɛlikam, dama tumtumda kam simdi yɔri. Ka miriya ka yi lɔhiri yiya. 8Yi yi ti paai tiŋ’ kam ka bɛ deei ya, yin’ dimiya bɛ ni kul tin ya shɛlikam; 9ka chɛliya ka barinim’ bɛn be nimaani kpaŋ, ka yɛliya ba ni Naawuni nam miri ba. 10#Tuma 13.51 Amaa yi yi ti paai tin’ shɛlikam ka bɛ bi deei ya, yin’ doliya di pala yɛra, 11‘Hal yi ya ŋɔ taŋkpa’ shɛli din puɣ’ ti naba ŋɔ, ti ni pihi li bahi yi zuɣu, amaa lee baŋmiya ni Naawuni nam miri ya.’ 12#Pil 19.24-28; Mat 11.24; 10.15 N yɛri ya mi ni zaadali Sɔdomnim’ azaaba nyabu ni ti so tiŋ’ maa nim’ dini.”
Tin’ shɛŋa nim’ bɛn bi niŋ Yisa yɛda
(Matiu 11.20-24)
13 #
Aiz 23.1-18; Ɛzɛk 26.1—28.26; Joɛl 3.4-8; Amɔs 1.9-10; Zak 9.2-4 Yisa daa lan yɛli, “Mbusim be yinim’ Kɔrazinnim’ mini Bɛtisaidanim’ zuɣu! Dama tuun’ kar’ shɛŋa din daa tum yi tinsi maa ni la yi di daa tumla Taai mini Sidɔn, bɛn’ daa naan pili buri, ka buɣi tampiligim n-niŋ tuuba yom. 14Amaa zaadali Taainim’ mini Sidɔnnim’ azaaba nyabu ni ti so yi dini. 15#Aiz 14.13-15 Ka yinim’ Kapɛriniumnima, yi mi bɔri ni yi duhila yimaŋa hal ni Naawuni nam ʒiishee? Naawuni ni ti siɣisi ya kpiimba biɛhigu shee.”
16 #
Mat 10.40; Maak 9.37; Luk 9.48; Jɔn 13.20 “Ŋunkam wum yinim’ bɛn nyɛ n nyaandoliba ŋɔ yɛligu wumla n yɛligu, ka ŋunkam zaɣisi ya zaɣisila mani; ka ŋunkam mi zaɣisi ma zaɣisila ŋun tim ma na.”
Ninvuɣ’ pisopɔin labbuna
17Ka Yisa ni daa tim ninvuɣ’ pisopɔin shɛb’ la daa ti labina ni suhupiɛlli ti yɛl’ o, “Ti Duuma, hal ti nyaŋ alizin’ biɛri gba a yuli zuɣu!”
18Ka o yɛli ba, “N nya ka Sintani yi zuɣusaa luna kaman saa n-nyaɣisi la.” 19#Yila 91.13 Ka o daa lan yɛli ba, “Nyamiya, n niŋ ya yiko din ni chɛ ka yi no tinvura mini nɔnsi, ka lan pahi ya yiko din ni tooi nyaŋ yi dim’ ŋun nyɛ Sintani ŋɔ min’ o nyaaŋa zaa; ka binshɛɣu ku niŋ ya shɛli. 20Amaa dimbɔŋɔnim’ zaa yoli, di chɛliya ka yi suhuri piɛli yi ni nyaŋ alizin’ biɛri maa zuɣu; amaa chɛliya ka yi suhuri piɛlila yi yuya ni sab’ alizanda ni la zuɣu.”
Yisa suhu paligibu
(Matiu 11.25-27; 13.16-17)
21Di saha maa ka Naawuni Shia Kasi daa chɛ ka Yisa suhu paligi pam ka o yɛli, “M Ba Naawuni, nyin’ ŋun su alizanda mini dunia ŋɔ, m paɣir’ a, dama a zaŋ dimbɔŋɔnim’ sɔɣi yɛnnim’ mini dunia baŋdiba, ka lee kahigi li wuhila biliɛri; yɛlimaŋli m Ba, dama lala n-viɛl’ a sani.”
22 #
Jɔn 3.35; 10.15 O daa lan yɛli niriba, “M Ba Naawuni zaŋ binshɛɣukam zaa niŋ n nuu ni, ka so ʒi Naawuni Bia maa naɣila o Ba maa m-mi o; ka so mi ʒi Ba maa naɣila o Bia maa m-mi o m-pahi Bia maa ni kahigi Ba maa wuhi so.”
23Ka ŋmalig’ o nyaandoliba maa polo yɛli ba ashilɔni, “Ninvuɣ’ shɛb’ bɛn nina nyari yi ni nyari shɛli ŋɔ mal’ alibarika! 24Dama n yɛri ya mi ni anabinim’ mini nanim’ pam daa bɔri ni bɛ nina nya yi ni nyari shɛli ŋɔ, ka bi nya li; ka daa lan bɔri ni bɛ wum yɛl’ shɛŋa yi ni wumdi ŋɔ, ka daa bi wum li.”
Samaria ninvuɣ’ suŋ
25 #
Mat 22.35-40; Maak 12.28-34 Dimbɔŋɔ nyaaŋa ka zaligubaŋdi’ so daa ti bɔri ni o zahim Yisa, ka yiɣisi zani bɔh’ o, “Karimba, wula ka n lee yɛn niŋ ti nya nyɛvili din ka bahigu?” 26Ka Yisa bɔh’ o, “Wula ka di lee sab’ Naawuni zaligu ni? Wula ka a lee karindi li?”
27 #
Lɛv 19.18; Zal 6.5 Ka zaligubaŋda maa garigi yɛl’ o, “Di sabiya, ‘Yum’ a Duuma Naawuni ni a suhu zaa min’ a shia zaa ni a kpiɔŋ zaa ni a tɛha zaa, ka yum’ a ʒiʒiinikpee kaman amaŋmaŋ’ la.’ ”
28 #
Lɛv 18.5
Ka Yisa yɛl’ o, “Mbo! A garigi viɛnyɛliŋga; niŋmi lala ka be.”
29Ka zaligubaŋda maa daa bɔri ni o paɣ’ omaŋa ka bɔhi Yisa, “Ka ŋuni n-lee nyɛ n ʒiʒiinikpee?”
30Ka Yisa yɛl’ o, “Do’ so daa yi Jɛrusalɛm chani Jɛriko nti sirigiri zolɔŋni ka ŋmɛnditoya lir’ o soli maa ni m-pirig’ o, ka bu o hal ka o ti tarigi, ka bɛ fa o nɛma zo ka chɛ o. 31Ka di daa niŋ daliri ka maligumaani’ so doli soli maa na nti nya o, ka lɔɣ’ gari ka chɛ o. 32Lala ka Lɛvi zuliya ni so gba daa ti doli soli maa na nti nya o, ka lɔɣ’ o gari. 33Amaa ka Samaria do’ so gba daa ti doli soli maa na nti paai nimaani nya o, ka di niŋ o nambɔɣu pam; 34#2 Yɛl 28.15 ka o zaŋ wain paɣ’ o dansi maa, ka niŋ kpam bɔbili li, ka zaŋ tana lo li, ka zaŋ o balisi omaŋmaŋ’ buŋa n-zaŋ o ti kpɛhi saamba yilikpɛrili n-gbib’ o viɛnyɛliŋga. 35N-yi biɛɣu ka o yɛn chaŋ, ka yihi liɣiri kaman tumtumda daba ayi yɔri ti o yilikpɛrilana, ka yɛl’ o ni o lihim’ bara maa viɛnyɛliŋga. Ka lan yɛli ni hal o yi ti di laɣ’ shɛli o ni ti o maa pooi ka di omaŋmaŋ’ liɣiri pahi, o yi ti labina o ni yo o.”
36 “To, bɛ niriba ata ŋɔ sunsuuni, a tɛhiya ni ŋuni n-lee lihi ŋmɛnditoya ni daa liri do’ so maa kaman o ʒiʒiinikpee?”
37Ka o yɛli, “Ŋun daa zo o nambɔɣu la.”
Ka Yisa yɛl’ o, “A gba cham’ ti niŋmi lala.”
Yisa kaai Mariama mini Maata
38Ka Yisa min’ o nyaandoliba daa ti paai tiŋkpan’ shɛli, ka paɣ’ so ŋun yuli daa booni Maata zaŋ o ti kpɛh’ o yiŋa. 39#Jɔn 11.1 Ka Maata tizo so ŋun yuli daa booni Mariama la daa chaŋ ti ʒini Yisa tooni wumd’ o yɛtɔɣa; 40amaa ka Maata ŋun’ tɛha kul bela bindirigu niŋbu ni, ka daa ti chaŋ Yisa sani ti bɔh’ o, “N Duuma, a baɣa ka n tizo maa ni chɛ tuma jɛli ma ŋɔ ni? Yɛlim’ o ni o sɔŋm’ ma.”
41Ka Yisa yɛl’ o, “Maata! Maata! A jiɣirimi ka nahind’ amaŋ’ bina pam zuɣu. 42Bin’ yini mi kɔŋko n-simdi bɔbu. Mariama pii din viɛli maa, ka di mi ku lan yi o nuu ni.”
Currently Selected:
Luk 10: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
