Luk 15
15
Piɛ’ so ŋun bɔrigi yɛla ŋahili
(Matiu 18.12-14)
1Farigudeeriba mini alahichinim’ zaa daa kul laɣindila Yisa sanna ni bɛ ti wum o wuhibu; 2#Luk 5.29-30 ka Farisiinim’ mini Naawuni zaligubaŋdiba daa ŋumdi bɛ kparima ni yɛra, “Doo ŋɔ kul chɛri ka alahichinim’ kanila o sanna hal ka o mini ba ti laɣindi dira!” 3Ka Yisa daa ŋahi ba ŋahili ŋɔ m-bɔhi,
4 “Yi ni ŋuni n-lee ni mali piɛri kɔbiga, ka piɛ’ yino ti bɔrigi ka o ku chɛ piɛri kɔbigayinika la bɛ mɔri ŋubbu shee, ka gbaai ŋun bɔrigi maa shee bɔbu hal ti nya o? 5Ka o yi ti nya piɛ’ yino maa, o suhu paligirimi, ka o zaŋ o buɣi ni suhupiɛlli. 6O yi ti zaŋ o paai yiŋa, o boonila o zɔnim’ min’ o ʒiʒiinitab’ na ti yɛli ba, ‘Chɛliya ka yi suhuri paligi pahi n zuɣu, dama n nya m piɛ’ so ŋun daa bɔrigi la. 7Dinzuɣu n yɛri ya mi ni alahichilaan’ yino yi niŋ tuuba, suhupiɛlli pam ni be alizanda ni o zuɣu gari wuntizɔriba kɔbigayinika bɛn bi lan simdi ni bɛ niŋ tuuba la.”
Laɣ’ shɛli din bɔrigi yɛla ŋahili
8Ŋahili ŋɔ ka Yisa daa lan ŋahi ba bɔhi, “Paɣ’ ŋuni n-lee ni mal’ anzinfa laɣibaligu pia, ka di zaɣ’ yini ti bɔrigi, ka o ku nyo firila kolikol’ o yiŋ’ zaa m-bo li ni nimmoo hal ti nya li? 9Ka o yi ti nya li, o boonila o zɔnim’ min’ o ʒiʒiinitab’ na ti yɛli ba, ‘Chɛliya ka yi suhuri paligi pahi n zuɣu, dama n nya n laɣifu din daa bɔrigi la.’ 10Dinzuɣu n yɛri ya mi ni alahichilaan’ yino yi niŋ tuuba, Naawuni malaikanim’ gba malila suhupiɛlli o zuɣu.”
Bi’ so ŋun bɔrigi yɛla ŋahili
11Yisa daa lan ŋahi ba ŋahili ŋɔ pahi yɛli, “Do’ so n-daa mal’ o bidibis’ ayi. 12Ka biasani ti yɛl’ o ba, ‘M ba, tim’ ma fal’ shɛli n ni ti yɛn di a kalinsi nyaaŋa pumpɔŋɔ.’ Ka doo maa daa zaŋ o ni mali shɛli m-pirigi ti o bihi maa. 13Ka di daa bi yuui ka biasani maa laɣis’ o ni mali shɛlikam zaa n-zaŋ chaŋ tinshee katiŋ’ ha. Nimaani ka o daa ti zaŋ o buni maa zaa tum yoliyoli. 14O ni daa ti saɣim o buni maa zaa naai nyaaŋa, ka kum titali daa lu tiŋ’ maa ni; ka kum wum o pam.
15 Di saha ka o daa zaŋ omaŋ’ ti tabili tiŋ’ maa ni tiŋbi’ so, ka o timd’ o o puu ni ka o ti dihir’ o kuruchunima. 16Hal ka bia maa daa ti bɔri ni o dirila kuruchunim’ maa bindira maa shɛli, dama so daa bi tir’ o bindirigu. 17Ka di daa ti lu o suhu ni ka o bɔh’ omaŋa, ‘Padiriba ala n-lee be m ba yiŋa m-mali bindira diri tiɣiri ka chɛra, ka man’ ti be kpe kpiri kum? 18N ni yiɣisi labi m ba sani nti yɛl’ o, “M ba, m birigi n Duuma Naawuni sani ni a gba sani. 19Hal m bi lan simdi ni a boli ma a bia gba; amaa lihim’ ma kaman a padiriba ŋɔ ni yino.” 20Ka daa dii yiɣisi di saha maa n-labir’ o ba maa sani.
O ni daa ti na be katiŋ’ ha kanna ka o ba maa nya o ka nambɔɣu gbaag’ o pam; ka o yiɣisi zo nti tuh’ o soli m-bɔbi gbaag’ o ni suhupiɛlli. 21Ka o bia maa yɛl’ o, “M ba, m birigi n Duuma Naawuni sani ni a gba sani; hal m bi lan simdi ni a boli ma a bia gba.” 22Amaa ka o ba maa yɛl’ o yiŋ bihi, “Zaŋmiya kpar’ suŋ na yomyom ti yɛl’ o, ka zaŋ nintua na ti pir’ o, ka zaŋ namda na ti pir’ o pahi. 23Ka gbaai naɣila’ kpabili na ti kɔrigi ka ti ŋubi, ka diɛm suhupiɛlli diɛma; 24dama n sani, m bia ŋɔ daa kpimi ka lan neei na, o daa bɔrigimi ka n lan nya o yaha.” Ka bɛ daa dii gbaai diɛma diɛmbu ni suhupiɛlli.
25 Di saha maa o bikpɛm’ sani la ŋun’ daa na bela puu polo nti kun’ na miri yiŋ’ na wum diɛma biŋkumda kumsi, 26ka boli yil’ maa ni bi’ so na nti bɔh’ o diɛma maa daliri. 27Ka bia maa yɛl’ o, “A tizɔbil’ la n-kuna, ka a ba chɛ ka ti kɔrigi naɣila’ kpabili, o ni labina ni alaafee maa zuɣu.” 28Ka bikpɛm’ maa daa je suli zaɣisi duu kpɛbu; ka o ba daa yina ti balim o. 29Amaa ka o yɛl’ o ba maa, “Nyama, man’ ŋun kul be a sani nahindi yuun’ bɔbili ŋɔ zaa ka na ʒi n-zaɣis’ a noli ŋɔ, a na ʒi n-gbaai hal bubil’ gba ti ma ni n kɔrigi ka m mini n zɔnim’ laɣim di ka diɛm. 30Amaa ka a bi’ so ŋun zaŋ a buni chaŋ ti nahi pagɔra ŋɔ lee ti kuna, ka a gbaari naɣila’ kpabili kɔrigir’ o zuɣu!” 31Ka o ba maa yɛl’ o, “M bia, nyin’ kul bela n sani sahakam; ka n ni mali binshɛɣukam zaa nyɛla a dini. 32Di luhiya ni ti suhuri paligi ka ti diɛm, dama a tizɔbil’ maa kpimi ka lan neena; o daa bɔrigimi, ka ti lan nya o maa.”
Currently Selected:
Luk 15: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
