Luk 17
17
Din chɛri ka salinim’ tumd’ alahichi
(Matiu 18.6-7, 21-22; Maak 9.42)
1Yisa daa yɛl’ o nyaandoliba, “Biriginsim din ni kpɛhi nir’ alahichi ni ku chɛ, amaa mbusim be ŋun chɛ ka o kpee birigi tum alahichi zuɣu! 2Bɛ yi zaŋ nɛ’ karili lo n-yili dilan’ nyiŋgoli n-zaŋ o bahi teeku ni, di naan so o zuɣu gar’ o chɛ ka bibihi ŋɔ ni yino birigi. 3#Mat 18.15 Gbibiya yimaŋ’ viɛnyɛliŋga! A mabia yi tum a taali, nyin’ saɣisim’ o; o yi deeg’ o galimi, nyin’ chɛl’ o taali paŋ o. 4Hal o yi tum a taali siɣimsiɣim buyopɔin dahin yini ka ŋmaligi deeg’ o galimi siɣimsiɣim buyopɔin maa zaa, di niŋ kamaata ni a chɛ m-paŋ o.”
Yɛda niŋbu
5Ka tuumba maa daa yɛli Yisa, “Ti Duuma, pahim’ ti yɛda.” 6Ka o yɛli ba, “Yi yi di mali yɛda ka di be kaman zabiliga tibiɛlim la, yi naan tooi yɛli sinsabiga ŋɔ ni di vuɣim’ di zaashee ŋɔ chaŋ ti zani teeku ni, ka di di niŋ lala.”
Dabili tuma ni nyɛ shɛm
7Ka Yisa daa bɔhi ba, “Yi ni ŋuni n-lee ni mali dabili, ka o nyɛla ŋun kɔri bee ŋun guli biŋkɔbiri ka ti kuna, ka a dii yɛl’ o, ‘Kamina ti ʒini di bindirigu,’ 8ka ku yɛl’ o mi ni o malim’ shili n-zaŋ a bindirigu na ti zal’ a, ka a di ka nyu pɔi ka o mi naanyi chaŋ ti ʒini di ka nyu? 9Ka dabili maa yi niŋ a ni wuh’ o shɛm maa, a ni puh’ o di zuɣu? Aai! 10Dinzuɣu lala n-nyɛ li. Yi gba yi niŋ bɛ ni wuhi ya ni yi niŋ shɛm zaa yin’ yɛlimiya, ‘Ti bi simdi paɣibu, dama ti tuma ni nyɛ shɛli ka ti tum maa.’ ”
Yisa ni chɛ ka kɔnsi pia kpaŋ shɛm
11Yisa daa ti chani Jɛrusalɛm n-zaŋ doli Samaria mini Galili sunsuuni garita 12n-daa ti kpɛri tiŋkpan’ shɛl’ ni ka kɔnsi pia chirig’ o sol’ ni n-kaɣ’ ti ʒe katiŋ’ ha, 13ka duhi bɛ yee yɛli, “Ti dan’ Yisa, zom’ ti nambɔɣu!”
14 #
Lɛv 14.1-32
O ni daa nya ba maa ka o yɛli ba, “Chamiya ti zaŋ yimaŋ’ wuhi maligumaaniba.”
Bɛ ni daa ŋmaligi chani maa ka bɛ kpaŋ. 15Bɛ ni yino ni daa nya ka o kɔŋ maa naai maa ka o ŋmaligi labiri ka duhir’ o yee paɣiri Naawuni m-mal’ 16hal ti damdi Yisa tooni n-zaŋ o nina kpa tiŋ’ puhir’ o. Doo maa daa nyɛla Samaria nira. 17Di saha ka Yisa bɔhi, “Pa ninvuɣ’ pia n-di kpaŋ maa? Ka niriba awɛi la, bɛn’ kpalim ya? 18Bɛ ni so bi labina ni o ti paɣi Naawuni shee tinzun nir’ ŋɔ kɔŋko?” 19Ka ŋmaligi yɛli ŋun labina maa, “Yiɣisim’ chaŋ a chandi; a yɛda niŋbu zuɣu n-chɛ ka a kpaŋ.”
Naawuni nam kandina yɛla
(Matiu 24.23-28, 37-41)
20Farisiinim’ daa ti bɔhi Yisa, “Bɔ saha ka Naawuni nam yɛn piligi?”
Ka o garigi yɛli ba, “Naawuni nam bi yɛn piligimi ni shihira ka niriba nya li ni bɛ nini; 21bee so ti yɛli, ‘Nyamiya, di be kpe!’ Bee n-yɛli, ‘Di be kpe ha!’ Dama Naawuni nam maa be yi sunsuuni pumpɔŋɔ.”
22Ka Yisa daa yɛl’ o nyaandoliba, “Dahin shɛli kanna ka yi ni ti bɔri ni yi nya Daadam Bia saha ŋɔ dabisili zaɣ’ yini gba, ka ku nya li. 23Bɛ ni ti yɛli ya, ‘Nyamiya, o be kpe ha!’ Bee n-yɛli ya, ‘Nyamiya, o be kpe!’ Ti miriya ka yi chaŋ bee nti doli ba. 24Daadam Bia dabisili ti yɛn ŋmanila saa ni yi nyaɣisi di pilibu shee m-mali ti ba di naabu shee shɛm la. 25Amaa shee o di wahala balibu kam pɔi, ka ʒiɛmani ŋɔ nim’ ti zaɣis’ o. 26#Pil 6.5-8 Di ni daa niŋ shɛm Anabi Nuhu saha la, lala ka di ti yɛn niŋ Daadam Bia gba dabisili dali. 27#Pil 7.6-24 Bɛ daa diri ka nyura, ka kpuɣiri paɣiba, ka zaŋdi bɛ bipuɣinsi tiri dɔbba hal ti paai Anabi Nuhu ni daa kpe ŋariŋ ni dahin’ shɛli ka kom kana ti di bɛ zaa ha la. 28#Pil 18.20—19.25 Lɔt saha la gba, lala n-daa nyɛ li: Bɛ daa diri ka nyura; ka dari ka kɔhira; ka biriti ka mɛri yiya. 29Amaa Lɔt ni daa ti yi Sɔdom dindahin’ shɛli, ka buɣim ni chilibi buɣim daa yi zuɣusaa na ti di bɛ zaa ha la, 30lala nti yɛn nyɛ Daadam Bia gba yi ti labina yi palo.
31 Dindali maa ŋun ti be dufahirili zuɣu ka o nɛma be duu, ŋun di lan siɣina ni o ti kpe n-kah’ o nɛma maa. Ka ŋun mi ti be puu ni di lan kuli yiŋa. 32Teemiya din daa niŋ Lɔt paɣ’ la. 33#Mat 10.39; 16.25; Maak 8.35; Luk 9.24; Jɔn 12.25 Ŋunkam bɔri ni o tilig’ o nyɛvili ni ti kɔŋ li, ka ŋunkam mi kɔŋ o nyɛvili ni ti lan nya li. 34N yɛri ya mi, dindali maa yuŋ niriba ayi ni ti do bindo’ yini zuɣu, ka Naawuni ti kpuɣ’ yino ka chɛ ŋun’ la. 35Ka paɣiba ayi ni ti laɣim niɛmda, ka Naawuni ti kpuɣ’ yino ka chɛ ŋun’ la. [ 36Dɔbba ayi mi ni ti be puu ni, ka Naawuni ti kpuɣ’ yino ka chɛ ŋun’ la.]
37Ka o nyaandoliba maa bɔh’ o, “Ti Duuma, ya polo ka dimbɔŋɔnim’ ti yɛn niŋ maa?”
Ka o yɛli ba, “Bin’ kpiŋ ni be luɣ’ shɛli, nimaani ka juri laana.”
Currently Selected:
Luk 17: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
