Yibu 12

Yaɣigari yɛla

1 # Lɛv 23.5; Kal 9.1-5; 28.16; Zal 16.1-2 Ka Yawɛ daa yɛli Musa mini Aduna Ijipti tiŋgbɔŋ maa ni, 2“Goli ŋɔ n-yɛn nyɛ goya piligu goli yi sani, dina n-yɛn nyɛ gol’ tuuli yi sani yuuni puuni. 3Dinzuɣu yɛlimiya Izraɛlnim’ zaa ni goli ŋɔ biɛɣu pia dali yiliyidan’ kam ŋun bom’ piɛbila o min’ o malibu zuɣu, ka yili kam ti mali piɛbila. 4Ka yili shɛli din pɔri ka ku tooi ŋubi piɛbila muni naai, bɛn’ chɛ ka bɛ mini bɛ ʒiʒiinitaba bɛn baɣi ba laɣim bo piɛbil’ yino, di simdi ka bɛ pirigi piɛbil’ maa saɣisi ninvuɣ’ shɛb’ bɛn yɛn ŋub’ o kalinli. 5Di simdi ka yi piɛbil’ nyɛla ŋun ka daŋa, ka nyɛ yuun’ yini piɛbila. Yi ni tooi zaŋ bulaa ŋun be lala gba. 6Di simdi ka yi lo biŋkɔbigu maa zali hal ni goli maa biɛɣ’ pinaanahi dali, dindali zaawuni ka Izraɛlnim’ zaa ni ti kɔri bɛ biŋkɔbiri maa. 7Di simdi ka bɛ ti zaŋ bɛ ʒim maa vie bɛ dunɔpaɣira mini bɛ dunoya zuɣusahi luɣ’ shɛŋa zaa bɛ ni yɛn ŋubi nimdi maa. 8Di simdi ka bɛ ti she di nimdi maa dindali yuŋ maa ŋ-ŋubi di mini bɔrɔbɔro din ka dabindi ni vari din to. 9Di ti ŋubiya niŋkaha bee n-duɣ’ li, amaa ti shɛmiya binzuɣuri ni biɛhi zaa n-tabili puuni nɛma zaa. 10Ka di bi simdi ka yi chɛ di shɛli zali hal ni asiba. Ka shɛli yi guui zani hal ni biɛɣ’ asiba, yin’ zaŋmiya li nyo buɣim. 11Yi ni yɛn ŋub’ li shɛm m-bɔŋɔ: Somiya yi kpalansi, ka piri yi namda, ka kpuɣiya yi jaaŋgbɛhi gbibi, ka ŋub’ li yomyom, dama di nyɛla Yawɛ yaɣigari.

12“Dama dindali yuŋ maa n ni tim Ijipti tiŋgbɔŋ ni gari, ka ku Ijipti tiŋgbɔŋ maa ni bikpamba zaa, ninsalinim’ mini biŋkɔbiri zaa, ka darigi Ijipti buɣa zaa tibili. Dama mani n-nyɛ Yawɛ. 13Ʒim la ni ti nyɛla shihirili din wuhiri yi ni be yi yiya shɛŋa ni. Ka n yi ti kuri Ijiptinim’ na ti paai ya ka nya ʒim maa, n ni kpahi yaɣ’ ya gari, ka yinim’ yi alɔbo maa ni. 14#Yibu 23.15; 34.18; Lɛv 23.6-8; Kal 28.17-25; Zal 16.3-8 Dabisili ŋɔ nyɛla yin’ ni teeri dabisi’ shɛli yɛla, ka di simdi ni yi puhiri di chuɣu n-tiri Yawɛ jilima. Zaŋmiya li leei zaligu yi ʒiɛmani kam ni ka gbib’ li.”

Bɔrɔbɔro din ka dabindi chuɣu

15“Di simdi ka yi ti ŋubi bɔrɔbɔro din ka dabindi daba ayopɔin; di dabisi’ tuuli dali maa, di simdi ka yi yihi dabindi kam yi yinsi. Ka so yi ti di dabindi daba ayopɔin ŋɔ puuni, dilan’ ni yi Izraɛl zuliya ni. 16Di piligu dali, di simdi ka yi laɣim laɣiŋgu kasi, daba ayopɔin maa dali gba, di simdi ka yi lan laɣim laɣiŋgu kasi, ka di bi simdi ka yi tum tuma di dabisa maa ni, amaa yi ni tooi duɣi yi bindira dina. 17Di simdi ni yi puhiri bɔrɔbɔro din ka dabindi maa chuɣu, dama dindali maa ka n daa yihi yi zuliya maa gbilligbilli Ijipti tiŋgbɔŋ ni. Dinzuɣu di simdi ka yi gbibi dabisili maa yi ʒiɛmani kam ni ka di nyɛ zaligu sahakam. 18Gol’ tuuli maa biɛɣ’ pinaanahi dali zaawuni, di simdi ka yi ŋubiri bɔrɔbɔro din ka dabindi hal ni goli maa biɛɣ’ pisiniyini dali zaawuni. 19Di bi simdi ka dabindi be yi yinsi daba ayopɔin maa ni. Ka ŋunkam di binshɛli din mali dabindi, dilan’ ni yi Izraɛlnim’ laɣiŋgu ni, dilan’ yi nyɛla sana bee tiŋbia. 20Di bi simdi ka yi di binshɛli din mali dabindi, Di simdi ni yi ŋubirila bɔrɔbɔro din ka dabindi luɣ’ shɛlikam zaa yi ni be.”

Tuuli Yaɣigari chuɣu puhibu

21Di saha ka Musa daa boli Izraɛl kpamba zaa na nti yɛli ba, “Sokam bom’ biŋkɔb’ bila kaman o malibu ni nyɛ shɛm nti kɔrigi puhi Yaɣigari chuɣu. 22Ka zaŋya taaŋkɔro tim ʒi’ shɛli yi ni taɣi niŋ taha ni zali la ni n-zaŋ vie yi dunoya zuɣusahi mini dunɔpaɣira, ka di chɛliya ka so doli dunoli maa yi hal ni asiba. 23#Hib 11.28 Dama Yawɛ yɛn kpɛla tiŋ’ ŋɔ ni na nti ku Ijiptinima, ka o yi ti nya ʒim maa yili shɛli dunoli zuɣusaa mini dunɔpaɣira ni, o ni yaɣi lala yili maa gari, ka ku chɛ ka kum maa kpe yi yinsi ti kun ya. 24Di simdi ka yi zaŋ dimbɔŋɔ leei zaligu yi sani, ka yi mini yi bihi doli li sahakam. 25Ka yi yi ti paai Yawɛ ni daa lo alikauli ni o ni zaŋ tiŋgbɔn shɛli tin ya la ni, yin’ puhimiya di chuɣu maa. 26Ka yi bihi yi ti bɔhi ya, ‘Yi ni niŋdi shɛli ŋɔ gbinni lee nyɛla dini?’ 27Yin’ yɛlimiya ba ni di nyɛla Yawɛ Yaɣigari chuɣu sara maligu. Dama o ni daa kuri Ijiptinima, o daa yaɣila tinim’ yiya gari, ka bi ku ti.”

Di saha ka Izraɛlnim’ maa daa silim bɛ zuɣuri tiŋ’ jɛm Naawuni, 28ka bɛ daa chaŋ ti niŋ Yawɛ ni yɛli Musa mini Aduna ni bɛ yɛli ba ka bɛ niŋ shɛm maa.

Bikpamba kubu yɛla

29 # Yibu 4.22-31 Dindali maa yuntisuɣu, ka Yawɛ daa kana ti ku Ijipti bikpamba zaa. Firawuna ŋun daa ʒi o nam ni la bidib’ kpɛm’ daa kpiya, hal dansarika so ŋun daa be vol’ ni sarika ni bidibituuli gba daa kpiya zaŋ tabili bɛ ni daa tuui dɔɣi biŋkɔb’ dib’ shɛb’ zaa. 30Ka Firawuna min’ o kpamba ni Ijiptinim’ zaa daa yiɣisi yuŋ maa ka kuŋ mɔni Ijipti fɔŋ ni zaa, dama yili shɛli daa kani ka kum bi ku nimaani. 31Ka o daa boli Musa mini Aduna na yuŋ maa ti yɛli ba, “Yi mini Izraɛlnim’ zaa yiɣisimiya n tiŋgbɔŋ ŋɔ ni ka chɛ n niriba ŋɔ; chamiya ti jɛm Yawɛ kaman yi ni yɛli shɛm maa. 32Zaŋmiya yi biŋkɔbbaligu mini yi niɣi zaa chaŋ kaman yi ni yɛli shɛm maa, ka suhiya Naawuni daalibarika niŋ n ni.”

33Ka Ijiptinim’ daa kul kpaŋsiri Izraɛlnim’ maa ni bɛ yim’ bɛ tiŋgbɔŋ maa ni yomyom, dama bɛ daa yɛlimi, “Di yi pa lala tinim’ gba kul kpimi maa.” 34Di saha ka Izraɛlnim’ maa daa zaŋ bɛ ni ŋɔri bɔrɔbɔro zim shɛli ka na bi niŋ dabindi niŋ di ni n-niŋ bɛ bɔrɔbɔro shɛr’ lahi ni n-guri adiikunim’ ni n-zaŋ pa bɛ bɔɣusapima zuɣu. 35#Yibu 3.21-22 Ka Izraɛlnim’ maa daa lan niŋ kaman Musa ni daa yɛli ba ni bɛ niŋ shɛm la; bɛ daa suhi Ijiptinim’ maa anzinfa mini salima yɛri ni situra. 36Ka Naawuni daa chɛ ka Ijiptinim’ maa niŋ ba nirilim ti ba bɛ ni kul suhi shɛlikam zaa. Ka bɛ daa zaŋ Ijiptinim’ maa daazichi pam pahi chaŋ.

Izraɛlnim’ ni yi Ijipti shɛm

37Ka Izraɛlnim’ maa daa yiɣisi Ramɛsis n-chaŋ Sukɔt, dɔbba kɔŋko kalinli daa nyɛla tuhi’ kɔbisiyɔbu m-pahi paɣiba mini bihi. 38Ka zuliya shɛb’ gba niriba pam daa zaŋ bɛ biŋkɔbiri pam bɛn nyɛ piɛri ni buhi ni niɣi n-doli ba chaŋ. 39Ka Izraɛlnim’ maa daa zaŋ bɛ ni ŋɔri bɔrɔbɔro zim shɛli Ijipti tiŋgbɔŋ ni la maani maha, dama dabindi daa ka di ni, bɛ mi daa bi ʒi bindir’ shɛli mali chaŋ, bɛ ni daa kari ba yihi Ijipti yomyom shɛm maa zuɣu.

40 # Pil 15.13 Izraɛlnim’ daa ʒini Ijipti tiŋgbɔŋ ni la yuun’ kɔbisinahi ni pihita. 41Yuun’ kɔbisinahi ni pihita maa naabu dali, ka Yawɛ niriba gbilligbilli maa zaa daa yi Ijipti tiŋgbɔŋ maa ni. 42Dindali maa yuŋ ka Yawɛ daa guli ni o yihi Izraɛlnim’ Ijipti tiŋgbɔŋ maa ni. Di yuŋ maa nyɛla Izraɛlnim’ zaa ni gbibi shɛli, ka di nyɛ Yawɛ guhibu yuŋ bɛ ʒiɛmani kam ni.

Yaɣigari chuɣu puhibu zaligu

43Ka Yawɛ daa yɛli Musa mini Aduna, “Yaɣigari chuɣu puhibu zaligu m-bɔŋɔ, Di bi simdi ka tinzun’ nira di Yaɣigari chuɣu bindirigu maa. 44Amaa yi ni da dab’ so ka gun’ o, o ni tooi di bindirigu maa o gunibu nyaaŋa. 45Ka ŋun nyɛ sana bee yi ni bu so paa bi simdi ni o di li. 46#Kal 9.12; Jɔn 19.36 Di simdi ka yi ti di li la yili yin’ ni ka di bi simdi ni yi zaŋ di nimdi yi samban’ ni bee ŋ-ŋma di kɔbili. 47Di simdi ka Izraɛlnim’ zaa dol’ li. 48Ka sana yi be yi sani ka bɔri ni o puhiri Yaɣigari chuɣu ŋɔ tiri Yawɛ jilima, yin’ chɛliya ka o gun’ o yiŋ’ bidibisi zaa, di saha o ni leei Izraɛl tiŋbia, ka ni tooi puhiri Yaɣigari chuɣu maa. Amaa di bi simdi ka ŋun bi guni di li. 49Di simdi ka yi mini saamba bɛn be yi sani zaa zaligu nyɛla zaɣ’ yini.” 50Ka Izraɛlnim’ zaa daa niŋ kaman Yawɛ ni daa zali Musa mini Aduna ni bɛ chɛ ka bɛ niŋ shɛm maa. 51Dindali maa ka Yawɛ daa yihi Izraɛlnim’ zaa Ijipti tiŋgbɔŋ maa ni gbilligbilli.

Currently Selected:

Yibu 12: DBwDB

Highlight

Copy

Compare