Yibu 13

Bɛ ni zaŋ bikpamba ti Naawuni shɛm

1Ka Yawɛ daa yɛli Musa, 2#Kal 3.13; Luk 2.23 “Zaŋmiya bidib’ tuuli kam ti ma. Bɛ ni kul tuui dɔɣi binshɛɣukam ka o nyɛ zaɣ’ lɔɣu, ninsal’ bee biŋkɔbigu Izraɛlnim’ sunsuuni nyɛla n dini.”

Bɔrɔbɔro Din ka Dabindi Chuɣu Puhibu

3Ka Musa daa yɛli niriba maa, “Di simdi ka yi teeri dabisili ŋɔ yɛla, di nyɛla yi ni daa yi Ijipti tiŋgbɔŋ ni dahin’ shɛli ka yi dabitim bandi ni la, dama Yawɛ yiko nuu n-daa yihi ya nimaani maa. Di bi simdi ka yi ŋubi bɔrɔbɔro din mali dabindi. 4Zuŋɔ dabisili ŋɔ, Abib goli ŋɔ ni ka yi yɛn yi. 5Ka Yawɛ yi ti zaŋ ya tahi Keenannim’ mini Hitinim’ ni Amɔrinim’ ni Hivinim’ ni Jɛbusinim’ tiŋgban’ shɛli o ni daa lo yi yaannim’ alikauli ni o ni zaŋ tin ya, ka di nyɛ tiŋgban’ shɛli din mali bihim mini shiri pam la, yin’ puhimiya di chuɣu maa goli maa ni. 6Di simdi ka yi ŋubiri bɔrɔbɔro din ka dabindi hal ni daba ayopɔin dali. Daba ayopɔin maa dali, di simdi ka yi puhiri Yawɛ chuɣu maa. 7Yi ni ŋubi bɔrɔbɔro din ka dabindi daba ayopɔin di dabisa maa ni. Di bi simdi ka yi chɛ ka so nya dabindi bɔrɔbɔro yi sani yi biɛhigu shee zaa. 8Dindali maa, yɛlimiya yi bihi Yawɛ ni daa niŋ shɛlikam zaa tin ya shɛm saha shɛli yi ni daa yi Ijipti na la, di zuɣu ka yi puhiri di chuɣu maa. 9Ka di ti leei shihirili shɛli din yɛn lo yi nuu ni, ka be yi gbɛri zuɣu n-chɛ ka yi teeri di yɛla din ni chɛ ka Yawɛ zaligu maa yɛla kul be yi noya ni, dama Yawɛ yiko nuu ka o daa zaŋ yihi ya Ijipti tiŋgbɔŋ ni. 10Di simdi ni yi puhiri di chuɣu maa di puhibu saha yuuni kam.”

Bikpamba yɛla

11“Ka Yawɛ yi ti zaŋ ya tahi Keenannim’ tiŋgbɔŋ maa ni nti zaŋ li tin ya kaman o ni daa lo yi mini yi yaannim’ alikauli shɛm la, 12#Yibu 34.19-20; Luk 2.23 yin’ ti zaŋmiya bɛ ni tuui dɔɣi bi’ shɛba zaa ti Yawɛ. Yi biŋkɔbiri ni tuui dɔɣi zaɣilɔ’ shɛb’ zaa nyɛla Yawɛ dini. 13Amaa buŋdibbil’ tuuli kam, yin’ zaŋmiya piɛɣu zal’ o zaani, ka yi yi bi niŋ lala, dindina yin’ ŋmɛlimiya kab’ o nyiŋgoli. Di simdi ni yi zaŋ binshɛli taɣi yi tuuli bidibisi n-tiligi ba. 14Ka a bia yi ti bɔh’ a daliri shɛli din chɛ ka a doli zaligu maa, nyin’ yɛlim’ o, ‘Ti ni daa nyɛ daba be Ijipti tiŋgbɔŋ ni la, Yawɛ n-daa zaŋ o nuu din mali kpiɔŋ n-yihi ti dabitim ni, lala zuɣu ka ti doli zaligu maa. 15Dama Firawuna ni daa niŋ tipawumli ka zaɣisi ni o ku chɛ ka ti yi o tiŋgbɔŋ ni chaŋ la, ka Yawɛ daa ku binshɛɣukam ni tuui dɔɣi bi’ shɛb’ zaa, ninsalinim’ zaŋ tabili biŋkɔbiri zaa, o daa ku bɛ ni tuui dɔɣi bi’ shɛba, dinzuɣu ka n zaŋdi binshɛɣukam ni tuui dɔɣi bi’ shɛb’ zaa m-maani sara tir’ o maa. Amaa m bihi bɛna, n zaŋla binshɛli zali bɛ zaani. 16Di simdi ka di ti leei shihirili be yi nuhi ni mini yi gbɛri zuɣu, dama Yawɛ daa zaŋla o yiko nuu yihi ti Ijipti tiŋgbɔŋ ni na.’ ”

Sagbani daantaliga mini buɣim daantaliga

17Firawuna ni daa chɛ ka Izraɛlnim’ maa yi o tiŋgbɔŋ maa ni, Naawuni daa bi zaŋ ba doli Filistianim’ tiŋgbɔŋ polo, nimaani polo ni daa nyɛ so’ jia maa zaa yoli, dama Naawuni daa yɛlimi, “Tɔbu yi ŋme niriba maa, bɛ tɛha ni taɣi ka bɛ zo n-labi Ijipti.” 18Dinzuɣu ka o daa zaŋ ba golimgolim tiŋgban’ nɛli ni kpa Teeku Ʒiɛɣu polo. Izraɛlnim’ daa lola tɔbu n-yi Ijipti tiŋgbɔŋ maa ni.

19 # Pil 50.25; Jɔsh 24.32 Ka Musa daa zaŋ Yisifu kɔba m-mali chaŋ kaman ŋun’ Yisifu ni daa chɛ ka Izraɛlnim’ po pɔri ni bɛ ni niŋ shɛm la. Dama Yisifu daa yɛli ba, “Naawuni yi ti ka yaŋɔ tiŋgbɔŋ ŋɔ ni na ti tiligi ya, ka yi yɛn chaŋ, yin’ zaŋmiya n kɔba mali chaŋ.”

20Ka bɛ daa yiɣisi Sukɔt n-chaŋ ti dɔni Itam tiŋgban’ nɛl’ naŋgbaŋgbiriŋ. 21Biɛɣu daa yi neei, Yawɛ chɛrimi ka sagban’ daantaliga be bɛ tooni n-wuhiri ba soli, yuŋ mi daa yi ti zibi, o chɛrimi ka buɣim daantaliga be bɛ tooni n-ne ba din ni chɛ ka bɛ chani yuŋ ni wuntaŋ’ ni zaa. 22Ka sagban’ daantaliga din daa be niriba maa tooni wuntaŋ’ ni la mini buɣim daantaliga din daa be bɛ tooni yuŋ la daa na ʒi n-zo bɛ sani.

Currently Selected:

Yibu 13: DBwDB

Highlight

Copy

Compare