Yibu 14

Bɛ baai du Teeku Ʒiɛɣu

1Ka Yawɛ daa yɛli Musa, 2“Yɛlim’ Izraɛlnim’ ni bɛ ŋmaligi labi bɛ nyaaŋa nti dɔni Pihahirɔt tooni polo, Migidol mini teeku sunsuuni luɣ’ shɛli din miri Baalizɛfɔn la; dɔnimiya miri teeku maa noli. 3Firawuna ni yɛli Izraɛlnim’ yɛla, ‘Bɛ bela tiŋgbɔŋ ŋɔ ni dari ginda, ka ʒi bɛ ni kpari shɛli polo, ka tiŋgban’ nɛli taɣi ba zali.’ 4N ni chɛ ka Firawuna niŋ tipawumli n-kari doli ya na din ni chɛ ka n nya jilima Firawuna min’ o tɔbbi’ gbaliŋ maa zuɣu, ka Ijiptinim’ maa baŋ ni mani n-nyɛ Yawɛ.” Ka bɛ daa shiri niŋ lala.

5Ijipti naa ni daa wum ni Izraɛlnim’ maa zoya maa, ka o min’ o kpamba zaa suhuri daa lan taɣi zaŋ chaŋ bɛ polo ka bɛ yɛli, “Bɔzuɣu ka ti daa niŋ lala? Bɔzuɣu ka ti chɛ ka Izraɛlnim’ maa chaŋ ka chɛ ti tuma?” 6Di saha ka o daa mali chɛchɛbunsi shili, ka zaŋ o tɔbbihi pa omaŋ’ zuɣu. 7O daa zaŋla chɛchɛbun’ gahinda kɔbisiyɔbu ni Ijipti chɛchɛbunsi zaa, ka tɔbbihi daa be di zaa ni. 8Ka Yawɛ daa chɛ ka Firawuna niŋ tipawumli n-kari doli Izraɛlnim’ maa saha shɛli bɛ ni daa yi Ijipti tiŋgbɔŋ ni ni nasara la. 9Ka Ijiptinim’ maa mini Firawuna yuri ni chɛchɛbunsi ni wɔribariba zaa ni o tɔbbihi zaa daa doli Izraɛlnim’ maa ti paai ba, ka bɛ dola teeku noli luɣ’ shɛli din yuli booni Pihahirɔt din daa be Baalizɛfɔn tooni polo la.

10Firawuna ni daa mirina, ka Izraɛlnim’ maa daa lihi bɛ nyaaŋa n-nya ka Ijiptinim’ maa kani bɛ sanna, ka dabiɛm daa gbahi ba pam, ka bɛ kuhi pam niŋ Yawɛ, 11ka bɔhi Musa, “Gbala n-daa lee ka Ijipti tiŋgbɔŋ ni bee bɔzuɣu ka a zaŋ ti na ni ti ti kpi tiŋgban’ nɛli ŋɔ ni? Bɔzuɣu ka a niŋ ti lala? Bɔzuɣu ka a zaŋ ti yi Ijipti na? 12Ti daa pun bi yɛl’ a Ijipti ni a chɛl’ ti baalim ka ti jɛmdi Ijiptinima? Dama ti yi di daa jɛmdi Ijiptinim’ maa, di di so ti ni yɛn kpi tiŋgban’ nɛli ŋɔ ni ŋɔ.”

13Ka Musa daa yɛli ba, “Di zɔriya dabiɛm, zanimiya baalim nya Yawɛ ni yɛn tum tiliginsim tuun’ shɛli tin ya zuŋɔ; dama yi ni nya Ijipti ninvuɣ’ shɛb’ zuŋɔ ŋɔ, yi nini ku lan nya ba yaha. 14Yawɛ ni tuhi ba tin ya, kul ʒiɛnya baalim.”

15Di saha ka Yawɛ daa yɛli Musa, “Bɔ n-niŋ ka a kuhiri niŋdi ma? Yɛlim’ Izraɛlnim’ maa ni bɛ cham’ tooni. 16Amaa nyin’ kpuɣim’ a jaaŋgbee zuɣusaa n-teeg’ a nuu tiri teeku maa m-pirigi li buyi ka chɛ ka Izraɛlnim’ maa doli tiŋgban’ kuŋ zuɣu du. 17Ka n chɛ ka Ijiptinim’ maa niŋ tipawumli siɣi doli ba na, ka di chɛ ka n nya jilima Firawuna min’ o tɔbbihi zaa ni o chɛchɛbunsi ni o chɛchɛbunduhiriba zuɣu. 18N yi nya jilima Firawuna min’ o chɛchɛbunsi ni o chɛchɛbunduhiriba ŋɔ zuɣu, di saha ka Ijiptinim’ maa ni baŋ ni mani n-nyɛ Yawɛ.”

19Ka Naawuni malaika ŋun daa be Izraɛlnim’ maa tooni la daa gari ti zani bɛ nyaaŋa polo, ka sagban’ daantaliga la gba daa gari ti zani bɛ nyaaŋa polo. 20Di daa ʒiɛla Ijipti tɔbbihi mini Izraɛl tɔbbihi sunsuuni. Sagbani maa daa nyɛla zibisim Ijiptinim’ polo, ka nyɛ neesim Izraɛlnim’ polo yuŋ zaa ka bɛ so daa bi tooi mir’ o kpee yuŋ maa zaa.

21Ka Musa daa teeg’ o nuu tiri teeku maa, ka Yawɛ daa chɛ ka pɔhim kpiɔŋ yi wulimpuhili polo na nti ʒe teeku maa kom labisi nyaaŋa yuŋ maa zaa m-pirigi li buyi ka chɛ tiŋ’ kuŋ. 22#1 Kɔr 10.1-2; Hib 11.29 Ka Izraɛlnim’ daa siɣi teeku maa ni n-doli tiŋ’ kuŋ maa chana, ka koma maa be kaman goma la n-ʒe bɛ nudirigu mini bɛ nuzaa polo. 23Ka Ijiptinim’ maa daa doli ba na ti siɣi teeku maa sunsuuni, Firawuna yuri zaa min’ o chɛchɛbunsi ni o chɛchɛbunduhiriba la zaa. 24Biɛɣ’ asiba ka Yawɛ daa be sagban’ buɣim daantaliga maa ni, ka lihi tiŋ’ na n-nya Ijipti tɔbbihi maa, ka o chɛ ka bɛ lu abirima. 25Ka bɛ chɛchɛbunsi daa firi bayaɣiti ni n-kɔŋ chandi. Di saha ka Ijiptinim’ maa daa yɛli, “Chɛliya ka ti zo ka chɛ Izraɛlnim’ maa, dama Yawɛ tuhirila Ijiptinim’ pahiri bɛ zuɣu.”

26Di saha ka Yawɛ daa yɛli Musa, “Teem’ a nuu tiri teeku maa n-chɛ ka kom maa nahi tab’ yaha n-lim Ijiptinim’ maa n-tabili bɛ chɛchɛbunsi mini bɛ chɛchɛbunduhiriba maa zaa.” 27Ka Musa daa teeg’ o nuu tiri teeku maa. Zaŋ chaŋ biɛɣu daa ti yɛn neei ka teeku maa kom maa lan nahi taba, ka Ijiptinim’ maa daa yɛn zo n-yi dini, ka Yawɛ daai ba niŋ teeku maa bulli ni 28ka koma maa daa labina ti lim Firawuna chɛchɛbunsi min’ o chɛchɛbunduhiriba ni o tɔbbihi bɛn daa doli Izraɛlnim’ maa siɣi teeku maa ni zaa, ka bɛ ninvuɣ’ yino gba daa bi kpalim. 29Amaa ka Izraɛlnim’ maa bɛn’ daa siɣi tiŋgban’ kuŋ ni du, ka kom maa daa kul pirigi ʒiɛya kaman goma la bɛ nudirigu mini bɛ nuzaa polo.

30Yawɛ ni daa tiligi Izraɛlnim’ Ijiptinim’ nuu ni dindali maa shɛm m-bala. Ka Izraɛlnim’ daa nya Ijiptinim’ ni kpi n-do teeku duli shɛm. 31Ka Izraɛlnim’ maa daa nya Yawɛ ni tum tuun’ kar’ shɛŋa jɛndi Ijiptinim’ maa, ka Yawɛ yɛla daa gbahi ba dabiɛm, ka bɛ niŋ Yawɛ min’ o dabili Musa yɛda.

Currently Selected:

Yibu 14: DBwDB

Highlight

Copy

Compare