Yibu 16

Manna mini kɔrinsi

1Ka Izraɛlnim’ maa zaa daa yiɣisi Ɛlim n-chaŋ ti kpe Sin tiŋgban’ nɛli din daa be Ɛlim mini Sinai sunsuuni la ni gol’ so ŋun daa pahir’ ayi bɛ Ijipti yibu maa nyaaŋa biɛɣ’ pinaanu dali. 2Ka Izraɛlnim’ maa zaa daa ŋumdi bɛ kparima ni niŋdi Musa mini Aduna tiŋgban’ nɛli maa ni 3yɛra, “Yawɛ yi di daa chɛ ka ti kpi Ijipti tiŋgbɔŋ ni di daa naan so, dama ti daa nyari nimdi ŋubira, ka diri bindira ti yubu, amaa yi zaŋ ti mi na ti bahi tiŋgban’ nɛli ŋɔ ni ni yi chɛ ka kum ku ti ninvuɣ’ gbaliŋ ŋɔ zaa.”

4 # Jɔn 6.31 Di saha ka Yawɛ daa yɛli Musa, “N ni chɛ ka bindirigu yi zuɣusaa luna, ka sokam chani ti pihir’ o dahin’ yini dibu tariga dabisili kam, ka n kpahim ba nya bɛ ni tooi doli n zaligu bee bɛ ku tooi dol’ li. 5Ka daba ayɔbu dali bɛ ni tooi pihi daba ayi dibu tariga na ti duɣi.”

6Ka Musa mini Aduna daa yɛli Izraɛlnim’ maa zaa, “Zaawuni ŋɔ, yi ni baŋ ni Yawɛ n-daa shiri yihi ya Ijipti tiŋgbɔŋ ni na. 7Biɛɣuni asiba, yi sa ni nya Yawɛ jilima, dama o wum yi ni ŋumdi yi kparima ni niŋdi ŋun’ Yawɛ shɛm maa. Dama ti mi lee nyɛla banima, ka yi ŋumdi yi kparima ni niŋdi ti? 8Yawɛ yi tiri ya nimdi ka yi ŋubiri tiɣiri zaawuni, ka tiri ya bindirigu ka yi diri tiɣiri asiba, di nyɛla o ni wum yi kparima ni ŋumbu maa zuɣu, dama ti mi lee nyɛla banima? Pa tinim’ ka yi ŋumdi yi kparima ni niŋdi maa, amaa Yawɛ ka yi ŋumdi yi kparima ni niŋdi maa.”

9Ka Musa daa yɛli Aduna, “Yɛlim’ Izraɛlnim’ maa zaa, “Vumiya miri Yawɛ, dama o wum yi ni ŋumdi yi kparima ni niŋd’ o shɛm maa.’ ” 10Aduna ni daa chaŋ ti tɔɣisiri Izraɛlnim’ yɛtɔɣa maa, ka bɛ daa ŋmaligi lihi tiŋgban’ nɛli polo n-nya ka Yawɛ jilima yi zahira sagban’ ni. 11Ka Yawɛ daa yɛli Musa, 12“N wum Izraɛlnim’ ni ŋumdi bɛ kparima ni shɛm maa. Yɛlim’ ba ni yi yɛn ŋubirila nimdi yuŋ, ka diri bindirigu mi tiɣiri asiba, ka baŋ ni man’ Yawɛ n-nyɛ yi Naawuni.”

13Ka di daa ti niŋ zaawuni, ka kɔrinsi kana ti lu bɛ suɣa maa gbini luɣ’ shɛlikam zaa. N-daa yi biɛɣu asiba ka maligim lu suɣa maa shee. 14Maligim maa ni daa ti vuui, ka Izraɛlnim’ maa nya ka binkpil’ bihi piɛla yɛrigi tiŋgban’ ni zaa. 15#1 Kɔr 10.3 Izraɛlnim’ maa ni daa nya li, ka bɛ bɔhiri taba, “Bɔ n-lee bala?” Dama bɛ daa bi mi di ni nyɛ shɛli. Ka Musa daa yɛli ba, “Yawɛ ni zaŋ bindir’ shɛli tin ya ni yi di m-bala. 16Dina ka Yawɛ zali ya ni sokam pihim’ o dimma tarig’ la. Di simdi ka sokam baŋ o malibu ni nyɛ shɛm tariga, ka pihi lita ayi ninvuɣ’ yino kam zuɣu.”

17Ka Izraɛlnim’ maa daa niŋ lala. Shɛb’ daa pihi pampam, ka shɛb’ mi pihi biɛlabiɛla. 18#2 Kɔr 8.15 Amaa bɛ ni daa ti zahim li, ŋun daa pihi pam dini shɛli daa bi guui, ka ŋun mi daa pihi biɛla dini shɛli daa bi poog’ o. Sokam daa kul pihila o dibu tariga. 19Ka Musa daa yɛli ba, “So di zaŋ li zali hal ni asiba.” 20Amaa shɛb’ daa bi saɣi Musa yɛligu maa, ka zaŋ shɛli zali hal ni asiba, ka di daa nyɔni wɔɣi zunzuya. Ka Musa suhu daa yiɣisi bahi bɛ zuɣu. 21Ka bɛ daa chani ti pihiri li asiba kam sokam dibu tariga, amaa wuntaŋ’ daa yi ti bii, di nyɛligirimi.

22Daba ayɔbu dali bɛ daa yi pihirila ʒii buyi zuɣu. Bɛ daa pihirila lita anahi ninvuɣ’ yino kam zuɣu, ka Izraɛl kpamba zaa daa kana ti yɛli Musa di yɛla. 23#Yibu 20.8-11 Ka Musa daa yɛli ba, “Yawɛ ni zali shɛm m-bala, biɛɣuni ni sa nyɛ vuhim dabisi’ tibisili ka nyɛ Yawɛ vuhim dabisi’ kasi la zuɣu. Shɛmiya yin’ ni tooi she shɛli zuŋɔ, ka duɣiya yin’ ni tooi duɣi shɛli zuŋɔ, ka din guui yin’ zaŋmiya li zali hal ni asiba.” 24Ka bɛ daa guui li zali hal ni asiba kaman Musa ni daa yɛli ba shɛm maa, ka di daa bi saɣim bee n-wɔɣi zunzuya. 25Ka Musa daa yɛli ba, “Dimiya li zuŋɔ, dama zuŋɔ nyɛla Yawɛ Vuhim Dabisili, yi ku nya li tiŋgban’ ni zuŋɔ. 26Yi ni tooi pihi li hal ni daba ayɔbu dali, amaa daba ayopɔin dali din nyɛ Vuhim Dabisili dali maa, di shɛli ku beni.” 27Amaa ka shɛb’ daa ti chaŋ daba ayopɔin maa dali ni bɛ ti pihi li ka bi nya shɛli. 28Ka Yawɛ daa bɔhi Musa, “Bɔ saha ka yi lee yɛn deei n noli, ka doli n zaligunima? 29Nyama, man’ Yawɛ n-zaŋ Vuhim Dabisili maa tin ya, lala zuɣu ka n tiri ya daba ayi bindirigu daba ayɔbu dali maa din ni chɛ ka sokam be o yiŋa, ka ku yi n-chaŋ luɣ’ shɛli polo daba ayopɔin maa dali.” 30Ka sokam daa vuhi Vuhim Dabisili dali maa.

31 # Kal 11.7-8 Ka Izraɛlnim’ daa boli bindirigu maa Manna,#16.31 MANNA: Hiburuli ni Manna gbinni ŋmanila, “Bɔ n-lee m-bala?” di daa ŋmanila bimbiɛlim din nyɛ zaɣ’ piɛla, ka nyaɣisi kaman bɛ ni zaŋ shiri mali karikaasi shɛŋa. 32Ka Musa daa yɛli, “Yawɛ zaliya ni yi zaŋ bindirigu maa lita ayi zuɣu zali yi bihi ʒiɛmani kam ni, ka bɛ ti nya n ni daa zaŋ bindir’ shɛli dihiri ya tiŋgban’ nɛli ni saha shɛli n ni daa yihi ya Ijipti tiŋgbɔŋ ni na la.” 33#Hib 9.4 Ka Musa daa yɛli Aduna, “Zaŋmi duɣu n-zahim manna maa lita ayi n-kpaai niŋ di ni n-zaŋ li ti zali Yawɛ tooni, ka di be nimaani yi ʒiɛmani kam ni.” 34Ka Aduna daa niŋ kaman Yawɛ ni daa zali Musa shɛm maa n-zaŋ li ti zali baɣili shɛhira bini#16.34 Shɛb’ tɛhiya ni shɛhira bini ŋɔ tɔɣisirila alikauli Adaka yɛla. la. 35#Jɔsh 5.12 Ka Izraɛlnim’ daa di manna maa yuun’ pihinahi hal ti paai bɛ ni daa yɛn ʒini tiŋgbɔn shɛl’ ni maa. Bɛ daa kul dirila manna maa hal ti paai Keenan tiŋgbɔŋ ni. 36(Ŋman’ shɛli bɛ ni daa mali zahindi binyara maa buɣisibu daa nyɛla lita pisi).

Currently Selected:

Yibu 16: DBwDB

Highlight

Copy

Compare