Yibu 17

Tampiŋ ni kom

(Kalinlinima 20.1-13)

1 # Kal 20.2-13 Ka Izraɛlnim’ maa zaa daa yiɣisi Sin tiŋgban’ nɛli ni m-piri taba gbilligbilli n-chani kaman Yawɛ ni daa zali ba shɛm. Ka bɛ daa chaŋ ti paai Rɛfidim n-ti suɣa nimaani, amaa ka kom daa lee ka nimaani ka bɛ ni nyu. 2Lala zuɣu ka bɛ daa zaŋ Musa taali, ka yɛra, “Tim’ ti kom ka ti nyu.”

Ka Musa daa yɛli, “Wula ka yi zaŋ ma taali? Bɔ n-niŋ ka yi zahindi Yawɛ?”

3Amaa ka kɔnyuri daa wum ba pam nimaani, ka bɛ ŋumdi bɛ kparima ni niŋdi Musa yɛra, “Bɔzuɣu ka a yihi ti Ijipti na ni kɔnyuri ti ku ti mini ti bihi ni ti biŋkɔbiri?”

4Di saha ka Musa daa kuhi niŋ Yawɛ yɛli, “Wula ka n yɛn niŋ niriba ŋɔ? Dama di chɛ biɛla ka bɛ lab’ ma kuɣa.”

5Ka Yawɛ daa yɛli Musa, “Kpuɣim a jaaŋgbɛ’ shɛli a ni daa zaŋ fiɛbi Nail la n-niŋ a nuu ni, ka zaŋ Izraɛl kpamba pah’ amaŋ’ zuɣu, ka yi gari niriba maa tooni chaŋ. 6N ni ti zani a tooni Sinai Zoli tampiŋ zuɣu, ka a ti zaŋ a jaaŋgbee maa fiɛbi tampiŋ maa, ka kom yi di ni na ka niriba maa nyu.” Ka Musa daa niŋ lala Izraɛl kpamba maa ninni. 7Ka Musa daa boli nimaani yuli Masa ni Mɛriba,#17.7 MASA … MƐRIBA: Hiburuli ni Masa gbinni nyɛla, “Zahimbu”, ka Mɛriba gbinni nyɛ “Kparima ni ŋumbu.” dama nimaani ka Izraɛlnim’ daa zaŋ o taali, ka daa lan zahim Yawɛ yɛra, “Amii Yawɛ be ti sani bee o kani?”

Bɛ tuhi Amalɛknima

8Ka Amalɛknim’ daa lo tɔbu na ni bɛ ti tuhi Izraɛlnim’ Rɛfidim maa. 9Ka Musa daa yɛli Jɔshua, “Piimi dɔbba n-sa chaŋ ti tuhi Amalɛknim’ maa. Biɛɣuni n sa ni zaŋ Naawuni jaaŋgbee ŋɔ niŋ n nuu ni n-chaŋ ti du n-tam daboli zuɣu.” 10Ka Jɔshua daa niŋ kaman Musa ni daa yɛl’ o shɛm maa n-chaŋ ni o ti tuhi Amalɛknim’ maa. Ka Musa mini Aduna ni Hur daa chaŋ ti du n-tam daboli maa zuɣu. 11Musa daa yi zaŋ o nuu duhi zuɣusaa, Izraɛlnim’ nyarila yaa n-tuhiri nyandi Amalɛknim’ maa, o mi daa yi ti zaŋ o nuu siɣisi tiŋa, Amalɛknim’ maa nyarila yaa n-tuhir nyɛndi Izraɛlnim’ maa. 12Ka Musa bɔɣiri daa ti ja, ka bɛ bo kuɣili na ti sɔŋ ka o ʒini di zuɣu, ka Aduna mini Hur daa gub’ gbaag’ o nuhi maa mali. Yino daa ʒiɛla o nudirigu polo, ka ŋun’ la mi ʒe o nuzaa polo, ka o nuhi maa daa kul ʒe tibi hal ka wuntaŋ’ ti lu. 13Ka lala zuɣu daa chɛ ka Jɔshua zaŋ takɔbi tuhi nyaŋ Amalɛknim’ maa zaa. 14#Zal 25.17-19; 1 Sam 15.2-9 Ka Yawɛ daa yɛli Musa, “Sabimi dimbɔŋɔ niŋ litaafi ni ka yi teeri di yɛla, ka yɛli Jɔshua ka di kpe o tibili ni ni n ni kpihim Amalɛknim’ maa birili dunia yili.” 15Ka Musa daa me sara maligu bimbini nimaani, ka boli di yuli, “Yawɛ n-nyɛ n nasara tuuta.” 16O daa lan yɛli, “Duhimiya Yawɛ tuuta maa zuɣusaa, Yawɛ kul ni tuhiri Amalɛknim’ maa ʒiɛmani kam ni.”

Currently Selected:

Yibu 17: DBwDB

Highlight

Copy

Compare