Yibu 22

Samli yɔbu zaligu

1“Nir’ yi zu nahu bee piɛɣu nti kɔhi bee nti kɔrigi, di simdi ka o yo niɣ’ anu naɣ’ yino maa zuɣu, ka yo piɛr’ anahi piɛ’ yino maa zuɣu. Di simdi ka o yo di samli maa, ka o yi ka binshɛli din ni yo samli maa, dindina bɛn’ kɔhim’ o n-yo o zubu maa samli. 2-4Ka o ni zu biŋkɔb’ so maa yi na ne m-be o sani, di yi nyɛla nahu bee buŋa bee piɛɣu, dindina di simdi ka o yo biŋkɔbir’ ayi zaɣ’ yino kam zuɣu.

“Ka tayiɣ’ yi kabiri so yiŋ’ dunoli yuŋ ni o kpe, ka bɛ nya o n-ŋme n-ku o, dindina o ʒim yihibu ka taali, amaa di yi nyɛla wuntaŋ’ puhibu nyaaŋa, dindina o ʒim yihibu mali taali.

5“So yi chɛ ka o biŋkɔbiri ŋub’ so puu ni binyɛra bee o wain tihi puu bee n-chɛ o biŋkɔbigu bahi ka o chaŋ so puu ni nti ŋub’ o bindira, di simdi ka dilan’ zaŋ o puu ni bindira din niŋ viɛnyɛliŋga bee o wain tihi din wali viɛnyɛliŋga yo di samli.

6“So yi mali buɣim ka di looi mɔɣu n-chaŋ ti di bɛ ni chɛ bindir’ shɛŋa sɔŋ bee bɛ ni na bi chɛ bindir’ shɛŋa bee n-di so puu zaa, di simdi ni ŋun mali buɣim maa yo di zuɣu zaa.

7“So yi zaŋ liɣiri bee binshɛli nti puh’ o kpee sɔŋbu, ka bɛ zu bini maa dilan’ yiŋa, ka bɛ gbaai tayiɣ’ maa, di simdi ka tayiɣ’ maa yo bini maa zuɣu ʒii buyi. 8Ka bɛ yi bi gbaai tayiɣ’ maa, dindina di simdi ka yili maa lana chaŋ Naawuni sani nti wuhi kaman o nuu tim o kpee maa daazichi maa ni bee di bi tim.

9“Dama naŋgbankpeeni kam zaa puuni, di yi nyɛla nahu bee buŋa bee piɛɣu bee situra bee binshɛli din bɔrigi yɛla, ka yino yɛli, ‘Di nyɛla n dini.’ Di dihi tabili nyɛla, bɛ niriba ayi maa bɛn’ zaŋmi bɛ yɛtɔɣa maa chaŋ Naawuni sani, Naawuni yi ti yɛli ni so ka yɛlimaŋli, dilan’ ni yo o kpee maa bini maa ʒii buyi zuɣu.

10“So yi zaŋ o buŋa bee o nahu bee o piɛɣu bee o biŋkɔb’ so ti o kpee ni o zali, ka biŋkɔbigu maa ti kpi bee n-nya daŋa bee bɛ taɣ’ o pah’ o tab’ ni chaŋ ka so bi nya o, 11dindina di simdi ka bɛ niriba ayi maa chaŋ Yawɛ sani, ka o ti po pɔri wuhi ni o nuu bi tim o kpee maa azichi maa ni, ka di simdi ni biŋkɔbigu maa lan’ saɣi pɔri maa, ka samli yɔbu lan kani. 12Amaa di yi nyɛla bɛ zula biŋkɔbigu maa dilan’ sani, dindina di simdi ni o yo o zuɣu. 13Ka mɔɣu ni biŋkɔbiri yi gbaai biŋkɔbigu maa, di simdi ka o zaŋ o chɛra na ti wuhi shɛhira, ka di bi simdi ni o yo mɔɣu ni biŋkɔbiri ni gbaai biŋkɔb’ so maa zuɣu.

14“Ka so yi paŋ biŋkɔbigu o kpee sani, ka biŋkɔbigu maa ti kpi bee n-nya daŋa, ka bindana maa kani, di simdi ka ŋun paŋ o maa yo o samli zaa; 15ka bindana maa yi beni, dindina samli yɔbu kani; ka di yi nyɛla o haayila biŋkɔbigu maa, dindina haayibu liɣiri maa ni zani biŋkɔbigu maa zaani.”

Ninsalitali biɛhigu mini Adiini zaligunima

16 # Zal 22.28-29 “Do’ so yi niŋ marisamarisa n-zaŋ paɣipiɛl’ so bɛ ni bi zaŋ ti doo dɔni, di simdi ka o yo paɣ’ maa paɣibɔr’ liɣiri zaa, ka kpuɣ’ o niŋ o paɣa.”

17“Amaa paɣ’ maa ba yi zaɣisi zaa ni o ku zaŋ o bia maa ti doo maa, di simdi ka doo maa yo paɣipiɛliga bɔbu liɣiri ti paɣ’ maa ba.”

18 # Zal 18.10-11 “Paɣ’ kam ŋun nyɛ sɔnya, yin’ kum’ o.

19 # Lɛv 18.23; 20.15-16; Zal 27.21 “Ŋunkam chɛ ka o mini biŋkɔbigu dɔni, yin’ kum’ o.

20 # Zal 17.2-7 “Ŋunkam mali maligu ti buɣili ka pa ni Yawɛ kɔŋko, yin’ kum dilana.

21 # Yibu 23.9; Lɛv 19.33-34; Zal 24.17-18; 27.19 “Miriya ka yi niŋ sana zaɣ’ biɛɣu bee n-niŋ o fitiina, dama yi gba daa nyɛla saamba be Ijipti tiŋgbɔŋ ni. 22Di niŋdiya pakoli kam bee kpibiga alaka. 23Dama yi yi niŋdi ba alaka ka bɛ fabili niŋ ma, biɛhiŋ kani, n ni gbilisi tibili wum bɛ fabila maa, 24ka chɛ ka n suhu yiɣisi bahi yi zuɣu, ka n chɛ ka bɛ zaŋ takɔbi kun ya, ka yi paɣiba kpalim pakoya, ka yi bihi gba leei kpibisi.

25 # Lɛv 25.35-38; Zal 15.7-11; 23.19-20 “Yi yi zaŋ liɣiri paŋ n niriba bɛn be yi ni ŋɔ nandaan’ so, yin’ di zaŋ yimaŋ’ leeg’ o sandihiriba, yi mi miriya ka yi chɛ ka o niŋ ya nyɔri di zuɣu. 26#Zal 24.10-13 Ka yi yi deei so chinchini sɔŋ pɔi ka naanyi zaŋ o ni bɔr’ shɛli paŋ o, yin’ labisim li ti o pɔi ka wuntaŋ’ naanyi lu, 27dama di kɔŋko n-nyɛ o ni mali shɛli pinda, ka bɔ ka o ti yɛn zaŋ pili gbihi? O yi fabili niŋ ma, n ni wum o fabila maa, dama n nyɛla nambɔzɔra.

28 # Tuma 23.5 “Miriya ka yi yɛli Naawuni yɛtɔɣ’ yoya bee n-tu yi niriba toondana.

29“Zaŋmiya yi puu ni bindir’ tuuli mini yi puu ni tiwala kom na ti ti ma di tibu saha, ka di niŋya zinchili.

“Zaŋmiya yi bidib’ tuuli kam ti ma. 30Lala ka di lan simdi ni yi zaŋ yi naɣilabil’ tuuli bee yi biŋkɔbbaligu bi’ tuuli kam ti ma. O ni be o ma sani daba ayopɔin, ka dabisi’ shɛli din pahir’ anii dali, di simdi ka yi zaŋ o ti ma.

31 # Lɛv 17.15 “Yi nyɛla ninvuɣ’ gahinda, ninvuɣ’ shɛb’ bɛn be kasi n sani. Miriya ka yi ŋubi mɔɣu ni biŋkɔbiri ni ku binshɛli, di simdi ni yi zaŋ li tila bahi.”

Currently Selected:

Yibu 22: DBwDB

Highlight

Copy

Compare