Jɔn 10
10
Buzɔŋ ni piɛri yɛla ŋahili
1Yisa daa lan yɛli ba, “Achiikatim, yɛlimaŋli ka n yɛri ya, ŋunkam bi doli buzɔŋ dunoli kpe, ka dula gooni kpe dilan’ nyɛla tayiɣa ni ŋmɛnditoli; 2amaa ŋun doli dunoli kpɛra, ŋuna n-nyɛ piɛgula. 3Ŋuna ka dunɔgula yoori dunoli tira; ka o boon’ o piɛri maa yuya ka be bɛ tooni, ka piɛri maa wumd’ o boligu ka dol’ o. 4Ka o yi ti yoog’ omaŋmaŋ’ piɛri maa zaa, o bela bɛ tooni ka piɛri maa dol’ o, bɛ ni mi o kukoli zuɣu. 5Bɛ ku saɣi doli sana, amaa bɛ ni zomi ka chɛ o, dama bɛ bi mi saamba kukoya.”
6Ŋahili ŋɔ ka Yisa daa ŋahi ba, amaa ka bɛ bi baŋ o ni yɛli ba shɛm maa gbinni.
Yisa ŋun nyɛ piɛgul’ suŋ
7Ka Yisa lan yɛli ba yaha, “Achiikatim, yɛlimaŋli ka n yɛri ya, Mani n-nyɛ buzɔŋ dunoli. 8Bɛnkam zaa daa daŋ tooni na la daa nyɛla tayiɣisi ni ŋmɛnditoya, ka piɛri maa daa bi wum ti ba. 9Mani n-nyɛ dunoli, ka so yi doli ma kpe, o ni tiligi. O ni doli ma kpɛri ka yira, ka nyari dihili. 10Tayiɣ’ bi kanna ka pa ni o yɛn zumi bee n-ku bee n-saɣim bahi. Amaa man’ kamina ni niriba ti nya nyɛvili n-kul nya li la pam. 11Mani n-nyɛ piɛgul’ suŋ, ka piɛgul’ suŋ mi zaŋd’ o nyɛvili taɣir’ o piɛri dini. 12Amaa ŋun pa piɛgula ka mi bi su piɛri ka nyɛla bɛ ni bu so paa ka o guli ba yi ti nya kunduŋ ka o kanna, o chɛrila piɛri maa bahi ka zo, ka kunduŋ maa gbahi piɛri maa ni shɛba, ka wurim bɛn kpalim bahi. 13Din chɛ ka bɛ ni bu so paa zɔri maa nyɛla o ni guli ba la liɣiri zuɣu maa n-chɛ ka o baɣa dii ka bɛ ni. 14-15#Mat 11.27; Luk 10.22 Mani n-nyɛ piɛgul’ suŋ. M Ba ni mi ma ka n gba mi m Ba shɛm, lala ka m mi m piɛri ka m piɛri maa gba mi ma; ka n zaŋdi n nyɛvili taɣiri m piɛri maa dini. 16Amaa m mali piɛ’ shɛba ka bɛ ka buzɔŋ ŋɔ ni, faashee m bahi zaŋ ba na ka bɛ gba ti baŋ n kukoli, ka di chɛ ka piɛgul’ yino mini buzɔn yini kɔŋko beni.
17 “M Ba yuri ma, n ni zaŋ n nyɛvili sɔŋ ni n ti lan kpuɣ’ li la zuɣu. 18Pa so n-yɛn yihi n nyɛvili maa, amaa mmaŋmaŋ’ yubu ni ka n yɛn zaŋ li sɔŋ. M mali yiko din ni tooi zaŋ li sɔŋ, ka lan mali yiko din ni ti lan kpuɣ’ li yaha. M Ba ni zali ma ni n niŋ shɛm m-bala.”
19Yisa ni daa yɛli shɛm ŋɔ zuɣu daa chɛ ka Yɛhudianim’ noya lan woli. 20Bɛ ni pam daa yɛlimi, “Alizin’ biɛɣu n-ʒi o zuɣu! O kpɛla yinyari! Bɔzuɣu ka yi wumd’ o yɛtɔɣa?”
21Ka bɛ ni shɛb’ mi yɛli, “Yɛtɔɣa ŋɔ pala alizin’ biɛɣu ni ʒi so zuɣu yɛtɔɣa. Alizin’ biɛɣu ni ʒi so zuɣu ni tooi neei zom’ nina?”
Yɛhudianim’ ni zaɣisi Yisa shɛm
22Ka bɛ daa ti yɛn puhi chu’ shɛli din nyɛ Naawuni Jɛmbu Duu Yoobu Chuɣu la Jɛrusalɛm, di daa nyɛla kikaa saha. 23Ka Yisa daa ti be Naawuni jɛmbu duu maa ni luɣ’ shɛli bɛ ni daa booni Sulemaana Kazala la ni chani ginda, 24ka Yɛhudianim’ daa kana nti laɣim gil’ o bɔh’ o, “Bɔ saha ka a yɛn chɛ ka ti chɛ biɛhiŋ? Nyini n-yi shiri nyɛ Masia, nyin’ kahigim’ li yɛli ti.”
25Ka Yisa yɛli ba, “M pun yɛli ya ka yi bi niŋ yɛda. N ni mali m Ba yuli tumdi tuun’ shɛŋa maa n-diri ma shɛhira; 26amaa ka yi bi niŋ yɛda, ka di nyɛla yi ni pa m piɛri la zuɣu. 27M piɛri mi n kukoli, ka n gba mi ba, ka bɛ doli ma; 28ka n tiri ba nyɛvili din ka bahigu, ka bɛ ti ku bahi yoli, ka so mi ku tooi fa ba n nuu ni. 29N Ba ŋun zaŋ ba ti ma maa gari sokam, ka so mi ku tooi fa ba m Ba maa nuu ni. 30M mini m Ba maa nyɛla zaɣ’ yini.”
31Di saha ka Yɛhudianim’ maa daa lan pihi kuɣa ni bɛ lab’ Yisa. 32Ka o yɛli ba, “N wuhi ya tuun’ suma pam din yi m Ba maa sanna, ka di ni dini zuɣu ka yi lee yɛn lab’ ma kuɣa ŋɔ?”
33 #
Lɛv 24.16
Ka Yɛhudianim’ maa garigi yɛl’ o, “Pa tuun’ sun shɛli zuɣu ka ti yɛn lab’ a kuɣa maa, amaa a ni mɔri Naawuni la zuɣu, dama a nyɛla daadam, amaa ka zaŋ amaŋ’ leei Naawuni!”
34 #
Yila 82.6
Ka Yisa bɔhi ba, “Di bi sabi yimaŋmaŋ’ zaligu ni ni Naawuni yɛliya ni yi nyɛla Naawuni ŋmahinli? 35Naawuni Kundi yɛligu mi kul ku yiɣisi. Ka Naawuni yi daa bol’ o ni zaŋ o yɛligu ti ninvuɣ’ shɛb’ la ŋun’ Naawuni ŋmahinli, 36di chaŋ wula ka yi yɛli ni m Ba ni pii man’ ninvuɣ’ so n-tim dunia ŋɔ ni na maa mɔri Naawuni, n ni yɛli ni n nyɛla Naawuni Bia la zuɣu? 37N yi bi tumdi m Ba tuma, yin’ di niŋ ma yɛda; 38amaa n yi tumdi li, hal yi yi bi niŋ ma yɛda, yin’ niŋmiya n tuma maa yɛda, ka di chɛ ka yi shiri baŋ ka niŋ yɛda ni m Ba be n ni ka n gba be o ni.” 39Ka bɛ daa lan bɔri ni bɛ gbaag’ o, amaa ka o daa ŋoli bɛ ni yi.
40 #
Jɔn 1.28
Dimbɔŋɔ nyaaŋa ka Yisa daa chaŋ ti baai du Jɔɔdɛn mɔɣili duli yaɣ’ shɛli polo Jɔn Baptaizira ni daa tuui baptaiziri niriba la nti be nimaani. 41Ka niriba pam daa ka o sanna ti yɛra, “Jɔn daa bi tum alahiziba tuun’ shɛli, amaa o ni daa yɛli shɛlikam zaa zaŋ chaŋ doo ŋɔ polo nyɛla yɛlimaŋli.” 42Ka niriba pam daa niŋ o yɛda nimaani.
Currently Selected:
Jɔn 10: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
