Luk 12

Yeezu Naŋ Kpãã Bampuori-kombampoɔ Mine

(Mat 10:26-27)

1A noba naŋ da wa lantaa a te ta ŋa turi ne dɔglɔ, a neɛrɛ taa gbɛɛ la ka Yeezu da piili yele korɔ a O potuuribo, “Yɛ gu yɛmenne velaa a yi a Faraziimine gagarre yɛlɛ poɔ. A ba bampuori-kombampoɔ yɛlɛ la ka N yele. 2Bonzaa ba kyebe naŋ pɔge a koŋ yuo, kyɛ ka yelsɔglaa zaa meŋ ba kyebe ka noba koŋ baŋ. 3Azuiŋ yelzaa fo naŋ yeli ligruŋ poɔ na yi la kyaane poɔ ka ba woŋ, ka yelzaa fo naŋ waale yeli die poɔ, noba na moɔle a la piiri zu.

Neɛ Na A Naŋ Seŋ Ka Yɛ Zoro

(Mat 10:28-31)

4N bamine, maa yele korɔ yɛ, yɛ ta zoro banaŋ naŋ maŋ ko a eŋɛ kyɛ ba la taa faŋ na e bonzaa a puoriŋ. 5Ka N wuli yɛ neɛ na a naŋ seŋ ka yɛ zoro: Yɛ zoro a neɛ naŋ maŋ wa ko baare kyɛ la taa a faŋ a na eŋ o soba dazugovũũ poɔ. Yelmeŋɛ zaa, yɛ zoro a neɛ ŋa! 6Warbie ayi naane ka ba maŋ koɔre daviime anuu be? Kyɛ Naaŋmen ba inne a kanzaa yɛlɛ. 7A yɛ zukɔɔloŋ zaa gba noɔre ka ba sɔre. Yɛ ta zoro dabeɛ̃, bonso, yɛ gaŋ la a daviime.

8Maa yeli ko yɛ! Neɛzaa naŋ sage de N yɛlɛ noba niŋesogɔ, a Nensaala Bie meŋ na sage de o la a Naaŋmen malekere niŋesogɔ. 9Kyɛ soba na zaa naŋ zagre ma bare noba niŋesogɔ, N meŋ na zagre o la bare Naaŋmen malekere niŋesogɔ. 10Neɛ na zaa naŋ yeli yelfaa zaa kyaare ne a Nensaala Bie, ba na di la suuri ko o. Kyɛ neɛ na zaa naŋ yeli yelfaa zaa kyaare ne a Vooroŋ Soŋ ba koŋ di suuri ko o. 11Ka ba naŋ wa taa yɛ kpɛ ne a puoruuderi ka ba di yɛ sɛrɛɛ, bee a gaa ne yɛ a namine ane a teŋɛ nembɛrɛ zie, yɛ ta miine ne lɛ yɛ naŋ na yeli faa yɛmenne, bee bon yɛ naŋ na yeli sɔge ba. 12Bonso, a Vooroŋ Soŋ na wuli yɛ la bonna yɛ naŋ na yeli a saŋ na poɔ.”

A Bondaa-damboli Sekpɔgre

13Neɛ kaŋ naŋ da be a noba poɔ da yeli ko la a Yeezu, “Wulwullo, vɛŋ ka N yɔɔ e ka te poŋ a te gbandi-boma.” 14Ka a Yeezu yeli ko o, “N ba, aŋ la biŋ ma ka N e a yɛ sɛredire bee a yɛ bompono?” 15Ka O yeli ko ba, “Yɛ gu yɛmenne velaa a yi bombɔ yaga eŋɛ, bonso, nensaala nyɔvore ba kye o bontaa yaga poɔ.” 16Lɛ la ka a Yeezu pãã da lɔɔ sekpɔgre ko ba, “Bondaana kaŋ weɛ boma da maale la yaga. 17Ka o pãã teɛre o poɔŋ, ‘Boŋ ka N na e, N naŋ ba taa zie a na biŋ a weɛ boma?’ 18Lɛ la ka o pãã da yeli, ‘Ŋaa ka N na e. N na ŋmɛre la N bugri ane katanne bare kyɛ leɛ mɛ bonkponni a de a bombie ane n boma eŋ.’ 19N pãã na yeli ko la N meŋɛ, ‘ “Fo nyɛ la boma yaga naŋ na ta yuomo korɔ korɔ. Ta ferɛ fo meŋɛ, dire kyɛ nyuuro a kyɛ taa popeɛloŋ.” ’ 20Kyɛ ka Naaŋmen yeli ko a dɔɔ, ‘Damboli ŋa! A tensogɔ ŋa zaa ka N na de a fo nyɔvore. Ka a boma fo naŋ nare biŋ, aŋ pãã na so a?’ 21Lɛ ka a na waa ko banaŋ naŋ boɔrɔ a teŋɛzu naboma korɔ bamenne, kyɛ ka a bontaa ba kyaare ne Naaŋmen.”

Yɛ Ta Kyerɛ

22A Yeezu da yeli ko la O potuuribo, “Azuiŋ N yele korɔ yɛ la, yɛ ta vɛŋ ka yɛ nyɔvore yɛlɛ dɔɔnɔ yɛ, bon yɛ naŋ na di, bee ka bonsuuri yɛlɛ dɔɔnɔ yɛ. 23Bonso, nyɔvore gaŋ la bondiraa, ka a eŋɛ meŋ gaŋ bonsuuraa. 24Yɛ leɛ kaa nyɛ a galeŋgaare, a ba maŋ bore bee a kyɛ boma, a ba taa boma bimmu zie bee bugri, kyɛ Naaŋmen maŋ guoli a la. Yɛ ba taa tɔnɔ gaŋ a nuuli yaga zaa! 25A yɛ buo soba la na kyerɛ, ka a lɛ vɛŋ ka gogo yeni la dɔgle a o yuomo zu? 26Ka yɛnee koŋ baŋ e a yeli fẽẽ ŋa, bonso ka yɛ kyerɛ a anaŋ naŋ kyɛre eŋɛ? 27Yɛ nyɛ a baa pɛmpɛllɛ naŋ maŋ baara lɛ, a ba tonɔ toma bee a wuoro pɛmɛ, kyɛ anealɛzaa, N yele korɔ yɛ la, haali gba Solomɔn ne o naaloŋ veɛloŋ zaa, o daŋ ba su bonsuuri ka a veɛlɛ seŋ ama kanzaa. 28Kyɛ ka Naaŋmen pãã kaara a weɛ moɔ zu seŋ ŋaa, anaŋ are zenɛ, ka zie wa nyaana ka a kpɛ vũũ, bonso, ka O koŋ kaara yɛ zu gaŋ lɛ, yɛnee yelde-fẽẽ deme! 29Yɛ ta dɔɔnɔ yɛmenne, bee a kyerɛ bon yɛ naŋ na di bee a nyu. 30Bonso a teŋɛzu noba la maŋ yɔ zoro boɔrɔ a boma ama zaa, kyɛ a yɛ Saa Naaŋmen baŋ ka yɛ boɔrɔ la a boma ama. 31Yɛ moɔ nimiri boɔrɔ a Naaŋmen naaloŋ, kyɛ O na ko yɛ la a boma na zaa yɛ naŋ boɔrɔ.”

32“N noba, yɛ ta zoro dabeɛ̃, bonso, a yɛ Saa Naaŋmen poboɔbo la ka O ko yɛ a O naaloŋ. 33Yɛ koɔre yɛ boma a de a libie ko nembaalba. Yɛ maale libi-woore na naŋ koŋ sãã ko yɛmenne, a boɔrɔ tenvelaa#12:33 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ naboma naŋ ba baara, be ka nannyige zaa kontoɔ̃ wa zu a, ka danduli zaa kontoɔ̃ di a. 34Bonso, zie na fo naboma naŋ be, be ka fo sukyiri meŋ na be.”

Gbaŋgbaare Naŋ Kyele

35“Yɛ nare gu a toma, kyɛ kyɔŋ yɛ fentelɛ. 36Yɛ waa ŋa noba naŋ kyɛllɛ ba daana ka o leɛ yi pɔgebeɛle zie wa, ka ba na yuo a dendɔre wieouŋ lɛ ko o, ka o naŋ deɛ wa kpaare a pane. 37A gbaŋgbaare banaŋ ba daana naŋ wa nyɛ ba ka ba ba gbiri nyɛ la maaloo. Yelmeŋɛ ka N yele korɔ yɛ, o na nare la o meŋɛ, a e ka ba zeŋ ka o ko ba bondirii. 38Ka o naŋ wa tensogpozentaa bee zinyaane saŋ a wa nyɛ a gbaŋgbaare ka ba be nimiri, ba nyɛ la maaloo.

39Kyɛ yɛ baŋ ka, ka yidandɔɔ da baŋ saŋ na a nannyige naŋ na wa o yiri, o da koŋ sage ka ba kɔɔ a o yiri kpɛ. 40Yɛ meŋ nare yɛmenne, bonso, a Nensaala Bie na wa la a saŋ na yɛ naŋ ba teɛre ka O na wa la.”

Gbaŋgba-bivelaa Bee Gbaŋgba-bifaa Yɛlɛ

(Mat 24:45-51)

41Piita da soore la Yeezu, “Daana, fo lɔɔ la a sekpɔgre ŋa ko te bee neɛzaa la ka fo lɔɔ tere?” 42Ka a Daana yeli sɔge, “Aŋ pãã la a tontonɔ na naŋ waa meŋɛ kyɛ baŋ yɛŋ, ka a o daana na e ka o kaara o yiri zu, a na maŋ korɔ o yideme bondirii a terebo saŋ? 43A gbaŋgbaa na o daana naŋ na leɛ kulo waana a wa nyɛ o ka o tonɔ nyɛ la maaloo. 44Serɛzaa ka N yele korɔ yɛ, a o daana na e la ka o kaara o boma zaa zu. 45Kyɛ ka a gbaŋgbaa wa yeli ko o meŋɛ, ‘N daana kɔɔrɛɛ waabo’, kyɛ pãã piili ŋmeɛrɛ a o gbaŋgba-taaba, a dɔbɔ ane a pɔgeba zaa, kyɛ di boma a nyu dãã te kuoli. 46A gbaŋgbaa ŋa daana na wa uri o la a daare na o naŋ ba nare ane gogo na o naŋ ba baŋ. A gbaŋgbaa ŋa daana na wa kyɛ o la ŋmaare puropuro kyɛ de o eŋ a nenfaare poɔ. 47A gbaŋgbaa na naŋ baŋ bonna a o daana naŋ boɔrɔ, kyɛ ba nare o meŋɛ bee a e a lɛ naŋ seŋ, na nyɛ la ŋmeɛroŋ yaga. 48Kyɛ a gbaŋgbaa na naŋ ba baŋ a kyɛ e yɛlɛ naŋ seŋ ka ba ŋmɛ o, na nyɛ la ŋmeɛroŋ belaa lɛ. Neɛzaa ba naŋ ko bon-yaga, ba na boɔrɔ la bon-yaga yi o zie. Neɛzaa ba naŋ de yɛlɛ yaga eŋ o nuuriŋ, ba na boɔrɔ la eroŋ yaga yi o zie.”

Yeezu Naŋ Wa Ne Kyataa

(Mat 10:34-36)

49“N waɛ la ka N mare vũũ eŋ a teŋɛzu, a da berɛ ŋa a vũũ da nyɔge dire la. 50N taa la suobu a na so N meŋɛ, kyɛ N be la toɔrɔ poɔ ka anaŋ ba wa te e baare! 51Yɛ teɛre ka maaroŋ la ka N wa ne a teŋɛzu be? Ai, maa yeli yɛ, kyataa la ka N wa ne! 52A yi ŋaa gɛrɛ noba banuu naŋ kpeɛrɛ yi-yeni poɔ na kya la taa ziiri ayi, ka ba bata laŋ noɔre a zɔɔrɔ ne a ba bayi, ka a ba bayi meŋ zɔɔrɔ ne a ba bata. 53Ba na kya la taa:

Saa na zɔɔrɔ ne la o bie

ka bie meŋ zɔɔrɔ ne o saa,

ma na zɔɔrɔ ne la o pɔgeyaa

ka pɔgeyaa meŋ zɔɔrɔ ne o ma,

pɔge na zɔɔrɔ ne la o naapɔge

ka naapɔge zɔɔrɔ ne o serɛ ma.”

Yɛ Baŋ A Saŋ

(Mat 16:2-3)

54A Yeezu da la yeli ko la a noba, “Ka yɛnee wa nyɛ zunzugri ka o wa iri a gɛrɛ sapare, yɛ maŋ yeli la daadaalɛ, ‘Saa na wa la’; ka a sereŋ e a lɛ. 55Ka yɛnee wa nyɛ saseɛ ka o fuuro a yi sapare nudoloŋ seŋ seŋ waana, yɛ maŋ yeli la, ‘A zie na tole la, a donɔ’; ka a sereŋ waa a lɛ. 56Yɛnee bampuori-kombampoɔ mine! Yɛ maŋ toɔ̃ kaa la a teŋɛ ane a saluoni kyɛ baŋ lɛ a zie naŋ na waa, kyɛ bonso ka yɛ ba toɔ̃ baŋ a zenɛ bebie yɛlɛ eŋ?”

Leɛ Maale Taa Yɛlɛ

(Mat 5:25-26)

57“Ka boŋ la so ka yɛ kontoɔ̃ gyɛle yɛmenne nyɛ lɛ a naŋ seŋ ne? 58Ka neɛ wa taa fo gɛrɛ ne sɛrɛɛdiibu zie, e aneɛ ka yɛ leɛ maale a yɛlɛ a sobiriŋ. Ka lɛ naane, o na tage fo la gaa ne a sɛredire zie, ka a sɛredire de fo ko a polisiri ka ba pɔge fo. 59Maa yele korɔ fo, fo koŋ yi a nempagdie poɔ a te ta lɛ saŋ fo naŋ yɔɔ a sane zaa baare.”

Currently Selected:

Luk 12: DNTTP

Highlight

Copy