Luk 14

Yeezu Naŋ Saŋ Dɔɔ Baala Kaŋ

1A Yeezu naŋ da gɛrɛ a Faraziimine neŋkpoŋ kaŋ yiri a pɛnnoo bebiri kaŋ daare ka O te di bondirii, ba da pigre O la a be. 2A lɛ poɔŋ, dɔɔ baala kaŋ eŋɛ naŋ mɔre da be la O niŋesogɔ. 3Ka Yeezu da soore a bege baŋnema ane a Faraziimine, “Sori bebe la ka ba saŋ baala a pɛnnoo bebiri daare bee sori kyebe?.” 4Kyɛ ba da taŋɛɛ la. Lɛ la ka Yeezu da de a dɔɔ baala a saŋ o kyɛ e ka o gɛrɛ. 5A Yeezu pãã da leɛ soore ba la, “Yɛ buo soba la ka o bie bee o naadɛre na le bulee poɔ a pɛnnoo bebiri daare ka o koŋ page iri o a bulee poɔ?” 6Ba da ba toɔ̃ leɛ yeli yelzaa sɔge O a ama poɔ.

Sigruumilluu Ane Saanoŋ Yɛlɛ

7O naŋ da wa nyɛ lɛ a tigri saama naŋ da kaa-iri a nembɛrɛ zenziiri, O da lɔɔ la sekpɔgre ko ba: 8“Ka neɛ kaŋ wa boɔle fo pɔgebeɛloŋ tigri zie, ta gaa te zeŋ a nembɛrɛ zenzie. Kaapɔge o boɔle la neŋkpoŋ kaŋ naŋ gaŋ fo; 9kyɛ a neɛ na naŋ boɔle yɛ zaa, na wa yeli ko fo la, ‘Iri kyɛ ko o a fo zie.’ Fo pãã na iri la a ne vi sigi te zeŋ a nembilii zenzie. 10Kyɛ ka ba naŋ wa boɔle fo, gaa te zeŋ a nembilii zie, ka a neɛ naŋ boɔle fo wa wa, kaapɔge o na yeli ko fo la, ‘N ba, iri gaa zusogɔ kyɛ’; a lɛ fo pãã na nyɛ la yuori a fo lanzennemɛ zie. 11Azuiŋ, banaŋ zaa naŋ duori bamenne, ba na sigri ba la, ka banaŋ meŋ naŋ sigri bamenne ka ba duori ba.”

12Yeezu da yeli ko la a neɛ na naŋ da boɔle O, “Ka fõõ wa maale tigri a boɔle noba, ta boɔle fo bamine bee fo yɔɔmine bee fo dɔgrebɔ bee fo laŋkpɛtaaba bee a bondaanema. Ka ba tɔɔ wa leɛ boɔle fo ka a yaa taa. 13Kyɛ ka fõõ wa maale tigri, boɔle a nandaanema, gbɛrɛɛ, a wɔɔre ane a zɔnne. 14A lɛ, fo pãã na nyɛ la maaloo, bonso, ba naŋ kontoɔ̃ leɛ boɔle fo ka a yaa taa. Fo pãã na nyɛ la fo san-yɔɔ a saŋ na a nemmenne naŋ na leɛ-iri a kuuni poɔ.”

A Tig-kpoŋ Sekpɔgre

(Mat 22:1-10)

15A tigri zie saana kaŋ naŋ da woŋ a ŋaa, o da yeli ko la a Yeezu, “Neɛ na zaa naŋ na di diibu a Naaŋmen naaloŋ poɔ nyɛ la maaloo!” 16Lɛ la ka Yeezu leɛ yeli ko o, “Neɛ kaŋ la da maale tig-kpoŋ a boɔle neŋyaga. 17A tigri diibu saŋ naŋ da wa ta, o da toŋ la o gbaŋgbaa ka o te yeli a banaŋ o naŋ boɔle, ‘Yɛ wa, bonso, a boma zaa nare baarɛɛ la.’ 18Kyɛ ka ba zaa piili terɛ gaafara. Ka a danweɛ soba yeli ko o, ‘N da la weɛ kaŋ, ka a fere ka N gaa te nyɛ. N sɔrɔ fo la, sage de a N gaafara.’ 19Ka a bayi soba yeli, ‘N da la naada-koɔre anuu, a gɛrɛ ka N te kaa nyɛ. Sɔroo la, sage a N gaafara.’ 20Ka kaŋ meŋ yeli, ‘N de la pɔgɔ daare yɛŋyɛŋ ŋa, a lɛ zuiŋ N kontoɔ̃ wa.’ 21Lɛ la ka a gbaŋgbaa leɛ gaa te yeli ko a o daana bonna ba naŋ yeli. A yidandɔɔ suuri da iree la, ka o da yeli ko a gbaŋgbaa, ‘Yi wieouŋ zaa, a gaa a yie foɔle ane a sobilii zu a te taa a nandaanema, a gbɛrɛɛ, a zɔnne ane a wɔɔre kpɛ wa ne a kyɛ.’ 22Ka a gbaŋgbaa leɛ wa yeli, ‘Daana, N e la a lɛ fo naŋ yeli ka N e, kyɛ zie naŋ kyɛrɛɛ la.’ 23Lɛ la ka a daana pãã yeli ko a gbaŋgbaa, ‘Yi gaa a sobilii zu ane a foɔle poore a te fere a noba ka ba kpɛ wa ka a N yiri paale. 24Maa yeli ko yɛ, a nemboɔle na kanzaa koŋ lɛnne a N tigri bondirii.’ ”

A Yeezu Puori Tuubu Yɛlɛ

(Mat 10:37-38)

25Noba yaga da tuuro la a Yeezu, ka O da leɛ kyaare ba a yeli: 26“Soba na zaa naŋ waana N zie kyɛ ba kyiiri o saa ane o ma, o pɔgɔ ane o biiri, o yɔɔmine ane o yɔɔpuuli, ane o meŋɛ, o soba koŋ baŋ e N potuuro. 27Soba na zaa naŋ ba tuo o dagaraa tuuro ne ma, koŋ baŋ e N potuuro. 28A yɛ buo soba la na boɔrɔ ka o mɛ yiri, a koŋ daŋ zeŋ a peɛre a yiri meɛbo zaa sane a nyɛ, ka o taa la libie naŋ na baŋ mɛ a yiri te baare? 29Ka lɛ naane, ka o naŋ wa biŋ a yiri pare kyɛ ba toɔ̃ mɛ o zaa baare, a noba na zaa naŋ nyɛ lɛ na laara o la, 30a yele, ‘A soba ŋa da piili la ka o mɛ yiri kyɛ ba toɔ̃ mɛ o zaa baare.’ 31Bee, naa buo la na yire tammo ne o na-tɔsoba kaŋ, a koŋ daŋ zeŋ kyɛ kaa nyɛ ka a o zɔɔzɔɔreba turi pie o naŋ taa na toɔ̃ zɔɔ ne la a naa na zɔɔzɔɔreba turi lezare?. 32Ka o naŋ wa nyɛ ka o kontoɔ̃, o na toŋ la noba ka ba gaa te pɔge a naa ŋa naŋ naŋ be tɔɔre zaa, a lɔɔ tampɛloŋ. 33Azuiŋ, yɛ kanzaa koŋ baŋ e N potuuro ka o soba ba bare a boma zaa o naŋ taa.

Nyɛnnoo Yɛlɛ

(Mat 5:13; Mak 9:50)

34Nyɛnnoo soma la, kyɛ ka a nyɛnnoo noɔŋ wa yi, wola ka ba na e ka a leɛ noma? 35A koŋ taa tɔnɔ a tɛne poɔ bee a tampuori zu. Ba na de a la lɔɔ bare. Soba na zaa naŋ taa tobo, o kyɛlle woŋ!”

Currently Selected:

Luk 14: DNTTP

Highlight

Copy