Luk 18

Pɔgekoɔre Ane Nɔmboore Sɛredire Sekpɔgre

1A Yeezu pãã da lɔɔ la sekpɔgre ko ba a kyaare ne lɛ a naŋ seŋ ka ba maŋ puoro tegitegilɛ a kyɛ ta wa yoɔrɔ nuuri. 2O da yelee la, “Sɛredire kaŋ la da be teŋɛ kaŋ poɔ, a ba zoro Naaŋmen bee a eŋnɛ nensaalba. 3Pɔgekoɔre kaŋ meŋ da be la a teŋɛ na poɔ, a da maŋ waana a sɛredire na zie a yele, ‘Vɛŋ ka N nyɛ sɛredi soŋ a kyaare ne N dɔndɔmɔ.’ 4A sɛredire da zagrɛɛ la ka a te kɔɔre, kyɛ a puoriŋ ka o da teɛre a yeli ko o meŋɛ, ‘Aneazaa ka N ba zoro Naaŋmen bee a eŋnɛ neɛzaa, 5kyɛ a pɔge ŋa naŋ waana dɔɔnɔ ma zuiŋ, N na bo la bo-soŋ ko o, ka o ta la waana dɔɔnɔ ma a wa e ka N te yɛ.’ ” 6Ka a Daana yeli, “Yɛ kyɛlle woŋ lɛ a nɔmboore sɛredire ŋa naŋ yeli. 7Yɛ teɛre ka Naaŋmen koŋ bo bo-soŋ ko a O neŋkaa-irri naŋ ŋmeɛrɛ kpɛlle korɔ O, ŋmenaa ane tensogɔ be? O na kɔɔre la yaga kyɛ wa soŋ ba be? 8Maa yeli ko yɛ, O na bo la bo-soŋ ko ba wieouŋ zaa. Aneazaa, ka a Nensaala Bie wa leɛ wa, O na nyɛ la yeldeebo deme a teŋɛzu kyɛ?”

A Farazii Ne Zuyɔɔ Derɛ Sekpɔgre

9A Yeezu da la lɔɔ la sekpɔgre ŋa ko a noba mine naŋ da de bamenne di ka ba waa la nemmenne, a pãã da gyegre ba taaba. 10“Noba bayi la da gaa a Naaŋmen die ka ba te puori. Kaŋ da waa la Farazii, kyɛ ka a kaŋ waa zuyɔɔ-derɛ. 11A Farazii da arɛɛ la a puoro ŋaa, ‘Naaŋmen, N puoro fo la bareka ne N naŋ ba waa ŋa N nensaaltaaba: naŋ waa nannyigri, fafareba, moɔrɔ toma noba, bee waa ŋa a zuyɔɔ-derɛ ŋa naŋ te are a kyɛ. 12N maŋ leŋ la noɔre gbɛre boyi daa gbuli zaa poɔ. A maŋ poŋ N boma ziiri pie, a iri a ziyeni tere.’ 13Kyɛ a zuyɔɔ-derɛ eŋ da te are la tɔɔre zaa a ba sage ka o doɔ o zu kaa sazu, kyɛ da gbɛlɛ o nuuri a yele, ‘Naaŋmen, zo N nembaaloŋ, maa yelbe-erɛ!’ 14Maa yeli ko yɛ, a zuyɔɔ-derɛ ŋa da leɛ kuli la o yiri ane mennoŋ kpoŋ a gaŋ a Farazii na, bonso, banaŋ zaa naŋ zɛgrɛ bamenne, ba na sigri ba la, kyɛ banaŋ zaa naŋ sigre bamenne meŋ ba na zɛge ba la ka ba do.”

Yeezu Naŋ Ko Bibiiri Maaloo

(Mat 19:13-15; Mak 10:13-16)

15Noba da taa la ba bibiiri gba waana ne a Yeezu zie ka O seene ba. Kyɛ a potuuribo naŋ da nyɛ a lɛ, ba da nyare la a noba zu, ka ba ta erɛ a lɛ. 16Kyɛ a Yeezu da boɔle la a bibiiri kyɛ yeli, “Yɛ bare a bibiiri ka ba wa N zie, yɛ ta pigi ba sori, bonso, a bama taaba la so a Naaŋmen naaloŋ. 17Yelmeŋɛ ka N yele korɔ yɛ, neɛzaa naŋ ba sage de a Naaŋmen naaloŋ aŋa bibile, o soba daŋ koŋ kpɛ a naaloŋ poɔ.”

Nabondaana Kaŋ Yɛlɛ

(Mat 19:16-30; Mak 10:17-31)

18Naa kaŋ da wa soore la a Yeezu, “Wulwulsoŋ, boŋ ka N na e a nyɛ nyɔvore naŋ ba taa baaroo?” 19Ka a Yeezu soore o, “Bonso ka fo boɔlɔ ma nenvelaa? Neɛzaa ba waa velaa ka Naaŋmen yoŋ naane. 20Fo baŋ la a Naaŋmen nɔɛ, ‘Ta toŋ moɔrɔ toma; Ta ko neɛ; Ta zu bon; Ta dire danse-zirii; Eŋnɛ fo saa ne fo ma.’ ” 21Ka a naa yeli sɔge, “N tuuro la a nɔɛ ama zaa a yi n biiluŋ saŋ a wa te ta zenɛ.” 22A Yeezu naŋ da woŋ a ŋaa, O da yeli ko la a dɔɔ, “Yelyeni kaŋ la kyɛre ka fo ba taa. Koɔre a boma na zaa fo naŋ taa, a de a libie poŋ nembaalba kyɛ fo na taa la naboma a tenvelaa#18:22 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ, kyɛ pãã wa tuuro ma.” 23Kyɛ a dɔɔ naŋ da wa woŋ a ŋaa, o poɔ da sãã la yaga, bonso, o da e la bondaa-kpoŋ. 24Yeezu da leɛ kaa la a dɔɔ kyɛ yeli, “A na waa la tuo yaga ko bondaanema ka ba kpɛ a Naaŋmen naaloŋ! 25Serɛzaa, a e la mɔlɔ ka bontaŋ tu fumini#18:25 Fumini: A Dagaaba mine maŋ yeli ka ‘Musin’ ka ba mine yeli ka ‘Kpar-pii.’ voɔre yi a gaŋ bondaana naŋ na kpɛ a Naaŋmen naaloŋ.”

26A banaŋ naŋ da woŋ a lɛ da yelee la, “Ka anaŋ waa lɛ, nembuo la na toɔ̃ nyɛ faabo?” 27Ka Yeezu yeli sɔge, “Yeli naŋ koŋ baŋ nyɛ eebo nensaala zie, maŋ nyɛ la eebo Naaŋmen zie.”

28Lɛ la ka Piita yeli, “Nyɛ, te bare la te yie kyɛ wa tuuro fo.” 29Ka Yeezu yeli ko ba, “Yelmeŋɛ ka N yele korɔ yɛ, neɛzaa naŋ bare o yiri bee o pɔgɔ, bee o yɔɔmine, bee o saa ne o ma, bee o biiri, a Naaŋmen naaloŋ zuiŋ, 30o soba na leɛ nyɛ la a boma ama ka a gaŋ a anaŋ o naŋ bare a teŋɛzu kyɛ, a kyɛ naŋ nyɛ nyɔvore naŋ ba taa baaroo a o kũũ puoriŋ.”

Yeezu Naŋ Yeli O Kũũ Ane O Leɛ-iruu Yɛlɛ A Gbɛre Bota Soba

(Mat 20:17-19; Mak 10:32-34)

31A Yeezu pãã da de la a O potuuribo pie ne bayi gyɛŋ yi ne puori a te yeli ko ba, “Yɛ nyɛ, te duoro gɛrɛ la Gyɛruzɛlɛm, ka a yɛlɛ anaŋ zaa a Ŋmen-yelmanneba naŋ sɛge a kyaare ne a Nensaala Bie na tu a tuubu. 32Ba na de O la eŋ a Nemboore-yobo#18:32 Nemboore-yobo: Noba na zaa naŋ da ba waa Gyuumine la a Nemboore-yobo. nuuriŋ, ka ba e O la, a to O zoma, kyɛ toore nentaare waare O. 33Ka ba naŋ wa feɛ O baare, ba na ko O la, kyɛ a beri ata daare ka O leɛ-iri.” 34Kyɛ a potuuribo da ba baŋ a yɛlɛ ama zaa tɛgɛ. Serɛzaa, a yɛlɛ a Yeezu naŋ da yeli da ba sãã weliweli ko ba, ka ba pãã da ba baŋ a tɛgɛ.

Yeezu Naŋ Saŋ Zɔŋ Kaŋ

(Mat 20:29-34; Mak 10:46-52)

35A Yeezu naŋ da wa te peɛle a Gyɛreko teŋɛ, dɔɔ zɔŋ kaŋ da zeŋ la a sobiri noɔre a sɔrɔ boma. 36O naŋ da woŋ a nembeɛoŋ naŋ wa tɔlɔ la ka o soore bonna naŋ erɛ. 37Ka ba da yeli ko o, “A Yeezu naŋ yi Naazɛrɛ la wa tɔlɔ.” 38Lɛ la ka o deɛ kyeere yaga zaa, a yele, “Yeezu, Davil Bidɔɔ, zo N nembaaloŋ!” 39Ka a banaŋ naŋ da de weɛ tanne o ka o bare gɔmɔ. Kyɛ lɛ ka o pãã da la kyeere yaga gba, “Davil Bidɔɔ, zo N nembaaloŋ!” 40A Yeezu da tɛge arɛɛ la kyɛ e ka ba taa a dɔɔ zɔŋ wa ne a O zie. Kyɛ o naŋ da wa te peɛle a Yeezu la ka O soore o: 41“Boŋ ka fo boɔrɔ ka N e ko fo?” Ka o yeli, “Daana, e ka N leɛ nyɛrɛ.” 42Ka Yeezu yeli ko o, “Leɛ nyɛrɛ, a fo yeldeebo faa fo la.” 43A tɔntɔbaalɛ ka o deɛ nyɛrɛ a tuuro a Yeezu, a ire Naaŋmen yuori, ka a noba na zaa naŋ da nyɛ a lɛ, da danna Naaŋmen.

Currently Selected:

Luk 18: DNTTP

Highlight

Copy