Luk 23

Ba Naŋ Taa Yeezu Wa Ne Pilato Zie

(Mat 27:1-2, 11-14; Mak 15:1-5; Gyn 18:28-38)

1Lɛ la ka a noba zaa da iri lantaa, a taa Yeezu gaa ne Pilato zie. 2A noba da piili ŋmaara la yɛlɛ dɔglɔ Yeezu, a yele, “Te nyɛ la a dɔɔ ŋa ka O saana a teŋɛ. O ba sagra ka te yɔɔ zuyɔɔ ko a Naa Siiza, kyɛ yele ka Ona la a Mɛzaaya,#23:2 Mɛzaaya: A Mɛzaaya tɛgɛ la a ‘Kirista.’ a Naa.” 3Lɛ la ka Pilato soore a Yeezu, “Fõõ la a Gyuumine Naa be?” Ka a Yeezu yeli sɔge, “Fõõ la yeli a lɛ.” 4A Pilato pãã leɛ yeli ko la a Naaŋmen bagmaalkare ane a noba, “Maa eŋ ba nyɛ a dɔɔ ŋa yelsaanaa.” 5Kyɛ ka a noba maaleŋ yeli, “O toɔrɔ la a noba eŋnɛ taa ne a O kannoo a Gyudiya paaloŋ zaa poɔ, a yi a Galili teŋɛ O naŋ da piili a wa te tɔ a kyɛ.”

Ba Naŋ Wa Ne Yeezu A Hɛrɔde Zie

6A Pilato naŋ da woŋ a lɛ o da soorɛɛ la ka a dɔɔ e la Galili neɛ. 7O naŋ da wa baŋ ka Hɛrɔde paaloŋ neɛ la, o da eɛɛ la ka ba taa O gaa ne a Hɛrɔde zie. A Hɛrɔde da be la a Gyɛruzɛlɛm poɔ a lɛ saŋ. 8A Hɛrɔde naŋ da wa nyɛ a Yeezu, O poɔ da pɛlɛɛ la yaga, bonso, o da woŋ la a O yɛlɛ ka a kɔɔre, a da boɔrɔ ka o nyɛ O ka O toŋ a toŋkpeɛne na mine ka o meŋ nyɛ. 9A Hɛrɔde da soore la a Yeezu yɛlɛ yaga te kɔɔre kyɛ O da ba yeli yeli zaa sɔge o. 10A Naaŋmen bagmaalkare ane a Naaŋmen bege wulwulibo da be la a be a toɔrɔ vũũ eŋnɛ. 11A Hɛrɔde ne a o sogyɛre gba da dɛge la a Yeezu yaga, a e O la. A de kpar-kpoŋ su O, kyɛ e ka ba leɛ taa O gaa ne a Pilato zie. 12A yi a lɛ daare gɛrɛ, Hɛrɔde ne Pilato naŋ da ba noma da leɛ e la bamine.

A Yeezu Kũũ Sɛrɛɛ Yɛlɛ

(Mat 27:15-26; Mak 15:6-15; Gyn 18:39—19:16)

13A Pilato pãã da boɔle la a Naaŋmen bagmaalkare ane a noba lantaa, 14a yeli ko ba, “Yɛ taa la a dɔɔ ŋa wa ne n zie, a yeli ka O dɔɔnɔ la a noba. N peɛre O la yɛ niŋesogɔ kyɛ N ba nyɛ O yelsaanaa zaa. 15Hɛrɔde meŋ da ba nyɛ O yelsaanaa zaa lɛnso ka O e ka ba leɛ taa O wa ne a te zie. Serɛzaa, a dɔɔ ŋa ba taa yelsaanaa zaa naŋ seŋ ne kũũ. 16Azuiŋ, N na e la ka ba feɛ O kyɛ de O bare.” [17A Ista tigri saŋ naŋ da maŋ wa tara, a da maŋ fere la ka Pilato iri a nempɔgre kaŋ bare.]

18A noba zaa pãã da laŋ la taa a kyeere yaga zaa, “Yɛ ko a dɔɔ ŋa! Kyɛ iri Baraba ko te!” 19(Ba da pɔge la a Baraba ŋa, o naŋ da dɔ̃ɔ̃ a teŋɛ kyɛ ko noba zuiŋ.) 20A Pilato naŋ da boɔrɔ ka o iri a Yeezu bare zuiŋ, o da la yelee yɛlɛ ko a noba; 21kyɛ ka a noba da naŋ kyeerɛ yele, “Kpa O dagaraa zu, kpa O dagaraa zu!” 22A Pilato laboreŋ soore la a noba a gbɛre bota soba, “Wola, boŋ yeli faa ka O e? Maa eŋ ba nyɛ O yelsaanaa zaa naŋ seŋ ka ba ko O. N na e la ka ba feɛ O kyɛ bare O.” 23Kyɛ a noba da ba sage kyɛ yele ne nimizeɛ zaa ane kɔkɔkpeɛne ka ba kpa O dagaraa zu. A noba gɔmɔ da do gaŋ la a Pilato deni. 24Lɛ la ka a Pilato da fãã kyɛ tere noɔre ka ba e seŋ ba naŋ boɔrɔ lɛ. 25A Pilato da iri la a neɛ na ba naŋ boɔrɔ a bare. A neɛ ŋa la ka ba da pɔge nempagdie tendɔ̃ɔ̃ ane o neŋko zuiŋ kyɛ da de a Yeezu ko ba aŋa lɛ ba naŋ boɔrɔ.

Ba Naŋ Kpa Yeezu Dagaraa Zu

(Mat 27:32-44; Mak 15:21-32; Gyn 19:17-27)

26Ba naŋ da taa a Yeezu gɛrɛ ne, ba te tuori la dɔɔ kaŋ ka o yi weɛ waana. A dɔɔ ŋa da yi la Saarin, ka o yuori di Saamon. Ba da nyɔge o la a e ka o tuo a dagaraa tuuro ne a Yeezu. 27Nembeɛoŋ da tuuro O la, ka pɔgeba da poɔ a kono gbɛlɛ nuuri a Yeezu zuiŋ. 28Kyɛ Yeezu da leɛ kaa ba la a yele, “Gyɛruzɛlɛm pɔgeyaare, yɛ ta kono maa zuiŋ, kyɛ yɛ kono yɛmenne ane yɛ biiri yɛlɛ. 29Bonso, a bebie waana la ka ba na yeli, ‘Pɔg-ɔɛ ane pɔgeba naŋ daŋ ba dɔge biiri, ane berɛ biiri naŋ daŋ ba ɛnne nyɛ la maaloo.’ 30A noba pãã na piili yele korɔ la a taŋkponni, ‘Yɛ le dɔgle te zu,’ kyɛ yeli ko a tambilii, ‘Yɛ pɔge te.’ 31Ka ba naŋ wa erɛ damaara ŋaa, wola ka ba na e a dakuoni?”

32Ba da taa la noba mine bayi naŋ e nenfaare, a poɔ a Yeezu eŋɛ a na te kpa a dagaraa zu. 33Ba naŋ da wa te ta a zie na ba naŋ boɔlɔ Zukoɔre, ba da kpa la a Yeezu dagaraa zu ane a nenfaare na bayi, kaŋ a O duluŋ seŋ, kaŋ meŋ a O gɔɔ seŋ. [34Lɛ la ka a Yeezu da yeli, “N Saa, di suuri ko ba, bonso, ba ba baŋ bonna ba naŋ erɛ.” Ba da de la a Yeezu bonsuuri ŋmɛ gbaŋ a poŋ taa.] 35Ka a noba da are a be kaara, kyɛ ka a nembɛrɛ da erɛ O laara a yele, “O faa la ba mine, O pãã faa O meŋɛ, ka O naŋ wa waa a Mɛzaaya, a Naaŋmen neŋkaa-iraa!” 36A sogyɛre meŋ da e O la la, a taa dããmiiruŋ mine a wa ko O, 37a yele, “Ka fõõ wa waa a Gyuumine Naa, faa fo meŋɛ wɛ!” 38Ba da sɛge la sɛgre a O zu sogɔŋ, “A Gyuumine Naa La A Ŋa.”

39A nenfaare na kaŋ ba naŋ da kpa a dagaraa zu meŋ da erɛ la a Yeezu laara a yele, “Fo ba waa a Mɛzaaya be? Faa fo meŋɛ ane te meŋ wɛ!” 40Ka a nenfaa kaŋ na soba nyare a o tɔsoba na zu a yele, “Ka lɛ fo ba zoro Naaŋmen, fõõ ne a dɔɔ ŋa dɔgroŋ naŋ waa yeni? 41Tenee eŋ seŋ ne la a dɔgroŋ ŋa, bonso, te nyɛrɛ la dɔgroŋ na te meŋɛ naŋ bɔ, kyɛ a dɔɔ ŋa eŋ ba e yeli faa zaa.” 42Lɛ la ka o pãã yeli, “Yeezu, ta inni n yɛlɛ, ka fõõ wa kpɛ a fo naaloŋ poɔ.” 43Ka a Yeezu yeli sɔge o, “Serɛzaa ka N yele korɔ fo, a zenɛ ŋa, fõõ ne ma na laŋ la taa a tenvelaa#23:43 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ.”

A Yeezu Kũũ Yɛlɛ

(Mat 27:45-56; Mak 15:33-41; Gyn 19:28-30)

44A naŋ da wa peɛlɛ a ŋmenaa pozentaa, ligruŋ da pɔge la a tendaa zaa, a te ta ŋmenaa gbelli ata saŋ, 45ka a ŋmenaa da ligi, kyɛ ka a Naaŋmen die patiisa da kyeɛ̃, a poŋ ziiri ayi. 46A Yeezu pãã da kyeere la yaga zaa a yeli, “N Saa, fo nuuriŋ la ka N de N vooroŋ eŋ.” O naŋ da yeli a ŋaa la ka O da ŋmaa vooroŋ. 47A sogyɛre kɔɔ neŋkpoŋ naŋ da nyɛ lɛ a yɛlɛ zaa naŋ e, o da iri la Naaŋmen yuori a yele, “Serɛzaa, a dɔɔ ŋa da ba sãã yeli zaa.” 48A noba zaa naŋ da wa ka ba nyɛ a Yeezu dagaraa kpaabo, naŋ wa nyɛ a lɛ zaa naŋ e, ba da leɛ kuli ne la nuyoɔre. 49Kyɛ a Yeezu nembaŋne ane a pɔgeba na zaa naŋ da tuuro O a yi a Gyudiya paaloŋ poɔ, da te are la tɔɔre zaa kyɛ kaara a yɛlɛ ama.

A Yeezu Ũũmu Yɛlɛ

(Mat 27:57-61; Mak 15:42-47; Gyn 19:38-42)

50A Gyuumine neŋkpoŋ kaŋ naŋ da waa nensoŋ kyɛ e nemmeŋɛ, ka o yuori da di Yuzɛb, 51eŋ da ba sage ne a ba poteɛrɛ ane a ba yel-erre kyaare ne a Yeezu koobo. A dɔɔ ŋa da yi la a Gyuumine teŋɛ kaŋ yuori naŋ di Aremateya, a da kyɛllɛ ka o nyɛ a Naaŋmen naaloŋ. 52A dɔɔ ŋa da gaa la a Pilato zie a te sɔre ka o ko o a Yeezu eŋɛ. 53Lɛ la ka o da yage a Yeezu eŋɛ, a de pɛmpelaa pilli page ne O, a gaa te ũũ yaa kaŋ ba naŋ nyɛ piiri zu, ka ba daŋ ba ũũ neɛzaa o poɔ sɛre. 54A da e la a Naroo bebiri daare, kyɛ ka a pɛnnoo bebiri da piili. 55A pɔgeba na naŋ da tu a Yeezu yi a Galili wa, da tu gaa te nyɛ la O ũũmu zie ane lɛ ba naŋ gaale O a bogi poɔ. 56Ba pãã da leɛ kulee la a te nare turaali ane kãã-nyunoɔ.

Ba da pɛnnɛɛ la a pɛnnoo bebiri daare a seŋ lɛ a Naaŋmen nɔɛ naŋ biŋ.

Currently Selected:

Luk 23: DNTTP

Highlight

Copy