Yoohana 11
11
Omoot Laassaro
1Maantooka etoo Laassaro layadeehe ilkerengeetti Beꞌdaaniya yaal khannate. Albehi leeddesse too Maariya tahe too la Maarta tahe laka ilkerengeettaas Beꞌdaaniya yaalliin. 2Maariyata la a ti ꞌdee Kamur miricchi luhlo kasubahto, tintiche la kahiyyaayto.#11:2 Yoohana 12:3-8. Maariyatane walaalicheki Laassaro layadeeh khannate. 3Albeha isleedesse, Yeesso farniin iꞌdiiche, “Kamur, aalaahki at weyti ꞌdoonto a khannanyahe,” iyidah.
4Chirri us waha daage ka, Yeesso wihi us yidah, “Khannaata omoot ma kamassati. Khannaata a yateehe ꞌdee Waakh laweynaacha, ꞌdee khannaata ka Weeli Waakh laweynaacha.” 5Yeesso la Maarta ichoow walaassicheti Maariya layadeeh ichoow walaalichoki Laassaro layadeeh ba a ꞌdoona. 6Iꞌdaasenyi inkoo us farniinkaas ꞌhele, us saggi Laassaro ikhannanyahe daage laka, Yeesso intaas us kajire ibeen lamma addane fiddiye.
7ꞌDeerka wihi us abattitiis iyidah, “Kaha, boroofenhi Yaꞌhuudiya a inokhanni.”
8Iꞌdaasenyi abatti wihi iche Yeesso itidah, “Eti ween, ibeenneta dow on menya weynaanti Yaꞌhuud dagah kaachibin leheete, kiigaasan leheet? Atihi toro intaas inokhatti ꞌdoonta?”
9Yeesso wihi us ilaabe, “Orrahti maantoo kaldach sahaꞌd tomon ichoow lamma ma khabto? Eti maalim sohti, ma tarraantarrati, iꞌdi tahe etaas eti harrata banay siicho, iche arga. 10Chirri us ibeen sohti a tarraantarrata, a mehe banay ma khabo.”
11Yeesso inkoo us waha yidah ka, wihi us toro iyidah, “Aaleenki Laassaro layadeeh a urꞌde, iꞌdaasenyi an irda neybaacha.”
12Abattitiis wihi iche ilaabte, “Kamur, chirri us urꞌdo ꞌdee a deefsata on gon.” 13Yeesso la saggi rumanka Laassaro iyumuyye kaayyeeda, iꞌdaasenyi abatti kol us wori urꞌdumme on kayeyyeedo koogtahe.
14Yeesso ꞌdeerka abatti ma kaaddaginne, “Laassaro a yumuy,” iyidah. 15“Toro la jeentetiin u, an a hamaada chirri maanti us yumuy an intaas ikajirin. Waha tuumman atine indigir atin ikhabaane, ꞌdee ani irummeysattaan. Iꞌdaasenyi kaaleya usu iiranni.”
16Toomashi Manꞌdaan layadeeh, wihi us abattiti addan iyidah, “Inno tuumman eti ween raahno, ꞌdee inno tuumman a leetuunno.”
Yeesso a eti enenyet omoot kasookahcho
17Chirri Yeesso ilkerengeetti Beꞌdaaniya soogele ka, saggi Laassaro ibeen affar kutte liihawwaale abte. 18Ilkerengeetti Beꞌdaaniya la geeddi kiilomitta seyyahe ilkerengeetti weene Yeerusaleem ileejirta. 19ꞌDooꞌdi Yaꞌhuude ittaawe la a yimiyye Maarta ichoow Maariya uur khoboocheen, jeenteti omoot walaalichuu. 20Chirri Maarta saggi Yeesso isoosohti daagte ka, bahte or kadowte. Iꞌdaasenyi Maariya goob kaꞌhadde.
21Maarta wihi iche Yeesso itidah, “Kamur, kootte at inta kajirte ka, walaaleey ma yamuut! 22Iꞌdaasenyi toolla laka saggi wihi tuummane at Waakh daahte Waakh kiyeelo, a garda.”
23Yeesso la wihi us iyidah, “Walaalaah omoot a kasookaha.”
24Maarta wihi iche ilaabte, “Saggi us ibeenki yomboot omoot ikasookaho a garda.”
25Yeesso la wihi us iyidah, “Ani enenyet omoot kasookahcha, toro jiro siicha. Eti tuummane ani irummeeste, chirri us yumuy laka jiro a ꞌhela. 26Eti tuummane toolla jiro, ani irummeeste la, jirtuu tuumman ma yamuut. At waha a rummeysatta?”
27Iche la wihi iche itidah, “Aa, Kamur, saggi at Ki Lasubhe itahe, at Weeli Waakhe goorat harrata yamiit itahe, a rummeesda.”
Yeesso jeente Laassaruu ooya
28Inkoo Maarta waha tidah ka, nokhatte, walaassicheti Maariya layadeeh ꞌdol iwahte wihi iche itidah, “Eti Ween kallaaye, ati laka a kiwaha.” 29Inkoo Maariya waha daagte ka, dowwa kahte Yeesso iiratte. 30Yeesso uliba ilkerengeet ma soogeline iꞌdaasenyi inti kootte Maarta kaꞌhesse on kajira. 31ꞌDooꞌdi Yaꞌhuude kootte Maariya leejire, uur khoboocho, chirra iche dowwa bahte ka, leebaheen. A mehe kol iche hawwaal iratti kooyto koogyahiin.
32Maariya inti Yeesso kajire sooeleesse, uus iche Yeesso agarte ka, luhlohiis ka jilbo il kaguꞌdubte, wihi iche tidah, “Kamur, kootte at inta kajirte ka, walaaleey ma yamuut.”
33Chirri Yeesso ichehi ooyto arge ka, ꞌdooꞌdi Yaꞌhuude leejiro laka usuhi ooyo arge, rubeye weyti uskulaatte, mal gele. 34Wihi us worsate, “Intoh kahawwaasseen?”
Wihi icho ilaabeen, “Kamur, kaale agar.”
35Yeesso ooye.
36ꞌDooꞌdi Yaꞌhuud la wihi us isiyidah, “Bal geeddi us Laassaro ꞌdoono yeya!”
37Iꞌdaasenyi gaasoo mehe yidaaheen ya, “Eti indo laa goorat indo a haaggichee, a iꞌdoh, Laassaro omoot ikaholin?”
Yeesso Laassaro omoot kasookahcha
38Yeesso toro weyti rubeye uskulaatte, hawwaassi goꞌdenye daddaabtoo buure af lakorche hagga irte. 39Yeesso wihi us yidah, “Daddaab bahcha.”
Iꞌdaasenyi Maartati Laassarohi yumuy leedelatte wihi iche tidah, “Kamur, kola a nuuhe, ibeen affar kutte lahawwaalee.”
40Yeesso la wihi us iyidah, “An kootte chaꞌat saggi waha iyateehiin rummeysatte weynaanti Waakh a agarta ma kiidaahan a?”
41Daddaab hawwaal afiche lakabahche. Yeesso ꞌdeerka serey yeye, wihi us yidah, “Aabba, jeenteti at ani idaagtuu, kalaꞌde kisoolaaba. 42Saggi at kol dakkhan idaagto a garda, iꞌdaasenyi jeenteti ꞌdooꞌdane waha iadeehe, ꞌdee icho la saggi at ani isooergatte rummeestaan.”
43Inkoo us waha yidah ka weyti riire, “Laassaro, soobah!” yidah. 44Eti yumuy soobahe. Usuhi dahanohiis ichoow luhlohiis ba darfohi eti yumuy lakaayyuubo kaayyubanyahiin soobahe. Fool laka dafare kayuuban. Yeesso la wihi us ꞌdooꞌd iyidah, “Furfura, ꞌdee a irti.”
ꞌDooꞌd saggi us Yeesso iyagiis yowta
45ꞌDooꞌdi Yaꞌhuude ittaawenye, Maariya bariito yimiy, wihi Yeesso yeele arge, Yeesso rummeeste. 46Iꞌdaasenyi gaasichokoo Farissaayo inokhteene, wihi Yeesso yeele icheekeen. 47Kuhaaniyyohi wewween ichoow Farissaayo ba Jaldaabti Weene Yaꞌhuud tol iwaheen.
Wihi icho worsateen, “Mehe yeello? Bal wahanyeyyoha ittaawenye miigti Waakh tuso eta yeelo yeya! 48Chirri inno usu ꞌdiinne us sagga isossohti, ꞌdooꞌd tuumman usu a rummeesta. ꞌDeerka ꞌdooꞌdi wewweene ili Rooma yamiite, minkeenki Waakhe buure ichoow yaafteen tuummamba baabiichaan.”
49Koo leejire Kayaafa layadeehe ullaka guꞌhaas ka kuhaanihi weyti weene sooyeede wihi us yidah, “Wohoo rucchul laka ma garattaan! 50Ichehi yaaf tuumman bakkatti ka, usuhi etoo kalday meessi ꞌdooꞌd tuumman kayamuut menya deefto?”
51Ulla waha us yidah, wihi usu kasoouummame mee. Iꞌdaasenyi jeenteti us guꞌhaas ka kuhaanihi weyti ween iyahe, iche wori Waakhe saggi Yeesso meessi yaafohi Yaꞌhuud ikayamuut ikaayyeede. 52Toro la Yeesso jeenteti yaaftaas kalday on ma iyamuute, iꞌdaasenyi jeenteti nyaakhuti Waakhe taasane iyamuute, ꞌdee ꞌdooꞌdi harra tuumman isikeena, wohoo kalday kayeela. 53Uus maalinkaas la, weynaanti Yaꞌhuud tossatte, jiti iche Yeesso katagiis yowatte.
54Maantaka Yeesso inti yaafohi Yaꞌhuud kaargaan ma kaassahan. Yeesso intaas katabe, abattitiis khabaayi irte, ilkerengeettoo hidaad haggeenye Efireem layadeeh irte, fiddiye.
55Maanti Daawti Yaꞌhuude Baasakka lahaaggicho soodowwaatte ka, ꞌdooꞌdi ittaawe ilicho kabahe, ilkerengeetti weene Yeerusaleem ikore, daawtichoti Isladikho Baasakka orcheenye gelaanee. 56Icho tuumman la Yeesso yowtaan. Chirri icho minki Waakhe buure yimaateen ka, wihi icho isworsateen, “Atin maanta kol us daawta yamiite koogtahiin?” 57Iꞌdaasenyi kuhaaniyyohi wewween ichoow Farissaayo amur bahcheene, chiꞌ etoo inti Yeesso kajiro garti, a soocheeko, ꞌdee a khabteen.
Currently Selected:
Yoohana 11: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
