Yoohana 13
13
Yeesso abattitiis luhlo dikha
1Geeddi ibeenki daawti Baasakka iitaahan, Yeesso saggi ibeenki us harrata katabo, us Aabbahiis iirti kola iyitah garte. Yeesso la ichoowka maanti jirotiisti harrata soomassatti laka, ꞌdooꞌdiis a ꞌdoone.
2Yeesso ichoow abattitiis ba gololi gelebeete yamhiin. Seytaan la Yuuda Iskaariyoothi inam Siimone mali suujenye us Yeesso ꞌdub kagoocho orey on rubeytiis gesse. 3Yeesso saggi Aabbahiis walah tuumman dahantiis igesse a garta, saggi us Waakh ikayimiyye us toro Waakh ikanokhti a garta. 4ꞌDeerka kombor kasookahe, dafartiisti oroot duumiche, dafarti chirri ladikhte lakahiyyaayti dabar kahiite. 5Wahaas ꞌdubicho ka, karaayatoo bicche kachibe, abattitiis luhlo dikhe, dafarti kootte us dabar kahiite ka hiyyaaye.
6Chirri us Siimonhi Beetero layadeeh sooeleele ka, Beetero wihi us iyidah, “Kamur, luhlo idikhta?”
7Yeesso wihi us ilaabe, “Wihi an yeelo toolla wihicho ma abatti, iꞌdaasenyi yomboka a abatta.”
8Beetero la wihi us iyidah, “At koloo kalday laka luhlo ma idikhto.”
Yeesso wihi us ilaabe, “Chirri an luhlo kidikhin, at keey mee.”
9Siimonhi Beetero layadeeh wihi us Yeesso ilaabe, “Kamur, ꞌdeerka luhlo kalday iidikhine, iꞌdaasenyi dahano ichoow matah laka idikh giꞌde.”
10Yeesso wihi us ilaabe, “Eti kootte sar tuumman dikhte, yomboka luhlo kalday on dikhta. Iꞌdi tahe sartiis tuumman chaafo ma khabto. Buurtiin a dikhantahe, iꞌdaasenyi atin tuumman mee dikhan.” 11A mehe us ꞌhor on eti ꞌdub goocho garte, jeentetaase, “Atin tuumman mee dikhan,” iyidah.
12Inkoo Yeesso abattitiis luhlo dikhe, us dafartiisti oroot toro gessate ka, inti kootte us ꞌhor fiddiye koorronte. Wihi us icho iyidah, “Kamalda bal, wihi toolla an atin iyeele wihicho a abatteen? 13Atin ani, ‘Eti ween,’ ichoow, ‘Kamur,’ menya itadeehiin? Aa! A iꞌdaas on gon. An rumanka a eti weene, toro la a Kamur. 14Anihi Kamuriinenye toro la etiinki weene, toolla luhlo a atin dikhe. Taba giꞌde atin laka luhlo isdikha. 15An jit a atin tuse, ꞌdee atin laka wihi an atin iyeele ꞌdooꞌdi addan iyeessaan. 16Rume atin icheeka, falfá kamuriche kaween mele, ommos eti ergaanee eti ergate ma kaween. 17Toolla ꞌdeerka atin runta garattaan, a hamaadoo geeddohe chaꞌatin wihi atin liiꞌdoono yeessaan.
Yeesso saggi ꞌdub liigoocho orey on cheeka
(Mattaayo 26:21-25, Marko 14:18-21, Luuka 22:21-23)
18“Wora an kaayyeedo atin tuumman mee atin miinsanyahe. ꞌDooꞌdi rumanka an soobahsade a garda. Iꞌdaasenyi Chiirnaanneti Waakhe, ‘Eti ileegolossate on toro chiiy iyitah,’#13:18 Sabuur 41:9. tadeeh a labuuhicha.
19“Waha geeddi icho iitaahane atin isoocheeka, ꞌdee maanti icho yitaaheen laka, saggi an eti an ahe, an atin isoocheeke iahe rummeysattaan. 20Rume atin icheeka, eti tuummane eti an sooergade khaatti, ani ikhaatta. Eti ani ikhaatti la, eti isooergate khaattta.”
21Inkoo us waha yidah ka, Yeesso weyti uur suujowe, wihi awtiis miinsan abatti icheeke, wihi us yidah, “Rume atin icheeka, etiinkoo ꞌdub igoocha.”
22Abattitiis isyeyte, etichoki yeedaas miinsanyahe fooliis waayte. 23Abatti goyaka, etoo kachka Yeesso weyti ꞌdoono, Yeessó garabiissa fiddiya. 24Siimonhi Beetero layadeeh etaas abattee far iooge, wihi us iyidah, “Bal eti us woriis kaayyeedo, eti tahe worsada.”
25Etaas abattee Yeesso kasiihsate wihi us worsate, “Kamur etaas a ayyo?”
26Yeesso wihi us ilaabe, “Etaas, a eti toolla an makaatetoor idiibo inkoo an karam kalugꞌde.” Yeesso ꞌdeerka makaatetoor karam goya kalugꞌde, Yuuda Iskaariyoothi inam Siimone iooge. 27Uus Yuuda makaate khaate, Seytaan goytiis gele.
Yeesso la wihi us Yuuda iyidah, “Nyaam, wihi at sooyeesso dowwa yeel!” 28Iꞌdaasenyi ꞌdooꞌdi addane leegolossati et jeenteti Yeesso waha iyidah garti mele. 29Yuuda gon chilimme khucchaa, abatti gaasoo kol Yeesso Yuuda ergate, wihi icho daaw ka ꞌdoonaan, “Soogat,” iyidahye, ommos us, “Wohoo miskiin sii,” iyidahye koogyahiin. 30Chirraas on Yuuda makaate khaate, dowwa bahe. Il la a ibeen.
Yeesso abatti amuroo husub siicha
31Inkoo Yuuda bahe ka, Yeesso wihi us yidah, “Toolla Ínam Aadam a laweynaache. Ulla saggi Waakh iweenyahe ꞌdooꞌd a tusa. 32Anna chirri an saggi Waakh iweenyahe ꞌdooꞌd tuse, Waakh laka saggi Ínam Aadam iweenyahe ꞌdooꞌde tusa, toro la dowwa tusa.
33“Nyaakhutaaw, an kola geeddoo rucchul on atin leefiddiya. Atin a iyowattaane, iꞌdaasenyi iꞌdi goorat an yaafohi Yaꞌhuud iidah u, inti an irdi emeet ma tabuuꞌdiin.#13:33 Yoohana 7:33-34, 8:21.
34“Amuroo husube atin siicha. Taba isꞌdoona. Saggi an atin iꞌdoone, atin laka saggaas isiꞌdoona. 35Chaꞌatin isꞌdoontaan, ꞌdooꞌd tuumman saggi atin abattiteey itahiin a abta.”
Yeesso saggi Beetero isooꞌdiiꞌdo orey on cheeka
36Siimonhi Beetero layadeeh wihi us Yeesso worsate, “Kamur, at intoh iratta?”
Yeesso wihi us ilaabe, “Toolla inti an irdi ma ileeiratti. Iꞌdaasenyi ꞌdee yomboka a ileeiratta.”
37Beetero la wihi us worsate, “Kamur, an a iꞌdoh toolla kiraahin? An a geeddi an jiroteey laka soobahcho jeentetaah u.”
38Yeesso wihi us ilaabe, “At rumanka jeenteteey u jirotaah a soobihissa? Rume kisoocheeka, geeddi lukki iriirin, at kol seyyahe ma igaratti tadeeh.”
Currently Selected:
Yoohana 13: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
