Yoohana 14

Yeesso a jiti Waakh lakiirti

1Yeesso toro wihi us abattitiis iyidah, “Amalalina, Waakh kakhuufa, ani laka ikakhuufa. 2Min Aabbaheey goonanneti ittaawenye khaba. Anna a irda, meel atin iyeela. Chirri kootte waha iꞌdaas ieheynan, ma atin isoocheeko. 3Chirri an irde meel atin iyeele la, a soonokhda, meesseey atin geecha, ꞌdee inti an kajiro, atin laka kajirtaan. 4Jiti inti an isohdi irti a garattaan.”

5Toomas la wihi us iyidah, “Kamur, inti at isohatti nah ma garanni, saggoh jiti intaas isohti iabanna?”

6Yeesso wihi us ilaabe, “An a jit, an a rum, an a jiro. Eti ani ileeyimiy on menye, et Aabbaheey iyamiit mele. 7Chaꞌatin rumanka igaratteen, Aabbaheey laka a garattaan. Uus toolla kakhabatti atin usu a abatteene, toro la a agarteen.”

8Fiilif la wihi us iyidah, “Kamur, bal Aabbahaah nah tus, nah walah addane nah ꞌdoonno mele.” 9Yeesso wihi us ilaabe, “Fiilif, geeddi deere atin tuumman atin leejire, toro ichoow uliba at ma iaban ba? Eti tuummane ani iarge, Aabbaheey a arge. A iꞌdohe toro, ‘Aabbahaah nah tus,’ ielatta? 10Fiilif, at saggi an Aabbaheey goytiis ifiddiyo, ulla goyteey ifiddiyo ma rummeysatti? Yeeda an eldi ani ma ikiimaatane, Aabbaheeyki goyteey fiddiyo iche waha tuumman yeela. 11Chirra ani, ‘An Aabbaheey goytiissa fiddiya, ulla goytaaya fiddiya,’ atin iidah, irummeesda giꞌde. Chirri atin irummeysan, wihi ittaawenye weeli enenyet yeelin iubaaꞌdane an yeelo ka rummeesda giꞌde. 12Rume atin icheeka, eti tuummane ani irummeesti, wihi an yeelo a yeela. Wihi waha kussan laka a yeela, iꞌdi tahe an Aabbahaaya inokhda. 13Anna walahbaaw atin jeenteti atin keey itahiin u daahteen a atin iyeela, ꞌdee Weeli Waakh Aabbahiis weynaacha. 14Walahbaaw tahe ka, jeenteti atin keey itahiin idaaha anna a atin iyeelaa.

Yeesso Rubeyti Munyee ꞌdooꞌd iayyicha

15“Chirri atin iꞌdoontaan, amuri an atin siiche a raahtaan. 16Anna Aabbaheey a daaha, ulla ꞌDooggargaartotoo#14:16 Yoohana 15:26, 16:7. addane jirtuu tuumman atin leejirto atin isooerga. 17Waha a Rubeyti Munyeenye rum leh. ꞌDooꞌdi harrata la Rubeyti Munyee ma khaatti. Iꞌdi tahe icho Rubeyta Munyee ma argaane, ommos ma gartaan. Iꞌdaasenyi atin a garattaan, a mehe Rubeyti Munyee toolla a atin leefiddiita, toro berri goytiinna kijirta. 18Saggi nyaakhuti ꞌdooꞌdi dele katuume ma atin ikatabo, a atin isoonokhda. 19Geeddoo rucchul ka kola ꞌdooꞌdi harrata toro ma iargo, iꞌdaasenyi atin a iagartaan. Toro jeenteti an ijiruu, atin laka ꞌdee jiro a ꞌhessaan. 20Maantaas saggi ani ichoow Aabbaheey wohoo kalday inahe, atin ichoow ani wohoo kalday inahe, toro la ani ichoow atin wohoo kalday inahe a kassaan. 21Eti iꞌdoono, a ki amurreteey khabti, toro raaho. Eti iꞌdoono la, Aabbaheey laka usú a ꞌdoona, ani laka usu a ꞌdoona, toro la eti an ahe la a tusa.”

22Yuuda ꞌdeerka, kan Yuudahi inam Iskaariyoote menye, wihi us yidah, “Kamur, at a iꞌdoh dowwanoha ka nah isitussa, ꞌdooꞌdi harrata la isitusiwwaayta?”

23Yeesso la wihi us ilaabe, “Eti tuummane iꞌdoono, wihi an abcho a raaha. Aabbaheey usu a ꞌdoona. Aabbaheey ichoow ani usu a inamiite fureenyo goytiis kayeelanna. 24Eti tuummane ani iꞌdoonin, wihi an abche laka ma raaho. Wihi atin daagteen la weheey menye, Aabbaheeyki isooerge iche kayimaateen.

25“Waha tuumman geeddi an atin leefiddiyo iche atin isoocheeke. 26Iꞌdaasenyi Rubeyti Munyeenye ꞌDooggargaarto layadeehe, Aabbaheey meesseey ka sooergo, walah tuummane atin abissa, toro la wihi tuummane an atin isoocheeke, atin kasooꞌhelissa. 27Nebeye atin ikataba. Nebeytaaya atin siicha. Saggi ꞌdooꞌdi harrata nebey ꞌdooꞌd isiicho mee an nebey atin isiicho. Amalalina toro la roorro akhabina.

28“Anihi, ‘A irda toro a atin isoonokhda,’ eldi a daagteen. Chirri atin iꞌdoonteen, jeenteti an Aabbaheey ikiirduu, a hamaaddaan. A mehe Aabbaheey ani a ikaweenyahe. 29Waha tuumman la geeddi icho iitaahane atin icheeke, ꞌdee ꞌdeerka maanti icho yateehiin rummeysattaan. 30Geeddi deer ma atin leeyyeedo, a mehe karnati harrata a soosohtaa. Us miig ma ikakhabo, 31iꞌdaasenyi ꞌdooꞌdi harrata saggi an Aabbaheey iꞌdoono an amur Aabbaheey iraaho a abta.

“Kaaleya inta a katabno.”

Currently Selected:

Yoohana 14: rel

Highlight

Copy