Yoohana 15

Yeesso a iꞌdi geeyi sabiib

1Yeesso toro wihi us yidah, “An a iꞌdi geeyi sabiibe rummaate, Aabbaheey la a eti gos hil kahaaggicho. 2Aabbaheey la eti tuummane iꞌdi liikhimeet u ani ikatoollo gurnaan idelin, a goocha. Eti tuummane iꞌdi liikhimeet u gurnaan delo la, Aabbaheey mujjume yeela,#15:2 Mujjume yeela. Eti gos leh goorat liikhimohi rurrucchule geeyi sabiib a goocha ꞌdee liikhimohi burbuure gurnaanki buure delaan. ꞌdee gurnaanki buure bahcha. 3Atin la ꞌhor on wihi an atin abche ka, atin mujjummooche. 4Goyteey fiddiya, anna goytiin a fiddiyo. Liikhime keley gurnaan iche bihisso mele. Chirri iche gurnaan bihisso, a chirri iche geeyi sabiib katolosso on. Atin laka iꞌdaasu, chirri atin goyteey ifiddiyin, walah atin ꞌduuꞌddaan mele.

5“An a iꞌdi geeyi sabiibe, atin la a iꞌdi liikhimohaaya. Eti tuummane goyteey fiddiyo, anna goytiis fiddiyo, gurnaanki buurenye dela. Laanteey walah atin ꞌduuꞌddaan mele. 6Eti tuummane goyteey ifiddiyin, iꞌdi liikhimeet u a laroga, angaga. Liikhimohi iꞌdaase a lasoosuuna, ꞌdab lakalugꞌda, laguba. 7Chirri atin goyteey fiddiitaane, yeedeey la goytiin fiddiyo, wihi atin ꞌdoontaan tuumman Aabbaheey a daahtaane, ulla atin siicha. 8Chirri atin gurnaanki buure bihissaan, saggi atin abattiteey itahiine tussaan. Iꞌda ka la, Aabbaheey a laweynaacha.

9“Saggi Aabbaheey ani iꞌdoono, iche ani laka atin iꞌdoona. Goyteey fiddiya, ꞌdee ani a atin ꞌdoono giꞌde. 10Chaꞌatin amurreteey raahtaan ꞌdoonintaaya kafiddiitaan, saggi an amurre Aabbaheey iraahe an ꞌdoonintiis ikafiddiyuu.

11“Waha la a atin isoocheeke, ꞌdee atin laka hamaadi an khabo khabtaane, toro la hamaadiin walah kaankhati mele.

12“Amuri an atin siicho kalla, saggi an atin iꞌdoonuu, taba atin laka isꞌdoona. 13Wihi ꞌdooninti enenyet aalassiis weyti ꞌdoono tuso kallaayo, a ti us jirotiis jeentetichuu isoobahcho. 14Atin a aalassaaya chirri atin amureey raahtaan.

15“Kola ilbooyye ma atin adeeh, iꞌdi tahe ilbooyye wihi kamuriche haaggicho ma garatti. Aalassaaya atin adeeh. Iꞌdi tahe wihi tuummane an Aabbaheey kadaage, a atin isoocheeke. 16Atin ani ma isoobahsan, iꞌdaasenyi ani atin soobahsade, toro hiloo atin korche, ꞌdee gurnaan bihissaan, gurnaanki fiddiyo bihissaan. ꞌDeerka jeenteti atin keey itahiin u, Aabbaheey wihi tuummane atin daahtaan, a atin siicha. 17Amurreteey taacheyye, taba giꞌde isꞌdoona.

ꞌDooꞌdi harrata a atin ꞌdiiꞌda

18“Chirri ꞌdooꞌdi wahanyeyyohi harratane sussuuje raaho atin ꞌdiiꞌde, saggi icho kolooraat ani iꞌdiiꞌdeen abda. 19Chirri kootte atin iꞌdi ꞌdooꞌda harrata tahiin, ꞌdooꞌdaas a atin ꞌdoona, iꞌdi ꞌdooꞌdichuu. Atin ꞌdooꞌdi harrata menye, iꞌdaasenyi an a atin soobahsade. Jeentetaase ꞌdooꞌdi harrata atin iꞌdiiꞌda. 20Wihi an atin iidah kasooꞌhela, ‘Falfá kamuriche kaween mele.’ Chirri ꞌdooꞌdi harrata ani sina iomhicho, atin laka sina a atin omhichaan. Chirri icho wihi an abche raaheen la, wihiin laka a raahaan. 21Waha tuumman la jeenteti atin keey itahiin u, a atin layeela. Iꞌdi tahe icho eti ani isooergate ma gartaan.

22“Chirri goorat an iimaatane an icho ileeyyeedin, uskeel lakacheekti mele gon. Iꞌdaasenyi toolla uskeelicho ka walah icho laabaan mele. 23Eti tuummane ani inibhaate, Aabbaheéy laka a nibhaate. 24Chirri kootte an goycho ka wihi injire liiyeelin iyeelin, uskeel ma khabaan. Iꞌdaasenyi toolla wihi ittaawenye weeli enenyet yeelin iubaaꞌdane an yeele a argeene, toro Aabbaheey ichoow ani ba a nah nibhaateen. 25Iꞌdaasenyi waha toolla a yateehiine, wihi Amurreticho lakachiire labuuhicha, ‘Walah an yeele icho ikaꞌdiiꞌdaan mele.’#15:25 Sabuur 35:19, 69:4.

26“Maanti Rubeyti Munyeenye ꞌDooggargaarto layadeehe Aabbaheey katamiit an atin isooergo, Rubeyta Munyeenye rum lehe Aabbaheey katamiit, a atin itamiite, wori ani imiinsan atin icheekta. 27Atin laka woraaya cheektaan. A mehe uuꞌ goorat maanti an hila sookhabde, a ileejirteen.

Currently Selected:

Yoohana 15: rel

Highlight

Copy