Luuka 12

Yeesso Farissaayo yuubsada ꞌdooꞌd iyadeeh

(Mattaayo 10:26-27)

1Geeddaka urur buuraate, aliffe laka kute ichoowka ꞌdooꞌd iskharꞌdabte. Yeesso koloo abattitiis leeyeede wihi us iyidah, “Yeedad Farissaayo ki iꞌdi booddati makaate fuurissee yuubsada. Wihi icho essaan tuumman ka a iskaayyeelaane suujoon taaꞌhichaan. 2Walah oboobsane liisoonyiikhin mala, ommos walah dagsane enenyet liiabin mala. 3Wihi atin mugꞌdi ka tidaaheen, maalime ladaaga, wihi atin minan goyaka nabah ka isicheekteen la minan sarchooda hooyi saraat lakacheeka.

Waakh kakhuufa

(Mattaayo 10:28-31)

4“Aalassaay wihi an atin icheeko, ꞌdooꞌdi sar on yagiise wahaas ꞌdubicho ka wohoo addan iyeelin akaroorina. 5Iꞌdaasenyi eti atin karoortaan a atin tusa. Ki inkoo us sar yigis antohi us meessi ꞌdabi armaanjireen kalugꞌdo khabo karoora. Aa a atin iadeehe, taba usu karoora. 6Chimbir chan chilimmetoo rucchul ma lagato? Iꞌdaasenyi chimbirtoo kaldaye Waakh kadabo laka ma jirto. 7Rumanka, tinti matah kaajirto tuumman laka Waakh geeddi iche tahe a garta. Roorro akhabina, atin Waakh ortiis ka chimbirohi ittaawe a kussantihiinee.

Yeesso akuuryaawina

(Mattaayo 10:32-33, 12:32, 10:19-20)

8“Wihi an atin iadeeh, eti tuummane ꞌdooꞌd ortiis ka saggi us keey iyahe cheeko, Ínam Aadam laka herti Waakh ortiche ka, saggi us kiis iyahe a cheeka. 9Iꞌdaasenyi eti ꞌdooꞌd ortiis ka saggi us keey iyahe ꞌdiiꞌdo, herti Waakh ortiche ka a laꞌdiiꞌda. 10Eti tuummane Ínam Aadam igafe a geeddi uskeeliis liikakuto. Iꞌdaasenyi eti Rubeyti Munyee igafe, uskeelaas ma liikakuto.

11“Chirri minassi weysiite Yaꞌhuud ommos weynaan ichoow ꞌdooꞌdi anto leh ortiis atin lakeeno ꞌdee atin lahukkumo, saggi atin isikaayyeeddaan ommos wihi atin sootadeehiin akawaꞌdwaaꞌdina. 12A mehe Rubeyti Munyee chirraas wihi atin tadeehiin a atin abissa.”

Yeesso mammahti eti kamurenye toro ꞌdalame cheeka

13Etoo urur goyaka wihi us Yeesso iyidah, “Eti ween, walaaleey leeyeede dahal ileegisam idah.” 14Yeesso wihi us ilaabe, “Eta, ayyo ani eti ꞌdooꞌd hukkumo ommos hili dahal atin lagiso isiiche?” 15Yeesso la wihi us icho iyidah, “Yuubsada! ꞌDamaanki atin wihi atin ikhabin ꞌdoontaan ka isyaakhicha. Iꞌdi tahe jiroti mujjume hoolahi at khabto mee katamiit.”

16Yeesso la toro mammahta ꞌdooꞌd icheeke, “Gosi etoo kamure gurnaanki buurenye bahche. 17Eta gos leh masse wihi us uuriis goyaka yidah, ‘Mehe yeelo? Inti an gurnaankeey kachibo ma khabo.’

18“ꞌDeerka wihi us yidah, ‘Iꞌdane yeela. Koondinyetaaya jejjebcha ꞌdee ti burbuure disa. Intaas gololeey tuumman ichoow meeheey ba kachiba. 19Ani la wihi an isiadeeh, “Wihi buurenye toro haaggane at guꞌhassi buure meel isigelisse a khabta. Sina at khabto mele, samacchaar on golosso, hamaad.” ’

20“Iꞌdaasenyi Waakh wihi us etaas iyidah, ‘ꞌDalamoow! Ibeenka goya rubeytaah a lakakhaata. Ayyo ꞌdeerka waha at isitannabisse ꞌhela?’

21“Waha a wihi eti tuummane wihi harrata ka kamurenye, iꞌdaasenyi wihi Waakh ꞌdoono ka miskiine iyateeh.”

Waakh kakhuuf

(Mattaayo 6:25-34)

22Yeesso ꞌdeerka wihi us abattitiis iyidah, “Maantaka wihi an atin iadeeh, jirotiin akawaꞌdwaaꞌdina, wihi atin tamhiin, ommos sartiin ka wihi atin gessattaan. 23Jiro golol a kussantahe, sare la gaad a kussantahe. 24Bal khaalkhe yeya, ilmo icho gos kichibaan mele, koondi icho khabaane icho golol kachibaan la mele. Iꞌdaasenyi Waakh on goollicha. Atin la geeddoo meheenye weyti chimbiro kussantahiin. 25Etiinkoo maanta waꞌdwaaꞌdi us waꞌdwaaꞌdo ka jirotiis sahaꞌddoo kalday kakhayaayi? 26Chirri at waha rucchul laka iubaaꞌdan, a iꞌdoh wihi addane buure waꞌdwaaꞌd ikakhabta?

27“Bal fiikh saggi iche ibahto yeya. Hil icho haaggichaane icho gaad isikahaaggichaan mele. Iꞌdaasenyi karnati goorat Soolomon layadeeh laka kamurroonkiis tuumman khabaayi gaaddiis geeddi fiikhta ma haaggan. 28Chirri Waakh hoosi keley baho, toolla jiro saahta ꞌdab lakalugꞌdo gaado, geeddoo meheenye atin weyti atin gaada? Atin eenna geeddoo rucchul on Waakh kakhuuftaane! 29Kol dakkhan la wihi atin tamhiin ommos wihi atin dantaan akalooꞌdina. Wahanyeyyohaas akawaꞌdwaaꞌdina. 30Iꞌdi tahe ꞌdooꞌdi Waakh igaranne harratane wahanyeyyohaas kaallooꞌda. Aabbahiin saggi atin waha dakkhan iꞌdoontaan a garta. 31Iꞌdaasenyi dakhi Waakh ꞌdonꞌdoon, ulla wahanyeyyoha dakkhan a ikaasookhayaa.

Kamurroonki goobi Waakh

(Mattaayo 6:19-21)

32“Chaꞌatin iꞌdi woyhoo adi rucchul tahiin laka, roorro akhabina. Iꞌdi tahe wihi Aabbahiin gooche, us hamaad ka dakhiis a atin siicha. 33Wihi atin khabtaan ororicha, ꞌdee chilimme miskiin siicha. Urgohi chilimme jirtuu imassan isiyeela, kamurroonkiin goobi Waakh gessa, inti icho iꞌdaaru laka ikanuglaanne, liihatine, riirintoo rucchul laka ikaꞌdaarin gessa. 34A mehe inti kamurroonkaah kajiro, iche uuraah laka kajira.

Tannabda Kamuri soonokhti suga

(Mattaayo 24:45-51)

35“Taba tannabda, gaaddiin mujjum marda, taassiin la iiche jitine, ꞌdee Waakh ihila. 36Iꞌdi ilbooyyeti kamurichoki oroos kasoonokhti sugto ateeha. Icho la uus kamuricho sootolossati chirraas on afaf ifuraan. 37Chirri kamuricho ichohi iurꞌdine fiddiyo on sooeleele, hamaadi buurenye khabaan. Rume atin icheeka, eta kamure gaaddi ilbooyye gessata, ilbooyye komborti ballaaddane lakagolossati garabiche ka dikkille kareecha ulla yamiite icho goollicha. 38Ilbooyyeta hamaadoo geeddohenye khabta chirri kamuricho naanokho ommos baryo afiche laka yimiyye, us ichohi iurꞌdine fiddiyo on sooeleele! 39Iꞌdaasenyi waha abda, chirri ooyohi min leh sahaꞌddi eti minkiis hato kayamiit garti, minkiis ma ꞌdiicho ma lajebcho. 40Atin laka toorribda giꞌde iꞌdi tahe Ínam Aadam sahaꞌddi liikamurine yamiite.”

Ilbooyi lakakhuufo ichoow ki liikakhuufin

(Mattaayo 24:45-51)

41Beetero wihi us worsate, “Kamur, mammahta nah kalday on nah miinsantahe bal ꞌdooꞌd tuumman on?”

42Kamur wihi us ilaabe, “Kamalda bal, ilbooyi weene lakakhuufo toro kharee a ayyo? A ki kamuriis ilbooyyetiis dahantiis gesso ꞌdee sahaꞌddi mujjume ka ilbooyye goollicho. 43Ilbooyi liimaalo a ki maanti kamuriis soonokhti usuhi hiliis mujjum haaggicho sooeleelo. 44Rume atin icheeka, kamuriis wihi us khabo tuummane dahantiis gessa, iweynaacha. 45Iꞌdaasenyi eemba ilbooya uuriis ka ‘Kamureey geeddi deere khaata soonokhta,’ yidahye kahye, ilbooyyeti mejele ichoow ti deddeyyah jahye, toro la sukuuku bihiyye farso damye ichoowka meleefu yitah. 46Kamuri ilbooyaas, maanti us ikamurine soonokhta toro sahaꞌddi us igaranne soonokhta. Usu seleye goggoocha, toro ꞌdooꞌdi Waakh irummeysan goya gata.

47“Ilbooyi wihi kamuriis usuhi yeelo ꞌdoono garti toro la iyeelin, kolassi ittaawenye lajaha. 48Iꞌdaasenyi ilbooyi wihi kamuriis usuhi yeelo ꞌdoono igaranne khufe, kolassoo rucchule lajaha. Eti tuummane wihi buure lasiiche la, wihi buurenye lakasuga, eti wihi weyti buure dahan lagesse la wihi weyti buurenye lakasuga.

Yeesso a eti enenyet seley bahcho

(Mattaayo 10:34-36)

49“Ani a imiyye harra ꞌdab kabolkhicha. Incheenka la kootte ꞌdab a lakabolkhiche. 50Iꞌdaasenyi koloo sina liikawaaricha, amuut. Anna jeenteti wahaas u a bolkha ichoowka wahaas kutaan. 51Atin maanta kol ani harra nebey keene koogtahiin? Mele! Iꞌdaasenyi seleyhi an ꞌdooꞌd fido iimiy. 52Uuꞌ toolla kakhabatti, minki et chan khabo afafe iswaaya. Et seyyahe isigessa, lammati addan dihta, lamma la ti seyyahe dihta. 53Seleye lagowa, ooyo ínam ichiiyowa, inam la ooyo ichiiyowa, abare inám ichiiyowta, iname la abár ichiiyowta, abare inanti lasoodise ichiiyowta, inanti lasoodise la seyyohtiche ichiiyowta.”

Wihi an yeelo walah kaabda

(Mattaayo 16:2-3)

54Wihi us urur iyidah, “Chirra atin baali bahay kasookoro agarteen, chirraas on mehe tadeehiin ya, ‘Hir a sooꞌdeya.’ Iꞌdaas on la tateeh. 55Chirra hafar anki gurro kayamiit la mehe tadeehiin ya, ‘Il a sookululaata.’ Rumanka la iꞌdaas on tateeh. 56Iskaayyeessooy! Atin harra a yeytaane, serey yeytaane walah kaabattaan. A iꞌdoh wihi an yeelo iagartaane, toro wohoo rucchul laka ikaabanna?”

Yeesso wori isliineybo kaayyeeda

(Mattaayo 5:25-26)

57“A iꞌdoh goytiin ka wihi mujjume igoonna? 58Chirri etoo wohoo kaacheekti ulla kootiin kigeen ꞌdoono, geeddi atin jit raahtaan, weyti hol dowe isineyba. Chaꞌat iꞌdaas iyeelin, eta eti ꞌdooꞌd hukkumo kigeecha, ki ꞌdooꞌd hukkumo la dahanti iskareet kigessa, eti iskareet la jeela kigessa. 59Wihi an kiadeeh, jeelataas goya ma kasoobahto ichoowka mogtiis tuumman hiyyaayta.”

Currently Selected:

Luuka 12: rel

Highlight

Copy