Luuka 13
13
Uskeel ꞌdiicha ommos a tuuntaan
1Geeddaakka la ꞌdooꞌdoo intaas kijire saggi Bilaato ꞌhor amuri ꞌdooꞌdoo boroofenhi Gaalilaaya ichohi Waakh soorriyo ibahcho lakayagiis ibahche Yeesso icheeke. 2Yeesso wihi us ilaabe, “Atin ka maanta, ꞌdooꞌda Gaalilaaya jeenteti icho bolokkhi iꞌdee liitusuu kol us ꞌdooꞌdi Gaalilaaya tuumman ka ꞌdooꞌdi weyti uskeel leh yahe koogtahiin? 3Iꞌdaas mee. Iꞌdaasenyi atin laka chirri atin uskeeliin ikasoonokhan, atin tuumman laka a tuuntaan. 4Ommos ꞌdooꞌdi tomon ichoow siyyeetenye maanti koondihi deere dagaheet Silowaam kasooreye tuume, kol icho weyti ꞌdooꞌdi Yeerusaleem yaal tuumman goyaka uskeeli buure yeele koogtahiin? 5Mele! Wihi an atin icheeko, atin laka chirri atin uskeeliin ikasoonokhan, atin tuumman laka a tuuntaan.”
Yeesso ꞌdooꞌdi Issiraayele gurnaan delo tootoocha
6Yeesso ꞌdeerka mammahta ꞌdooꞌd ibahche, “Etoo goorat geeyi fiige gosiis goya katoolliche. Ulla irte geeyaas yeyyeye, gurnaan kayowte. Iꞌdaasenyi, gurnaan us geey kaꞌhele mele. 7Ulla ꞌdeerka ilbooyi gos khuto wihi us iyidah, ‘Guꞌh seyyah dakkhan an geeya fiig gurnaan on kayowda, ulla gurnaan us delo mele. Gooy uus immarah harra katoolline.’ ”
8Et wihi us ilaabe, “ ‘Eti ween, ꞌdii toro guꞌha laka a fiddiyo, amba ꞌdollohiis khuta, laag laka kachiba ꞌdee bal a agarro. 9Chirri us berri gurnaan dele, a haaggantahe. Chirri us idelin la goocha.’ ”
Yeesso Seeri Lanaso makhaabassoo samaacha
10Yeesso maantoo Seeri Lanaso ka minkoo weysiite Yaꞌhuude ꞌdooꞌd wori Waakh kaabcha. 11Makhaabassoo ginna guꞌh tomon ichoow siyyeet luhlo tirte la minkaas goya kajirta. Iche la goorat a khonnokhte, fit ma sohatti. 12Chirri Yeesso iche arge ka, iche enenyet ortiis iwahe toro wihi us iyidah, “Makhaabassa, sugeeraah a lakaabahche!” 13Ulla dahantiis makhaabassaas korche, iche la chirraas on fit tolossatte, Waakh koolisse.
14Jeenteti Yeesso makhaabassa Seeri Lanaso isamaachuu, eti minki weysiite Yaꞌhuud itoollo weyti hollowe. Ulla wihi us ꞌdooꞌd iyidah, “Ibeen lih enenyet hiliis haagsati a jirta. Eti khannan ꞌdeerka ibeenneta lihe goyaka a yimaate a lasamaacho, Seeri Lanaso mee.”
15Kamur wihi us ilaabe, “Iskaayyeessooy! Etiimba Seeri Lanaso ka heeriis ommos eheliis inti lakahide ka ma furo ma yegcho? 16ꞌDeerka makhaabassa rumanka hiiy Aburaahamenye Seytaan guꞌh tomon ichoow siyyeet tuumman hide, Seeri Lanaso wihi hide ma lakafuro?”
17Chirri us iꞌdaas yidah ka ꞌdooꞌdi kootte Yeesso tirrimo lakhaanyo khaatatte, iꞌdaasenyi ꞌdooꞌdi addan haaggi noole us yeelo kahamaade.
Saggi dakhi Waakh iballaasti
(Mattaayo 13:31-33, Marko 4:30-32)
18Yeesso toro wihi us ꞌdooꞌd worsate, “Kamalda bal, dakhi Waakh a koo mehe? Mehe iokkanaacho maanta? 19A iꞌdi ilinti weyti rucchule etoo khaate gosiis goyaka il gesse. Ilime bahte geey titahye, chimbirohi saraat la liikhimohiis kafiddiyaan.”
20Toro wihi us worsate, “Dakhi Waakh mehe iokkanaacho? 21Dakhi Waakh a iꞌdi makhaabassi booddati makaate fuurisso wohoor khaatte, ingangaanoti buure kakhayte ichoowka ingangaano tuumman fuurte.”
Afafhi juukhenye goobi Waakh lakagelo
(Mattaayo 7:13-14, 21-23)
22Yeesso orey isohte anki ilkerengeetti weene Yeerusaleem tabe. Geedda us sohti la ilkerengeet ichoow goobab dah kagooche, ꞌdooꞌd wori Waakh abche. 23Etoo la wihi us Yeesso worsate, “Kamur ꞌdooꞌdi uskeel lakaribo a koo rucchul on a?”
Yeesso la wihi us ilaabe, 24“Hol dowe afafhi juukhe kagel. Iꞌdi tahe wihi an atin iadeeh, ꞌdooꞌdi buure afafhaase kagelin ꞌdoona, iꞌdaasenyi ma yabuuꞌdiin. 25Chirri eti min leh sookahe afaf hide, min khariissa tolossattaane, afaf jahtaane, eti min leh hawwaassattaane, ‘Eti weenoow, afaf nah ifur,’ idowtaan.
“Iꞌdaasenyi wihi us atin isoolaabo, ‘An ma atin gardi, ommos inti atin katimaateen ma gardi.’
26“Atin la wihi atin tadeehiin, ‘Nah goorat a kileegolossanne, at la ilkerengeetoheenyo ka ꞌdooꞌd wori Waakh abisse.’
27“Iꞌdaasenyi wihi us ilaabo, ‘An ma atin gardi, ommos inti atin katimaateen ma gardi. Nyaama ikataba atinhi tuummane uskeel yeessaan!’ 28Atin la maanti atin Aburaaham ichoow Isakh ichoow Yaakoobo ichoow ꞌdooꞌdi goorat Waákh íyeyyeedo goobi Waakh ka agartaane, iꞌdaasenyi atin atin lariho, a ooytaane bolokh ka ilko iskarobtaan. 29ꞌDooꞌd beri ichoow bahay ichoow miig ichoow gurro kayamiite, meelassicho khaattaane, dakhi Waakh ka sukuuku isleegelaan. 30Rumanka ꞌdooꞌdoo ꞌduboote ki oraat yateehe, koo oraat la ki ꞌduboot yateeh.”
Yeesso yeeddagiwwaayyoti Yeerusaleem kooya
(Mattaayo 23:37-39)
31Chirraas on Farissaayotoo timiyye wihi iche Yeesso itidah, “Karnati ꞌHerood Antiiba layadeeh usuhi kiyagiise ꞌdoona, inta katab.”
32Yeesso wihi us ilaabe, “Nyaama ꞌdowwohotaas wihi atin itadeehiin, ‘Ani maalinka ichoow saahta ba ꞌdooꞌd ginnayyo kabahcha, ꞌdooꞌd samaacha, ibeenki seyyahnaatteet ka la hili goorat an iimiy massicha.’ 33Iꞌdaasenyi maalinka ichoow saahta ichoow saahti yomboot ba a sohda on. Rumanka la et Waákh íyeyyeedo ilkerengeetti weene Yeerusaleem khariis kayamuut mele.
34“Yeerusaleemoow, ilkerengeetti weenoow, atin ꞌdooꞌdi Waákh íyeyyeedo a tagiisiine, ꞌdooꞌdi Waakh atin isooerge la dagah kachibtaan. Saggi orran lukki weylassiis barbarre goya igessatuu, an geeddi buurenye anihi dahanoheey atin koogoogo ꞌdoone, iꞌdaasenyi atin ma ꞌdoonin! 35Yeya, Waakh rubeytiis minki Waakhe buurenye kiine a kaguure minki marah kalday atin ikatabe. Wihi an atin icheeko, yombuu toro ma iagartaane ichoowka, ‘Waakh ki magahi Kamur kayamiit a imaale,’ tadeehiin.”#13:35 Sabuur 118:26.
Currently Selected:
Luuka 13: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
