Luuka 16
16
Mammahti ilbooyi weene liikakhuufin
1Yeesso abattitiis imammahte wihi us iyidah, “Etoo kamurenye saggi ilbooyiiski ween hoolahiis ikagirꞌdaamo liicheeke a jira. 2Ulla ꞌdeerka ilbooyaas wahe wihi us worsate, ‘Waha an daddaago lakaacheekti a mehe? Saggi orran at hoolaheey idakhatti khadaaboo ka isoochiire isii. Iꞌdi tahe at kola ilbooyeeyki ween mee.’
3“Ilbooyi ween la wihi us uuriis goyaka yidah, ‘Kamureey kola hili an kijiro a ikabahcha. Mehe yeelo? Ani la miigti gosas lakakhuto ma khabo, daah la a kuuryaawa. 4Wihi an yeelo ꞌdee chirri hil liikabahche laka an aalassi ittaawenye igargaaro khabo a garda.’
5“Ulla ꞌdeerka kahe, ꞌdooꞌdi mogti kamuriis khabo tuumman wahe. Eti oraat wihi us worsate, ‘At kamureey mogti at kakhabto a geeddoh?’
6“Wihi us ilaabe, ‘A gaꞌdaar kudoo subakki geeyi oolif.’
“Ilbooyi ween la wihi us iyidah, ‘Dowwa orrommo buuggaahki mogeet ka tomon chan on chiire ꞌdee geeddaas on soogut.’
7“Ki lammaatteet toro worsate wihi us worsate, ‘At la mogti at khabto a geeddoh?’
“Et la wihi us ilaabe, ‘A ugar kudoo ꞌdargaayye.’
“Wihi us iyidah, ‘Buuggaahki mogeet ka tomon siyyeet on kayeel.’
8“Eta kamure ilbooyiiska weene khollokkhan jeenteti ekkeysihiis u kooliche. A mehe ꞌdooꞌdi harrata wihi icho isiyeelaan ka, ꞌdooꞌdi banayhi Waakh kijiro khara ka a kussanyahiin. 9Wihi an atin isoocheeko, hoolahiinki harrata aalal kabahsada ꞌdee maanti kamurroonkiin massate ka goobi Waakhe jirtuu imassan ka a atin lamartiisti.
10“Eti tuummane wihi rucchul ka lakakhuufo, wihi buure ka laka a lakakhuufa, eti tuummane wihi rucchul ka liikakhuufin la, wihi buure ka laka ma lakakhuufo. 11Chirri ꞌdeerka goorat kamurroonki harrata ka atin liikaakhuufin, ayyo kamurroonki rummaat ka atin kakhuufa? 12Chirri goorat hoolahi etoo ka atin liikakhuufin la, ayyo hoolahi wihiine atin siicha?
13“Falfa kamur lamma ifasso mele. Koo a ꞌdiiꞌdda ki addan la ꞌdoonta, ommos koo inkaanyitta ki addan la ꞌdarraawta. Waakh ichoow chilimme ba koloo kalday ma ifasso.”
Yeesso ꞌdooꞌdi Farissaayo leeyyeeda
(Mattaayo 11:12-13, 5:31-32, Marko 10:11-12)
14Farissaayo chiꞌiche ayta daagte ka tekkele ka Yeesso kareyatte. A mehe icho a ꞌdooꞌdi weyti chilimme ꞌdoono. 15Yeesso la wihi us icho iyidah, “Atin ꞌdooꞌd ortiis ka a ismujjummoossaane, iꞌdaasenyi Waakh uuriin a garta. Wihi weeli enenyet ortiis ka weyti khumman, Waakh weyti ꞌdiiꞌddanyahe.
16“Chiirnaanneti Amurre ichoow ti ꞌdooꞌdi Waákh íyeyyeedo tuumman ꞌdooꞌd a liicheeke ichoowka Yoohanahi Enenyet Baattissiyo yimiy. Uus maantaas, Wori Haaggane dakhi Waakh miinsan enenyet a liicheeka. Ebba la usuhi miigtiis ka dakhaas gelo marma. 17Chirri sereyta daayan ichoow harra massataan laka, aytoo kaldaye amurre Muusa goya kajirto labahcho ma jirto.
18“Eti tuummane makhaabassiis tuum rihe makhaabassoo addan diste, uskeeli us makhaabassi tiis ieheynan leeurꞌdo iche gele, toro la makhaabali makhaabassi tuum larihe diste, ullaka uskeeli us makhaabassi tiis ieheynan leeurꞌdo iche gele.
Eti kamure ichoow Laassaro
19“Etoo kamurenye gaaddi weyti gato miige khabo toro la kol dakkhan gololi haaggan yahame jire. 20Arittiis la etoo miskiinenye Laassaro layadeehe jiissoo suuje sar tuumman kasoobahte lakeene, 21ulla weyti gololi eta kamure kombortiisti ballaaddan kasoodihe yaham imoone. Kararre laka a tamiite jiissiis laajja.
22“Saahka eti miskiine yumuyye, herti Waakh la khaatte inti ꞌdooꞌdi fiffissane tuume lagesso ka, Aburaaham garabiis orrommisse. Eti kamure laka yumuyye lahawwaale. 23Ulla meessi ꞌdooꞌdi tuume kijiro goya kijire, bolokkhi uskul latuse. Chirraakka serey yeye fogaka Aburaahamhi Laassaro garabiis fiddiyo arge. 24ꞌDeerka kariire wihi us yidah, ‘Aabba Aburaaham, uur isoonugleyso. Laassaro ergo farriiskoo bicche a kalugꞌdo a sookhaato harrab a ikhoboocho. Iꞌdi tahe ꞌdaba goyaka bolokkhi uskule khaba.’
25“Iꞌdaasenyi Aburaaham wihi us ilaabe, ‘Inankaaaw saggi goorat at jirotaah ka wahaahki haaggan iꞌhesse Laassaro la wihi sussuuje iꞌhele kasooꞌhel. Iꞌdaasenyi us toolla inta ka uure lakhoboocha, ati la bolokkhi uskule khabta. 26Wihi addan la Waakh ankharoo buurenye dahteen gesse, ꞌdee et inta kabaho atin iyamiit mele, toro la et intaas kasoomaaho nah iyamiit mele.’
27“Wihi us ilaabe, ‘Aabbahaaw Aburaaham an ꞌdeerka a kihawwaasdee, Laassaro goob aabbaheey iergo. 28A mehe an walaal chane khaba. Icho a tootoocho uus ꞌdee icho laka maanti icho tuumeen inta bolokkhi uskul ꞌdooꞌd kayaham imaatane.’
29“Aburaaham wihi us ilaabe, ‘ꞌDooꞌdiin, a geeddi us amurre Muusa ichoow wihi ꞌdooꞌdi Waákh íyeyyeedo chiire soomo, icho la wihi liidowo on a daageen.’
30“Eti kamure la wihi us yidah, ‘Aabba Aburaaham geeddaas kalday ma yaakhto! Iꞌdaasenyi chirri etoo omoot kasookahe icho iirte uskeelicho a kasoonokhtaan.’
31“Aburaaham la wihi us ilaabe, ‘Chirri icho amurre Muusa ichoow wihi ꞌdooꞌdi Waákh íyeyyeedo chiire daagiwwaayeen, chirri etoo omoot kasookahe laka uskeelicho ma ꞌdiichaan.’ ”
Currently Selected:
Luuka 16: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
