Luuka 17
17
Wihi uskeel kaalugꞌdo
(Mattaayo 18:6-7, 21-22, Marko 9:42)
1Yeesso wihi us abattitiis iyidah, “Wahanyeyyohi enenyet uskeel kalugꞌdo a yamiitiine, iꞌdaasenyi eti icho leeyamiitiin sinati sugto eenna a buure! 2Wihi deefo a usuhi daddaabti buurenye gurnaan lakatumo lukhum lakahido beyti buure goya lakalugꞌdo usuhi ꞌdooꞌdaar tarraantarricho ka. 3Taba giꞌde isyaakhicha!
“Chirri walaalaah uskeeloo kajiro, leejaakh. Chirri us uskeel kasoonokhte la ikakut. 4Chirri us orrahtoo goyaka laka kol teeba uskeel kiyeele, kolal teebaccho ba la uskeelaas kisoocheekte, ‘Uskeeleey a kasoonokhda, iileeraahin,’ kiyidah, uskeelaas ikakut.”
Miigti Waakh lakakhuufo
5Maantoo ergaano wihi iche Kamur itidah, “Kamur, nah gargaare ꞌdee weyti Waakh a kakhuufno.”
6Wihi us ilaabe, “Chiꞌ kakhuufnaanki atin Waakh kakhuuftaan rucchuleel ka geeddi ilinti geeyi dahar yahe, a geeddi atin geeya inta katoollo, ‘Hiiyyay khabtaayi inta kabukkhe beyti buure goya kasoobah,’ itadeehiine, geey la wihi atin itidaaheen yeelo.”
Saggi ilbooyi haaggan ijiro
7“Ayyo goytiin ka ilbooy khaba, chirra ilbooy gos khunnaan kayimiyye ommos adi goya kayimiy, ‘Kaale orrommo golosso’ iyadeeh? 8Wihi us ilbooyaas iyadeeh, ‘Gololeeyki gelebeet kariche, gaaddi hil gesso, igoolli. Inkoo an golossade golosso.’ 9Ilbooyaas wihi us yeele ka kalaꞌd liilaabo mele, iꞌdi tahe us hiliissa on buuhiche. 10Iꞌdaasu atin laka chirra atin wihi yeela atin liidah yeesseen, wihi atin tadeehiin, ‘Nah a ilbooyyeti wihi iche yeesse ka kalaꞌd isugin. A mehe nah hilaanya on buuhinne.’ ”
Yeesso reeroo tomone samaacha
11Yeesso anki ilkerengeetti weene Yeerusaleem fool siiche, sohtaayi boroofenhi Saamariya ichoow boroofenhi Gaalilaaya dahcho eleele. 12Chuꞌus gooboo hagga eleele ka, reeroo tomonenye buꞌdatoo sar kasoobahte or kasoodowe. ꞌDooꞌda la foga tolossate, 13riire, “Yeesso! Eti ween! Uur nah isoonugleyso!” yidaaheen.
14Inkoo us icho arge ka, wihi us iyidah, “Nyaama kuhaaniyyo iirda istusa.” Sohtaani icho dakkhamba samaateen.
15Kichokoo chuꞌus saggi us isamaate arge ka, usuhi hooyi buure ka Waakh saaꞌdo soonokhte. 16Yeesso hagga ka jilbo il kaguꞌdde kalaꞌd ilaabe. Eta la ili Saamariya kayimiy.
17Yeesso wihi us worsate, “ꞌDooꞌdi kootte an samaache et tomon menya? Et saagaassi addan meete? 18Eta yeelan kalday on menye et addane soonokhte Waakh kooliche mele?” 19Yeesso la wihi us etaas iyidah, “Kah iro, kakhuufnaanki at ikakhuufte a kiribee.”
Saggi dakhi goobi Waakh iyamiit
(Mattaayo 24:23-28, 37-41)
20Maantoo Farissaayo maanti dakhi Waakh yamiite Yeesso worsatte. Yeesso wihi us ilaabe, “Emeetti dakhi Waakh ti indo lakaargo mee. 21Et keley argo, ‘Yeya kalla soosohta,’ ommos, ‘Kuulla soosohta’ yadeeh mele. Iꞌdi tahe dakhi Waakh goytiinna kajira.”
22Wihi us abattitiis iyidah, “Ibeen a yamiit ki atin Ínam Aadamhi soonokhti harra dakhti imoontaan argin ꞌdoontaan, iꞌdaasenyi argin ma tabuuꞌdiin. 23ꞌDooꞌd mehe atin iyadeeh ya, ‘Ínam Aadam kuulla,’ ommos ‘Ínam Aadam kalla.’ Icho akaallooꞌdina. 24Iꞌdi tahe Ínam Aadam maanti us soonokhti iꞌdi ankhadhi ankhado sereyta daayan guꞌddo ichoowka anki ꞌdiri ikabaho yateeh. 25Iꞌdaasenyi koloo Ínam Aadam sinati buurenye kawaarta, ꞌdooꞌdi weyꞌda la usu ꞌdiiꞌda.
26“Iꞌdi goorat ibeenne Noowa eheet, iche ibeenki Ínam Aadam yamiit laka yateeh. 27Maantaas la ꞌdooꞌd saggi orrankateet on sukuuku igele, minan laka laaddiste ichoowka Noowa koobanhi buure goya gele. Chirraas on ꞌduley ichohi addan tuumman baabiiche.
28“Harra toro iꞌdi maanti goorat Loot jire tateeh. ꞌDooꞌd saggi orrankateet on sukuuku igele, walah ororsata, walah gatta, gaasoo ilmo il kachiba, gaasoo laka minassicho dista. 29Iꞌdaasenyi maanti Loot ilkerengeetti Soodom kabahe Waakh serey ka ꞌdab ichoow dagahti bolokhto serey kakeene ꞌdooꞌd tuumman bakkiche.
30“Maanti Ínam Aadam enenyet liisoobabbakkaahicho laka iꞌda on tateeh. 31Maantaas et min sartiis fuulo, meehiis la min goya kijiro yego meehiis soobahsati mele. Saggaas on u, et gos goya kijiro nokhti wohoo sookhaatti mele. 32Bal wihi makhaabál Loot kayitah kasooꞌhela! 33Eti tuummane jirotiis khucchin ꞌdoono, jirotiisti rummaat a waaya, eti tuummane jirotiis waayo la jirotiisti rummaat a riba. 34Wihi an atin icheeko, ibeenkaas et lamma siriirtoo kalday iskaleeuꞌdurta, koo lakhaata, ki addan la lakataba. 35Deyyehotoo lammee la inchaba isleetunta, too lakhaata ti addan la lakataba.”#17:35 Chiirnaanneti Yeedi Waakhe uumacchee gaasoo chiirnaanka a kakhayte. 36 “Makhaaballetoo lammeenye gos iskaleejirto, koo lakhaata, koo la lakataba.”
37Abatti la wihi iche worsatte, “Kamur waha intoh kayateehiin?”
Wihi us ilaabe, “Inti wohoo kayumaateen, intaase raꞌd kawara.”
Currently Selected:
Luuka 17: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
