Luuka 23

Yeesso Bilaato liigeecha

(Mattaayo 27:1-2, 11-14, Marko 15:1-5, Yoohana 18:28-38)

1Jaldaabti Ween tuumman ꞌdeerka kahte Yeesso woyte Bilaato igeesse. 2Chirraas on usu cheekteene wihi icho yidaaheen, “Eta usuhi yaafteen baabiicho khabanne. Karnati ili Rooma kooddihi liiguto ꞌdiiꞌda, Ki Lasubhe karnatenye iskawaha.”

3Bilaato la wihi us Yeesso worsate, “Karnati Yaꞌhuud a ati?”

Yeesso wihi us ilaabe, “A rum, a iꞌdaas at elatti on.”

4Bilaato la wihi us kuhaaniyyohi wewween ichoow urur ba iyidah, “An eta walah lakacheekti an argo mele.”

5Iꞌdaasenyi weyti tirriinsateene wihi icho yidaaheen, “Ili Yaꞌhuudiya tuumman ka ꞌdooꞌde walah abcha, ichoowka enenyet seley fida. Wihi us ꞌdooꞌd abcho la boroofenhi Gaalilaaya kasookhabte ichoowka toolla inta yimiy.”

Bilaato Yeesso karnati ꞌHerood layadeeh ierga

6Chirri Bilaato waha daage ka usu eta ꞌdooꞌdi Gaalilaaya yahe worsate. 7Chirri us saggi Yeesso ili ꞌHerood itoollo ikayimiy kase ka, Yeesso ꞌHerood ierge. ꞌHerood rubeytiis la geedda ka ilkerengeetti weene Yeerusaleeme kajira.

8ꞌHerood la chirri us Yeesso arge ka hamaade, iꞌdi tahe geeddi deere yeed Yeesso daage, ulla geeddi deere usuhi Yeesso argo ꞌdoone. Ulla Yeessohi wihi weeli enenyet yeelin iubaaꞌdan yeelo khajjeela. 9Ulla Yeesso wihi buure worsate, iꞌdaasenyi Yeesso walah us ilaabe mele. 10Kuhaaniyyohi wewween ichoow tagaammeti amurre intaase toollaane, weyti riireene Yeesso cheekteen. 11ꞌHerood ichoow iskartiis ba Yeesso lakhaanyo kadoweene kachaarteen. Darfohi karnat gesseene, khaateene Bilaato ilaabeen. 12Maalinkaas goya, ꞌHerood ichoow Bilaato ba aal yitaaheen, goorat ꞌhor la a isichiiy.

Yeesso omoot liigoocha

(Mattaayo 27:15-26, Marko 15:6-15, Yoohana 18:39-19:16)

13Bilaato kuhaaniyyohi wewween ichoow ꞌdooꞌdi wewween ichoow ꞌdooꞌdi addan ba isiwahe, 14wihi us iyidah, “Atin eta ani ikeenteene, ꞌdooꞌde baabiicha sirgaal ꞌdiiꞌda idowa tidaaheen. Ani la ortiin ka wihi nool worsade wohoo kaldaye atin kacheekatteen la an ma kaargin. 15ꞌHerood laka walah suujenye eta yeele us arge mele, jeentetaase toro inno ikasoolaabe. Eta walah us yeele omoot liigoocho mele. 16Maantaka laajja on ka a ladoocho ꞌdee a laꞌdiicho a irti.” #23:16 Chiirnaanneti Yeedi Waakhe uumacchee gaasoo chiirnaanka a kakhayte. 17 “Orran la maanti daawti Baasakka tuumman, Bilaato etoo hidane ꞌdooꞌdi Yeerusaleem isoofura.”

18Urur dakkhamba hooyoo kalday ka riire, “Eta agiise, Barraba nah isoofur!” 19Barraba la goorat wihi jeela lakagesse, ilkerengeetti weene Yeerusaleem ka, ꞌdooꞌdoo sirgaal ꞌdiiꞌdo goya kijire, toro la enenyet laka yigis.

20Bilaato usuhi Yeesso ꞌdiicho ꞌdoona, toro urur inokhte. 21Iꞌdaasenyi urur riire “Massalaaba kakaah! Massalaaba kakaah!” esse.

22Bilaato toro koli seyyahnaatteet icho leeyeede, “A iꞌdoh? Eta suujoonkoh yeele? An wihi eta yeele omoot liikagoocho ma argo. Maantaka a lajaha one ꞌdee laꞌdiicha.”

23Iꞌdaasenyi weyti riireene katirriinsateene, usu massalaaba a lakakaaho, ichoowka Bilaato jeenteti riirit u ꞌdooꞌd agaafte. 24Bilaato ꞌdeerka wihi icho daaheen siin gooche. 25Eti icho daahenee goorat sirgaal ꞌdiiꞌdo toro la enenyet yigisye jeela kijire soofure. Yeesso la dahanticho gesse ꞌdee wihi icho ꞌdoonaan a yeeleen.

Yeesso massalaaba lakakaaha

(Mattaayo 27:32-44, Marko 15:21-32, Yoohana 19:17-27)

26Chirra icho woyaan ka, etoo ilkerengeetti Kureene Siimon layadeehe gosiis kayimiy khabteene, massalaaba korcheene ihosseene ulla Yeesso ꞌdubiis leeraahe. 27Ururi buure la Yeesso ꞌdubiis leeyimiy. Urur goyaka la deyyehotoo jeente Yeessuu ooyto uuwwisso a jirta. 28Yeesso la wihi us deyyehota iyidah, “Deyyehoti ilkerengeetti weene Yeerusaleem, ani iooyina, atin on isooya, toro la nyaakhutiin ooya. 29Iꞌdi tahe ibeen a yamiit ki ‘Deyyehoti Waakh imaale, a ti mahanenye injire ideline, weel inuugsan,’ layadeeh. 30ꞌDeerka,

“ ‘Halal mehe iyadeehiin ya, “Nah kasooreya!”

Kuro la mehe iyadeehiin ya, “Nah dagcha!” ’#23:30 ꞌHoseeya 10:8.

31A mehe chirri ꞌdooꞌd anihi fissan sinati geeddee ituso, ꞌdooꞌdi suujoon yeele sinati weyti buurenye kawaarichaan.”

32Reeroo addane lammeenye chiftee laka usu a laleekhaate, ꞌdee layagiis. 33Chirri icho meessi Lafohi Matahe Enenyet layadeeh sooeleeleen ka, Yeesso intaas ka massalaaba kakaaheen. Chiftati lammee laka leekaahte. Koo ankiiski miigeet kakaaheene, ki addan la ankiiski gurro kakaaheen. 34Yeesso wihi us yidah, “Aabba, ꞌdooꞌda uskeelicho ikakut! Iꞌdi tahe wihi icho haaggichaan ma gartaanee.” Kura guꞌddateene gaaddiis gisante.

35Urur a toolla ꞌdeyꞌdoocha, ewweenki Yaꞌhuud la Yeesso kachaarta. Wihi icho yidaaheen, “ꞌDooꞌdi addan a ribe, chirri us rumanka Ki Lasubhe Koo Waakhenye Ki Lasoobahsate yahe, bal a isribo!”

36Iskare laka timiyye usu kachaaratte, farsoti sabiibe birrakhe siisse. 37Wihi icho iyidaaheen, “Chirri at karnati Yaꞌhuud tahe isrib.”

38Matakkiis sartiis la wihi lakachiire a mehe ya, Waha a Karnati Yaꞌhuud.

39Chiftataas Yeesso laleekaahe koo Yeesso leeabaarrame wihi us iyidah, “At a Ki Lasubhe gone, isribe nah laka nah rib!”

40Iꞌdaasenyi ki addan leejaakhe wihi us iyidah, “At Waakh ma karoorto? At laka iꞌdiis u omoote lakigooche. 41Lammateen jeenteti uskeeli inno yeelle on inno liiyagiis, iꞌdaasenyi us walah suujenye us yeele mele.”

42ꞌDeerka wihi us yidah, “Yeesso maanti at karnati dakhaah titah ikasooꞌhel.”

43Yeesso wihi us ilaabe, “Rume kicheeka, at maalinka goobi Waakh ka a ileejirta.”

Yeesso rubey goocha

(Mattaayo 27:45-56, Marko 15:33-41, Yoohana 19:28-30)

44Geedda ka il a geeddi sahaꞌd lihti maalimeet, il tuumman la mugꞌdi yitahye, ichoowka sahaꞌd saagaale eleesse, 45a mehe orrahe banay soobihin a ꞌdiisse. Dafarti weyti yobbeenye minki Waakhe buure seley goosso meel lamma seley igoote. 46Yeesso la hooyi buure ka riire, wihi us yidah, “Aabba, rubeyteey dahantaahha soogessa!” Chuꞌus yeeda massiche ka massate.

47Chirri eti koobbintoo iskareet itoollo wihi yitah arge ka, Waakh saaꞌde wihi us yidah, “Rumanka eta eti fissane eheet!” 48Chirri ꞌdooꞌdi tuummane kootte sookulme wihi yitah ꞌdeyꞌdooche wihi yitah arge ka, bolokh ka kacchach isguꞌddeene irteen. 49Iꞌdaasenyi ꞌdooꞌdi usu garti tuumman deyyehoti goorat boroofenhi Gaalilaaya kasooraahte khabaani foga tolossateene wahanyeyyoha ꞌdeyꞌdoocheen.

Yeesso lahawwaala

(Mattaayo 27:57-61, Marko 15:42-47, Yoohana 19:38-42)

50Etoo Yuussuf layadeehe ilkerengeetti Arimaꞌdaaya ili Yaꞌhuudiya kajirto yaal la a jira. Ulla a etoo haaggane toro fissane toro dakhi Waakhe suga. 51Ulla a etoo Jaldaabti Weene Yaꞌhuud goya kijiro, iꞌdaasenyi wihi icho goocheen ichoow wihi icho yeeleen ma leegoon. 52Ulla Bilaato iirte sar Yeesso daahe. 53ꞌDeerka massalaaba kasooyagche, dafartoo kaayyuube goꞌddoo daddaab ka lakhute, injire enenyet liikahawwaalin goya kareeche. 54Waha la a Ibeenki Latannabti, Seeri Lanaso la a soodeylanta.

55Deyyehoti Yeesso ilkerengeetti Gaalilaaya ka sooraahte la Yuussuf raahte goꞌddi Yeesso lakahawwaale ichoow saggi sartiis goꞌddaas ka liireeche argeen. 56ꞌDeerka goob inokhteene miricchi ichoow geeyohi uyuuggee tuumman tannabicheen. Waha la a wihi icho sar Yeesso kadowaan. Iꞌdaasenyi Seeri Lanaso ka naseen iꞌdi amur iꞌdoonuu.

Currently Selected:

Luuka 23: rel

Highlight

Copy