Juan 4
4
Tej tyolin Jesús tuk'il jun xu'j aj Samaria
1Pon tqanil kyuk'il fariseo qa mas in che chmet t-xnaq'tzb'en Jesús twitz te Juan ex mas nim xjal in che b'yan tu'n tuj a'; 2maske mya tu'n Jesús o che b'yan xjal; kyu'n t-xnaq'tzb'en in che b'yan xjal. 3Tejtzun tb'inte Jesús jlu, etz tuj tx'otx' Judea, xi' juntl maj tuj Galilea.
4Aju b'e jatum xi' Jesús, atzun nnik' tuj tx'otx' Samaria. 5Pontzun Jesús tuj jun tnam Sicar tb'i, at tuj tx'otx' Samaria, niqayin ttxlaj tetzb'il Jacob, aju xi tq'o'n te José aju tky'ajal. 6Ex attoq jun xoch kyaj tb'incha'n Jacob; ex tu'nju otoq sikt Jesús tu'n b'etin, kub' qe' ttzi xoch; b'alo te chilkuq'ij. 7Ultzun jun xu'j aj Samaria q'il a', ex xi tma'n Jesús te:
—Q'ontza ch'in nk'a'ye a'.
8Atzun qe t-xnaq'tzb'en otoq che'x laq'ol wab'j tuj tnam. 9Tzajtzun tma'n ju xu'j aj Samaria te Jesús:
—¿Tiqu'n in tzaj tqanina tk'a'ya a' weye, aya xjal judiy, atzun weye aj Samaria qine? Chi xu'j.
(Porke qe xjal judiy mya b'a'n kyten kyuk'il aj Samaria.)
10Xi ttzaq'we'n Jesús:
—Noqwit ma tz'el tnik'a ti'j ju toyaj Dios ex noqwit ma tz'el tnik'a wi'je tej xi nqanine nk'a'ye a' teya, mawtlo tzaj tqanina tk'a'ya weye ex mawtlo txi nq'o'ne jun a' itz' teya.
11Atzunte xu'j tma:
—Tat, minti' pulb'il te q'i'n tu'na tu'n tjatz ti'na a', ex ma' te jul t-xe'. ¿Jatumtzun ta' ju a' itz' tu'na? 12¿Maspetzun ma' toklena twitz qxe'chel Jacob, aju kyaj q'onte ju xoch lu qe, jatum o k'an te, ex qe tk'wa'l ex qe talun? Chi xu'j.
13Xi ttzaq'we'n Jesús:
—Kykyaqil qeju in che k'an ti'j a' lu, ktzajel juntl maj txqetle'n kyi'j; 14ex alkyeju ma txi k'ante ju a' kxel nq'o'ne te, mlay tzaj juntl maj txqetle'n ti'j. Porke aju a' kxel nq'o'ne te, kpulwil tuj tanmi ik tza'n jun twi' a' tu'n tten tchwinqlal te jumajx, chi Jesús.
15Tzajtzun tma'n ju xu'j te Jesús:
—Tat, q'ontza ju a' lu weye, tu'ntzun mi'n ttzaj txqetle'n wi'je, ex tu'n mi'n ntzaje q'ilte a' max tzalu.
16Xi tma'n Jesús te:
—Txi'ya, ex txkontza tchmila, ex tzaja tzalu.
17Tzaj ttzaq'we'n ju xu'j:
—Minti'we nchmil.
Xitzun tma'n Jesús te:
—B'a'n ma tmaya: Minti'we nchmil, chitzuna. 18Ex jwe'xi tchmila ten, ex aju at tuk'ila ja'lo mya tchmila. Ax tok aju ma tmaya.
19Tmatzun ju xu'j te:
—Tat, tuj nnab'le aya t-sanjel Dios. 20Qeye qxe'chel e k'ulun te Dios twi' witz lu; atzun kyeye xjal judiy, in kyma'ne qa tuj Jerusalén ta' ju lugar jatum tu'n qk'ulun twitz Dios.
21Xitzun tma'n Jesús te:
—Okslama nyole, nan, tzul tq'ijlalil tu'n kyk'ulune twitz Dios Mamb'aj, mya twi' ju witz lu tu'n kyk'ulune, ex mya tuj Jerusalén. 22Aqeye aj Samaria in che k'ulune twitz ju minti' ojtzqi'n kyu'ne; atzun qeye in qo k'ulune twitz ju ojtzqi'n qu'ne; porke aju kolb'il atzun in tzaj kyxol xjal judiy. 23Tzul tq'ijlalil, ex lu ma tzul ja'lo, qeju in che k'ulun axix tok, ok che k'ulul twitz Dios Mamb'aj tuj kyanmi ex axix tok kyu'n; porke ate Dios Mamb'aj taj tu'n kyk'ulun xjal twitz ex axix tok kyu'n. 24Ate Dios Xewb'aj; ex qeju in che k'ulun twitz, ilxix ti'j tu'n tk'ulunjtz kyu'n tuj kyanmi ex axix tok kyu'n, chi Jesús xi tma'n te xu'j.
25Xitzun tma'n ju xu'j te Jesús:
—B'i'nwe wu'n, tzul ju Mesías, aju Crist tb'i, aju at toklen tu'n Dios; oktzun tul ktzajel tchik'b'a'n tkyaqil qe.
26Xi tma'n Jesús te:
—Aqine ju Crist in chin yolin tuk'ila.
27E ultzun qe t-xnaq'tzb'en, e lab'in ti'j tu'nju in yolintoq Jesús tuk'il jun xu'j; ex mi jun xi qaninte te: ¿Ti in xi tqanina? ex qa ¿alkye yol in yolina ti'j tuk'il ju xu'j? Chiwt. 28Atzunte xu'j kyaj tq'o'n t-ẍoq', xi' tuj tnam, ex xi tma'n kye xjal: 29Qo'qe wuk'ile ke'yilte jun xjal ma tzaj tma'n weye tkyaqilju o nb'inchaye. ¿Myapelo a Crist jlu aju at toklen tu'n Dios? Chi xu'j.
30Tu'n jlu e je'tz qe xjal tuj tnam e ul tuk'il Jesús. 31Atzun kye t-xnaq'tzb'en Jesús in che kub'san twitz:
—Xnaq'tzal, chux wa'na, che chi.
32Atzunte Jesús xi tma'n kye:
—At junwe nwa tu'n nwa'ne ti'j, aju minti' b'a'n kyu'ne.
33Kymatzun qe t-xnaq'tzb'en kyxolx:
—¿Atpelo jun xjal ma tzul q'inte twa?
34Ex xi tma'n Jesús kye:
—We nwa, atzunju tu'n nb'inchanteye aju tajb'il ju tzaj samante weye, ex tu'n tb'aj b'ant taq'un wu'ne. 35¿Myapetzun in kyma'ne qa atx kyaje xjaw taj tu'n tjaw awal? Ex kxel nma'ne kyeye: Kyke'yinxe awal ma tzqij tu'n tjaw. 36Aju in jaw chmonte awal, in tk'mo'n twi tk'u'j, ex in jaw tchmo'n twitz awal tu'n tpon tuj chwinqlal te jumajx, tu'ntzun kytzalaj junx aju chmol twitz awal tuk'il ju awalte. 37Porke ti'j jlu in q'manjtz ju tal twitz yol axix tok lu: Jun in ku'x awante, ex juntl in jaw chmonte, chi tal twitz yol. 38Aqine ẍinx samante kyeye tu'n tjaw kychmo'ne twitz awal, aju minti' e aq'nane ti'j; junxitl e aq'nan ti'j, ex atzun kyeye ma jaw kychmo'ne twitz kyawal, chi Jesús kye.
39Ex nimku aj Samaria te tnam Sicar e okslan ti'j Jesús tu'n tyol ju xu'j xi ttx'olb'a'n kye: Ma tma weye tkyaqilju o nb'inchaye, chi xu'j. 40Kyja'tzun tej kyul aj Samaria tuk'il Jesús, e kub'san twitz tu'n tkyaj ten kyuk'il. Ex axtzun kyaj ten Jesús kab' q'ij. 41Ex nimkutl xjal e okslan tu'nx tyol Jesús. 42Xitzun kyma'n teju xu'j:
—Mya noq o'kx tu'n tyola ma qokslaye, ex ax qeqo' ma qo b'inte tyol Jesús, ex b'a'n qe qu'n axix tok ate jlu Klol kye xjal, aju Crist aju at toklen tu'n Dios.
Tu'n Jesús b'anix tk'wa'l jun xjal at toklen ttxlaj rey
43Tb'ajlenxitzun kab' q'ij, etztzun Jesús tuj Samaria ex xi' tuj Galilea. 44Tu'nju axte Jesús o q'mante ju yol lu: Jun t-sanjel Dios minti' in nimanjtz tujx ttanmi. 45Tejtzun tpon Jesús tuj Galilea, b'a'n o k'monjtz kyu'n aj Galilea, tu'nju otoq kyil tkyaqilju otoq tb'incha Jesús tuj Jerusalén tuj ninq'ij, tu'nju ikx kye otoq che'x aj tuj ninq'ij.
46Xi'tzun juntl maj Jesús tuj tnam Caná tuj tx'otx' Galilea, jatum otoq tz'ok ju a' te vin tu'n. Ex attoq jun xjal at toklen ttxlaj rey, yab'toq tk'wa'l tuj tnam Capernaum. 47Tej tb'inte xjal lu qa otoq tzaj Jesús tuj Judea ex otoq tzul tuj Galilea, tzaj kanul ti'j ex o kub'san twitz tu'n t-xi' Jesús tuj Capernaum ex tu'n tb'anix ju tk'wa'l tu'n, porke ch'ixtoq tkyim k'wa'l. 48Xitzun tma'n Jesús te:
—Qa minti' ma kyile qe señ ex qe b'inchb'en nim kyipumal in che b'ant wu'ne mlay che okslane.
49Tzaj ttzaq'we'n ju xjal at toklen ttxlaj rey:
—Tat, txi' naja na'nxtoq tkyim nk'wa'le.
50Xitzun tma'n Jesús te:
—B'a'n taja tjaya, kb'antel tk'wa'la, chi Jesús.
Xi toksla'n xjal aju yol tzaj q'ma'n te tu'n Jesús, ex aj meltz'aj. 51Ch'ixtoq tpon xjal tuj Capernaum, e etz qe tmajen kanul ti'j, ex xi kyma'n te qa otoq b'anix ju tk'wa'l.
52Xitzun tqanin kye alkye or tej tb'anix k'wa'l. Atzun kye tzaj kytzaq'we'n:
—Txale' q'ij ew ik' kyaq ti'j, che chi.
53Ultzun tuj tnab'l mamb'aj qa atzun orju tej tmante Jesús te: Kb'antel tk'wa'la; okslantzun ju xjal ti'j Jesús kyuk'ix qeju ate' tuj tja.
54Atzun tkab'in señ jlu b'ant tu'n Jesús tej tul juntl maj tuj Galilea tej tetz tuj Judea.
Currently Selected:
Juan 4: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
