Lucas 5

Nim kyiẍ tzyet kyu'n Pedro tu'n tipumal Jesús

Mateo 4.18-22; Marcos 1.16-20

1At jun q'ij wa'ltoq Jesús ttzi laguna Genesaret tb'i, nim xjal ul kychmon kyib' tuk'il tu'n kyb'inte tyol Dios. 2Ex o til Jesús kab'e barc ate'toq niqayin ttzi laguna; atzun kye tzyul kyiẍ otoq che ku'tz tuj barc ex in che tx'jontoq kyxuyb' te tzuyb'il kyiẍ. 3Okxtzun Jesús tuj jun barc aju te Simón, ex kub'san twitz Simón tu'n tex tlaq'b'a'n ch'in barc ttzi tx'otx'. Jurat kub' qe' Jesús tuj barc ex oktzun ten q'ol xnaq'tzb'il kye xjal. 4Tejtzun tjapun b'aj tyol Jesús xi tma'n te Simón:

—Tokx laq'e'ya tuj laguna ex kyq'onkuxe kyxuyb'e tu'n tjatz kyiẍ.

5Xi ttzaq'we'n Simón:

—Xnaq'tzal, ma tz'ex aq'b'il qu'ne in qo aq'nane, ex minti' kyiẍ ma tzyet qu'ne; pero noq tu'nju ma tzaj tma'na, kb'elex nq'o'ne xyub', chi Pedro.

6Tejtzun tku'x kyq'o'n, tzyet nim kyiẍ kyu'n, ch'ixtoq tlaqj kyxuyb'. 7Xitzun kyyek'un kyq'ab' kye kyuk'il, aqeju ate'toq tuj juntl barc, tu'n kytzaj onil kye. E ultzun ex e b'aj noj kykab'il barc kyu'n kyiẍ, kyja'toq kyaj mulq'aj tjaq' a' tu'n kyalil kyiẍ. 8Tejtzun tlonte Simón Pedro jlu, kub' ẍmeje' twitz Jesús ex xi tma'n:

—Pa'mil tib'a wi'je Tat, porke aqine jun xinaq aj il.

9Tu'nju otoq tzaj nim t-xob'il Simón, tu'nju nim kyiẍ otoq tzyet kyu'n, ax ikx kykyaqil qeju ate'toq tuk'il tzaj kyxob'il. 10Ax ikx tzaj t-xob'il Jacobo tuk'ix Juan, aqeju tky'ajal Zebedeo, aqeju tuk'il Simón. Atzunte Jesús xi tma'n te Simón:

—Mi'n xob'a; texju ja'lo k'okela te tzyul xjal ik tza'n in che tzyet kyiẍ.

11Tej tetz kyi'n barc ttzi tx'otx', kyaj kyq'o'n tkyaqil, ex e ok lpe' ti'j Jesús.

Jun xjal nim tx'a'k ti'j b'anix tu'n Jesús

Mateo 8.1-4; Marcos 1.40-45

12Tej attoq Jesús tuj jun tnam, lu jun xinaq nim tx'a'k ti'j minti' q'anb'il ti'j, tej tlonte xjal Jesús kub' ẍmeje' twitz ex pon takl tib'aj twitz max twitz tx'otx' ex o kub'san twitz:

—Tat, qa tajb'ila jaku chin b'anixe tu'na, chi xjal.

13Xitzun tnuqpi'n Jesús tq'ab', ok tmako'n, ex xi tma'n:

—Wajb'ile. B'i'x kb'antela, chi Jesús.

Ex jurattzun el tx'a'k ti'j xjal. 14Ex xi tma'n Jesús te tu'n mi'n t-xi tma'n kye xjal. O'kx xi tma'n:

—Txi'ya ex yek'unx tib'a twitz pal kye judiy, ex q'onxa ju oyaj te tx'ajb'il teya ik tza'n o tma Moisés, tu'ntzun tel kynik' xjal ti'j qa ma b'anixa.

15Ex el laq'e' tqanil ti'j Jesús; ex nim xjal e chmet tu'n kyb'inte tyol ex tu'n kyb'anix qe yab' tu'n. 16Atzunte Jesús el tpa'n tib' kyi'j ex xi' tuj jun lugar minti' kynajb'il xjal tuj tu'n tna'n Dios.

Jun xjal tzqijle'n tyab'il b'anix tu'n Jesús

Mateo 9.1-8; Marcos 2.1-12

17At jun q'ij in tq'o'n Jesús xnaq'tzb'il kye xjal, ex q'uql qe'toq qe fariseo kyuk'ix qe xnaq'tzal ti'j ley, tzajni qe tuj junjun tnam tuj tx'otx' Galilea ex tuj tx'otx' Judea ex tuj Jerusalén; ex attoq tipumal Dios tuk'il Jesús tu'n kyb'anix qe yab' tu'n. 18E pontzun junjun xinaq q'intoq jun xinaq kyu'n twitz tkoẍb'il, tzqijle'n tyab'il, ex o kyajb'e tu'n kyokx tuja tu'n tkub' kyq'o'n ju yab' twitz Jesús. 19Ex minti' knet kyu'n jatum b'a'n tu'n tokx yab' tu'n tlaj nim xjal. E jaxtzun twi ja ex el kyi'n kab'e xk'o'n tu'ntzun tku'x ju yab' twitz tkoẍb'il tu'n tku'pun kyxol xjal twitz Jesús. 20Ex tej tlonte Jesús qa at kyokslab'l xi tma'n te yab':

—Aya wuk'il, qe tila ma che najset.

21Atzun qe xnaq'tzal ti'j ley ex qe fariseo e kub' ten ximal ti'j ex kyma: ¿Titzun toklen ju xjal lu? In yolin mya b'a'n ti'j Dios. ¿Alkye jun xjal jaku najset il tu'n, myapelo o'kx Dios?

22Eltzun tnik' Jesús ti'j kyximb'etz, ex xi tma'n kye:

—¿Tiqu'n in kub' kyximane jlu tuj kyanmiye? 23¿Alkye mas ch'in toka tu'n t-xi nma'ne te xjal lu? ¿Apetzun tu'n t-xi nma'ne: Qe tila ma che najset, ex qa tu'n t-xi nma'ne: We'ktza ex b'eta? 24Kxe'ltzun nyek'une kyeye tu'n tel kynik'e ti'j, at woklene twitz tx'otx' tu'n tnajset kyil xjal, aqine sk'o'maj qine tu'n Dios tu'n ntene kyuk'il xjal.

Xitzun tma'n teju xjal tzqijle'n tyab'il:

—Teya kxel nma'ne: We'ktza, q'i'nktz tkoẍb'ila, ex txi'ya tjaya, chi Jesús.

25Jurattzun jaw we' ju yab' kywitz kykyaqil, jaw ti'n tkoẍb'il jatum koẍltoq, ex xi'tzun tja in tq'o'n chjonte te Dios. 26Ex kykyaqiltzun in che lab'in nim ti'j, in jaw kynimsa'n tb'i Dios; ex tzaj nimxix kyxob'il, in kyma'n:

—Ja'lo ma qil tb'inchb'en nimxix kyipumal, b'ajx qil ikju.

Txokb'il te Leví tu'n Jesús

Mateo 9.9-13; Marcos 2.13-17

27Tb'ajlenxitzun jlu, etz Jesús ex o til Jesús jun peyil pwaq Leví tb'i q'uqltoq ti'j mes tuj ja jatum nne'l peyin pwaq te gobierni, ex xi tma'n Jesús te:

—Lpetza wi'je.

28Kyajtzun tq'o'n Leví tkyaqil, jaw we' ex ok lpe' ti'j Jesús.

29Ex o tb'incha Leví jun nintz wa'n tuj tja te Jesús; ex ate'toq nim peyil pwaq ex txqantl xjal q'uql qe'toq ti'j mes kyuk'il. 30Atzun qe fariseo kyuk'ix qe kyuk'il, aqeju xnaq'tzal ti'j ley, tzaj jun kyyol kyi'j t-xnaq'tzb'en Jesús, ex xi kyma'n kye:

—¿Tiqu'n in che wa'ne kyuk'il peyil pwaq ex kyuk'il aj il ex in che k'ane kyuk'il?

31Xi ttzaq'we'n Jesús:

—Aqeju xjal b'a'n qe mya il ti'j jun q'anal kye, o'kx qeju xjal yab' qe. 32Minti' ma chin ule txkol kye xjal tz'aqlxix, noq o'kx ma chin ule txkol kye xjal aj il tu'n tajtz ti'j kyanmi.

Tiqu'n minti' in kub' kyyo'n we'yaj qe t-xnaq'tzb'en Jesús

Mateo 9.14-17; Marcos 2.18-22

33Xitzun kyma'n te Jesús:

—¿Tiqu'n in kub' kyyo'n nimku maj we'yaj qe t-xnaq'tzb'en Juan, ex in che na'n Dios, ax ikx in kyb'incha'n qe kyxnaq'tzb'en fariseo, atzun kye t-xnaq'tzb'ena kukx in che wa'n ex in che k'an?

34Xi tma'n Jesús kye:

—¿Jakupe kub' kyyo'n we'yaj qeju otoq che txkonjtz tuj mejeb'le'n atxtoq chmilb'aj kyuk'il? 35Pero tzul tq'ijlalil k'elel q'i'n chmilb'aj kyxol; maxitzun kb'el kyyo'n we'yaj.

36Ax ikx xi tma'n Jesús jun techal kye:

—Minti' jun xjal nno'k tq'o'n jun piẍ xb'alun ak'aj te xb'uqb'il teju xb'alun ma b'aj. Qa ma tz'ok tq'o'n, k'elel sb'it'j ju xb'alun ma b'aj tu'nju xb'uqb'il ak'aj; ax ikx aju xb'alun ma b'aj mlay tmojb'a tib' tuk'il xb'uqb'il ak'aj. 37Ex minti' jun xjal in ku'x tq'o'n ak'aj vin tuj jun bols tz'u'm ttx'aqan; qa ma ku'x tq'o'n, kb'ajel sb'it'j bols tz'u'm tu'n ak'aj vin, ex kb'el qojl vin, ex che najel qe bols tz'u'm. 38Kyja'tzun il ti'j tu'n tku'x q'ot ak'aj vin tuj bols tz'u'm ak'aj. 39Ex minti' jun xjal in k'an ti'j ojtxi vin ex tajtl ju ak'aj, porke in tma'n: Aju te ojtxi mas b'a'n, chi Jesús kye.

Currently Selected:

Lucas 5: MAMNO

Highlight

Copy